ਬਿਓਰੋ। ਜਲੰਧਰ ਦੀ ਆਦਮਪੁਰ ਸੀਟ ‘ਤੇ ਕਾਂਗਰਸ ਦੀ ਟਿਕਟ ਨੂੰ ਲੈ ਕੇ ਨਾਮਜ਼ਦਗੀਆਂ ਦੇ ਆਖਰੀ ਦਿਨ ਜੰਮ ਕੇ ਹਾਈਵੋਲਟੇਜ ਡਰਾਮਾ ਹੋਇਆ। ਦਰਅਸਲ, ਇਸ ਸੀਟ ‘ਤੇ ਕਾਂਗਰਸ ਨੇ ਸੁਖਵਿੰਦਰ ਸਿੰਘ ਕੋਟਲੀ ਨੂੰ ਮੈਦਾਨ ਵਿੱਚ ਉਤਾਰਿਆ ਹੈ, ਪਰ ਸੀਨੀਅਰ ਆਗੂ ਮੋਹਿੰਦਰ ਸਿੰਘ ਕੇਪੀ ਦੀ ਨਰਾਜ਼ਗੀ ਦੇ ਚਲਦੇ ਦਿਨ ਭਰ ਟਿਕਟ ਬਦਲਣ ਦੀਆਂ ਖ਼ਬਰਾਂ ਚਲਦੀਆਂ ਰਹੀਆਂ।
ਖ਼ਬਰ ਆਈ ਕਿ ਕਾਂਗਰਸ ਨੇ ਕੋਟਲੀ ਦੀ ਟਿਕਟ ਕੱਟ ਕੇ ਕੇਪੀ ਨੂੰ ਉਮੀਦਵਾਰ ਬਣਾ ਦਿੱਤਾ ਦਿੱਤਾ, ਪਰ ਇਸਦਾ ਕੋਈ ਰਸਮੀ ਐਲਾਨ ਨਹੀਂ ਕੀਤਾ ਗਿਆ। ਇਸਦੇ ਚਲਦੇ ਸਸਪੈਂਸ ਬਣਿਆ ਰਿਹਾ। ਨਾਮਜ਼ਦਗੀ ਦਾ ਵਕਤ ਖਤਮ ਹੋਣ ਤੋਂ ਮਹਿਜ਼ ਕੁਝ ਦੇਰ ਪਹਿਲਾਂ ਮੋਹਿੰਦਰ ਕੇਪੀ ਅਤੇ ਕੋਟਲੀ ਦੋਵੇਂ ਨਾਮਜ਼ਦਗੀ ਭਰਨ ਲਈ ਪਹੁੰਚ ਗਏ। ਇਸੇ ਵਿਚਾਲੇ ਦਿੱਲੀ ਤੋਂ ਹਾਈਕਮਾਂਡ ਦਾ ਮੈਸੇਜ ਆਇਆ ਕਿ ਕਾਂਗਰਸ ਉਮੀਦਵਾਰ ਦੇ ਤੌਰ ‘ਤੇ ਕੋਟਲੀ ਹੀ ਪਰਚਾ ਭਰਨਗੇ, ਜਿਸ ਤੋਂ ਬਾਅਦ ਕੇਪੀ ਆਪਣੇ ਸਮਰਥਕਾਂ ਦੇ ਨਾਲ ਉਲਟੇ ਪੈਰ ਵਾਪਸ ਪਰਤ ਗਏ।
ਕੇਪੀ ਨੇ ਕਿਹਾ, “ਕਾਂਗਰਸ ਨੇ ਧੋਖਾ ਦਿੱਤਾ”
ਮੋਹਿੰਦਰ ਸਿੰਘ ਕੇਪੀ ਨੇ ਕਿਹਾ ਕਿ ਜੇਕਰ ਉਹਨਾਂ ਦੀ ਨਾਮਜ਼ਦਗੀ ਨਹੀਂ ਭਰਵਾਉਣੀ ਸੀ, ਤਾਂ ਉਹਨਾਂ ਨੂੰ ਪਹਿਲਾਂ ਹੀ ਸਾਫ ਮਨ੍ਹਾਂ ਕਰ ਦਿੰਦੇ। ਸਵੇਰੇ ਉਹਨਾਂ ਨੂੰ ਕਿਹਾ ਗਿਆ ਕਿ ਟਿਕਟ ਦੇ ਦਿੱਤੀ ਹੈ, ਨਾਮਜ਼ਦਗੀ ਦਾਖਲ ਕਰੋ। ਪਰ ਜਦੋਂ ਉਹ ਕਾਗਜਾਤ ਜਮ੍ਹਾਂ ਕਰਵਾਉਣ ਲਈ ਪਹੁੰਚੇ, ਤਾਂ ਐਨ ਮੌਕੇ ‘ਤੇ ਆ ਕੇ ਉਹਨਾਂ ਨੂੰ ਨਾਂਹ ਕਰ ਦਿੱਤੀ ਗਈ। ਉਹਨਾਂ ਕਿਹਾ ਕਿ ਕਾਂਗਰਸ ਦੀ ਲੀਡਰਸ਼ਿਪ ਨੇ ਉਹਨਾਂ ਦੇ ਨਾਲ ਗਲਤ ਕੀਤਾ ਹੈ। ਉਹ ਚੁੱਪ ਨਹੀਂ ਬੈਠਣਗੇ। ਚੋਣਾਂ ਤਾਂ ਹੁਣ ਲੜ ਨਹੀਂ ਸਕਣਗੇ, ਪਰ ਪਾਰਟੀ ਖਿਲਾਫ਼ ਪ੍ਰਚਾਰ ਤੋਂ ਤਾਂ ਉਹਨਾਂ ਨੂੰ ਕੋਈ ਨਹੀਂ ਰੋਕ ਸਕਦਾ।
ਸੀਐੱਮ ਦੇ ਰਿਸ਼ਤੇਦਾਰ ਹਨ ਕੇਪੀ
ਮੋਹਿੰਦਰ ਕੇਪੀ ਵੈਸੇ ਤਾਂ ਕਾਂਗਰਸ ਦੇ ਵੱਡੇ ਲੀਡਰ ਹਨ, ਪਰ ਸੀਐੱਮ ਦੇ ਨਾਲ ਵੀ ਉਹਨਾਂ ਦੀ ਰਿਸ਼ਤੇਦਾਰੀ ਹੈ। ਟਿਕਟ ਕੱਟਣ ਦੇ ਬਾਅਦ ਤੋਂ ਹੀ ਕੇਪੀ ਨਰਾਜ਼ ਚੱਲ ਰਹੇ ਸਨ। ਸੀਐੱਮ ਚੰਨੀ ਨੇ ਉਹਨਾਂ ਨੂੰ ਟਿਕਟ ਬਦਲਣ ਦਾ ਭਰੋਸਾ ਦੇ ਕੇ ਮਨਾ ਲਿਆ ਸੀ। ਜਲੰਧਰ ਦੌਰੇ ਦੌਰਾਨ ਉਹਨਾਂ ਦੀ ਰਾਹੁਲ ਗਾਂਧੀ ਨਾਲ ਮੁਲਾਕਾਤ ਵੀ ਕਰਵਾਈ ਗਈ ਸੀ ਅਤੇ ਲੱਗਿਆ ਕਿ ਕੇਪੀ ਮੰਨ ਗਏ, ਪਰ ਹੁਣ ਆਖਰੀ ਮੌਕੇ ਜੋ ਕੁਝ ਹੋਇਆ, ਉਸ ਤੋਂ ਕੇਪੀ ਬਾਗੀ ਹੋ ਗਏ ਹਨ ਅਤੇ ਹੁਣ ਜਲਦ ਹੀ ਕੋਈ ਵੱਡਾ ਫੈਸਲਾ ਲੈ ਸਕਦੇ ਹਨ।
