ਬਿਓਰੋ। ਪੰਜਾਬ ਵਿੱਚ ਗੁਰੂ ਘਰ ਤੋਂ ਬਾਅਦ ਹੁਣ ਮੰਦਰ ਵਿੱਚ ਬੇਅਦਬੀ ਦਾ ਵੱਡਾ ਮਾਮਲਾ ਸਾਹਮਣੇ ਆਇਆ ਹੈ। ਘਟਨਾ ਪਟਿਆਲਾ ਦੇ ਇਤਿਹਾਸਕ ਕਾਲੀ ਮਾਤਾ ਮੰਦਰ ਦੀ ਹੈ। ਇਥੇ ਇੱਕ ਨੌਜਵਾਨ ਨੇ ਕਾਲੀ ਮਾਤਾ ਦੇ ਆਸਨ ਦੀ ਬੇਅਦਬੀ ਕੀਤੀ। ਨੌਜਵਾਨ ਅਚਾਨਕ ਮੰਦਰ ਵਿੱਚ ਮੁੱਖ ਮੂਰਤੀ ਦੇ ਸਾਹਮਣੇ ਲੱਗੀ ਗਰਿੱਲ ਟੱਪ ਕੇ ਆਸਨ ‘ਤੇ ਚੜ੍ਹ ਗਿਆ ਅਤੇ ਕਾਲੀ ਮਾਤਾ ਦੀ ਮੂਰਤੀ ਦੀ ਜੱਫੀ ਪਾ ਲਈ।
ਹਾਲਾਂਕਿ ਉਥੇ ਮੌਜੂਦ ਪੁਜਾਰੀ ਨੇ ਤੁਰੰਤ ਹੀ ਨੌਜਵਾਨ ਨੂੰ ਮੂਰਤੀ ਤੋਂ ਵੱਖ ਕਰਕੇ ਆਸਨ ਤੋਂ ਹੇਠਾਂ ਧਕੇਲ ਦਿੱਤਾ। ਘਟਨਾ ਤੋਂ ਨਰਾਜ਼ ਮੰਦਰ ਕਮੇਟੀ ਦੇ ਮੈਂਬਰਾਂ ਅਤੇ ਉਥੇ ਮੌਜੂਦ ਸ਼ਰਧਾਲੂਆਂ ਨੇ ਨੌਜਵਾਨ ਦੀ ਕੁੱਟਮਾਰ ਤੋਂ ਬਾਅਦ ਉਸ ਨੂੰ ਪੁਲਿਸ ਦੇ ਹਵਾਲੇ ਕਰ ਦਿੱਤਾ।
ਨੌਜਵਾਨ ਨੇ ਮੂੰਹ ‘ਤੇ ਬੰਨ੍ਹਿਆ ਸੀ ਰੁਮਾਲ
ਜਾਣਕਾਰੀ ਮੁਤਾਬਕ, ਸੋਮਵਾਰ ਦੁਪਹਿਰ 2 ਵਜੇ ਦੇ ਕਰੀਬ ਇੱਕ ਨੌਜਵਾਨ ਮੰਦਰ ਵਿੱਚ ਦਾਖਲ ਹੋਇਆ। ਔਰੇਂਜ ਕਲਰ ਦਾ ਲੋਅਰ ਅਤੇ ਜੈਕੇਟ ਪਾਏ ਨੌਜਵਾਨ ਨੇ ਆਪਣੇ ਮੂੰਹ ‘ਤੇ ਰੁਮਾਲ ਬੰਨ੍ਹਿਆ ਹੋਇਆ ਸੀ। ਕੁਝ ਸੈਕੰਡ ਤੱਕ ਕਾਲੀ ਮਾਤਾ ਦੀ ਮੂਰਤੀ ਦੇ ਸਾਹਮਣੇ ਖੜ੍ਹਾ ਰਹਿ ਕੇ ਤਾਲੀਆਂ ਵਜਾਉਣ ਤੋਂ ਬਾਅਦ ਨੌਜਵਾਨ ਅਚਾਨਕ ਗੋਲਕ ‘ਤੇ ਪੈਰ ਰੱਖ ਕੇ ਸਾਹਮਣੇ ਲੱਗੀ ਗਰਿੱਲ ਟੱਪ ਕੇ ਆਸਨ ‘ਤੇ ਪਹੁੰਚ ਗਿਆ ਅਤੇ ਕਾਲੀ ਮਾਤਾ ਦੀ ਮੂਰਤੀ ਨੂੰ ਜੱਫੀ ਪਾ ਲਈ।
ਮਾਹੌਲ ਵਿਗਾੜਨ ਦੀ ਸਾਜਿਸ਼- ਕੈਪਟਨ
ਸਾਬਕਾ ਸੀਐੱਮ ਕੈਪਟਨ ਅਮਰਿੰਦਰ ਸਿੰਘ ਨੇ ਆਪਣੇ ਗ੍ਰਹਿ ਖੇਤਰ ਪਟਿਆਲਾ ਵਿੱਚ ਹੋਈ ਬੇਅਦਬੀ ਦੀ ਇਸ ਘਟਨਾ ਦੀ ਨਿੰਦਾ ਕੀਤੀ। ਕੈਪਟਨ ਨੇ ਟਵੀਟ ਕਰਕੇ ਕਿਹਾ, “ਇਹ ਪੰਜਾਬ ਦਾ ਮਾਹੌਲ ਖਰਾਬ ਕਰਨ ਦੀ ਸਾਜਿਸ਼ ਹੈ, ਜਿਸ ਨੂੰ ਬਰਦਾਸ਼ਤ ਨਹੀਂ ਕੀਤਾ ਜਾ ਸਕਦਾ।” ਕੈਪਟਨ ਨੇ ਚੋਣ ਕਮਿਸ਼ਨ ਨੂੰ ਅਪੀਲ ਕੀਤੀ ਕਿ ਇਸ ਮਾਮਲੇ ਵਿੱਚ ਸਖਤ ਐਕਸ਼ਨ ਲਿਆ ਜਾਵੇ।
Strongly condemn the disturbing incident of attempted sacrilege at Shri Kali Mata Mandir in Patiala.
Repetitive attempts to disturb peace in Punjab will not be tolerated. I urge @ECISVEEP to take strict action so that the atmosphere in the state is not disturbed.
— Capt.Amarinder Singh (@capt_amarinder) January 24, 2022
ਮਨਸੂਬੇ ਕਾਮਯਾਬ ਨਹੀਂ ਹੋਣ ਦੇਵਾਂਗੇ- ਚੰਨੀ
ਸੀਐੱਮ ਚਰਨਜੀਤ ਸਿੰਘ ਚੰਨੀ ਨੇ ਕਿਹਾ ਕਿ ਚੋਣਾਂ ਦੇ ਚਲਦੇ ਪੰਜਾਬ ਵਿੱਚ ਕੁਝ ਤਾਕਤਾਂ ਮਾਹੌਲ ਖਰਾਬ ਕਰਨਾ ਚਾਹੁੰਦੀਆਂ ਹਨ, ਪਰ ਉਹ ਅਜਿਹੇ ਮਨਸੂਬੇ ਕਾਮਯਾਬ ਨਹੀਂ ਹੋਣ ਦੇਣਗੇ। ਸੀਐੱਮ ਨੇ ਕਿਹਾ ਕਿ ਮੁਲਜ਼ਮ ਪੁਲਿਸ ਦੀ ਗ੍ਰਿਫ਼ਤ ਵਿੱਚ ਹੈ ਅਤੇ ਸਖਤ ਕਾਰਵਾਈ ਕੀਤੀ ਜਾ ਰਹੀ ਹੈ।
Some vested interests are continuously trying to destabilise the social harmony of Punjab in view of the upcoming elections, but I will not let them succeed in their malicious motives. (2/2)
— Charanjit S Channi (@CHARANJITCHANNI) January 24, 2022
ਪਟਿਆਲਾ ਬੰਦ ਦਾ ਸੱਦਾ
ਇਸ ਘਟਨਾ ਨੂੰ ਲੈ ਕੇ ਹਿੰਦੂ ਭਾਈਚਾਰੇ ਵਿੱਚ ਜ਼ਬਰਦਸਤ ਰੋਸ ਹੈ। ਹਿੰਦੂ ਤਖਤ ਅਤੇ ਹਿੰਦੂ ਸੁਰੱਖਿਆ ਸਮਿਤੀ ਦਾ ਇਲਜਾਮ ਹੈ ਕਿ ਨੌਜਵਾਨ ਕਾਲੀ ਮਾਤਾ ਦੀ ਮੂਰਤੀ ਨੂੰ ਖੰਡਿਤ ਕਰਨ ਦੇ ਇਰਾਦੇ ਨਾਲ ਆਸਨ ‘ਤੇ ਚੜ੍ਹਿਆ ਸੀ। ਇਸ ਮਾਮਲੇ ਵਿੱਚ ਪੁਲਿਸ ਨੂੰ ਸਖਤ ਕਾਰਵਾਈ ਕਰਨੀ ਚਾਹੀਦੀ ਹੈ। ਇਸ ਘਟਨਾ ਦੇ ਵਿਰੋਧ ਵਿੱਚ ਹਿੰਦੂ ਤਖਤ ਅਤੇ ਹਿੰਦੂ ਸੁਰੱਖਿਆ ਸਮਿਤੀ ਨੇ ਮੰਗਲਵਾਰ ਨੂੰ ਪਟਿਆਲਾ ਬੰਦ ਦਾ ਸੱਦਾ ਦਿੱਤਾ ਹੈ। ਦੋਵੇਂ ਜਥੇਬੰਦੀਆਂ ਨੇ ਆਪਣੇ ਸਾਰੇ ਮੈਂਬਰਾਂ ਨੂੰ ਸਵੇਰੇ 9 ਵਜੇ ਕਾਲੀ ਮਾਤਾ ਮੰਦਰ ਪਹੁੰਚਣ ਦੀ ਅਪੀਲ ਕੀਤੀ ਹੈ।
