ਚੰਡੀਗੜ੍ਹ। ਆਮ ਆਦਮੀ ਪਾਰਟੀ ਦੇ ਕਨਵੀਨਰ ਅਤੇ ਦਿੱਲੀ ਦੇ ਮੁੱਖ ਮੰਤਰੀ ਅਰਵਿੰਦ ਕੇਜਰੀਵਾਲ ਦੇ ਕੋਰੋਨਾ ਪਾਜੀਟਿਵ ਪਾਏ ਜਾਣ ਤੋਂ ਬਾਅਦ ਹਰ ਕੋਈ ਉਹਨਾਂ ਦੇ ਜਲਦ ਸਿਹਤਯਾਬ ਹੋਣ ਦੀ ਕਾਮਨਾ ਕਰ ਰਿਹਾ ਹੈ। ਇਸ ਵਿਚਾਲੇ ਪੰਜਾਬ ਦੇ ਮੁੱਖ ਮੰਤਰੀ ਚਰਨਜੀਤ ਸਿੰਘ ਚੰਨੀ ਨੇ ਕੇਜਰੀਵਾਲ ਦੀ ਤੁਲਨਾ ਹੀ ਵਾਇਰਸ ਨਾਲ ਕਰ ਦਿੱਤੀ। ਬੇਸ਼ੱਕ ਸੀਐੱਮ ਨੇ ਖੁਦ ਕੇਜਰੀਵਾਲ ਨੂੰ ਫੋਨ ਕਰਕੇ ਉਹਨਾਂ ਦਾ ਹਾਲ ਜਾਣਿਆ, ਪਰ ਨਾਲ ਹੀ ਇਹ ਵੀ ਕਹਿ ਦਿੱਤਾ ਕਿ ਅਸੀਂ ਇਹ ਕੋਰੋਨਾ ਪੰਜਾਬ ਨਹੀਂ ਵੜਨ ਦੇਣਾ।
ਮੋਰਿੰਡਾ ਵਿੱਚ ਇੱਕ ਚੋਣ ਰੈਲੀ ਨੂੰ ਸੰਬੋਧਿਤ ਕਰਦੇ ਹੋਏ ਮੁੱਖ ਮੰਤਰੀ ਨੇ ਕਿਹਾ, “ਕੇਜਰੀਵਾਲ ਨੂੰ ਕੋਰੋਨਾ ਹੋਇਆ, ਮੈਂ ਉਹਨਾਂ ਨਾਲ ਫੋਨ ‘ਤੇ ਗੱਲ ਕੀਤੀ। ਮੈਂ ਕਿਹਾ ਬੜੀ ਮਾੜੀ ਗੱਲ ਹੋਈ, ਤੁਹਾਡੀ ਸਿਹਤ ਚੰਗੀ ਹੋਵੇ, ਤੁਹਾਨੂੰ ਸ਼ੁਭਕਾਮਨਾਵਾਂ ਦਿੰਦਾ ਹਾਂ। ਪਰ ਇਹ ਬਾਹਰ ਦੇ ਲੋਕ ਪੰਜਾਬ ‘ਚ ਆ ਕੇ ਰਾਜ਼ ਕਰਨਾ ਚਾਹੁੰਦੇ ਹਨ। ਪੰਜਾਬ ਵਾਸਤੇ ਵੀ ਇਹ ਕੋਰੋਨਾ ਹੀ ਹੈ। ਅਸੀਂ ਇਹੋ-ਜਿਹਾ ਕੋਰੋਨਾ ਨਹੀਂ ਲੈਣਾ। ਅਜਿਹੀ ਬਿਮਾਰੀ ਨਹੀਂ ਪਾਉਣੀ, ਜਿਹੜੀ ਬਾਹਰੋਂ ਆ ਕੇ ਸਾਨੂੰ ਪੈ ਜਾਵੇ। ਸਾਡਾ ਪੈਸਾ ਬਾਹਰ ਨੂੰ ਜਾਣ ਲੱਗ ਜਾਵੇ।”
‘ਪੰਜਾਬ ਦਾ ਪੈਸਾ ਬਾਹਰ ਲਿਜਾਣਾ ਚਾਹੁੰਦੇ ਹਨ ਕੇਜਰੀਵਾਲ’
ਸੀਐੱਮ ਚੰਨੀ ਇਥੇ ਹੀ ਨਹੀਂ ਰੁਕੇ, ਉਹਨਾਂ ਨੇ ਇਥੋਂ ਤੱਕ ਦਾਅਵਾ ਕਰ ਦਿੱਤਾ ਕਿ ਜੇਕਰ ਪੰਜਾਬ ਵਿੱਚ ‘ਆਪ’ ਦੀ ਸਰਕਾਰ ਬਣ ਗਈ, ਤਾਂ ਉਹ ਪੰਜਾਬ ਦਾ ਪੈਸਾ ਬਾਹਰ ਲੈ ਜਾਣਗੇ। ਉਹਨਾਂ ਕਿਹਾ, “ਦਿੱਲੀ ਦੇ ਮੁੱਖ ਮੰਤਰੀ ਦੇ ਬੋਰਡ ਪੰਜਾਬ ‘ਚ ਲੱਗੇ ਹੋਏ ਹਨ। ਇਹ ਫ੍ਰੀ ਥੋੜ੍ਹੇ ਨਾ ਲਗਦੇ ਹਨ। ਦਿੱਲੀ ਦੀ ਸਰਕਾਰ ਦਾ ਪੈਸਾ ਲੱਗਿਆ ਹੈ। ਕੱਲ੍ਹ ਨੂੰ ਕਿਤੇ ਆਪਾਂ ਬਣਾ ਬੈਠੇ, ਤਾਂ ਸਾਡਾ ਪੈਸਾ ਦਿੱਲੀ ਤੇ ਮਹਾਂਰਾਸ਼ਟਰ ‘ਚ ਲਗਦਾ ਫਿਰੇਗਾ। ਖਰਚਾ ਬਾਹਰ ਨੂੰ ਜਾਣ ਲੱਗੇਗਾ। ਅਸੀਂ ਇਹ ਪੈਸਾ ਲੋਕਾਂ ਵੱਲ ਮੋੜਨਾ ਹੈ।“
