ਮਾਲੇਰਕੋਟਲਾ। ਪੰਜਾਬ ਸਰਕਾਰ ਨੇ 15 ਮੈਂਬਰੀ ਪੰਜਾਬ ਸਟੇਟ ਹੱਜ ਕਮੇਟੀ ਦਾ ਐਲਾਨ ਕਰ ਦਿੱਤਾ ਹੈ, ਜਿਸ ਵਿੱਚ ਮਾਲੇਰਕੋਟਲਾ ਤੋਂ ਮੁਸਲਿਮ ਵਿਧਾਇਕ ਡਾ. ਮੁਹੰਮਦ ਜਮੀਲ-ਉਰ-ਰਹਿਮਾਨ ਦਾ ਨਾਂ ਪਹਿਲੇ ਨੰਬਰ ‘ਤੇ ਦਿੱਤਾ ਗਿਆ ਹੈ।
ਜਿਹੜੇ ਗੈਰ-ਸਰਕਾਰੀ ਮੈਂਬਰ ਬਣਾਏ ਗਏ ਹਨ, ਉਨ੍ਹਾਂ ਵਿਚ ਮੁਫ਼ਤੀ ਮੁਹੰਮਦ ਖਲੀਲ ਕਾਸਮੀ ਮਾਲੇਰਕੋਟਲਾ, ਯਾਸੀਨ ਰਸ਼ੀਦ ਮਾਲੇਰਕੋਟਲਾ, ਮੁਹੰਮਦ ਅਖਤਰ ਮਿਊਂਸੀਪਲ ਕੌਂਸਲ ਮਾਲੇਰਕੋਟਲਾ, ਐਡਵੋਕੇਟ ਅਹਿਮਦ ਮਾਲੇਰਕੋਟਲਾ, ਮੌਲਾਨਾ ਸਈਦ ਆਜ਼ਮ ਰਿਜ਼ਵੀ ਮਾਲੇਰਕੋਟਲਾ, ਕਾਰੀ ਮੁਹੰਮਦ ਰਫੀ ਰਾਜਪੁਰਾ, ਯੂਸੁਫ ਮੁਹੰਮਦ ਪੁੱਤਰ ਮੁਹੰਮਦ ਅੰਮ੍ਰਿਤਸਰ, ਅਵਤਾਰ ਮੁਹੰਮਦ ਮੋਹਾਲੀ, ਸੁਰਮੂਦੀਨ ਖਡੂਰ ਸਾਹਿਬ, ਸ਼ਿੰਗਾਰਾ ਖਾਨ ਮਾਨਸਾ ਅਤੇ ਸਿਰਾਜਦੀਨ ਲੁਧਿਆਣਾ ਆਦਿ ਸ਼ਾਮਲ ਹਨ, ਜਦੋਂ ਕਿ ਪੰਜਾਬ ਵਕਫ ਬੋਰਡ ਦੇ ਆਉਣ ਵਾਲੇ ਚੇਅਰਮੈਨ ਨੂੰ ਵੀ ਗੈਰ ਸਰਕਾਰੀ ਮੈਂਬਰ ਵਜੋਂ ਸ਼ਾਮਲ ਕੀਤਾ ਗਿਆ ਹੈ।
ਇਸ ਤੋਂ ਇਲਾਵਾ ਈ.ਓ. ਆਫਿਸਰ ਸਟੇਟ ਕਮੇਟੀ ਸਰਕਾਰੀ ਮੈਂਬਰ ਹੋਣਗੇ। ਇਨ੍ਹਾਂ ਤੋਂ ਇਲਾਵਾ ਐੱਸ.ਡੀ.ਐੱਮ. ਮਾਲੇਰਕੋਟਲਾ ਨੂੰ ਵੀ ਐਕਸ-ਆਫੀਸ਼ੀਓ ਅਤੇ ਸਰਕਾਰੀ ਮੈਂਬਰ ਵਜੋਂ ਸ਼ਾਮਲ ਕੀਤਾ ਗਿਆ ਹੈ। ਐਲਾਨ ਕੀਤੀ ਸਟੇਟ ਹੱਜ ਕਮੇਟੀ ਦੇ ਚੇਅਰਮੈਨ ਦੀ ਚੋਣ ਹੱਜ ਕਮੇਟੀ ਦੇ ਐਕਟ 2002 ਅਨੁਸਾਰ ਆਉਣ ਵਾਲੇ ਕੁਝ ਦਿਨਾਂ ਵਿਚ ਕਮੇਟੀ ਮੈਂਬਰਾਂ ਵੱਲੋਂ ਵਿਸ਼ੇਸ਼ ਤੌਰ ‘ਤੇ ਮੀਟਿੰਗ ਬੁਲਾ ਕੇ ਕੀਤੀ ਜਾਵੇਗੀ।
ਦੱਸ ਦਈਏ ਕਿ ਸਟੇਟ ਹੱਜ ਕਮੇਟੀ ਕੇਂਦਰ ਸਰਕਾਰ ਅਧੀਨ ਚੱਲ ਰਹੀ ਹੱਜ ਕਮੇਟੀ ਆਫ ਇੰਡੀਆ ਦੀ ਰਹਿਨੁਮਾਈ ਹੇਠ ਪੰਜਾਬ ਵਿੱਚੋਂ ਹਰ ਸਾਲ ਸਾਊਦੀ ਅਰਬ ਵਿਖੇ ਹੱਜ ਦੀ ਪਵਿੱਤਰ ਯਾਤਰਾ ‘ਤੇ ਜਾਣ ਵਾਲੇ ਹਾਜੀਆਂ ਦੇ ਪ੍ਰਬੰਧਕੀ ਕੰਮਾਂ ਲਈ ਜ਼ਿੰਮੇਵਾਰ ਹੁੰਦੀ ਹੈ।
