October 11, 2022
(Chandigarh)
ਪੰਜਾਬ ਦੇ ਰਾਜਪਾਲ ਬਨਵਾਰੀ ਲਾਲ ਪੁਰੋਹਿਤ ਅਤੇ ਮੁੱਖ ਮੰਤਰੀ ਭਗਵੰਤ ਮਾਨ ਵਿਚਕਾਰ ਤਕਰਾਰ ਖਤਮ ਹੋਣ ਦਾ ਨਾਂਅ ਨਹੀਂ ਲੈ ਰਹੀ। ਹੁਣ ਫ਼ਰੀਦਕੋਟ ਦੀ ਬਾਬਾ ਫ਼ਰੀਦ ਯੂਨੀਵਰਸਿਟੀ ਆਫ ਹੈਲਥ ਸਾਇੰਸ ਦੇ ਨਵੇਂ ਵਾਈਸ ਚਾਂਸਲਰ ਨੂੰ ਲੈ ਕੇ ਵਿਵਾਦ ਖੜ੍ਹਾ ਹੋ ਗਿਆ ਹੈ। ਦਰਅਸਲ, ਪਿਛਲੇ ਦਿਨੀਂ ਡਾ. ਰਾਜ ਬਹਾਦੁਰ ਦੇ ਅਸਤੀਫ਼ੇ ਤੋਂ ਬਾਅਦ ਸਰਕਾਰ ਨੇ ਡਾ. ਗੁਰਪ੍ਰੀਤ ਸਿੰਘ ਵਾਂਡਰ ਨੂੰ ਬਤੌਰ ਵੀਸੀ ਨਿਯੁਕਤ ਕੀਤਾ ਸੀ, ਪਰ ਹੁਣ ਰਾਜਪਾਲ ਨੇ ਇਸ ‘ਤੇ ਇਤਰਾਜ਼ ਜ਼ਾਹਿਰ ਕਰ ਦਿੱਤਾ ਹੈ।
ਜਾਣਕਾਰੀ ਦੇ ਮੁਤਾਬਕ, ਰਾਜਪਾਲ ਨੇ ਵੀਸੀ ਦੀ ਨਿਯੁਕਤੀ ਨਾਲ ਜੁੜੀ ਫਾਈਲ ਇਹ ਕਹਿੰਦੇ ਹੋਏ ਵਾਪਸ ਕਰ ਦਿੱਤੀ ਕਿ ਸਰਚ ਕਮੇਟੀ ਵੱਲੋਂ ਸ਼ਾਰਟਲਿਸਟ ਕੀਤੇ ਗਏ ਤਿੰਨ ਨਾਵਾਂ ਦਾ ਪੈਨਲ ਭੇਜਿਆ ਜਾਵੇ।
ਰਾਜਪਾਲ ਨੂੰ ਭੇਜ ਦਵਾਂਗੇ ਪੈਨਲ- CM
CM ਭਗਵੰਤ ਮਾਨ ਨੇ ਕਿਹਾ ਕਿ ਆਮ ਤੌਰ ‘ਤੇ ਜੋ ਨਾਂਅ ਸਰਕਾਰ ਤੈਅ ਕਰਦੀ ਹੈ, ਉਸ ਨੂੰ ਹੀ ਰਾਜਪਾਲ ਮਨਜ਼ੂਰੀ ਦਿੰਦੇ ਹਨ। ਪਰ ਹੁਣ ਨੇ ਜੇਕਰ ਪੈਨਲ ਮੰਗਿਆ ਹੈ, ਤਾਂ ਉਹਨਾਂ ਨੂੰ ਪੈਨਲ ਭੇਜ ਦਿੱਤਾ ਜਾਵੇਗਾ।
ਕਾਬਿਲੇਗੌਰ ਹੈ ਕਿ 10 ਦਿਨ ਪਹਿਲਾਂ ਹੀ ਮੁੱਖ ਮੰਤਰੀ ਭਗਵੰਤ ਮਾਨ ਨੇ ਆਪਣੇ ਟਵਿਟਰ ਹੈਂਡਲ ‘ਤੇ ਇਹ ਜਾਣਕਾਰੀ ਦਿੱਤੀ ਸੀ ਕਿ ਦਿਲ ਦੇ ਰੋਗਾਂ ਦੇ ਮਾਹਰ ਡਾ. ਗੁਰਪ੍ਰੀਤ ਸਿੰਘ ਵਾਂਡਰ ਨੂੰ ਬਾਬਾ ਫਰੀਦ ਮੈਡੀਕਲ ਯੂਨੀਵਰਸਿਟੀ ਦਾ ਨਵਾਂ ਵੀਸੀ ਲਗਾ ਦਿੱਤਾ ਗਿਆ ਹੈ। ਉਹ DMC ਲੁਧਿਆਣਾ ਵਿੱਚ ਕਾਰਡੀਓਲੋਜਿਸਟ ਮਹਿਕਮੇ ਦੇ ਮੁਖੀ ਹਨ ਅਤੇ ਕੌਮਾਂਤਰੀ ਪੱਤਰ ‘ਤੇ ਦਿਲ ਦੇ ਰੋਗਾਂ ਦੇ ਨਾਮੀ ਡਾਕਟਰ ਹਨ।
ਰਾਜ ਬਹਾਦੁਰ ਦੇ ਅਸਤੀਫ਼ੇ ਤੋਂ ਬਾਅਦ ਨਵੇਂ VC ਦੀ ਤਲਾਸ਼
ਦੱਸ ਦਈਏ ਕਿ ਡਾ. ਰਾਜ ਬਹਾਦੁਰ ਨੇ ਸਿਹਤ ਮੰਤਰੀ ਚੇਤਨ ਸਿੰਘ ਜੌੜਾਮਾਜਰਾ ਵੱਲੋਂ ਮਾੜਾ ਵਿਵਹਾਰ ਕੀਤੇ ਜਾਣ ਤੋਂ ਬਾਅਦ ਆਪਣੇ ਅਹੁਦੇ ਤੋਂ ਅਸਤੀਫ਼ਾ ਦੇ ਦਿੱਤਾ ਸੀ। ਉਹਨਾਂ ਦੇ ਅਸਤੀਫ਼ੇ ਤੋਂ ਬਾਅਦ ਸਰਕਾਰ ਨੇ ਇਸ ਅਹੁਦੇ ‘ਤੇ ਨਵੇਂ ਵੀਸੀ ਲਈ ਆਵੇਦਨ ਦਿੱਤਾ, ਤਾਂ ਉਸਦੇ ਲਈ 22 ਲੋਕਾਂ ਨੇ ਆਵੇਦਨ ਕੀਤਾ। ਇਹਨਾਂ ਆਵੇਦਨਾਂ ਦੀ ਜਾਂਚ ਉਪਰੰਤ ਡਾ. ਗੁਰਪ੍ਰੀਤ ਸਿੰਘ ਵਾਂਡਰ ਦੀ ਨਿਯੁਕਤੀ ਨੂੰ ਮੁੱਖ ਮੰਤਰੀ ਨੇ ਮਨਜ਼ੂਰੀ ਦੇ ਦਿੱਤੀ।
VC ਦੀ ਨਿਯੁਕਤੀ ‘ਚ ਸਰਕਾਰ ਤੋਂ ਹੋਈ ਚੂਕ
ਜਾਣਕਾਰਾਂ ਦਾ ਕਹਿਣਾ ਹੈ ਕਿ ਮੁੱਖ ਮੰਤਰੀ ਆਪਣੇ ਤੌਰ ‘ਤੇ ਨਿਯੁਕਤੀ ਨੂੰ ਮਨਜ਼ੂਰੀ ਨਹੀਂ ਦੇ ਸਕਦੇ। ਉਹਨਾਂ ਨੇ ਤਿੰਨ ਲੋਕਾਂ ਦਾ ਪੈਨਲ ਰਾਜਪਾਲ ਨੂੰ ਭੇਜਣਾ ਹੁੰਦਾ ਹੈ, ਜਿਹਨਾਂ ਵਿਚੋਂ ਇੱਕ ਦੀ ਚੋਣ ਕਰਕੇ ਉਸਦੀ ਨਿਯੁਕਤੀ ਦਾ ਆਦੇਸ਼ ਜਾਰੀ ਕਰਦੇ ਹਨ। ਇੱਕ ਰਿਟਾਇਰਡ ਸੀਨੀਅਰ ਅਧਿਕਾਰੀ ਨੇ ਦੱਸਿਆ ਕਿ ਬਾਬਾ ਫ਼ਰੀਦ ਮੈਡੀਕਲ ਯੂਨੀਵਰਸਿਟੀ ਦੇ ਵੀਸੀ ਦੀ ਚੋਣ ਪ੍ਰਕਿਰਿਆ ਵਿੱਚ ਰਾਜਪਾਲ ਦੀ ਚਾਂਸਲਰ ਹੋਣ ਦੇ ਨਾਤੇ ਅਹਿਮ ਭੂਮਿਕਾ ਹੁੰਦੀ ਹੈ। ਇਸ ਤੋਂ ਪਹਿਲਾਂ ਵੀ ਰਾਜਪਾਲ ਨੂੰ ਪੈਨਲ ਭੇਜਿਆ ਜਾਂਦਾ ਰਿਹਾ ਹੈ, ਪਰ ਜਿਸ ਵਿਅਕਤੀ ਦੀ ਸਰਕਾਰ ਨੇ ਨਿਯੁਕਤੀ ਕਰਨੀ ਹੁੰਦੀ ਹੈ, ਉਸਦੇ ਬਾਰੇ ਰਾਜਪਾਲ ਨੂੰ ਮੌਖਿਕ ਤੌਰ ‘ਤੇ ਦੱਸ ਦਿੱਤਾ ਜਾਂਦਾ ਹੈ।
ਰਾਜਪਾਲ ਤੇ CM ਵਿਚਕਾਰ ਲਗਾਤਾਰ ਤਕਰਾਰ
ਜ਼ਿਕਰੇਖਾਸ ਹੈ ਕਿ ਰਾਜਪਾਲ ਅਤੇ CM ਵਿਚਕਾਰ ਲਗਾਤਾਰ ਤਕਰਾਰ ਚੱਲ ਰਹੀ ਹੈ। VC ਤੋਂ ਪਹਿਲਾਂ ਰਾਜਪਾਲ ਅਤੇ ਸਰਕਾਰ ਵਿਚਕਾਰ ਵਿਧਾਨ ਸਭਾ ਸੈਸ਼ਨ ਨੂੰ ਲੈ ਕੇ ਵਿਵਾਦ ਹੋ ਚੁੱਕਿਆ ਹੈ। ਉਸ ਤੋਂ ਬਾਅਦ ਏਅਰ ਸ਼ੋਅ ਵਿੱਚ ਸੀਐੱਮ ਦੀ ਗੈਰ-ਮੌਜੂਦਗੀ ਨੂੰ ਲੈ ਕੇ ਰਾਜਪਾਲ ਨੇ ਰਾਸ਼ਟਰਪਤੀ ਦੇ ਸਾਹਮਣੇ ਸਵਾਲ ਚੁੱਕੇ ਸਨ। ਤੇ ਹੁਣ ਵੀਸੀ ਦੇ ਮੁੱਦੇ ‘ਤੇ ਦੋਵੇਂ ਆਹਮੋ-ਸਾਹਮਣੇ ਹਨ।
ਕਿਸੇ ਤਰ੍ਹਾਂ ਦੀ ਤਕਰਾਰ ਨਹੀਂ- ਭਗਵੰਤ ਮਾਨ
ਇਸ ਸਭ ਦੇ ਵਿਚਾਲ ਸੀਐੱਮ ਭਗਵੰਤ ਮਾਨ ਦਾ ਕਹਿਣਾ ਹੈ ਕਿ ਪੰਜਾਬ ਸਰਕਾਰ ਦੀ ਲੜਾਈ ਮੁੱਦਿਆਂ ਨਾਲ ਹੈ, ਨਾ ਕਿ ਰਾਜਪਾਲ ਨਾਲ। ਉਹਨਾਂ ਕਿਹਾ ਕਿ ਰਾਜਪਾਲ ਇੱਕ ਉੱਚ ਅਹੁਦੇ ‘ਤੇ ਹਨ। ਉਹਨਾਂ ਦਾ ਸਨਮਾਨ ਕਰਦੇ ਹਨ।
