ਬਿਓਰੋ। ਪੰਜਾਬ ਕਾਂਗਰਸ ਦੇ ਪ੍ਰਧਾਨ ਨਵਜੋਤ ਸਿੰਘ ਸਿੱਧੂ ਨੇ ਮੁੜ ਆਪਣੀ ਹੀ ਸਰਕਾਰ ਨੂੰ ਚੇਤਾਵਨੀ ਦਿੱਤੀ ਹੈ। ਇਸ ਵਾਰ ਸਿੱਧੂ ਨੇ ਮੋਗਾ ਦੇ ਬਾਘਾਪੁਰਾਣਾ ਵਿਖੇ ਹੋਈ ਰੈਲੀ ਵਿੱਚ ਨਸ਼ੇ ਦੇ ਮੁੱਦੇ ‘ਤੇ ਸਰਕਾਰ ਨੂੰ ਘੇਰਿਆ ਅਤੇ ਸਾਫ ਕਹਿ ਦਿੱਤਾ ਕਿ ਜੇਕਰ ਡਰੱਗਜ਼ ‘ਤੇ STF ਦੀ ਰਿਪੋਰਟ ਨਾ ਖੁੱਲ੍ਹੀ, ਤਾਂ ਉਹ ਮਰਨ ਵਰਤ ‘ਤੇ ਬਹਿ ਜਾਣਗੇ। ਸਿੱਧੂ ਨੇ ਕਿਹਾ ਕਿ ਕੋਰਟ ਦੀ ਹਦਾਇਤ ਹੈ ਕਿ ਇਹ ਰਿਪੋਰਟ ਖੋਲ੍ਹੋ ਅਤੇ ਜਿੰਮੇਵਾਰ ਲੋਕਾਂ ‘ਤੇ ਕਾਰਵਾਈ ਕਰੋ।
ਰੈਲੀ ਵਿੱਚ ਸੀਐੱਮ ਚਰਨਜੀਤ ਸਿੰਘ ਚੰਨੀ ਵੀ ਸ਼ਾਮਲ ਸਨ। ਹਾਲਾਂਕਿ ਦੂਜੇ ਪ੍ਰੋਗਰਾਮ ਵਿੱਚ ਜਾਣ ਦਾ ਹਵਾਲਾ ਦੇ ਕੇ ਸਿੱਧੂ ਦੇ ਭਾਸ਼ਣ ਤੋਂ ਪਹਿਲਾਂ ਹੀ ਉਹ ਚਲੇ ਗਏ ਸਨ।
— Navjot Singh Sidhu (@sherryontopp) November 25, 2021
ਕਰਜ਼ ਦੇ ਮੁੱਦੇ ‘ਤੇ ਵੀ ਵਰ੍ਹੇ ਸਿੱਧੂ
ਰੈਲੀ ਵਿੱਚ ਸਿੱਧੂ ਨੇ ਕਿਹਾ, “ਪੰਜਾਬ ਦੇ ਸਿਰ 7 ਲੱਖ ਕਰੋੜ ਦਾ ਕਰਜ਼ ਹੈ। ਅਸੀਂ ਕਰਜ਼ ਲੈ ਕੇ ਕਰਜ਼ ਉਤਾਰ ਰਹੇ ਹਾਂ। ਕਿਸਾਨਾਂ ਦੇ ਇੱਕ ਲੱਖ ਕਰੋੜ ਦੇ ਕਰਜ਼ ਚੁਕਾਉਣ ਦੀ ਗੱਲ ਕਹੀ ਗਈ।” ਸਿੱਧੂ ਨੇ ਕਿਹਾ ਕਿ ਕਰਜ਼ ਉਤਾਰਨ ਦੀ ਬਜਾਏ ਕੋਈ ਇਹ ਕਿਉਂ ਨਹੀਂ ਕਹਿੰਦਾ ਕਿ ਅੱਗੇ ਤੋਂ ਕਰਜ਼ ਨਹੀਂ ਚੜ੍ਹਨ ਦੇਣਗੇ।
ਲੁਧਿਆਣਾ ਰੈਲੀ ‘ਚ ਦਿੱਤੀ ਸੀ ਅਸਤੀਫੇ ਦੀ ਧਮਕੀ
ਇਸ ਤੋਂ ਪਹਿਲਾਂ ਸਿੱਧੂ ਨੇ ਲੁਧਿਆਣਾ ਰੈਲੀ ਵਿੱਚ ਸੀਐੱਮ ਦੀ ਮੌਜੂਦਗੀ ‘ਚ ਰੇਤੇ ਦੇ ਮੁੱਦੇ ਨੂੰ ਲੈ ਕੇ ਸਰਕਾਰ ‘ਤੇ ਸਵਾਲ ਚੁੱਕੇ ਸਨ ਅਤੇ ਕਿਹਾ ਸੀ ਕਿ ਰੇਤਾ ਅਜੇ ਵੀ ਸਸਤਾ ਨਹੀਂ ਹੋਇਆ ਤੇ ਜੇਕਰ ਰੇਟ ਨਾ ਘੱਟ ਹੋਏ, ਤਾਂ ਪ੍ਰਧਾਨਗੀ ਦੇ ਅਹੁਦੇ ਤੋਂ ਅਸਤੀਫਾ ਦੇ ਦੇਣਗੇ। ਹਾਲਾਂਕਿ ਲੁਧਿਆਣਾ ਰੈਲੀ ਵਿੱਚ ਸਿੱਧੂ ਨੇ ਬਿਜਲੀ ਸਸਤੀ ਕਰਨ ਨੂੰ ਲੈ ਕੇ ਚੰਨੀ ਦੀ ਤਾਰੀਫ਼ ਵੀ ਕੀਤੀ ਸੀ।
