ਬਿਓਰੋ। ਪੰਜਾਬ ਵਿੱਚ ਚੋਣਾਂ ਨੂੰ ਲੈ ਕੇ ਛਿੜੇ ਘਮਸਾਣ ਵਿਚਾਲੇ ਲੀਡਰਾਂ ਦੇ ਵੱਖੋ-ਵੱਖਰੇ ਅੰਦਾਜ਼ ਵੇਖਣ ਨੂੰ ਮਿਲ ਰਹੇ ਹਨ। ਇਹਨਾਂ ਵਿੱਚ ਸਭ ਤੋਂ ਵੱਧ ਚਰਚਾ ਵਿੱਚ ਸੀਐੱਮ ਚਰਨਜੀਤ ਸਿੰਘ ਚੰਨੀ ਹਨ। ਹੁਣ ਮੁੱਖ ਮੰਤਰੀ ਦਾ ਇੱਕ ਹੋਰ ਅਵਤਾਰ ਸਾਹਮਣੇ ਆਇਆ ਹੈ। ਇਸ ਵਾਰ ਸੀਐੱਮ ਇੱਕ ਬੇਜੁਬਾਨ ਲਈ ਮਦਦਗਾਰ ਬਣੇ।
ਸੀਐੱਮ ਨੇ ਕਰਵਾਇਆ ਗਾਂ ਦਾ ਰੈਸਕਿਊ
ਦਰਅਸਲ, ਐਤਵਾਰ ਰਾਤ ਨੂੰ ਸੀਐੱਮ ਚਰਨਜੀਤ ਸਿੰਘ ਚੰਨੀ ਚਮਕੌਰ ਸਾਹਿਬ ਵਿਖੇ ਕਿਸੇ ਸਮਾਗਮ ਵਿੱਚ ਸ਼ਾਮਲ ਹੋਣ ਲਈ ਪਹੁੰਚੇ ਸਨ। ਜਦੋਂ ਉਹ ਆਪਣੀ ਸਰਕਾਰੀ ਰਿਹਾਇਸ਼ ਵਿਖੇ ਪਰਤ ਰਹੇ ਸਨ, ਤਾਂ ਰਾਹ ਵਿੱਚ ਉਹਨਾਂ ਨੇ ਇੱਕ ਗਾਂ ਨੂੰ ਖੱਡ ਵਿੱਚ ਡਿੱਗੇ ਵੇਖਿਆ। ਸੀਐੱਮ ਨੇ ਫੌਰਨ ਆਪਣਾ ਕਾਫਲਾ ਰੋਕਿਆ ਅਤੇ ਗਾਂ ਨੂੰ ਬਚਾਉਣ ਦਾ ਕੰਮ ਸ਼ੁਰੂ ਕਰ ਦਿੱਤਾ। ਸੀਐੱਮ ਚੰਨੀ ਟੌਰਚ ਜਗਾ ਕੇ ਬਚਾਅ ਵਿੱਚ ਲੱਗੇ ਲੋਕਾਂ ਅਤੇ ਸੁਰੱਖਿਆਕਰਮੀਆਂ ਨੂੰ ਇਹ ਵੀ ਦੱਸਦੇ ਰਹੇ ਕਿ ਰੱਸੀ ਕਿਵੇਂ ਬੰਨ੍ਹਣੀ ਹੈ।
ਆਖਰੀ ਵਕਤ ਤੱਕ ਡਟੇ ਰਹੇ ਸੀਐੱਮ ਚੰਨੀ
ਅੱਧੇ ਘੰਟੇ ਦੀ ਮੁਸ਼ੱਕਤ ਤੋਂ ਬਾਅਦ ਗਾਂ ਨੂੰ ਸੁਰੱਖਿਅਤ ਬਾਹਰ ਕੱਢ ਲਿਆ ਗਿਆ। ਗਾਂ ਦੇ ਬਾਹਰ ਨਿਕਲਣ ਤੱਕ ਸੀਐੱਮ ਉਥੇ ਹੀ ਖੜ੍ਹੇ ਰਹੇ। ਅਖੀਰ ਵਿੱਚ ਉਹਨਾਂ ਨੇ ਗਾਂ ਦੇ ਪੈਰੀਂ ਹੱਥ ਲਾਏ ਅਤੇ ਗਾਂ ਨੂੰ ਮਾਸੀ ਕਹਿੰਦੇ ਹੋਏ ਕਿਹਾ, “ਮਾਸੀ ਆਪਣਾ ਖਿਆਲ ਰੱਖਿਓ।”
ਸਿੱਧੂ ਨੇ ਵੀ ਵਿਖਾਈ ਸੀ ਦਰਿਆਦਿਲੀ
ਕੁਝ ਦਿਨ ਪਹਿਲਾਂ ਪੰਜਾਬ ਕਾਂਗਰਸ ਦੇ ਪ੍ਰਧਾਨ ਨਵਜੋਤ ਸਿੰਘ ਸਿੱਧੂ ਨੇ ਵੀ ਸੜਕ ਹਾਦਸੇ ਵਿੱਚ ਜ਼ਖਮੀ ਸ਼ਖਸ ਨੂੰ ਹਸਪਤਾਲ ਪਹੁੰਚਾਇਆ ਸੀ। ਉਹ ਸੜਕ ਤੋਂ ਲੰਘ ਰਹੇ ਸਨ, ਤਾਂ ਪਤਾ ਲੱਗਿਆ ਕਿ ਜ਼ਖਮੀ ਨੂੰ ਕੋਈ ਹਸਪਤਾਲ ਲਿਜਾਣ ਨੂੰ ਤਿਆਰ ਨਹੀਂ ਹੈ। ਇਸ ਉਪਰੰਤ ਸਿੱਧੂ ਨੇ ਆਪਣਾ ਕਾਫਲਾ ਰੋਕਿਆ ਅਤੇ ਆਪਣੀ ਗੱਡੀ ਵਿੱਚ ਜ਼ਖਮੀ ਨੂੰ ਹਸਪਤਾਲ ਪਹੁੰਚਾਇਆ।
