November 25, 2022
(Mohali)
ਮੋਹਾਲੀ ਦੇ ਸੋਹਾਣਾ ਵਿੱਚ 23 ਸਾਲਾ ਨਰਸ ਨਸੀਬ ਕੌਰ ਦੇ ਕਤਲ ਮਾਮਲੇ ਵਿੱਚ ਪੰਜਾਬ ਪੁਲਿਸ ਦੇ ਬਰਖਾਸਤ ASI ਰਸ਼ਪ੍ਰੀਤ ਸਿੰਘ ਨੂੰ ਗ੍ਰਿਫ਼ਤਾਰ ਕਰ ਲਿਆ ਗਿਆ ਹੈ। ASI ਰਸ਼ਪ੍ਰੀਤ ਸਿੰਘ ਨੇ 13 ਨਵੰਬਰ ਨੂੰ ਨਸੀਬ ਕੌਰ ਦਾ ਗਲਾ ਘੋਟ ਕੇ ਕਤਲ ਕਰ ਦਿੱਤਾ ਸੀ ਅਤੇ ਫਿਰ ਛੱਪੜ ਦੇ ਕੋਲ ਲਾਸ਼ ਸੁੱਟ ਕੇ ਫਰਾਰ ਹੋ ਗਿਆ ਸੀ। ਉਹ ਨਸੀਬ ਦੀ ਲਾਸ਼ ਐਕਟਿਵਾ ‘ਤੇ ਲੈ ਕੇ ਗਿਆ ਸੀ, ਜਿਸਦੀ CCTV ਫੁਟੇਜ ਵੀ ਸਾਹਮਣੇ ਆਈ ਸੀ।
ਮੋਬਾਈਲ ਨੇ ਖੋਲ੍ਹਿਆ ਰਾਜ਼
ਜਾਣਕਾਰੀ ਮੁਤਾਬਕ, ਮੁਲਜ਼ਮ ਦਾ ਨਰਸ ਦੇ ਨਾਲ ਅਫੇਅਰ ਚੱਲ ਰਿਹਾ ਸੀ। ਉਹ ਪਹਿਲਾਂ ਤੋਂ ਵਿਆਹੁਤਾ ਸੀ ਅਤੇ ਨਸੀਬ ਕੌਰ ਨੂੰ ਇਸ ਬਾਰੇ ਜਾਣਕਾਰੀ ਨਹੀਂ ਸੀ। ਮ੍ਰਿਤਕਾ ਦੇ ਮੋਬਾਈਲ ਫੋਨ ਵਿੱਚ ਉਸਦੀ ਰਸ਼ਪ੍ਰੀਤ ਨਾਲ ਚੈਟ ਵੀ ਪੁਲਿਸ ਨੂੰ ਮਿਲੀ ਸੀ। ਇਸੇ ਦੇ ਅਧਾਰ ‘ਤੇ ਪੁਲਿਸ ਦਾ ਸ਼ੱਕ ਰਸ਼ਪ੍ਰੀਤ ‘ਤੇ ਗਿਆ।
ਪ੍ਰਮੋਸ਼ਨ ਨਾਲ ਬਣਿਆ ਸੀ ASI
ਮੁਲਜ਼ਮ ASI ਰਸ਼ਪ੍ਰੀਤ ਸਿੰਘ ਮੋਹਾਲੀ ਦੇ ਫੇਜ਼-8 ਦੇ ਥਾਣੇ ਵਿੱਚ ਤੈਨਾਤ ਸੀ। ਰਸ਼ਪ੍ਰੀਤ ਨੂੰ ਪੰਚਕੂਲਾ ਵਿੱਚ ਗੈਂਗਸਟਰਾਂ ਨਾਲ ਹੋਈ ਇੱਕ ਮੁਠਭੇੜ ਦੇ ਦੌਰਾਨ ਪੈਰ ਵਿੱਚ ਗੋਲੀ ਵੱਜੀ ਸੀ। ਉਸਦੀ ਬਹਾਦਰੀ ਨੂੰ ਵੇਖਦੇ ਹੋਏ ਉਸ ਨੂੰ ASI ਬਣਾ ਦਿੱਤਾ ਗਿਆ ਸੀ। ਹਾਲਾਂਕਿ ਬਾਅਦ ਵਿੱਚ ਉਸਦਾ ਨਾਂਅ ਇੱਕ ਅਪਰਾਧਿਕ ਕੇਸ ਵਿੱਚ ਆਉਣ ਤੋਂ ਬਾਅਦ ਨੌਕਰੀ ਤੋਂ ਕੱਢ ਦਿੱਤਾ ਗਿਆ ਸੀ।
