ਬਿਓਰੋ। ਕਾਂਗਰਸ ਵੱਲੋਂ ਚਰਨਜੀਤ ਸਿੰਘ ਚੰਨੀ ਨੂੰ ਪੰਜਾਬ ਵਿੱਚ ਸੀਐੱਮ ਕੈਂਡੀਡੇਟ ਐਲਾਨੇ ਜਾਣ ਦੇ ਬਾਅਦ ਤੋਂ ਨਵਜੋਤ ਸਿੰਘ ਸਿੱਧੂ ਲਗਾਤਾਰ ਨਰਾਜ਼ ਚੱਲ ਰਹੇ ਹਨ। ਬੇਸ਼ੱਕ ਸਿੱਧੂ ਦੀ ਜੁਬਾਨ ਕੁਝ ਹੋਰ ਕਹਿ ਰਹੀ ਹੈ, ਪਰ ਉਹਨਾਂ ਦੀ Body Language ਕੁਝ ਹੋਰ ਹੀ ਬਿਆਨ ਕਰਦੀ ਹੈ। ਇਸੇ ਦੀ ਤਾਜਾ ਮਿਸਾਲ ਐਤਵਾਰ ਨੂੰ ਧੂਰੀ ‘ਚ ਪ੍ਰਿਅੰਕਾ ਗਾਂਧੀ ਦੀ ਰੈਲੀ ਵਿੱਚ ਵੀ ਨਜ਼ਰ ਆ ਗਈ। ਸਿੱਧੂ ਨੇ ਇਥੇ ਪ੍ਰਿਅੰਕਾ ਦੇ ਸਾਹਮਣੇ ਬਿਨ੍ਹਾਂ ਕੁਝ ਬੋਲੇ ਆਪਣਾ ਗੁੱਸਾ ਜਾਹਿਰ ਕਰ ਦਿੱਤਾ।
ਧੂਰੀ ਵਿੱਚ ਪ੍ਰਿਅੰਕਾ ਗਾਂਧੀ ਦੀ ਰੈਲੀ ਦੌਰਾਨ ਜਦੋਂ ਸਿੱਧੂ ਨੂੰ ਮੰਚ ‘ਤੇ ਬੋਲਣ ਦਾ ਸੱਦਾ ਦਿੱਤਾ ਗਿਆ, ਤਾਂ ਸਿੱਧੂ ਆਪਣੀ ਸੀਟ ਤੋਂ ਖੜ੍ਹੇ ਜ਼ਰੂਰ ਹੋਏ ਪਰ ਭਾਸ਼ਣ ਦੇਣ ਲਈ ਅੱਗੇ ਨਹੀਂ ਵਧੇ। ਸਿੱਧੂ ਨੇ ਇਸ਼ਾਰਿਆਂ ਵਿੱਚ ਵੀ ਭਾਸ਼ਣ ਦੇਣ ਤੋਂ ਇਨਕਾਰ ਕਰ ਦਿੱਤਾ। ਆਪਣਾ ਨਾਂਅ ਐਲਾਨੇ ਜਾਣ ਤੋਂ ਬਾਅਦ ਸਿੱਧੂ ਉਠੇ, ਹੱਥ ਜੋੜੇ ਅਤੇ ਚੰਨੀ ਵੱਲ ਇਸ਼ਾਰਾ ਕਰਕੇ ਕਹਿ ਦਿੱਤਾ ਕਿ ਇਹਨਾਂ ਨੂੰ ਬੁਲਾ ਲਓ।
ਵਾਰ-ਵਾਰ ਬੁਲਾਉਣ ‘ਤੇ ਵੀ ਨਹੀਂ ਦਿੱਤਾ ਭਾਸ਼ਣ
ਦਰਅਸਲ, ਕਾਂਗਰਸ ਦੇ ਸਾਬਕਾ ਪ੍ਰਧਾਨ ਸੁਨੀਲ ਜਾਖੜ ਦੇ ਭਾਸ਼ਣ ਤੋਂ ਬਾਅਦ ਕਾਂਗਰਸ ਉਮੀਦਵਾਰ ਦਲਬੀਰ ਗੋਲਡੀ ਦੀ ਪਤਨੀ ਸਿਮਰਨ ਖੰਗੂੜਾ ਨੇ ਸਿੱਧੂ ਨੂੰ ਭਾਸ਼ਣ ਲਈ ਡਾਇਸ ‘ਤੇ ਬੁਲਾਇਆ। ਸਿੱਧੂ ਨੇ ਮੰਚ ‘ਤੇ ਖੜ੍ਹੇ ਹੋ ਕੇ ਹੱਥ ਜੋੜੇ ਅਤੇ ਚੰਨੀ ਵੱਲ ਇਸ਼ਾਰਾ ਕਰ ਦਿੱਤਾ। ਇਸ ਤੋਂ ਬਾਅਦ ਸਿਮਰਨ ਖੰਗੂੜਾ ਨੇ ਮੁੜ ਉਹਨਾਂ ਦਾ ਨਾਂਅ ਲਿਆ, ਪਰ ਸਿੱਧੂ ਨੇ ਇਸ਼ਾਰਾ ਕਰਕੇ ਫਿਰ ਮਨ੍ਹਾਂ ਕਰ ਦਿੱਤਾ। ਇਸ ਤੋਂ ਬਾਅਦ ਸਿਮਰਨ ਨੇ ਮੌਕਾ ਸੰਭਾਲਦੇ ਹੋਏ ਕਿਹਾ ਕਿ ਸਿੱਧੂ ਸਾਬ੍ਹ ਕਹਿ ਰਹੇ ਹਨ ਕਿ ਮੈਂ ਤਾਂ ਤੁਹਾਡੇ ਵਿੱਚ ਦਾ ਹੀ ਹਾਂ। ਚੰਨੀ ਸਾਬ੍ਹ ਤੋਂ ਬੁਲਵਾਓ। ਇਸ ਤੋਂ ਬਾਅਦ ਚੰਨੀ ਨੇ ਮੰਚ ਤੋਂ ਆਪਣਾ ਭਾਸ਼ਣ ਸ਼ੁਰੂ ਕਰ ਦਿੱਤਾ।
ਅੰਮ੍ਰਿਤਸਰ ਈਸਟ ਤੱਕ ਹੀ ਸੀਮਤ ਸਿੱਧੂ
ਕਾਬਿਲੇਗੌਰ ਹੈ ਕਿ ਚੰਨੀ ਨੂੰ ਸੀਐੱਮ ਕੈਂਡੀਡੇਟ ਐਲਾਨੇ ਜਾਣ ਤੋਂ ਪਹਿਲਾਂ ਨਵਜੋਤ ਸਿੰਘ ਸਿੱਧੂ 50 ਤੋਂ ਵੱਧ ਵਿਧਾਨ ਸਭਾ ਹਲਕਿਆਂ ਵਿੱਚ ਰੈਲੀਆਂ ਕਰ ਚੁੱਕੇ ਸਨ। ਸਿੱਧੂ ਨੇ ਇਹਨਾਂ ਹਲਕਿਆਂ ਵਿੱਚ ਨਾ ਸਿਰਫ਼ ਰੈਲੀ ਕੀਤੀ, ਬਲਕਿ ਆਪਣੇ ਭਾਸ਼ਣਾਂ ਵਿੱਚ ਹੀ ਟਿਕਟਾਂ ਅਤੇ ਅਹੁਦੇ ਵੀ ਵੰਡ ਰਹੇ ਸਨ। ਦਿਲਚਸਪ ਹੈ ਕਿ 6 ਫਰਵਰੀ ਦੇ ਬਾਅਦ ਤੋਂ ਸਿੱਧੂ ਕਿਸੇ ਵੀ ਉਮੀਦਵਾਰ ਦੇ ਹੱਕ ਵਿੱਚ ਪ੍ਰਚਾਰ ਨਹੀਂ ਕਰ ਰਹੇ ਅਤੇ ਸਿਰਫ਼ ਆਪਣੇ ਹਲਕੇ ਅੰਮ੍ਰਿਤਸਰ ਈਸਟ ਤੱਕ ਹੀ ਸੀਮਤ ਰਹਿ ਗਏ ਹਨ। ਉਹਨਾਂ ਦੇ ਭਾਸ਼ਣਾਂ ਵਿੱਚ ਵੀ ਹੁਣ ਪੰਜਾਬ ਨਹੀਂ, ਬਲਕਿ ਅੰਮ੍ਰਿਤਸਰ ਈਸਟ ਦੇ ਵਿਕਾਸ ਦੀ ਹੀ ਗੱਲ ਹੁੰਦੀ ਹੈ।
