ਰੂਪਨਗਰ। ਸਿੱਖਿਆ ਤੋਂ ਬਾਅਦ ਹੁਣ ਪੰਜਾਬ ਵਿੱਚ ਮਾਈਨਿੰਗ ਨੂੰ ਲੈ ਕੇ ਸਿਆਸੀ ਜੰਗ ਛਿੜੀ ਹੈ। ਆਮ ਆਦਮੀ ਪਾਰਟੀ ਵੱਲੋਂ ਸੀਐੱਮ ਚੰਨੀ ਦੇ ਹਲਕੇ ਵਿੱਚ ਛਾਪੇਮਾਰੀ ਕਰਕੇ ਗੈਰ-ਕਾਨੂੰਨੀ ਮਾਈਨਿੰਗ ਦੇ ਇਲਜਾਮ ਲਗਾਏ ਗਏ, ਤਾਂ ਹੁਣ ਸੀਐੱਮ ਨੇ ਉਹਨਾਂ ਦੇ ਹੀ ਅੰਦਾਜ਼ ਵਿੱਚ ਜਵਾਬ ਦਿੱਤਾ ਹੈ। ਐਤਵਾਰ ਨੂੰ ਸੀਐੱਮ ਚੰਨੀ ਅਚਾਨਕ ਰੂਪਨਗਰ ਦੇ ਨਾਲ ਲੱਗਦੇ ਸਤਲੁਜ ਦਰਿਆ ਨੇੜੇ ਮਾਈਨਿੰਗ ਸਾਈਟ ‘ਤੇ ਪਹੁੰਚ ਗਏ ਅਤੇ ‘ਆਪ’ ਦੇ ਇਲਜਾਮਾਂ ਨੂੰ ਖਾਰਜ ਕਰਦੇ ਹੋਏ ਕਿਹਾ ਕਿ ਇਹ ਸਭ ਕੁਝ ਲੀਗਲ ਤਰੀਕੇ ਨਾਲ ਚੱਲ ਰਿਹਾ ਹੈ।
ਸੀਐੱਮ ਨੇ ਸਿੱਧੇ ‘ਆਪ’ ਲੀਡਰ ਰਾਘਵ ਚੱਢਾ ‘ਤੇ ਹਮਲਾ ਬੋਲਦੇ ਹੋਏ ਕਿਹਾ ਕਿ ਇਹ ਲੋਕ ਦਿੱਲੀ ਤੋਂ ਆ ਕੇ ਅੜਚਨ ਪੈਦਾ ਕਰਨ ਦੀ ਕੋਸ਼ਿਸ਼ ਕਰ ਰਹੇ ਹਨ ਅਤੇ ਝੂਠੇ ਇਲਜਾਮ ਲਗਾ ਰਹੇ ਹਨ। ਉਹਨਾਂ ਕਿਹਾ ਕਿ ਪੰਜਾਬ ਦਾ ਕੋਈ ਵੀ ਨੁਮਾਇੰਦਾ ਇਥੇ ਆ ਕੇ ਜਾਂਚ ਕਰ ਸਕਦਾ ਹੈ, ਪਰ ਬਾਹਰੀ ਲੋਕਂ ਨੂੰ ਇਸਦੀ ਇਜਾਜ਼ਤ ਨਹੀਂ ਹੈ। ਸੀਐੱਮ ਨੇ ਕਿਹਾ ਕਿ ਉਹ ਪਹਿਲਾਂ ਆਪਣੀ ਦਿੱਲੀ ਸੰਭਾਲਣ, ਪੰਜਾਬ ‘ਚ ਦਖਲਅੰਦਾਜੀ ਨਾ ਕਰਨ।
ਸੀਐੱਮ ਨੇ ਕਿਹਾ ਕਿ ਜਦੋਂ ਰੇਤ ਦਾ ਰੇਟ ਹੀ ਸਾਢੇ 5 ਰੁਪਏ ਹੋ ਗਿਆ ਹੈ, ਤਾਂ ਫਿਰ ਗੈਰ-ਕਾਨੂੰਨੀ ਮਾਈਨਿੰਗ ਦਾ ਸਵਾਲ ਹੀ ਨਹੀਂ। ਉਹਨਾਂ ਕਿਹਾ ਕਿ ਇਹ ਝੂਠੇ ਇਲਜਾਮ ਮਹਿਜ਼ ਸਰਕਾਰ ਨੂੰ ਬਦਨਾਮ ਕਰਨ ਲਈ ਲਗਾਏ ਜਾ ਰਹੇ ਹਨ। ਉਹਨਾਂ ਚੇਤਾਵਨੀ ਭਰੇ ਅੰਦਾਜ਼ ਵਿੱਚ ਕਿਹਾ ਕਿ ‘ਆਪ’ ਦੇ ਸਥਾਨਕ ਲੀਡਰ ਇਹਨਾਂ ਨੂੰ ਰੋਕਣ, ਨਹੀਂ ਤਾਂ ਅਸੀਂ ਉਹਨਾਂ ‘ਤੇ ਕਾਰਵਾਈ ਕਰਾਂਗੇ।
ਕੇਜਰੀਵਾਲ ਨੇ ਕੀਤਾ ਸੀਐੱਮ ‘ਤੇ ਪਲਟਵਾਰ
ਓਧਰ ‘ਆਪ’ ਕਨਵੀਨਰ ਅਰਵਿੰਦ ਕੇਜਰੀਵਾਲ ਦਾ ਕਹਿਣਾ ਹੈ ਕਿ ਸੀਐੱਮ ਚੰਨੀ ਅੱਜ ਜਿਸ ਸਾਈਟ ਦੇ ਬਹਾਨੇ ‘ਆਪ’ ਦੇ ਇਲਜ਼ਾਮਾਂ ਤੋਂ ਬਚਣ ਦੀ ਕੋਸ਼ਿਸ਼ ਕਰ ਰਹੇ ਹਨ, ਉਹ ਸਾਈਟ ਹੀ ਕੋਈ ਹੋਰ ਹੈ। ਕੇਜਰੀਵਾਲ ਨੇ ਟਵੀਟ ਕੀਤਾ, “ਕੀ ਇਹ ਸੱਚ ਹੈ ਕਿ ਚੰਨੀ ਸਾਬ੍ਹ ਅੱਜ ਇੱਕ ਵੱਖਰੀ ਸਾਈਟ ‘ਤੇ ਗਏ ਸਨ, ਉਸ ਸਾਈਟ ‘ਤੇ ਨਹੀਂ ਜਿਸ ‘ਤੇ ਕੱਲ ਰਾਘਵ ਗਏ ਸਨ। ਅਤੇ ਚੰਨੀ ਸਾਬ੍ਹ ਨੇ ਇਸ ਨੂੰ ਲੀਗਲ ਐਲਾਨ ਦਿੱਤਾ, ਜਦਕਿ ਜਿਸ ਸਾਈਟ ‘ਤੇ ਰਾਘਵ ਗਏ ਸਨ, ਉਹ ਵੱਖਰੀ ਸੀ ਅਤੇ ਗੈਰ-ਕਾਨੂੰਨੀ ਸੀ।” ਉਹਨਾਂ ਕਿਹਾ ਕਿ ਇੱਕ ਸੀਐੱਮ ਇਸ ਤਰ੍ਹਾਂ ਕਿਵੇਂ ਸ਼ੋਰ ਮਚਾ ਸਕਦਾ ਹੈ?
Is it true that Channi sahib went to a different mining site today n not the one visited by Raghav yesterday? And Channi sahib declared it as legal, whereas the one visited by Raghav is a different site and is illegal. How can a CM be sooo blatant?
— Arvind Kejriwal (@ArvindKejriwal) December 5, 2021
ਰਾਘਵ ਚੱਢਾ ਨੇ ਲਗਾਏ ਸਨ ਇਲਜਾਮ
ਦੱਸ ਦਈਏ ਕਿ ਬੀਤੇ ਦਿਨ ਆਮ ਆਦਮੀ ਪਾਰਟੀ ਦੇ ਪੰਜਾਬ ਸਹਿ-ਇੰਚਾਰਜ ਰਾਘਵ ਚੱਢਾ ਨੇ CM ਚੰਨੀ ਦੇ ਵਿਧਾਨ ਸਭਾ ਹਲਕੇ ਵਿੱਚ ਗੈਰ-ਕਾਨੂੰਨੀ ਰੇਤ ਮਾਈਨਿੰਗ ਹੋਣ ਦਾ ਦਾਅਵਾ ਕਰਦਿਆਂ ਲਾਈਵ ਰੇਡ ਮਾਰੀ ਸੀ । ਰਾਘਵ ਚੱਢਾ ਨੇ ਕਿਹਾ ਸੀ ਕਿ ਮੁਖ ਮੰਤਰੀ ਕਹਿ ਰਹੇ ਹਨ ਕਿ ਰੇਤਾ 5 ਰੁਪਏ ਫੁੱਟ ਮਿਲ ਰਹੀ ਹੈ ਜਦੋਂ ਕਿ ਸੱਚਾਈ ਤਾਂ ਇਹ ਹੈ ਕਿ ਉਨ੍ਹਾਂ ਦੇ ਆਪਣੇ ਹਲਕੇ ਵਿਚ ਰੇਤਾ ਮਾਈਨਿੰਗ ਹੋ ਰਹੀ ਹੈ ਤੇ ਸ਼ਰੇਆਮ 25 ਤੋਂ 40 ਰੁਪਏ ਫੁੱਟ ਰੇਤਾ ਵਿਕ ਰਹੀ ਹੈ। ਰੋਜ਼ਾਨਾ ਇਥੋਂ 800 ਤੋਂ 1000 ਟਰੱਕ ਟਿੱਪਰਾਂ ਵਿਚ ਰੇਤਾ ਭਰ ਕੇ ਲਿਜਾਏ ਜਾਂਦੇ ਹਨ ਤੇ ਇਨ੍ਹਾਂ ਨੂੰ ਮਹਿੰਗੇ ਭਾਅ ‘ਤੇ ਵੇਚਿਆ ਜਾਂਦਾ ਹੈ।
