ਚੰਡੀਗੜ੍ਹ। ਆਮ ਆਦਮੀ ਪਾਰਟੀ ਦੇ ਪੰਜਾਬ ਪ੍ਰਧਾਨ ਭਗਵੰਤ ਮਾਨ ਨੇ ਬੀਜੇਪੀ ‘ਤੇ ਵੱਡਾ ਇਲਜਾਮ ਲਗਾਇਆ ਹੈ। ਉਹਨਾਂ ਕਿਹਾ ਕਿ ਭਾਰਤੀ ਜਨਤਾ ਪਾਰਟੀ ਉਹਨਾਂ ਨੂੰ ਲੁਭਾਵਨੇ ਆਫਰ ਦੇ ਕੇ ਖਰੀਦਣ ਦੀ ਕੋਸ਼ਿਸ਼ ਕਰ ਰਹੀ ਹੈ। ਮਾਨ ਨੇ ਇਹ ਸਨਸਨੀਖੇਜ਼ ਖੁਲਾਸਾ ਕਰਦੇ ਹੋਏ ਸਾਫ ਕਿਹਾ ਕਿ ਉਹ ਆਪਣਾ ਜ਼ਮੀਰ ਮਾਰ ਕੇ ਬੀਜੇਪੀ ਵਿੱਚ ਨਹੀਂ ਜਾ ਸਕਦੇ।
ਬੀਜੇਪੀ ਦੇ ਵੱਡੇ ਲੀਡਰ ਨੇ ਕੀਤਾ ਫੋਨ- ਮਾਨ
ਮਾਨ ਨੇ ਕਿਹਾ ਕਿ 4 ਦਿਨ ਪਹਿਲਾਂ ਉਹਨਾਂ ਨੂੰ ਬੀਜੇਪੀ ਦੇ ਇੱਕ ਵੱਡੇ ਲੀਡਰ ਦਾ ਫੋਨ ਆਇਆ। ਉਸਨੇ ਕਿਹਾ ਕਿ ਤੁਸੀਂ ਬੀਜੇਪੀ ਵਿੱਚ ਆਉਣ ਦਾ ਕੀ ਲਓਗੇ। ਕਿੰਨੇ ਪੈਸੇ ਲਓਗੇ, ਇਹ ਦੱਸ ਦਿਓ। ਕੇਂਦਰੀ ਮੰਤਰੀਮੰਡਲ ‘ਚ ਕਿਹੜਾ ਮੰਤਰਾਲਾ ਚਾਹੀਦਾ ਹੈ, ਪਾਰਟੀ ‘ਚ ਕਿਹੜਾ ਅਹੁਦਾ ਚਾਹੀਦਾ ਹੈ? ਤੁਹਾਡੇ ਉੱਪਰ ਦਲਬਦਲ ਨਿਯਮ ਵੀ ਲਾਗੂ ਨਹੀਂ ਹੋਵੇਗਾ, ਕਿਉਂਕਿ ਤੁਸੀਂ ਸੀਨੀਅਰ ਅਤੇ ਇਕਲੌਤੇ ਸਾਂਸਦ ਹੋ। ਹਾਲਾਂਕਿ ਮਾਨ ਨੇ ਬੀਜੇਪੀ ਲੀਡਰ ਦੇ ਨਾਂਅ ਦਾ ਖੁਲਾਸਾ ਨਹੀਂ ਕੀਤਾ।
ਆਮ ਆਦਮੀ ਪਾਰਟੀ ਦੀ ਪ੍ਰੈਸ ਕਾਨਫਰੰਸ ਚੰਡੀਗੜ੍ਹ ਤੋਂ LIVE https://t.co/u9FV757ZVu
— AAP Punjab (@AAPPunjab) December 5, 2021
ਮੈਂ ਮਿਸ਼ਨ ‘ਤੇ ਹਾਂ, ਕਮਿਸ਼ਨ ‘ਤੇ ਨਹੀਂ- ਮਾਨ
ਭਗਵੰਤ ਮਾਨ ਮੁਤਾਬਕ, ਉਹਨਾਂ ਨੇ ਸਿੱਧੇ ਤੇ ਸਾਫ ਸ਼ਬਦਾਂ ਵਿੱਚ ਬੀਜੇਪੀ ਆਗੂ ਨੂੰ ਜਵਾਬ ਦਿੱਤਾ ਅਤੇ ਕਿਹਾ, “ਮੈਂ ਸਿਆਸਤ ਵਿੱਚ ਮਿਸ਼ਨ ‘ਤੇ ਹਾਂ, ਨਾ ਕਿ ਕਮਿਸ਼ਨ ‘ਤੇ। ਉਹ ਕੋਈ ਹੋਰ ਹੋਣਗੇ, ਜਿਹਨਾਂ ਨੂੰ ਤੁਸੀਂ ਖਰੀਦ ਲੈਂਦੇ ਹੋਓਗੇ। ਅਜੇ ਤੱਕ ਉਹ ਨੋਟ ਨਹੀਂ ਬਣੇ, ਜੋ ਭਗਵੰਤ ਮਾਨ ਨੂੰ ਖਰੀਦ ਸਕਣ।”
ਮੈਂ ਪਾਰਟੀ ਨੂੰ ਆਪਣੇ ਪਸੀਨੇ ਨਾਲ ਸੀਚਿਆ- ਮਾਨ
ਮਾਨ ਨੇ ਕਿਹਾ ਕਿ ਉਹ ਪੰਜਾਬ ਦੀ ਸੇਵਾ ਲਈ ਉਸ ਵੇਲੇ ਸਿਆਸਤ ‘ਚ ਆਏ ਸਨ, ਜਦੋਂ ਪੈਸੇ ਕਮਾਉਣ ਵਾਲਾ ਉਹਨਾਂ ਦਾ ਕਰੀਅਰ ਸਿਖਰਾਂ ‘ਤੇ ਸੀ। ਉਹਨਾਂ ਕਿਹਾ, “ਮੈਂ ਪਾਰਟੀ ਨੂੰ ਖੂਨ-ਪਸੀਨੇ ਨਾਲ ਸੀਚਿਆ ਹੈ। ਲੋਕਾਂ ਨੂੰ ਵਿਸ਼ਵਾਸ ਹੈ ਕਿ ਭਗਵੰਤ ਮਾਨ ਜਿਥੇ ਖੜ੍ਹਿਆ ਸੀ, ਉਥੇ ਹੀ ਖੜ੍ਹਿਆ ਹੈ।”
ਗਲਤਫਹਿਮੀ ‘ਚ ਨਾ ਰਹੇ ਬੀਜੇਪੀ- ਮਾਨ
ਮਾਨ ਮੁਤਾਬਕ, ਬੀਜੇਪੀ ਨੂੰ ਸ਼ਾਇਦ ਗਲਤਫਹਿਮੀ ਹੈ ਕਿ ਉਹਨਾਂ ਦੀ ਟਿਊਨਿੰਗ ਪਾਰਟੀ ਵਿੱਚ ਠੀਕ ਨਹੀਂ ਹੈ। ਉਹਨਾਂ ਕਿਹਾ, “ਪਾਰਟੀ ਇੱਕ ਪਰਿਵਾਰ ਦੀ ਤਰ੍ਹਾਂ ਹੈ। ਇਸ ਵਿੱਚ ਛੋਟੇ-ਮੋਟੇ ਮਤਭੇਦ ਹੁੰਦੇ ਰਹਿੰਦੇ ਹਨ, ਜੋ ਪਾਰਟੀ ਪਲੇਟਫਾਰਮ ‘ਤੇ ਹੀ ਹੱਲ ਹੁੰਦੇ ਹਨ। ਬੀਜੇਪੀ ਗਲਤਫਹਿਮੀ ਨੂੰ ਆਪਣੇ ਮਨ ਤੋਂ ਕੱਢ ਦਵੇ।”
ਬੀਜੇਪੀ ‘ਚ ਕਦੇ ਨਹੀਂ ਜਾ ਸਕਦਾ- ਮਾਨ
ਮਾਨ ਨੇ ਕਿਹਾ ਕਿ ਜਿਸ ਪਾਰਟੀ ਨੇ 750 ਕਿਸਾਨਾਂ ਦੀ ਜਾਨ ਲੈ ਲਈ, ਜਿਸ ਪਾਰਟੀ ਨੇ ਲਖੀਮਪੁਰ ਖੀਰੀ ਵਿੱਚ ਕਿਸਾਨਾਂ ਨੂੰ ਕੀੜੇ-ਮਕੌੜਿਆਂ ਵਾਂਗ ਗੱਡੀਆਂ ਦੇ ਥੱਲੇ ਕੁਚਲ ਦਿੱਤਾ ਹੋਵੇ, ਉਹ ਸਰਕਾਰ ਜਿਸਨੇ ਇੱਕ ਸਾਲ ਤੱਕ ਪੰਜਾਬ ਦੇ ਵੱਡੇ ਬਜੁਰਗ ਮਾਵਾਂ-ਭੈਣਾਂ ਨੂੰ ਸੂਲੀ ‘ਤੇ ਟੰਗੀ ਰੱਖਿਆ, ਜਿਸ ਪਾਰਟੀ ਨੇ ਦਿੱਲੀ ਦੀਆਂ ਸਰਹੱਜਾਂ ‘ਤੇ ਬੈਠੇ ਕਿਸਾਨਾਂ ਨੂੰ ਗੁੰਡੇ, ਮਵਾਲੀ, ਦਹਿਸ਼ਤਗਰਦੀ ਕਿਹਾ, ਉਸ ਪਾਰਟੀ ਵਿੱਚ ਜਾਣ ਦੀ ਉਹ ਸੋਚ ਨਹੀਂ ਨਹੀਂ ਸਕਦੇ।
ਬੀਜੇਪੀ ਹੌਰਸ ਟ੍ਰੇਡਿੰਗ ‘ਚ ਮਾਹਰ- ਮਾਨ
ਭਗਵੰਤ ਮਾਨ ਨੇ ਕਿਹਾ, “ਬੀਜੇਪੀ ਨੂੰ ਹੌਰਸ ਟ੍ਰੇਡਿੰਗ ਆਉਂਦੀ ਹੈ, ਇਸ ਤੋਂ ਪਹਿਲਾਂ ਉਹ ਮੱਧ ਪ੍ਰਦੇਸ਼, ਕਰਨਾਟਕ, ਗੋਆ ਅਤੇ ਮੇਘਾਲਿਆ ਵਿੱਚ ਵੀ ਅਜਿਹਾ ਕਰ ਚੁੱਕੇ ਹਨ। ਹੁਣ ਉਹ ਪੰਜਾਬ ‘ਚ ਵੀ ਖਰੀਦ-ਫਰੋਖਤ ਕਰਨਾ ਚਾਹੁੰਦੇ ਹਨ, ਪਰ ਉਹ ਆਮ ਆਦਮੀ ਪਾਰਟੀ ਦੇ ਕਿਸੇ ਵੀ ਵਰਕਰ ਨੂੰ ਖਰੀਦਣ ਦੀ ਕੋਸ਼ਿਸ਼ ਨਾ ਕਰਨ, ਕਿਉਂਕਿ ‘ਆਪ’ ‘ਚ ਸਾਰੇ ਜ਼ਮੀਰ ਵਾਲੇ ਹਨ, ਵਿਕਾਊ ਨਹੀਂ।“
ਝੂਠੇ ਇਲਜਾਮ ਲਗਾ ਰਹੇ ਮਾਨ- ਬੀਜੇਪੀ
ਪੰਜਾਬ ਬੀਜੇਪੀ ਨੇ ਭਗਵੰਤ ਮਾਨ ਦੇ ਇਹਨਾਂ ਸਾਰੇ ਇਲਜਾਮਾਂ ਨੂੰ ਸਿਰੇ ਤੋਂ ਖਾਰਜ ਕੀਤਾ ਅਤੇ ਕਿਹਾ, “ਭਗਵੰਤ ਮਾਨ ਮਨਘੜੰਤ ਇਲਜਾਮ ਲਗਾ ਕੇ ਕੇਜਰੀਵਾਲ ‘ਤੇ ਦਬਾਅ ਪਾਉਣ ਦੀ ਕੋਸ਼ਿਸ਼ ਕਰ ਰਹੇ ਹਨ, ਤਾਂ ਜੋ ਕੇਜਰੀਵਾਲ ਉਹਨਾਂ ਨੂੰ ਸੀਐੱਮ ਫੇਸ ਐਲਾਨ ਦੇਣ।” ਬੀਜੇਪੀ ਨੇ ਦਾਅਵਾ ਕੀਤਾ ਕਿ ਮਾਨ ਆਪਣੀ ਪਾਰਟੀ ਤੋਂ ਪਰੇਸ਼ਾਨ ਹਨ ਅਤੇ ਉਹਨਾਂ ਦੀ ਕਾਂਗਰਸ ਸਣੇ ਕਈ ਪਾਰਟੀਆਂ ਨਾਲ ਗੱਲ ਚੱਲ ਰਹੀ ਹੈ, ਪਰ ਬੀਜੇਪੀ ਨੂੰ ਮਾਨ ਦੀ ਨਾ ਤਾਂ ਪਹਿਲਾਂ ਲੋੜ ਸੀ, ਨਾ ਹੀ ਹੁਣ ਹੈ। ਬੀਜੇਪੀ ਨੂੰ ਮਾਨ ਨੂੰ ਇਲਜਾਮ ਸਾਬਿਤ ਕਰਨ ਦੀ ਚੁਣੌਤੀ ਵੀ ਦਿੱਤੀ ਹੈ।
