ਬਿਓਰੋ। ਚੋਣਾਂ ਤੋਂ ਠੀਕ ਪਹਿਲਾਂ ਗ਼ੈਰ-ਕਾਨੂੰਨੀ ਮਾਈਨਿੰਗ ਦੇ ਮਾਮਲੇ ਵਿੱਚ ਪੰਜਾਬ ਦੇ ਮੁੱਖ ਮੰਤਰੀ ਚਰਨਜੀਤ ਸਿੰਘ ਚੰਨੀ ਦੀਆਂ ਮੁਸ਼ਕਲਾਂ ਵੱਧ ਸਕਦੀਆਂ ਹਨ। ਚਮਕੌਰ ਸਾਹਿਬ ਵਿੱਚ ਗੈਰ-ਕਾਨੂੰਨੀ ਮਾਈਨਿੰਗ ਦੇ ਮਾਮਲੇ ਵਿੱਚ ਗਵਰਨਰ ਬੀ. ਐੱਲ. ਪੁਰੋਹਿਤ ਨੇ DGP ਵੀ.ਕੇ. ਭਵਰਾ ਨੂੰ ਜਾਂਚ ਦੇ ਆਦੇਸ਼ ਦੇ ਦਿੱਤੇ ਹਨ। ਉਹਨਾਂ ਨੇ DGP ਤੋਂ ਇਸ ਮਾਮਲੇ ਵਿੱਚ ਉੱਚ ਪੱਧਰੀ ਜਾਂਚ ਕਰਕੇ ਕਾਰਵਾਈ ਦੀ ਰਿਪੋਰਟ ਤਲਬ ਕੀਤੀ ਹੈ। ਗਵਰਨਰ ਨੇ ਇਹ ਕਦਮ ਆਮ ਆਦਮੀ ਪਾਰਟੀ ਵੱਲੋਂ ਦਿੱਤੀ ਇੱਕ ਸ਼ਿਕਾਇਤ ‘ਤੇ ਚੁੱਕਿਆ ਹੈ।
‘ਆਪ’ ਆਗੂ ਰਾਘਵ ਚੱਢਾ ਨੇ ਕਿਹਾ, “ਗੈਰ-ਕਾਨੂੰਨੀ ਮਾਈਨਿੰਗ ਦੇ ਮਾਮਲੇ ਵਿੱਚ ਸੀਐੱਮ ਚਰਨਜੀਤ ਸਿੰਘ ਚੰਨੀ ਦਾ ਨਾਂਅ ਸਾਹਮਣੇ ਆਇਆ ਸੀ। ਇਸ ਤੋਂ ਬਾਅਦ ਅਸੀਂ ਗਵਰਨਰ ਬੀ.ਐੱਲ. ਪੁਰੋਹਿਤ ਨੂੰ ਮਿਲੇ। ਅਸੀਂ ਉਹਨਾ ਤੋਂ ਮੰਗ ਕੀਤੀ ਕਿ ਇਸ ਮਾਮਲੇ ਦੀ ਜਾਂਚ ਕੀਤੀ ਜਾਵੇ, ਜਿਸ ਤੋਂ ਬਾਅਦ ਗਵਰਨਰ ਨੇ ਵੀ.ਕੇ. ਭਵਰਾ ਨੂੰ ਪੱਤਰ ਲਿਖਕੇ ਨਿਰਦੇਸ਼ ਦਿੱਤੇ ਹਨ।” ਉਨ੍ਹਾਂ ਕਿਹਾ ਕਿ ਇਸ ਮਾਮਲੇ ਵਿੱਚ ਹੁਣ ਸੀਐੱਮ ਬੱਚ ਨਹੀਂ ਸਕਦੇ।
ਕਾਂਗਰਸ ਨੇ ਚੁੱਕੇ ਗਵਰਨਰ ਦੇ ਫ਼ੈਸਲੇ ‘ਤੇ ਸਵਾਲ
ਕਾਂਗਰਸੀ ਆਗੂ ਗਵਰਨਰ ਵੱਲੋਂ ਦਿੱਤੇ ਜਾਂਚ ਦੇ ਆਦੇਸ਼ ‘ਤੇ ਸਵਾਲ ਚੁੱਕ ਰਹੇ ਹਨ ਅਤੇ ਇਸ ਨੂੰ ਸੰਘੀ ਢਾਂਚੇ ਦੇ ਖਿਲਾਫ਼ ਦੱਸਿਆ ਗਿਆ ਹੈ। ਜਾਖੜ ਨੇ ਟਵਿਟਰ ‘ਤੇ ਲਿਖਿਆ, ਜ਼ਾਹਿਰ ਤੌਰ ‘ਤੇ ਡਰੱਗਜ਼ ਨਾਲ ਜੁੜੇ ਮਾਮਲੇ ਦਾ ਫ਼ੈਸਲਾ ਕਰਨ ਵਾਲੀ ਸਭ ਤੋਂ ਉੱਚ ਅਦਾਲਤ ਨੇ ਵੀ ਚੋਣ ਪ੍ਰਕਿਰਿਆ ਨੂੰ ਧਿਆਨ ‘ਚ ਰੱਖਿਆ, ਪਰ ਰਾਜਪਾਲ ਨੂੰ ਸੀਐੱਮ ਪੰਜਾਬ ਦੇ ਖਿਲਾਫ ਜਾਂਚ ਲਈ ਅਜਿਹਾ ਕੋਈ ਮਲਾਲ ਨਹੀਂ ਹੈ। ਸੰਵਿਧਾਨਕ ਯੋਗਤਾ ਨੂੰ ਭੁੱਲ ਜਾਓ, ਸੰਘਵਾਦ ਦੇ ਬਚੇ ਹੋਏ ਹਿੱਸੇ ਵੀ ਨਸ਼ਟ ਹੋ ਗਏ। ਚੋਣ ਕਮਿਸ਼ਨ ਨੂੰ ਆਦੇਸ਼ ਦਾ ਐਕਜ਼ੀਕਿਊਸ਼ਨ ਰੋਕ ਦੇਣਾ ਚਾਹੀਦਾ ਹੈ।”
ਭਾਣਜੇ ਤੋਂ 10 ਕਰੋੜ ਦੀ ਬਰਾਮਦ ‘ਤੇ ਘਿਰੇ ਚੰਨੀ
ਦੱਸ ਦਈਏ ਕਿ ਪਿਛਲੇ ਦਿਨੀਂ ਈਡੀ ਨੇ ਸੀਐੱਮ ਚਰਨਜੀਤ ਚੰਨੀ ਦੇ ਭਾਣਜੇ ਅਤੇ ਉਨ੍ਹਾਂ ਦੇ ਕਰੀਬੀਆਂ ਦੇ ਟਿਕਾਣਿਆਂ ‘ਤੇ ਗ਼ੈਰ-ਕਾਨੂੰਨੀ ਮਾਈਨਿੰਗ ਦੇ ਮਾਮਲੇ ਵਿੱਚ ਛਾਪੇਮਾਰੀ ਕੀਤੀ ਸੀ। ਰੇਡ ਦੌਰਾਨ ਸੀਐੱਮ ਦੇ ਭਾਣਜੇ ਭੁਪਿੰਦਰ ਹਨੀ ਦੇ ਟਿਕਾਣਿਆਂ ਤੋਂ ਕਰੀਬ 10 ਕਰੋੜ ਰੁਪਏ ਬਰਾਮਦ ਹੋਏ ਸਨ। ਇਸੇ ਦੇ ਬਾਅਦ ਤੋਂ ਸੀਐੱਮ ਵਿਰੋਧੀਆਂ ਦੇ ਨਿਸ਼ਾਨੇ ‘ਤੇ ਹਨ। ਹਾਲਾਂਕਿ ਸੀਐੱਮ ਈਡੀ ਦੀ ਕਾਰਵਾਈ ਅਤੇ ਕਰੱਪਸ਼ਨ ਦੇ ਇਲਜ਼ਾਮਾਂ ਨੂੰ ਆਪਣੇ ਖਿਲਾਫ਼ ਸਿਆਸੀ ਸਾਜ਼ਿਸ਼ ਦੱਸ ਚੁੱਕੇ ਹਨ।
