ਬਿਓਰੋ। ਕੈਪਟਨ ਅਤੇ ਕਾਂਗਰਸ ਦੀ ਸਿੱਧੀ ਜੰਗ ਵਿੱਚ ਪਟਿਆਲਾ ਨਗਰ ਨਿਗਮ ਦੇ ਮੇਅਰ ਸੰਜੀਵ ਸ਼ਰਮਾ ਉਰਫ ਬਿੱਟੂ ਦੀ ਕੁਰਸੀ ਚਲੀ ਗਈ ਹੈ। ਵੀਰਵਾਰ ਨੂੰ ਹੋਈ ਹਾਊਸ ਮੀਟਿੰਗ ਵਿੱਚ ਜ਼ਬਰਦਸਤ ਹੰਗਾਮੇ ਵਿਚਕਾਰ ਬਿੱਟੂ ਵਿਸ਼ਵਾਸ ਮਤ ਹਾਸਲ ਨਹੀਂ ਕਰ ਸਕੇ। ਸਥਾਨਕ ਵਿਧਾਇਕ ਹੋਣ ਦੇ ਨਾਤੇ ਮੀਟਿੰਗ ਵਿੱਚ ਸ਼ਾਮਲ ਹੋਏ ਲੋਕਲ ਬਾਡੀ ਮੰਤਰੀ ਬ੍ਰਹਮ ਮਹਿੰਦਰਾ ਮੁਤਾਬਕ, ਮੇਅਰ ਭਰੋਸੇ ਲਈ ਮਤ ਪੇਸ਼ ਨਹੀਂ ਕਰ ਸਕੇ, ਇਸ ਲਈ ਉਹਨਾਂ ਨੂੰ ਸਸਪੈਂਡ ਕਰ ਦਿੱਤਾ ਗਿਆ ਹੈ।
ਕਿਸ ਨੂੰ ਕਿੰਨੇ ਵੋਟ ਮਿਲੇ?
60 ਕੌਂਸਲਰਾਂ ਵਾਲੀ ਪਟਿਆਲਾ ਨਗਰ ਨਿਗਮ ਵਿੱਚ 59 ਕੌਂਸਲਰ ਇਕੱਲੇ ਕਾਂਗਰਸ ਪਾਰਟੀ(ਕਈ ਕੈਪਟਨ ਦੇ ਨਾਲ) ਦੇ ਹਨ, ਜਦਕਿ ਇੱਕ ਕੌਂਸਲਰ ਅਕਾਲੀ ਦਲ ਦਾ ਹੈ। ਨਿਗਮ ਵਿੱਚ 3 ਸਥਾਨਕ ਵਿਧਾਇਕਾਂ (ਕੈਪਟਨ ਅਮਰਿੰਦਰ ਸਿੰਘ, ਬ੍ਰਹਮ ਮਹਿੰਦਰਾ ਅਤੇ ਹਰਿੰਦਰਪਾਲ ਚੰਦੂਮਾਜਰਾ) ਦੀ ਵੀ ਵੋਟ ਸ਼ਾਮਲ ਸੀ। ਇਹਨਾਂ ਵਿੱਚ ਇੱਕ ਕੌਂਸਲਰ ਅਤੇ ਅਕਾਲੀ ਵਿਧਾਇਕ ਚੰਦੂਮਾਜਰਾ ਸ਼ਾਮਲ ਨਹੀਂ ਹੋਏ। ਕੁੱਲ 61 ਵੋਟ ਪਏ, ਜਿਹਨਾਂ ਵਿੱਚ ਮੇਅਰ ਬਿੱਟੂ ਦੇ ਸਮਰਥਨ ਵਿੱਚ 25 ਅਤੇ ਵਿਰੋਧ ਵਿੱਚ 36 ਵੋਟਾਂ ਪਈਆਂ।
ਇਸ ਤਰ੍ਹਾਂ ਗਈ ਮੇਅਰ ਦੀ ਕੁਰਸੀ…
ਦਰਅਸਲ, ਮੇਅਰ ਦੇ ਖਿਲਾਫ਼ ਕੌਂਸਲਰ ਬੇ-ਭਰੋਸਗੀ ਮਤਾ ਲਿਆਏ ਸਨ ਅਤੇ ਮੀਟਿੰਗ ਵੀ ਇਸੇ ਮੁੱਦੇ ‘ਤੇ ਸੱਦੀ ਜਾਣੀ ਸੀ। ਪਰ ਲੋਕਲ ਬਾਡੀ ਵਿਭਾਗ ਵੱਲੋਂ ਦਿੱਤੇ ਗਏ ਨੋਟਿਸ ਦੇ ਜਵਾਬ ਵਿੱਚ ਮੇਅਰ ਨੇ ਬੇ-ਭਰੋਸਗੀ ਮਤੇ ਦੇ ਖਿਲਾਫ਼ ਮੀਟਿੰਗ ਸੱਦਣ ਦੀ ਬਜਾਏ ਭਰੋਸਗੀ ਮਤੇ ਲਈ ਮੀਟਿੰਗ ਸੱਦ ਲਈ। ਇਸ ਨੂੰ ਵਿਰੋਧੀਆਂ ਨੇ ਹਥਿਆਰ ਬਣਾਇਆ ਅਤੇ ਉਹਨਾਂ ਨੂੰ ਮੁਅੱਤਲ ਕਰ ਦਿੱਤਾ, ਜਦਕਿ ਉਹਨਾਂ ਦੇ ਕੋਲ ਬੇ-ਭਰੋਸਗੀ ਮਤੇ ਦੇ ਖਿਲਾਫ਼ 25 ਵੋਟ ਸਨ।
ਕੈਪਟਨ ਧੜਾ ਕਰ ਰਿਹਾ ਜਿੱਤ ਦਾ ਦਾਅਵਾ
ਕੈਪਟਨ ਅਮਰਿੰਦਰ ਸਿੰਘ ਨੇ ਕਿਹਾ, “ਮੇਅਰ ਦੇ ਖਿਲਾਫ਼ ਬੇ-ਭਰੋਸਗੀ ਮਤਾ ਲਿਆਂਦਾ ਗਿਆ ਸੀ ਅਤੇ ਇਸਦੇ ਲਈ ਉਹਨਾਂ ਨੂੰ ਇੱਕ-ਤਿਹਾਈ ਬਹੁਮਤ ਚਾਹੀਦਾ ਸੀ ਅਤੇ ਇਸਦੇ ਲਈ 20 ਵੋਟਾਂ ਪੇਸ਼ ਕੀਤੀਆਂ ਜਾਣੀਆਂ ਸਨ, ਪਰ ਉਹਨਾਂ ਕੋਲ 25 ਸਨ। ਅਜਿਹੇ ਵਿੱਚ ਵਿਰੋਧੀ ਧਿਰ ਦਾ ਬੇ-ਭਰੋਸਗੀ ਮਤਾ ਡਿੱਗ ਗਿਆ ਹੈ। ਅਜਿਹੇ ਵਿੱਚ ਸੰਜੀਵ ਸ਼ਰਮਾ ਬਿੱਟੂ ਹੀ ਮੇਅਰ ਬਣੇ ਰਹਿਣਗੇ। ਜੇਕਰ ਮੇਅਰ ਦੇ ਖਿਲਾਫ਼ ਕੋਈ ਕਾਰਵਾਈ ਕੀਤੀ ਜਾਂਦੀ ਹੈ, ਤਾਂ ਅਸੀਂ ਹਾਈਕੋਰਟ ਜਾਵਾਂਗੇ।“
ਮੀਟਿੰਗ ਤੋਂ ਪਹਿਲਾਂ ਖੂਬ ਹੋਇਆ ਹੰਗਾਮਾ
ਮੀਟਿੰਗ ਤੋਂ ਪਹਿਲਾਂ ਕੈਪਟਨ ਅਮਰਿੰਦਰ ਸਿੰਘ ਆਪਣੇ ਕੌਂਸਲਰਾਂ ਨੂੰ ਇੱਕ ਬੱਸ ਵਿੱਚ ਲੈ ਕੇ ਨਿਗਮ ਹਾਊਸ ਪਹੁੰਚੇ ਸਨ। ਉਹ ਬੱਸ ਵਿੱਚ ਹੀ ਹਾਊਸ ਗੇਟ ਤੱਕ ਜਾਣਾ ਚਾਹੁੰਦੇ ਸਨ, ਪਰ ਉਹਨਾਂ ਨੂੰ ਰੋਕ ਦਿੱਤਾ ਗਿਆ ਅਤੇ ਉਹ ਪੈਦਲ ਨਿਗਮ ਹਾਊਸ਼ ਪਹੁੰਚੇ। ਇਲਜਾਮ ਇਹ ਵੀ ਹੈ ਕਿ ਹਾਊਸ ਦੀ ਬੈਠਕ ਵਿੱਚ ਜਾ ਰਹੇ ਕੈਪਟਨ ਸਮਰਥਕ ਕੁਝ ਕੌਂਸਲਰਾਂ ਨੂੰ ਪੁਲਿਸ ਨੇ ਜ਼ਬਰਨ ਚੁੱਕ ਲਿਆ। ਹਾਲਾਂਕਿ ਜ਼ਬਰਦਸਤ ਹੰਗਾਮੇ ਤੋਂ ਬਾਅਦ ਉਹਨਾਂ ਨੂੰ ਜਲਦੀ ਹੀ ਛੱਡ ਦਿੱਤਾ ਗਿਆ।
ਕਦੇ ਇਕੱਠੇ ਸਨ, ਹੁਣ ਦੂਰ-ਦੂਰ
ਕੈਪਟਨ ਅਮਰਿੰਦਰ ਸਿੰਘ ਅਤੇ ਕੈਬਨਿਟ ਮੰਤਰੀ ਬ੍ਰਹਮ ਮਹਿੰਦਰਾ ਕਿਸੇ ਵੇਲੇ ਇਕੱਠੇ ਸਨ। ਬ੍ਰਹਮ ਮਹਿੰਦਰਾ ਕੋਲ ਕੈਪਟਨ ਸਰਕਾਰ ਵਿੱਚ ਅਹਿਮ ਮੰਤਰਾਲੇ ਰਹੇ ਹਨ ਅਤੇ ਉਹ ਹਮੇਸ਼ਾ ਇੱਕ-ਦੂਜੇ ਦਾ ਸਾਥ ਦਿੰਦੇ ਨਜ਼ਰ ਆਏ ਹਨ। ਜਦੋਂ ਨਵਜੋਤ ਸਿੰਘ ਸਿੱਧੂ ਨੂੰ ਪੰਜਾਬ ਕਾਂਗਰਸ ਦਾ ਪ੍ਰਧਾਨ ਬਣਾਇਆ ਗਿਆ, ਤਾਂ ਬ੍ਰਹਮ ਮਹਿੰਦਰਾ ਨੇ ਉਹਨਾਂ ਨੂੰ ਮਿਲਣ ਤੋਂ ਸਾਫ਼ ਇਨਕਾਰ ਕਰ ਦਿੱਤਾ ਸੀ ਅਤੇ ਕਿਹਾ ਸੀ ਕਿ ਪਹਿਲਾਂ ਸਿੱਧੂ ਨੂੰ ਕੈਪਟਨ ਤੋਂ ਮੁਆਫੀ ਮੰਗਣੀ ਪਏਗੀ, ਤਾਂ ਹੀ ਉਹ ਸਿੱਧੂ ਨਾਲ ਮੁਲਾਕਾਤ ਕਰਨਗੇ। ਇਸ ਤੋਂ ਬਾਅਦ ਜਿਵੇਂ ਹੀ ਕੈਪਟਨ ਅਮਰਿੰਦਰ ਸਿੰਘ ਦੇ ਹੱਥੋਂ ਸੀਐੱਮ ਦੀ ਕੁਰਸੀ ਗਈ, ਤਾਂ ਉਹ ਵੀ ਪਲਟੀ ਮਾਰ ਗਏ ਅਤੇ ਚਰਨਜੀਤ ਸਿੰਘ ਚੰਨੀ ਦੇ ਧੜੇ ਵਿੱਚ ਚਲੇ ਗਏ।
