ਬਿਓਰੋ। ਦਿੱਲੀ ਦੇ ਮੁੱਖ ਮੰਤਰੀ ਅਤੇ ਆਮ ਆਦਮੀ ਪਾਰਟੀ ਦੇ ਕੌਮੀ ਕਨਵੀਨਰ ਅਰਵਿੰਦ ਕੇਜਰੀਵਾਲ ਨੇ ਦਿੱਲੀ ਦੇ ਸਰਕਾਰੀ ਦਫ਼ਤਰਾਂ ਲਈ ਇੱਕ ਵੱਡਾ ਐਲਾਨ ਕੀਤਾ ਹੈ। ਗਣਤੰਤਰ ਦਿਹਾੜੇ ਦੇ ਸਬੰਧ ਵਿੱਚ ਰੱਖੇ ਇੱਕ ਸਮਾਗਮ ਦੌਰਾਨ ਕੇਜਰੀਵਾਲ ਨੇ ਐਲਾਨ ਕੀਤਾ ਕਿ ਹੁਣ ਰਾਜਧਾਨੀ ਦੇ ਸਰਕਾਰੀ ਦਫ਼ਤਰਾਂ ਵਿੱਚ ਮੁੱਖ ਮੰਤਰੀ ਜਾਂ ਕਿਸੇ ਹੋਰ ਲੀਡਰ ਦੇ ਨਹੀਂ, ਬਲਕਿ ਡਾ. ਬੀ.ਆਰ. ਅੰਬੇਡਕਰ ਅਤੇ ਭਗਤ ਸਿੰਘ ਦੀਆਂ ਤਸਵੀਰਾਂ ਲੱਗਣਗੀਆਂ।
ਸਮਾਗਮ ਦੇ ਮੰਚ ਤੋਂ ਆਪਣੇ ਸੰਬੋਧਨ ਵਿੱਚ ਕੇਜਰੀਵਾਲ ਨੇ ਕਿਹਾ, “ਇਹਨਾਂ ਦੋਵਾਂ ਨੇ ਇੱਕ ਅਜਿਹੇ ਭਾਰਤ ਦਾ ਸੁਫਨਾ ਵੇਖਿਆ ਸੀ, ਜਿਥੇ ਹਰ ਬੱਚੇ ਨੂੰ ਚੰਗੀ ਸਿੱਖਿਆ ਮਿਲੇਗੀ। ਦੋਵਾਂ ਨੇ ਇੱਕ ਕ੍ਰਾਂਤੀ ਦਾ ਸੁਫਨਾ ਵੇਖਿਆ ਸੀ। ਅੱਜ ਓਹੀ ਸਾਡਾ ਵੀ ਸੁਫਨਾ ਹੈ। ਮੈਨੂੰ ਖੁਸ਼ੀ ਹੈ ਕਿ ਅਜਾਦੀ ਦੇ 70 ਸਾਲਾਂ ਬਾਅਦ ਦਿੱਲੀ ਵਿੱਚ ਇਹਨਾਂ ਦੋਵਾਂ ਦਾ ਸੁਫਨਾ ਪੂਰਾ ਹੋਣ ਲੱਗਿਆ ਹੈ। ਗਣਤੰਤਰ ਦਿਹਾੜੇ ਮੌਕੇ ਮੈਂ ਇਹ ਐਲਾਨ ਕਰਦਾ ਹਾਂ ਕਿ ਦਿੱਲੀ ਸਰਕਾਰ ਦੇ ਹਰ ਦਫ਼ਤਰ ਵਿੱਚ ਬਾਬਾ ਸਾਹੇਬ ਅੰਬੇਡਕਰ ਅਤੇ ਸ਼ਹੀਦ-ਏ-ਆਜ਼ਮ ਭਗਤ ਸਿੰਘ ਦੀਆਂ ਤਸਵੀਰਾਂ ਲੱਗਣਗੀਆਂ। ਹੁਣ ਅਸੀਂ ਨੇਤਾ ਦੀ ਨਸਵੀਰ ਨਹੀਂ ਲਗਾਵਾਂਗੇ, ਮੁੱਖ ਮੰਤਰੀ ਦੀ ਤਸਵੀਰ ਨਹੀਂ ਲਗਾਵਾਂਗੇ, ਇਹਨਾਂ ਦੋਵਾਂ ਦੀ ਤਸਵਾਰ ਲਗਾਵਾਂਗੇ। ਦਿੱਲੀ ਸਰਕਾਰ ਇਹਨਾਂ ਦੋਵਾਂ ਦੇ ਆਦਰਸ਼ਾਂ ‘ਤੇ ਚੱਲੇਗੀ।”
ਪੰਜਾਬ ਚੋਣਾਂ ‘ਤੇ ਕੇਜਰੀਵਾਲ ਦੀ ਨਜ਼ਰ !
ਬੇਸ਼ੱਕ ਕੇਜਰੀਵਾਲ ਦਾ ਇਹ ਐਲਾਨ ਕਾਬਿਲੇਤਾਰੀਫ਼ ਹੈ, ਪਰ ਇਸ ਐਲਾਨ ਦੇ ਕੁਝ ਸਿਆਸੀ ਮਾਇਨੇ ਵੀ ਹਨ, ਜਿਹਨਾਂ ਨੂੰ ਅਣਗੌਲਿਆਂ ਨਹੀਂ ਕੀਤਾ ਜਾ ਸਕਦਾ। ਪੰਜਾਬ ਵਿੱਚ ਅਗਲੇ ਮਹੀਨੇ ਵਿਧਾਨ ਸਭਾ ਚੋਣਾਂ ਹੋਣ ਜਾ ਰਹੀਆਂ ਹਨ। ਜਾਹਿਰ ਹੈ ਕਿ ਕੇਜਰੀਵਾਲ ਦੇ ਇਸ ਐਲਾਨ ਨੂੰ ਆਮ ਆਦਮੀ ਪਾਰਟੀ ਪੰਜਾਬ ਚੋਣਾਂ ਵਿੱਚ ਭੁਨਾਉਣ ਦੀ ਕੋਸ਼ਿਸ਼ ਜ਼ਰੂਰ ਕਰੇਗੀ। ਦਰਅਸਲ, ਸੰਵਿਧਾਨ ਨਿਰਮਾਤਾ ਡਾ. ਬੀ.ਆਰ. ਅੰਬੇਡਕਰ ਦੇ ਸਮਰਥਕਾਂ ਦੀ ਪੰਜਾਬ ਵਿੱਚ ਵੱਡੀ ਤਦਾਤ ਹੈ। ਇਸਦੇ ਨਾਲ ਹੀ ਭਗਤ ਸਿੰਘ ਦਾ ਵੀ ਪੰਜਾਬ ਨਾਲ ਗੂੜਾ ਰਿਸ਼ਤਾ ਹੈ, ਜਿਸਦੇ ਚਲਦੇ ਕੇਜਰੀਵਾਲ ਦੇ ਇਸ ਐਲਾਨ ਨੂੰ ਪੰਜਾਬ ਚੋਣਾਂ ਨਾਲ ਜੋੜ ਕੇ ਵੇਖਿਆ ਜਾ ਰਿਹਾ ਹੈ।
ਦੋਆਬਾ ‘ਚ ਚੰਗਾ ਅਧਾਰ ਚਾਹੁੰਦੀ ਹੈ ‘ਆਪ’
ਸੰਵਿਧਾਨ ਨਿਰਮਾਤਾ ਡਾ. ਬੀ.ਆਰ. ਅੰਬੇਡਕਰ ਦੀਆਂ ਮੂਰਤੀਆਂ ਦਿੱਲੀ ਸਰਕਾਰ ਦੇ ਦਫ਼ਤਰਾਂ ਵਿੱਚ ਲਗਾਉਣ ਦੇ ਐਲਾਨ ਦਾ ਸਿੱਧਾ ਫਾਇਦਾ ਕੇਜਰੀਵਾਲ ਨੂੰ ਪੰਜਾਬ ਦੇ ਦੋਆਬਾ ਖੇਤਰ ਵਿੱਚ ਮਿਲ ਸਕਦਾ ਹੈ। ਇਸ ਵਿੱਚ ਕੋਈ ਦੋ ਰਾਏ ਨਹੀਂ ਕਿ ਪੰਜਾਬ ਵਿੱਚ ‘ਆਪ’ ਸਿਰਫ਼ ਮਾਲਵਾ ਖੇਤਰ ਵਿੱਚ ਚੰਗਾ ਅਧਾਰ ਰਖਦੀ ਹੈ, ਜਦਕਿ ਮਾਝਾ ਅਤੇ ਦੋਆਬਾ ਵਿੱਚ ਪਾਰਟੀ ਦੀ ਰਾਹ ਅਸਾਨ ਨਹੀਂ ਹੈ। ਕਿਉਂਕਿ ਦੋਆਬਾ ਖਾਸਕਰ ਜਲੰਧਰ ਦੇ ਇਸਦੇ ਆਲੇ-ਦੁਆਲੇ ਦੇ ਇਲਾਕਿਆਂ ਵਿੱਚ ਡਾ. ਅੰਬੇਡਕਰ ਦੇ ਸਮਰਥਕਾਂ ਦੀ ਵੱਡਾ ਤਦਾਦ ਹੈ। ਲਿਹਾਜਾ ਆਮ ਆਦਮੀ ਪਾਰਟੀ ਉਸੇ ਦਾ ਫਾਇਦਾ ਲੈਣ ਦੀ ਫਿਰਾਕ ਵਿੱਚ ਹੈ।
ਭਗਤ ਸਿੰਘ ਦੇ ਜ਼ਰੀਏ ਸਿੱਧੇ ਦਿਲ ‘ਚ ਉਤਰਨ ਦੀ ਕੋਸ਼ਿਸ਼
ਸ਼ਹੀਦ-ਏ-ਆਜ਼ਮ ਭਗਤ ਸਿੰਘ ਪੰਜਾਬ ਦੀ ਰੂਹ ਵਿੱਚ ਵੱਸਦੇ ਹਨ। ਪੰਜਾਬ ਦਾ ਲਗਭਗ ਹਰ ਨੌਜਵਾਨ ਉਹਨਾਂ ਦੇ ਆਦਰਸ਼ਾਂ ‘ਤੇ ਚੱਲਣ ਦਾ ਦਮ ਭਰਦਾ ਹੈ। ਸ਼ਹੀਦ ਦਾ ਜੱਦੀ ਪਿੰਡ ਖਟਕੜ ਕਲਾਂ ਪੰਜਾਬ ਦੇ ਨਵਾਂਸ਼ਹਿਰ ਵਿੱਚ ਸਥਿਤ ਹੈ। ਲਿਹਾਜਾ ਭਗਤ ਸਿੰਘ ਦੀਆਂ ਤਸਵੀਰਾਂ ਨੂੰ ਦਿੱਲੀ ਦੇ ਦਫ਼ਤਰਾਂ ਵਿੱਚ ਲਗਾਉਣ ਦੇ ਕੇਜਰੀਵਾਲ ਦੇ ਐਲਾਨ ਜ਼ਰੀਏ ਉਹ ਸਿੱਧੇ ਪੰਜਾਬ ਦੇ ਦਿਲ ਵਿੱਚ ਉਤਰਨ ਦੀ ਕੋਸ਼ਿਸ਼ ਕਰ ਰਹੇ ਹਨ। ਹਾਲਾਂਕਿ ਇਸ ਵਿੱਚ ਉਹ ਕਿੰਨੇ ਕਾਮਯਾਬ ਹੋਣਗੇ, ਇਸਦਾ ਜਵਾਬ ਚੋਣਾਂ ਦੇ ਨਤੀਜੇ ਦੇਣਗੇ।
