ਬਿਓਰੋ। ਕਿਸਾਨਾਂ ਅਤੇ ਸਿੱਖਾਂ ਖਿਲਾਫ਼ ਵਿਵਾਦਤ ਬਿਆਨਬਾਜੀ ਕਰਨ ਵਾਲੀ ਅਦਾਕਾਰਾ ਕੰਗਨਾ ਰਣੌਤ ਨੂੰ ਸ਼ੁੱਕਰਵਾਰ ਨੂੰ ਪੰਜਾਬ ਵਿੱਚ ਜ਼ਬਰਦਸਤ ਵਿਰੋਧ ਦਾ ਸਾਹਮਣਾ ਕਰਨਾ ਪਿਆ। ਕੰਗਨਾ ਹਿਮਾਚਲ ਵਿੱਚ ਆਪਣੇ ਘਰ ਤੋਂ ਸੜਕ ਦੇ ਰਸਤੇ ਮੋਹਾਲੀ ਏਅਰਪੋਰਟ ਜਾ ਰਹੇ ਸਨ। ਇਸ ਦੌਰਾਨ ਜਦੋਂ ਕੰਗਨਾ ਦਾ ਕਾਫਲਾ ਕੀਰਤਪੁਰ ਸਾਹਿਬ ਪਹੁੰਚਿਆ, ਤਾਂ ਉਥੇ ਕਿਸਾਨਾਂ ਨੇ ਉਹਨਾਂ ਦੀ ਗੱਡੀ ਨੂੰ ਘੇਰ ਲਿਆ।
ਜਿਸ ਵਕਤ ਘੇਰਾਓ ਹੋਇਆ, ਕੰਗਨਾ ਦੇ ਅੱਗੇ ਉਹਨਾਂ ਦੀ ਸਕਿਓਰਿਟੀ ਦੀ ਪਾਇਲਟ ਜਿਪਸੀ ਦੇ ਨਾਲ ਪੰਜਾਬ ਪੁਲਿਸ ਦੀ ਵੀ 2 ਗੱਡੀਆਂ ਲੱਗੀਆਂ ਹੋਈਆਂ ਸਨ। ਇਸਦੇ ਬਾਵਜੂਦ ਪੁਲਿਸ ਵਿਰੋਧ ਨੂੰ ਰੋਕ ਨਹੀਂ ਸਕੀ। ਇਸ ਦੌਰਾਨ ਕੰਗਨਾ ਨੇ ਸੋਸ਼ਲ ਮੀਡੀਆ ‘ਤੇ ਵੀਡੀਓ ਪਾ ਕੇ ਪੂਰੀ ਘਟਨਾ ਨੂੰ ਮੌਬ ਲਿੰਚਿੰਗ ਕਰਾਰ ਦੇ ਦਿੱਤਾ। ਹਾਲਾਂਕਿ ਬਾਅਦ ਵਿੱਚ ਕੰਗਨਾ ਆਪਣੀ ਗੱਡੀ ਤੋਂ ਬਾਹਰ ਨਿਕਲੀ ਅਤੇ ਮੁਆਫੀ ਮੰਗ ਕੇ ਗੁੱਸੇ ਨੂੰ ਸ਼ਾਂਤ ਕੀਤਾ।
ਕੀਰਤਪੁਰ ਸਾਹਿਬ ਤੋਂ ਬਾਅਦ ਰੋਪੜ ‘ਚ ਵੀ ਵਿਰੋਧ
ਕੀਰਤਪੁਰ ਸਾਹਿਬ ਤੋਂ ਬਾਅਦ ਰੋਪੜ ਵਿੱਚ ਟੋਲ ਪਲਾਜਾ ‘ਤੇ ਵੀ ਵਿਰੋਧ ਲਈ ਕਿਸਾਨ ਇਕੱਠੇ ਹੋ ਗਏ। ਇਸਦਾ ਪਤਾ ਚਲਦੇ ਹੀ ਪੁਲਿਸ ਨੇ ਟੋਲ ਤੋਂ 200 ਮੀਟਰ ਪਹਿਲਾਂ ਕਾਫਿਲੇ ਨੂੰ ਮੋਰਿੰਡਾ ਦੇ ਪਿੰਡਾਂ ਵੱਲ ਮੋੜ ਦਿੱਤਾ। ਪਿੰਡਾਂ ਦੇ ਰਸਤੇ ਉਹਨਾਂ ਨੂੰ ਹਾਈਵੇ ‘ਤੇ ਲਿਆਂਦਾ ਗਿਆ।
ਅੰਦੋਲਨ ਬਾਰੇ ਲਗਾਤਾਰ ਵਿਵਾਦਤ ਬਿਆਨ ਦਿੱਤੇ
ਕੰਗਨਾ ਰਣੌਤ ਸ਼ੁਰੂਆਤ ਤੋਂ ਹੀ ਕਿਸਾਨ ਅੰਦੋਲਨ ਦੇ ਵਿਰੋਧ ਵਿੱਚ ਰਹੀ। ਕੁਝ ਸਮੇਂ ਪਹਿਲਾਂ ਉਹਨਾਂ ਨੇ ਕਿਸਾਨ ਅੰਦੋਲਨ ਦੀ ਤੁਲਨਾ ਖਾਲਿਸਤਾਨੀ ਅੰਦੋਲਨ ਨਾਲ ਕਰ ਦਿੱਤੀ ਸੀ, ਜਿਸਦੇ ਚਲਦੇ ਕੰਗਨਾ ਦੇ ਖਿਲਾਫ਼ ਮੁੰਬਈ ਵਿੱਚ ਧਾਰਮਿਕ ਭਾਵਨਾਵਾਂ ਨੂੰ ਠੇਸ ਪਹੁੰਚਾਉਣ ਦਾ ਕੇਸ ਵੀ ਦਰਜ ਹੋਇਆ ਸੀ। ਉਹਨਾਂ ਨੇ ਕਿਸਾਨ ਅੰਦੋਲਨ ਨੂੰ ਮਿਲੇ ਕੌਮਾਂਤਰੀ ਸਮਰਥਨ ਨੂੰ ਭਾਰਤ ਦੇ ਟੁੱਕੜੇ ਕਰਨ ਦੀ ਸਾਜਿਸ਼ ਕਰਾਰ ਦਿੱਤਾ ਸੀ।
