ਚੰਡੀਗੜ੍ਹ। ਕੋਰੋਨਾ ਕਾਲ ਵਿੱਚ ਗਰੀਬਾਂ ਦੇ ਮਸੀਹਾ ਬਣ ਕੇ ਸੁਰਖੀਆਂ ਵਿੱਚ ਰਹੇ ਸੋਨੂੰ ਸੂਦ ਪੰਜਾਬ ਦੀਆਂ ਵਿਧਾਨ ਸਭਾ ਚੋਣਾਂ ਤੋਂ ਪਹਿਲਾਂ ਸੂਬੇ ਦੀ ਸਿਆਸਤ ਵਿੱਚ ਐਂਟਰੀ ਕਰਨ ਲਈ ਪੂਰੀ ਤਰ੍ਹਾਂ ਤਿਆਰ ਹਨ। ਹਾਲਾਂਕਿ ਸੋਨੂੰ ਨੇ ਹਾਲੇ ਤੱਕ ਪੱਤੇ ਨਹੀਂ ਖੋਲ੍ਹੇ ਹਨ। ਫਿਲਹਾਲ ਉਹਨਾਂ ਨੇ ਸਿਰਫ਼ ਆਪਣੀ ਭੈਣ ਮਾਲਵਿਕਾ ਦੇ ਚੋਣ ਮੈਦਾਨ ਵਿੱਚ ਉਤਰਨ ਦਾ ਐਲਾਨ ਕੀਤਾ ਹੈ। ਸੋਨੂੰ ਨੇ ਕਿਹਾ ਕਿ ਮਾਲਵਿਕਾ ਸੂਦ ਮੋਗਾ ਤੋਂ ਚੋਣ ਲੜਨਗੇ, ਪਰ ਪਾਰਟੀ ਫਿਲਹਾਲ ਤੈਅ ਨਹੀਂ ਹੈ, ਪਰ ਜਲਦ ਹੀ ਇਸ ‘ਤੇ ਫ਼ੈਸਲਾ ਹੋ ਜਾਵੇਗਾ।
ਮੇਰੇ ਲਈ ਸਿਆਸਤ ਦੇ ਰਾਹ ਖੁੱਲ੍ਹੇ- ਸੋਨੂੰ
ਸੋਨੂੰ ਸੂਦ ਤੋਂ ਜਦੋਂ ਉਹਨਾਂ ਦੇ ਸਿਆਸਤ ਵਿੱਚ ਆਉਣ ਬਾਰੇ ਸਵਾਲ ਕੀਤਾ ਗਿਆ, ਤਾਂ ਉਹਨਾਂ ਕਿਹਾ ਕਿ ਭੈਣ ਦਾ ਚੋਣ ਲੜਨਾ ਪਹਿਲਾ ਕਦਮ ਹੈ। ਇਸ ਤੋਂ ਬਾਅਦ ਉਹ ਅੱਗੇ ਵਧਦੇ ਜਾਣਗੇ। ਸੋਨੂੰ ਨੇ ਇਸ ਦੌਰਾਨ ਪੰਜਾਬ ਦੇ ਮੁੱਖ ਮੰਤਰੀ ਚਰਨਜੀਤ ਸਿੰਘ ਚੰਨੀ ਅਤੇ ਦਿੱਲੀ ਦੇ ਮੁੱਖ ਮੰਤਰੀ ਅਰਵਿੰਦ ਕੇਜਰੀਵਾਲ ਦੀ ਤਾਰੀਫ਼ ਕੀਤੀ। ਨਾਲ ਹੀ ਕਿਹਾ ਕਿ ਉਹ ਜਲਦ ਅਕਾਲੀ ਦਲ ਦੇ ਪ੍ਰਧਾਨ ਸੁਖਬੀਰ ਬਾਦਲ ਨਾਲ ਵੀ ਮੁਲਾਕਾਤ ਕਰਨਗੇ।
ਦਰਅਸਲ, ਸੋਨੂੰ ਸੂਦ ਦੇ ਪਹਿਲਾਂ ਆਮ ਆਦਮੀ ਪਾਰਟੀ ਵਿੱਚ ਸ਼ਾਮਲ ਹੋਣ ਦੀਆਂ ਅਟਕਲਾਂ ਸਨ। ਉਹਨਾਂ ਨੂੰ ‘ਆਪ’ ਦੇ ਸੀਐੱਮ ਚਿਹਰੇ ਵਜੋਂ ਵੀ ਵੇਖਿਆ ਜਾ ਰਿਹਾ ਸੀ। ਹਾਲਾਂਕਿ ਇਸ ਬਾਰੇ ਪੁੱਛੇ ਸਵਾਲ ‘ਤੇ ਸੋਨੂੰ ਨੇ ਕਿਹਾ ਕਿ ਅਜਿਹਾ ਕੁਝ ਕਹਿਣਾ ਹਾਲੇ ਜਲਦਬਾਜ਼ੀ ਹੋਵੇਗੀ। ਇਹਨਾਂ ਸਾਰੀਆਂ ਅਟਕਲਾਂ ਵਿਚਾਲੇ 2 ਦਿਨ ਪਹਿਲਾਂ ਸੋਨੂੰ ਅਚਾਨਕ ਚੰਡੀਗੜ੍ਹ ਵਿੱਚ ਸੀਐੱਮ ਚਰਨਜੀਤ ਚੰਨੀ ਨਾਲ ਮੁਲਾਕਾਤ ਕਰਨ ਲਈ ਪਹੁੰਚ ਗਏ ਸਨ, ਜਿਸ ਤੋਂ ਬਾਅਦ ਉਹਨਾਂ ਦੇ ਕਾਂਗਰਸ ਵਿੱਚ ਸ਼ਾਮਲ ਹੋਣ ਦੀਆਂ ਚਰਚਾਵਾਂ ਨੇ ਜ਼ੋਰ ਫੜ ਲਿਆ। ਸੋਨੂੰ ਨੇ ਕਿਹਾ ਕਿ ਉਹਨਾਂ ਨੇ ਇਸ ਬਾਰੇ ਫਿਲਹਾਲ ਕੋਈ ਫ਼ੈਸਲਾ ਨਹੀਂ ਲਿਆ ਹੈ। ਪਰ ਉਹਨਾਂ ਨੇ ਆਪਣੇ ਲਈ ਸਿਆਸਤ ਦਾ ਰਸਤਾ ਖੁੱਲ੍ਹਿਆ ਹੋਣ ਦੀ ਗੱਲ ਕਹਿ ਦਿੱਤੀ।
ਭੈਣ ਮਾਲਵਿਕਾ ਦੇ ਕੰਮ ਦੀ ਕੀਤੀ ਤਾਰੀਫ਼
ਸੋਨੂੰ ਸੂਦ ਨੇ ਇਸ ਦੌਰਾਨ ਆਪਣੀ ਭੈਣ ਮਾਲਵਿਕਾ ਸੂਦ ਦੇ ਕੰਮ ਦੀ ਜੰਮ ਕੇ ਤਾਰੀਫ਼ ਕੀਤੀ। ਸੋਨੂੰ ਨੇ ਕਿਹਾ ਕਿ ਉਹਨਾਂ ਨੂੰ ਉਮੀਦ ਹੈ ਕਿ ਮਾਲਵਿਕਾ ਪੰਜਾਬ ਦੀ ਸੇਵਾ ਕਰਨਗੇ। ਉਹਨਾਂ ਕਿਹਾ, “ਫਿਲਹਾਲ ਇਹ ਤੈਅ ਨਹੀਂ ਕਿ ਕਿਹੜੀ ਪਾਰਟੀ ਤੋਂ ਉਹ ਚੋਣ ਲੜਨਗੇ, ਪਰ ਪਾਰਟੀ ਤੋਂ ਵੱਧ ਸੋਚ ਜ਼ਰੂਰੀ ਹੈ। ਮਾਲਵਿਕਾ ਲੋਕਾਂ ਦੇ ਦਿੱਤੇ ਅਹੁਦੇ ‘ਤੇ ਖਰੇ ਉਤਰਣਗੇ।” ਉਹਨਾਂ ਕਿਹਾ ਕਿ ਸਮਾਂ ਆਉਣ ‘ਤੇ ਪਾਰਟੀ ਦਾ ਨਾਂਅ ਵੀ ਦੱਸ ਦਿੱਤਾ ਜਾਵੇਗਾ।
