ਬਿਓਰੋ। ਪੰਜਾਬ ਵਿੱਚ ਹਾਈ ਅਲਰਟ ਦੇ ਬਾਵਜੂਦ ਵੀਰਵਾਰ ਨੂੰ ਲੁਧਿਆਣਾ ਕੋਰਟ ਵਿੱਚ ਹੋਏ ਬਲਾਸਟ ਨੇ ਪੰਜਾਬ ਪੁਲਿਸ ਦੀ ਕਾਰਜਸ਼ੈਲੀ ‘ਤੇ ਕਈ ਸਵਾਲ ਖੜ੍ਹੇ ਕਰ ਦਿੱਤੇ ਹਨ। ਦਰਅਸਲ, ਪਿਛਲੇ ਹਫ਼ਤੇ ਦਰਬਾਰ ਸਾਹਿਬ ਵਿੱਚ ਬੇਅਦਬੀ ਦੀ ਘਟਨਾ ਤੋਂ ਬਾਅਦ ਕਾਂਗਰਸ ਸਰਕਾਰ ਪੂਰੇ ਸੂਬੇ ਵਿੱਚ ਅਲਰਟ ਜਾਰੀ ਕਰ ਚੁੱਕੀ ਹੈ। ਸੂਬੇ ਭਰ ਵਿਚ ਥਾਂ-ਥਾਂ ਪੁਲਿਸ ਨੇ ਨਾਕੇ ਲਗਾਏ ਹੋਏ ਹਨ। ਇਸਦੇ ਬਾਵਜੂਦ ਵੀਰਵਾਰ ਨੂੰ ਲੁਧਿਆਣਾ ਕੋਰਟ ਦੇ ਅੰਦਰ ਕੋਈ ਧਮਾਕਾਖੇਜ਼ ਸਮੱਗਰੀ ਲੈ ਕੇ ਪਹੁੰਚ ਗਿਆ ਅਤੇ ਪੁਲਸ ਮੈਟਲ ਡਿਟੈਕਟਰ ਲਗਾ ਕੇ ਬੈਠੀ ਰਹਿ ਗਈ। ਸ਼ੁਰੂਆਤੀ ਜਾਂਚ ਵਿੱਚ ਇਸ ਨੂੰ ਆਤਮਘਾਤੀ ਹਮਲੇ ਦੇ ਤੌਰ ‘ਤੇ ਵੇਖਿਆ ਜਾ ਰਿਹਾ ਹੈ।
ਕੋਰਟ ਦੀ ਸੁਰੱਖਿਆ ‘ਤੇ ਸਵਾਲ
ਲੁਧਿਆਣਾ ਦੇ ਜਿਸ ਕੋਰਟ ਕੰਪਲੈਕਸ ਵਿੱਚ ਵੀਰਵਾਰ ਨੂੰ ਧਮਾਕਾ ਹੋਇਆ, ਉਹ 7 ਮੰਜ਼ਿਲਾ ਇਮਾਰਤ ਹੈ। ਇਥੇ ਕੋਰਟ ਰੂਮ, ਜੱਜ ਦੇ ਰੈਸਟ ਰੂਮ ਤੋਂ ਇਲਾਵਾ ਪੇਸ਼ੀ ਲਈ ਲਿਆਏ ਜਾਂਦੇ ਕੈਦੀਆਂ ਦੇ ਬੰਦੀ ਸੈੱਲ ਮੌਜੂਦ ਹਨ। ਕੋਰਟ ਕੰਪਲੈਕਸ ਵਿੱਚ ਹਰ ਵੇਲੇ ਪੁਲਿਸ ਮੌਜੂਦ ਰਹਿੰਦੀ ਹੈ। ਇੱਥੇ ਰੋਜ਼ਾਨਾ ਹਜ਼ਾਰਾਂ ਲੋਕ ਆਉਂਦੇ ਜਾਂਦੇ ਹਨ। 2 ਮੈਟਲ ਡਿਟੈਕਟਰ, ਉਹ ਵੀ ਖਰਾਬ
ਕੋਰਟ ਕੰਪਲੈਕਸ ਵਿੱਚ ਅੰਦਰ ਜਾਣ ਲਈ 10 ਤੋਂ 12 ਦਰਵਾਜ਼ੇ ਬਣੇ ਹਨ। ਇਨ੍ਹਾਂ ਵਿਚੋਂ ਸਿਰਫ 2 ਗੇਟਾਂ ‘ਤੇ ਹੀ ਮੈਟਲ ਡਿਟੈਕਟਰ ਲੱਗੇ ਹਨ। ਲੁਧਿਆਣਾ ਕੋਰਟ ਵਿੱਚ ਪ੍ਰੈਕਟਿਸ ਕਰਨ ਵਾਲੇ ਵਕੀਲਾਂ ਮੁਤਾਬਕ ਇਹ ਦੋਵੇਂ ਮੈਟਲ ਡਿਟੈਕਟਰ ਡੈੱਡ ਸਨ। ਕੋਰਟ ਕੰਪਲੈਕਸ ਦੇ ਗੇਟਾਂ ‘ਤੇ ਕਹਿਣ ਨੂੰ ਤਾਂ ਪੁਲਿਸ ਮੁਲਾਜ਼ਮ ਤੈਨਾਤ ਰਹਿੰਦੇ ਹਨ, ਪਰ ਕਿਸੇ ਦੀ ਜਾਂਚ ਨਹੀਂ ਕਰਦੇ ਹਨ ਅਤੇ ਇੱਕ ਕੋਨੇ ਵਿੱਚ ਬੈਠੇ ਰਹਿੰਦੇ ਹਨ।
ਜਿਸ ਮੰਜ਼ਿਲ ‘ਤੇ ਬਲਾਸਟ, ਉਥੇ 4 ਕੋਰਟ ਰੂਮ
ਲੁਧਿਆਣਾ ਕੋਰਟ ਕੰਪਲੈਕਸ ਦੀ ਜਿਸ ਦੂਜੀ ਮੰਜ਼ਿਲ ‘ਤੇ ਬਲਾਸਟ ਹੋਇਆ, ਉਥੇ ਦਿਨ ਭਰ ਚਹਿਲ-ਪਹਿਲ ਰਹਿੰਦੀ ਹੈ। ਇਸ ਮੰਜ਼ਿਲ ‘ਤੇ 4 ਕੋਰਟ ਰੂਮ ਬਣੇ ਹਨ। ਇਥੇ ਪੁਲਿਸ ਤੋਂ ਇਲਾਵਾ ਵਕੀਲਾਂ ਅਤੇ ਕੈਦੀਆਂ ਸਣੇ ਆਮ ਲੋਕਾਂ ਦੀ ਭੀੜ ਅਕਸਰ ਲੱਗੀ ਰਹਿੰਦੀ ਹੈ। ਇਸਦੇ ਬਾਵਜੂਦ ਇਸ ਸ਼ਖਸ ਦੇ Explosive ਲੈ ਕੇ ਪਹੁੰਚਣ ਦੀ ਭਣਕ ਨਾ ਪੁਲਸ ਨੂੰ ਲੱਗੀ ਅਤੇ ਨਾ ਹੀ ਕੰਪਲੈਕਸ ਵਿੱਚ ਮੌਜੂਦ ਲੋਕਾਂ ਨੂੰ ।
ਆਮ ਦਿਨਾਂ ਦੀ ਤੁਲਨਾ ‘ਚ ਘੱਟ ਸੀ ਭੀੜ
ਵੀਰਵਾਰ ਨੂੰ ਜਿਸ ਵੇਲੇ ਧਮਾਕਾ ਹੋਇਆ, ਉਸ ਵੇਲੇ ਫਲੋਰ ‘ਤੇ ਲੋਕਾਂ ਦੀ ਗਿਣਤੀ ਹੋਰ ਦਿਨਾਂ ਦੇ ਮੁਕਾਬਲੇ ਘੱਟ ਸੀ। ਦਰਅਸਲ, ਪੰਜਾਬ ਵਿੱਚ ਸਰਕਾਰੀ ਮੁਲਾਜ਼ਮਾਂ ਦੀ ਕਲਮਛੋੜ ਹੜਤਾਲ ਚੱਲ ਰਹੀ ਹੈ। ਇਸ ਕਾਰਨ ਕੋਰਟ ਦੇ ਮੁਲਾਜ਼ਮ ਡਿਊਟੀ ‘ਤੇ ਨਹੀਂ ਸਨ।
ਕੋਰਟ ਦੇ ਨਜ਼ਦੀਕ DC ਦਫ਼ਤਰ, ਕਮਿਸ਼ਨਰੇਟ ਤੇ ਮੰਤਰੀ ਦਾ ਘਰ
ਕੋਰਟ ਕੰਪਲੈਕਸ ਦੇ ਨਜ਼ਦੀਕ ਹੀ ਮਿੰਨੀ ਸਕੱਤਰੇਤ ਬਣਿਆ ਹੋਇਆ ਹੈ, ਜਿਥੇ DC ਦਫ਼ਤਰ ਤੋਂ ਇਲਾਵਾ ਦੁਜੇ ਕਈ ਦਫ਼ਤਰ ਮੌਜੂਦ ਹਨ। ਉਸਦੇ ਬਿਲਕੁਲ ਨਜ਼ਦੀਕ ਲੁਧਿਆਣਾ ਪੁਲਿਸ ਕਮਿਸ਼ਨਰ ਦਾ ਮੁੱਖ ਦਫਤਰ ਹੈ, ਜਿਥੇ ਪੁਲਿਸ ਕਮਿਸ਼ਨਰ ਗੁਰਪ੍ਰੀਤ ਭੁੱਲਰ ਦੇ ਨਾਲ-ਨਾਲ ਆਲਾ ਅਧਿਕਾਰੀ ਬੈਠਦੇ ਹਨ। ਇੰਨਾ ਹੀ ਨਹੀਂ, ਕੋਰਟ ਕੰਪਲੈਕਸ ਤੋਂ 400 ਮੀਟਰ ਦੇ ਦਾਇਰੇ ਵਿੱਚ ਆਉਂਦੇ ਨਿਊ ਮਾਡਲ ਟਾਊਨ ਵਿੱਚ ਮੰਤਰੀ ਭਾਰਤ ਭੂਸ਼ਣ ਆਸ਼ੂ ਦਾ ਘਰ ਵੀ ਹੈ।
