ਬਿਓਰੋ। ਸ਼੍ਰੋਮਣੀ ਅਕਾਲੀ ਦਲ ਦੇ ਤੇਜ਼-ਤਰਾਰ ਆਗੂ ਬਿਕਰਮ ਸਿੰਘ ਮਜੀਠੀਆ ਹੁਣ ਸਿਰਫ਼ ਨਵਜੋਤ ਸਿੰਘ ਸਿੱਧੂ ਦੇ ਖਿਲਾਫ਼ ਚੋਣ ਲੜਨਗੇ। ਮਜੀਠੀਆ ਨੇ ਆਪਣਾ ਜੱਦੀ ਹਲਕਾ ਮਜੀਠਾ ਛੱਡ ਦਿੱਤਾ ਹੈ। ਇਥੋਂ ਹੁਣ ਉਹਨਾਂ ਦੀ ਪਤਨੀ ਗੁਨੀਵ ਕੌਰ ਚੋਣ ਮੈਦਾਨ ਵਿੱਚ ਹਨ। ਗੁਨੀਵ ਕੌਰ ਨੇ ਸੋਮਵਾਰ ਨੂੰ ਹੀ ਮਜੀਠਾ ਹਲਕੇ ਤੋਂ ਚੋਣ ਲੜਨ ਲਈ ਨਾਮਜ਼ਦਗੀ ਦਾਖਲ ਕੀਤੀ ਸੀ। ਗੁਨੀਵ ਕੌਰ ਦਾ ਸਬੰਧ ਡੇਰਾ ਬਿਆਸ ਦੇ ਪਰਿਵਾਰ ਨਾਲ ਜੁੜਿਆ ਹੈ। ਗੁਨੀਵ ਕੌਰ ਨੂੰ ਬਿਕਰਮ ਮਜੀਠੀਆ ਹਾਊਸ ਵਾਈਫ ਦੱਸਦੇ ਰਹੇ ਹਨ। ਇਸ ਤੋਂ ਪਹਿਲਾਂ ਉਹਨਾਂ ਨੇ ਕਦੇ ਕੋਈ ਚੋਣ ਨਹੀਂ ਲੜੀ।
ਮਜੀਠੀਆ ਨੇ ਕਿਹਾ ਕਿ ਉਹਨਾਂ ਨੇ ਇਹ ਫੈਸਲਾ ਇਸ ਲਈ ਲਿਆ ਹੈ, ਕਿਉਂਕਿ ਚੋਣ ਜਿੱਤਣ ਤੋਂ ਬਾਅਦ ਵੀ ਉਹਨਾਂ ਨੇ ਇੱਕ ਹੀ ਹਲਕਾ ਚੁਣਨਾ ਹੈ। ਉਹ ਚੋਣਾਂ ਤੋਂ ਪਹਿਲਾਂ ਹੀ ਈਸਟ ਹਲਕੇ ਦੇ ਵੋਟਰਾਂ ਨੂੰ ਦੱਸ ਦੇਣਾ ਚਾਹੁੰਦੇ ਹਨ ਕਿ ਈਸਟ ਹਲਕਾ ਉਹਨਾਂ ਲਈ ਮੁੱਖ ਰਹੇਗਾ।
The election is also about breaking the arrogance of @INCPunjab chief @sherryontopp. I will teach him to respect people. You will see that he will start to love people, learn to respect elders, and stop making statements in the air, and descend to the level of the common man. 2/2
— Bikram Singh Majithia (@bsmajithia) February 1, 2022
ਵਿਕਾਸ ਦੇ ਮੁੱਦੇ ‘ਤੇ ਲੜਾਈ ਲੜਾਂਗਾ- ਮਜੀਠੀਆ
ਮਜੀਠੀਆ ਨੇ ਕਿਹਾ, “ਮੈਂ ਈਸਟ ਹਲਕੇ ਵਿੱਚ ਝਗੜੇ ਅਤੇ ਈਰਖਾ ਦੀ ਸਿਆਸਤ ਨੂੰ ਖਤਮ ਕਰਨਾ ਚਾਹੁੰਦਾ ਹਾਂ। ਸਿੱਧੂ ਵਿੱਚ ‘ਮੈਂ’ ਬਹੁਤ ਹੈ। ਮੈਂ ਉਹਨਾਂ ਨੂੰ ਪਿਆਰ ਸਮਝਾਉਣਾ ਚਾਹੁੰਦਾ ਹਾਂ, ਪਰ ਮੈਂ ਲੜਾਈ ਵਿਕਾਸ ਦੀ ਹੀ ਲੜਾਂਗਾ। ਸਿੱਧੂ ਨੇ 18 ਸਾਲ ਹਲਕੇ ਵਿੱਚ ਲਗਾ ਦਿੱਤੇ, ਪਰ ਲੋਕਾਂ ਦਾ ਇੱਕ ਵੀ ਵਾਅਦਾ ਪੂਰਾ ਨਹੀਂ ਕੀਤਾ।“ ਮਜੀਠੀਆ ਨੇ ਕਿਹਾ ਕਿ ਉਹ ਵਾਅਦਾ ਕਰਦੇ ਹਨ ਕਿ ਮਜੀਠਾ ਵਰਗਾ ਵਿਕਾਸ ਅੰਮ੍ਰਿਤਸਰ ਈਸਟ ਵਿੱਚ ਕਰਨਗੇ।
‘ਠੋਕੋ ਤਾਲੀ’ ਤੋਂ ‘ਸਿੱਧੂ ਸਾਬ੍ਹ’ ਤੱਕ ਪਹੁੰਚੇ ਮਜੀਠੀਆ
ਦਿਲਚਸਪ ਹੈ ਕਿ ਇਸ ਪ੍ਰੈੱਸ ਕਾਨਫ਼ਰੰਸ ਦੌਰਾਨ ਮਜੀਠੀਆ ਨੇ ਪਹਿਲੀ ਵਾਰ ਨਵਜੋਤ ਸਿੰਘ ਸਿੱਧੂ ਨੂੰ ‘ਠੋਕੋ ਤਾਲੀ’ ਦੀ ਥਾਂ ‘ਸਿੱਧੂ ਸਾਬ੍ਹ’ ਕਿਹਾ। ਉਹਨਾਂ ਦਾ ਕਹਿਣਾ ਹੈ ਕਿ ਉਹ ਸਿੱਧੂ ਨੂੰ ਪਿਆਰ ਕਰਨਾ ਸਿਖਾਉਣਗੇ। ਉਹਨਾਂ ਨੇ ਕੁਝ ਪੁਰਾਣੀਆਂ ਤਸਵੀਰਾਂ ਨੂੰ ਵੀ ਸਾਂਝਾ ਕੀਤਾ, ਜਿਹਨਾਂ ਵਿੱਚ ਉਹ ਸਿੱਧੂ ਨੂੰ ਜੱਫੀ ਪਾ ਰਹੇ ਹਨ। ਉਹਨਾਂ ਕਿਹਾ ਕਿ ਸਿੱਧੂ ਮੁੰਬਈ ਜਾ ਕੇ ਹੱਸ ਕੇ ਪੈਸੇ ਲਿਆਂਦੇ ਸਨ, ਪਰ ਇਥੇ ਉਹ ਉਹਨਾਂ ਨੂੰ ਅਸਲ ਵਿੱਚ ਹਸਣਾ ਸਿਖਾਉਣਗੇ।
ਸਿੱਧੂ ਨੇ ਦਿੱਤਾ ਸੀ ਮਜੀਠੀਆ ਨੂੰ ਚੈਲੇਂਜ
ਮਜੀਠੀਆ ਨੇ ਪਹਿਲਾਂ ਮਜੀਠਾ ਅਤੇ ਅੰਮ੍ਰਿਤਸਰ ਈਸਟ ਦੋਵੇਂ ਸੀਟਾਂ ਤੋਂ ਪਰਚਾ ਦਾਖਲ ਕੀਤਾ ਸੀ, ਪਰ ਸਿੱਧੂ ਇਸੇ ਨੂੰ ਮੁੱਦਾ ਬਣਾ ਕੇ ਉਹਨਾਂ ਨੂੰ ਘੇਰਨ ਦੀ ਕੋਸ਼ਿਸ਼ ਕਰ ਰਹੇ ਸਨ। ਸਿੱਧੂ ਨੇ ਕਿਹਾ ਸੀ ਕਿ ਮਜੀਠੀਆ ‘ਚ ਹਿੰਮਤ ਹੈ, ਤਾਂ ਉਹ ਮਜੀਠਾ ਛੱਡ ਕੇ ਸਿਰਫ਼ ਅੰਮ੍ਰਿਤਸਰ ਈਸਟ ਤੋਂ ਲੜ ਕੇ ਵਿਖਾਉਣ। ਮਜੀਠੀਆ ਨੇ ਸਿੱਧੂ ਦਾ ਚੈਲੇਂਜ ਕਬੂਲ ਕੀਤਾ ਅਤੇ ਹੁਣ ਸਿੱਧੂ ਦੀ ਮੁਸ਼ਕਿਲ ਵਧਣਾ ਤੈਅ ਹੈ।
ਅੰਮ੍ਰਿਤਸਰ ਈਸਟ ਸਭ ਤੋਂ ਹੌਟ ਸੀਟ
2017 ਦੀਆਂ ਵਿਧਾਨ ਸਭਾ ਚੋਣਾਂ ਦੌਰਾਨ ਲੰਬੀ ਅਤੇ ਜਲਾਲਾਬਾਦ ‘ਚ ਕਈ ਦਿੱਗਜ ਆਹਮੋ-ਸਾਹਮਣੇ ਸਨ। ਲੰਬੀ ਵਿੱਚ ਪ੍ਰਕਾਸ਼ ਸਿੰਘ ਬਾਦਲ ਨੂੰ ਟੱਕਰ ਦੇਣ ਲਈ ਖੁਦ ਕੈਪਟਨ ਅਮਰਿੰਦਰ ਸਿੰਘ ਮੈਦਾਨ ‘ਚ ਉਤਰੇ ਸਨ, ਤਾਂ ਜਲਾਲਾਬਾਦ ਵਿੱਚ ਸੁਖਬੀਰ ਬਾਦਲ ਖਿਲਾਫ਼ ‘ਆਪ’ ਵੱਲੋਂ ਭਗਵੰਤ ਮਾਨ ਅਤੇ ਕਾਂਗਰਸ ਵੱਲੋਂ ਰਵਨੀਤ ਬਿੱਟੂ ਚੋਣ ਲੜੇ ਸਨ। ਹਾਲਾਂਕਿ ਇਸ ਵਾਰ ਲਗਭਗ ਸਾਰੇ ਦਿੱਗਜ ਸੇਫ ਸੀਟਾਂ ਤੋਂ ਚੋਣ ਲੜ ਰਹੇ ਹਨ। ਸਿਰਫ਼ ਅੰਮ੍ਰਿਤਸਰ ਈਸਟ ‘ਤੇ ਹੀ 2 ਦਿੱਗਜਾਂ ਵਿਚਕਾਰ ਸਿੱਧਾ ਮੁਕਾਬਲਾ ਵੇਖਣ ਨੂੰ ਮਿਲ ਰਿਹਾ ਹੈ।
ਇਹ ਮੁਕਾਬਲਾ ਪਹਿਲਾਂ ਤੈਅ ਨਹੀਂ ਸੀ। ਮਜੀਠੀਆ ਸਿਰਫ਼ ਮਜੀਠਾ ਤੋਂ ਚੋਣ ਲੜ ਰਹੇ ਸਨ। ਹਾਲਾਂਕਿ ਪੰਜਾਬ ਚੋਣਾਂ ਵਿੱਚ ਹਮਲਾਵਰ ਰੁਖ ਵਿਖਾਉਣ ਦੇ ਨਾਲ-ਨਾਲ ਸਿੱਧੂ ਨੂੰ ਅੰਮ੍ਰਿਤਸਰ ਈਸਟ ਵਿੱਚ ਹੀ ਘੇਰਨ ਲਈ ਸੁਖਬੀਰ ਬਾਦਲ ਨੇ ਅਚਾਨਕ ਮਜੀਠੀਆ ਨੂੰ ਅੰਮ੍ਰਿਤਸਰ ਈਸਟ ਤੋਂ ਚੋਣ ਲੜਵਾਉਣ ਦਾ ਐਲਾਨ ਕਰ ਦਿੱਤਾ ਅਤੇ ਹੁਣ ਜੇਕਰ ਮਜੀਠੀਆ ਸਿਰਫ਼ ਅੰਮ੍ਰਿਤਸਰ ਈਸਟ ਤੋਂ ਚੋਣ ਲੜਦੇ ਹਨ, ਤਾਂ ਇਹ ਲੜਾਈ ਹੋਰ ਤਲਖ ਹੋ ਸਕਦੀ ਹੈ।
