ਨਿਊਜ਼ ਡੈਸਕ। ਪੰਜਾਬ ਵਿੱਚ ਚੋਣਾਂ ਤੋਂ ਪਹਿਲਾਂ ਕੋਰੋਨਾ ਕੇਸਾਂ ਦੀ ਰਫਤਾਰ ਵਧਣ ਲੱਗੀ ਹੈ, ਜਿਸ ਨੂੰ ਵੇਖਦੇ ਹੋਏ ਪੰਜਾਬ ਸਰਕਾਰ ਨੇ ਸੂਬੇ ਵਿੱਚ ਨਾਈਟ ਕਰਫਿਊ ਸਮੇਤ ਕਈ ਤਰ੍ਹਾਂ ਦੀਆਂ ਪਾਬੰਦੀਆਂ ਲਗਾਈਆਂ ਹਨ। ਸਰਕਾਰ ਵੱਲੋਂ ਜਦੋਂ ਇਹਨਾਂ ਪਾਬੰਦੀਆਂ ਦੇ ਆਦੇਸ਼ ਦੀ ਕਾਪੀ ਜਾਰੀ ਕੀਤੀ ਗਈ, ਤਾਂ ਉਸ ਵਿੱਚ ਸਭ ਤੋਂ ਪਹਿਲੇ ਨੰਬਰ ‘ਤੇ ਮਾਸਕ ਅਤੇ ਸੋਸ਼ਲ ਡਿਸਟੈਂਸਿੰਗ ‘ਤੇ ਜੋਰ ਦਿੱਤਾ ਗਿਆ ਸੀ।
ਸਰਕਾਰ ਵੱਲੋਂ ਜਾਰੀ ਆਦੇਸ਼ ਵਿੱਚ ਲਿਖਿਆ ਗਿਆ:-
- ਕੰਮਕਾਜ ਵਾਲੀਆਂ ਥਾਵਾਂ ਸਮੇਤ ਸਾਰੀਆਂ ਜਨਤੱਕ ਥਾਵਾਂ ‘ਤੇ ਲੋਕਾਂ ਵੱਲੋਂ ਮਾਸਕ ਪਹਿਨਣਾ ਲਾਜ਼ਮੀ ਹੋਵੇਗਾ। ਇਸਦੀ ਸਖਤ ਨਿਗਰਾਨੀ ਕੀਤੀ ਜਾਵੇਗੀ ਤੇ ਸਖਤੀ ਨਾਲ ਲਾਗੂ ਕਰਵਾਇਆ ਜਾਵੇਗਾ।
- ਤਮਾਮ ਗਤੀਵਿਧੀਆਂ ਦੌਰਾਨ ਸੋਸ਼ਲ ਡਿਸਟੈਂਸਿੰਗ (ਘੱਟੋ-ਘੱਟ 6 ਫੁੱਟ ਦੀ ਦੂਰੀ/2 ਗਜ਼ ਦੀ ਦੂਰੀ) ਦਾ ਹਮੇਸ਼ਾ ਧਿਆਨ ਰੱਖਿਆ ਜਾਵੇ।
ਇਹ ਵੀ ਪੜ੍ਹੋ:- ਕੋਰੋਨਾ ਦੇ ਚਲਦੇ ਪੰਜਾਬ ‘ਚ ਲੱਗਿਆ ਨਾਈਟ ਕਰਫਿਊ…ਸਕੂਲ, ਕਾਲਜ ਵੀ ਬੰਦ
ਦਿਲਚਸਪ ਹੈ ਕਿ ਕੋਰੋਨਾ ਨਿਯਮਾਂ ਦਾ ਇਹ ਪਾਠ ਜਿਹੜੀ ਸਰਕਾਰ ਸੂਬੇ ਦੇ ਲੋਕਾਂ ਨੂੰ ਪੜ੍ਹਾ ਰਹੀ ਹੈ, ਉਸੇ ਸਰਕਾਰ ਦੇ ਮੁੱਖ ਮੰਤਰੀ ਖੁਦ ਹੀ ਇਹਨਾਂ ਨਿਯਮਾਂ ਦੀਆਂ ਜੰਮ ਕੇ ਧੱਜੀਆਂ ਉਡਾ ਰਹੇ ਹਨ। ਸਰਕਾਰ ਵੱਲੋਂ ਆਦੇਸ਼ ਜਾਰੀ ਕਰਨ ਤੋਂ ਮਹਿਜ਼ ਕੁਝ ਹੀ ਘੰਟਿਆਂ ਅੰਦਰ ਮੁੱਖ ਮੰਤਰੀ 2 ਵੱਖ-ਵੱਖ ਥਾਵਾਂ ‘ਤੇ ਜਨਤੱਕ ਪ੍ਰੋਗਰਾਮਾਂ ਵਿੱਚ ਗਏ। ਇਹਨਾਂ ਵਿੱਚੋਂ ਇੱਕ ਵੀ ਪ੍ਰੋਗਰਾਮ ਵਿੱਚ ਮੁੱਖ ਮੰਤਰੀ ਮਾਸਕ ਲਗਾਏ ਨਜ਼ਰ ਨਹੀਂ ਆਏ। ਇੰਨਾ ਹੀ ਨਹੀਂ, ਇੱਕ ਪ੍ਰੋਗਰਾਮ ਦੌਰਾਨ ਤਾਂ ਸੀਐੱਮ ਨੌਜਵਾਨਾਂ ਦੇ ਭਾਰੀ ਇਕੱਠ ਵਿਚਕਾਰ ਪਹੁੰਚ ਕੇ ਡਾਂਸ ਕਰਦੇ ਅਤੇ ਸੈਲਫੀਆਂ ਲੈਂਦੇ ਨਜ਼ਰ ਆਏ।
ਪਹਿਲਾਂ ਮੋਰਿੰਡਾ ‘ਚ ਚੋਣ ਰੈਲੀ ਨੂੰ ਕੀਤਾ ਸੰਬੋਧਨ
ਮੁੱਖ ਮੰਤਰੀ ਪਹਿਲਾਂ ਮੋਰਿੰਡਾ ਵਿੱਚ ਆਂਗਨਵਾੜੀ ਵਰਕਰਾਂ ਵਿਚਾਲੇ ਪਹੁੰਚੇ, ਜਿਸ ਦੌਰਾਨ ਉਹਨਾਂ ਨੇ ਆਂਗਨਵਾੜੀ ਵਰਕਰਾਂ ਤੇ ਹੈਲਪਰਾਂ ਦੀ ਤਨਖਾਹ ਵਧਾਉਣ ਦਾ ਐਲਾਨ ਕੀਤਾ। ਇਸ ਦੌਰਾਨ ਮੁੱਖ ਮੰਤਰੀ ਅਤੇ ਸਟੇਜ ‘ਤੇ ਉਹਨਾਂ ਨਾਲ ਮੌਜੂਦ ਕਿਸੇ ਵੀ ਸ਼ਖਸ ਨੇ ਮੂੰਹ ‘ਤੇ ਮਾਸਕ ਨਹੀਂ ਲਗਾਇਆ ਹੋਇਆ ਸੀ। ਇਥੋਂ ਤੱਕ ਕਿ ਸੀਐੱਮ ਨੇ ਸਟੇਜ ਤੋਂ ਕੋਰੋਨਾ ਸੰਕ੍ਰਮਿਤ ਦਿੱਲੀ ਦੇ ਮੁੱਖ ਮੰਤਰੀ ਅਰਵਿੰਦ ਕੇਜਰੀਵਾਲ ਦੀ ਹੀ ਤੁਲਨਾ ਵਾਇਰਸ ਨਾਲ ਕਰ ਦਿੱਤੀ।
LPU ‘ਚ ਨੌਜਵਾਨਾਂ ਵਿਚਕਾਰ ਪਹੁੰਚੇ CM
ਮੋਰਿੰਡਾ ਤੋਂ ਬਾਅਦ ਮੁੱਖ ਮੰਤਰੀ ਫਗਵਾੜਾ ਵਿੱਚ ਲਵਲੀ ਪ੍ਰੋਫੈਸ਼ਨਲ ਯੂਨੀਵਰਸਿਟੀ ਵਿਖੇ ਪਹੁੰਚੇ। ਇਥੇ ਮੁੱਖ ਮੰਤਰੀ ਨੇ ਸੂਬੇ ਦੇ ਨੌਜਵਾਨਾਂ ਲਈ ਰੁਜ਼ਗਾਰ ਗਾਰੰਟੀ ਸਕੀਮ ਦੀ ਸ਼ੁਰੂਆਤ ਕੀਤੀ, ਜਿਸ ਤਹਿਤ ਉਹਨਾਂ ਨੂੰ ਹਰ ਸਾਲ 1-1 ਲੱਖ ਨੌਕਰੀਆਂ ਦਾ ਵਾਅਦਾ ਕੀਤਾ। ਇਸ ਐਲਾਨ ਦੇ ਤੁਰੰਤ ਬਾਅਦ ਮੁੱਖ ਮੰਤਰੀ ਯੂਨੀਵਰਸਿਟੀ ਵਿੱਚ ਮੌਜੂਦ ਨੌਜਵਾਨਾਂ ਦੇ ਵਿਚਕਾਰ ਜਾ ਪਹੁੰਚੇ। ਇਥੇ ਨਾ ਤਾਂ ਸੀਐੱਮ ਚੰਨੀ ਨੇ ਕੋਈ ਮਾਸਕ ਲਗਾਇਆ ਹੋਇਆ ਸੀ ਤੇ ਨਾ ਹੀ ਨੌਜਵਾਨਾਂ ਦੀ ਭੀੜ ਵਿੱਚ ਕੋਈ ਵੀ ਮਾਸਕ ਲਗਾਇਆ ਨਜ਼ਰ ਆਇਆ।
ਮਾਸਕ ਤਾਂ ਦੂਰ, ਸੀਐੱਮ ਚੰਨੀ ਇਥੇ ਨੌਜਵਾਨਾਂ ਦੀ ਭੀੜ ਵਿੱਚ ਘਿਰੇ ਨਜ਼ਰ ਆਏ। ਸੀਐੱਮ ਨੇ ਨੌਜਵਾਨਾਂ ਨਾਲ ਭੰਗੜਾ ਪਾਇਆ ਤੇ ਨਾਲ ਹੀ ਉਹਨਾਂ ਦੇ ਨਾਲ ਖੂਬ ਸੈਲਫੀਆਂ ਵੀ ਲਈਆਂ।
ਬਹਿਰਹਾਲ, ਸਿਆਸੀ ਲੀਡਰਾਂ ਖਾਸਕਰ ਮੁੱਖ ਮੰਤਰੀ ‘ਤੇ ਚੋਣਾਂ ਦਾ ਬੁਖਾਰ ਤਾਂ ਖੂਬ ਸਿਰ ਚੜ੍ਹ ਕੇ ਬੋਲ ਰਿਹਾ ਹੈ। ਪਰ ਅਫਸੋਸ ਹੈ ਕਿ ਚੋਣਾਂ ਦੇ ਇਸ ਭਖਦੇ ਮਾਹੌਲ ਵਿੱਚ ਬਤੌਰ ਮੁੱਖ ਮੰਤਰੀ ਉਹ ਆਪਣੀ ਨੈਤਿਕ ਜਿੰਮੇਵਾਰੀ ਨੂੰ ਛਿੱਕੇ ਟੰਗ ਕੇ ਹੋਰ ਸਿਆਸਤਦਾਨਾਂ ਲਈ ਗਲਤ ਮਿਸਾਲ ਸੈੱਟ ਕਰ ਰਹੇ ਹਨ। ਅਜਿਹੇ ਵਿੱਚ ਸਿਆਸੀ ਲੀਡਰਾਂ ਦੇ ਨਾਲ-ਨਾਲ ਆਮ ਲੋਕਾਂ ਤੋਂ ਕੋਰੋਨਾ ਦੇ ਵਿਗੜਦੇ ਹਾਲਾਤ ਵਿੱਚ ਸਮਝਦਾਰੀ ਦੀ ਆਸ ਕਿਵੇਂ ਰੱਖੀ ਜਾ ਸਕਦੀ ਹੈ।
