ਚੰਡੀਗੜ੍ਹ। ਪੰਜਾਬ ਕਾਂਗਰਸ ਵਿੱਚ ਇਹਨੀਂ ਦਿਨੀਂ ਜਾਰੀ ਸਿੱਧੂ Vs ਚੰਨੀ ਦੀ ਲੜਾਈ ਨੂੰ ਸ਼ਾਂਤ ਕਰਨ ਲਈ ਹਾਈਕਮਾਂਡ ਵੱਲੋਂ ਇੱਕ ਹੋਰ ਕੋਸ਼ਿਸ਼ ਕੀਤੀ ਗਈ। ਆਬਜ਼ਰਵਰ ਹਰੀਸ਼ ਚੌਧਰੀ ਅਤੇ ਸਿੱਧੂ ਦੇ ਕਰੀਬੀ ਮੰਤਰੀ ਪਰਗਟ ਸਿੰਘ ਦੀ ਮੌਜੂਦਗੀ ਵਿੱਚ ਐਤਵਾਰ ਰਾਤ ਦੋਵੇਂ ਲੀਡਰਾਂ ਵਿਚਾਲੇ ਮੀਟਿੰਗ ਹੋਈ, ਜਿਸ ਦੌਰਾਨ ਦੋਵਾਂ ਵਿਚਕਾਰ ਮਸਲੇ ਸੁਲਝਾਉਣ ਬਾਰੇ ਕਰੀਬ 4 ਘੰਟੇ ਤੱਕ ਵਿਚਾਰ-ਤਕਰਾਰ ਕੀਤੀ ਗਈ।
ਹਾਲਾਂਕਿ ਖ਼ਬਰਾਂ ਇਹ ਵੀ ਹਨ ਕਿ ਇਹ ਮੁਲਾਕਾਤ ਅਗਲੇ ਸਾਲ ਹੋਣ ਵਾਲੀਆਂ ਵਿਧਾਨ ਸਭਾ ਚੋਣਾਂ ਨੂੰ ਲੈ ਕੇ ਪਹਿਲਾਂ ਤੋਂ ਹੀ ਨਿਰਧਾਰਤ ਸੀ, ਜਿਸ ਵਿੱਚ ਇਹ ਵਿਚਾਰ ਕੀਤਾ ਗਿਆ ਕਿ ਅਗਾਮੀ ਚੋਣਾਂ ਲਈ ਪ੍ਰਚਾਰ ਦਾ ਜਿੰਮਾ ਕਿਹੜੀ ਕੰਪਨੀ ਨੂੰ ਸੌਂਪਿਆ ਜਾਣਾ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਇਸ ਮੀਟਿੰਗ ਵਿੱਚ ਕਈ ਪ੍ਰਚਾਰ ਕੰਪਨੀਆਂ ਦੇ ਨੁਮਾਇੰਦਿਆਂ ਨੇ ਹਿੱਸਾ ਲਿਆ ਅਤੇ ਆਪੋ-ਆਪਣੀ ਪ੍ਰੈਜੇਂਟੇਸ਼ਨ ਦਿੱਤੀ। ਜਾਣਕਾਰੀ ਮੁਤਾਬਕ, 7 ਕੰਪਨੀਆਂ ਇਸ ਦੌੜ ਵਿੱਚ ਸ਼ਾਮਲ ਹਨ।
ਬੇਸ਼ੱਕ ਮੀਟਿੰਗ ਦਾ ਮੁੱਦਾ ਕੁਝ ਵੀ ਹੋਵੇ, ਜਾਂ ਕੁਝ ਵੀ ਦੱਸਿਆ ਜਾਵੇ, ਪਰ ਸੀਐੱਮ ਚਰਨਜੀਤ ਸਿੰਘ ਚੰਨੀ ਅਤੇ ਪੰਜਾਬ ਕਾਂਗਰਸ ਪ੍ਰਧਾਨ ਨਵਜੋਤ ਸਿੱਧੂ ਵਿਚਕਾਰ ਨਰਾਜ਼ਗੀ ਅਤੇ ਦੂਰੀਆਂ ਕਿਸੇ ਤੋਂ ਲੁਕੀਆਂ ਨਹੀਂ ਹਨ। ਸੂਤਰ ਦੱਸਦੇ ਹਨ ਕਿ 4 ਘੰਟੇ ਦੀ ਇਹ ਮੈਰਾਥਨ ਬੈਠਕ ਦੋਵੇਂ ਆਗੂਆਂ ਵਿਚਾਲੇ ਸੁਲ੍ਹਾ ਕਰਾਉਣ ਦੇ ਮੰਤਵ ਲਈ ਹੀ ਸੱਦੀ ਗਈ, ਪਰ ਸਿਆਸੀ ਬਜਾਰ ਦੀਆਂ ਚਰਚਾਵਾਂ ‘ਤੇ ਨਕੇਲ ਕਸਣ ਲਈ ਉਸਨੂੰ ਚੋਣਾਂ ਸਬੰਧੀ ਮੀਟਿੰਗ ਦਾ ਰੂਪ ਦਿੱਤਾ ਜਾ ਰਿਹਾ ਹੈ।
ਸੋਨੀਆ ਨੂੰ ਲਿਖੀ ਚਿੱਠੀ ਤੋਂ ਬਾਅਦ ਹੋਈ ਮੁਲਾਕਾਤ
ਸਿੱਧੂ ਅਤੇ ਚੰਨੀ ਵਿਚਕਾਰ ਇਸ ਮੀਟਿੰਗ ਦੀ ਟਾਈਮਿੰਗ ਵੀ ਬੇਹੱਦ ਦਿਲਚਸਪ ਰਹੀ। ਦਰਅਸਲ, ਐਤਵਾਰ ਦੇ ਹੀ ਦਿਨ ਸਿੱਧੂ ਨੇ ਆਪਣੇ ਸੋਸ਼ਲ ਮੀਡੀਆ ਅਕਾਊਂਟ ‘ਤੇ ਕਾਂਗਰਸ ਪ੍ਰਧਾਨ ਸੋਨੀਆ ਗਾਂਧੀ ਦੇ ਨਾਂਅ ਲਿਖੀ ਚਿੱਠੀ ਜਨਤੱਕ ਕੀਤੀ ਸੀ। ਸਿੱਧੂ ਨੇ ਇਸ ਚਿੱਠੀ ਵਿੱਚ ਪੰਜਾਬ ਦੇ 13 ਮੁੱਖ ਮੁੱਦਿਆਂ ਦਾ ਜਿਕਰ ਕਰਦਿਆਂ ਸੋਨੀਆ ਗਾਂਧੀ ਨੂੰ ਅਪੀਲ ਕੀਤੀ ਹੈ ਕਿ ਉਹ ਪੰਜਾਬ ਦੀ ਚੰਨੀ ਸਰਕਾਰ ਨੂੰ ਇਹ ਮੁੱਦੇ ਪਹਿਲਤਾ ਦੇ ਅਧਾਰ ‘ਤੇ ਹੱਲ ਕਰਨ ਦਾ ਆਦੇਸ਼ ਦੇਣ। ਇਸਦੇ ਨਾਲ ਹੀ ਸਿੱਧੂ ਨੇ ਅਗਾਮੀ ਚੋਣਾਂ ਲਈ ਮੈਨੀਫੈਸਟੋ ਦੇ ਮੁੱਦੇ ਡਿਸਕਸ ਕਰਨ ਲਈ ਸੋਨੀਆ ਗਾਂਧੀ ਤੋਂ ਮੁਲਾਕਾਤ ਦਾ ਸਮਾਂ ਵੀ ਮੰਗਿਆ ਹੈ। (ਪੂਰੀ ਖ਼ਬਰ ਇਥੇ ਪੜ੍ਹੋ)
