December 10, 2022
(Shimla)
ਹਿਮਾਚਲ ਪ੍ਰਦੇਸ਼ ਵਿੱਚ ਲੰਮੀ ਚੱਲੀ ਖਿੱਚੋਤਾਣ ਤੋਂ ਬਾਅਦ ਆਖਰਕਾਰ ਮੁੱਖ ਮੰਤਰੀ ਦੇ ਨਾਂਅ ਦਾ ਐਲਾਨ ਕਰ ਦਿੱਤਾ ਗਿਆ। ਸੁਖਵਿੰਦਰ ਸਿੰਘ ਸੁੱਖੂ ਹਿਮਾਚਲ ਪ੍ਰਦੇਸ਼ ਦੇ ਨਵੇਂ ਮੁੱਖ ਮੰਤਰੀ ਹੋਣਗੇ। ਸ਼ਨੀਵਾਰ ਸ਼ਾਮ ਨੂੰ ਕਾਂਗਰਸ ਵਿਧਾਇਕ ਦਲ ਦੀ ਬੈਠਕ ਤੋਂ ਬਾਅਦ ਉਹਨਾਂ ਦੇ ਨਾਂਅ ਦਾ ਐਲਾਨ ਕਰ ਦਿੱਤਾ ਗਿਆ।
ਓਧਰ ਪ੍ਰਤਿਭਾ ਸਿੰਘ ਦੇ ਧੜੇ ਨੂੰ ਡਿਪਟੀ ਸੀਐੱਮ ਦੇ ਅਹੁਦੇ ‘ਤੇ ਸਬਰ ਕਰਨਾ ਪਿਆ। ਪ੍ਰਤਿਭਾ ਸਿੰਘ ਦੇ ਧੜੇ ਤੋਂ ਮੁਕੇਸ਼ ਅਗਨੀਹੋਤਰੀ ਉਪ ਮੁੱਖ ਮੰਤਰੀ ਬਣਾਏ ਜਾਣਗੇ।
CLP ਮੀਟਿੰਗ ਤੋਂ ਬਾਅਦ ਕਾਂਗਰਸ ਦੇ ਆਗੂ ਰਾਜਪਾਲ ਨੂੰ ਮਿਲਣ ਪਹੁੰਚੇ ਅਤੇ ਸਰਕਾਰ ਬਣਾਉਣ ਦਾ ਦਾਅਵਾ ਪੇਸ਼ ਕੀਤਾ। ਹੁਣ ਐਤਵਾਰ ਦੁਪਹਿਰ 2 ਵਜੇ ਨਵੀਂ ਸਰਕਾਰ ਦਾ ਸਹੁੰ ਚੁੱਕ ਸਮਾਗਮ ਹੋਵੇਗਾ।
ਸਾਂਸਦ ਹੋਣ ਦੇ ਚਲਦੇ ਕਮਜ਼ੋਰ ਪਈ ਪ੍ਰਤਿਭਾ ਦਾ ਦਾਅਵੇਦਾਰੀ
ਕਾਂਗਰਸ ਨੂੰ ਬਹੁਮਤ ਮਿਲਣ ਦੇ ਨਾਲ ਹੀ ਪ੍ਰਤਿਭਾ ਸਿੰਘ ਨੇ ਸੀਐੱਮ ਅਹੁਦੇ ‘ਤੇ ਦਾਅਵੇਦਾਰੀ ਜਤਾਉਣੀ ਸ਼ੁਰੂ ਕਰ ਦਿੱਤੀ, ਪਰ ਸਾਂਸਦ ਹੋਣ ਦੇ ਚਲਦੇ ਪ੍ਰਤਿਭਾ ਸਿੰਘ ਦਾ ਨਾਂਅ ਸੀਐੱਮ ਦੀ ਰੇਸ ਤੋਂ ਬਾਹਰ ਹੋ ਗਿਆ। ਉਹ ਮੰਡੀ ਸੀਟ ਤੋਂ ਸਾਂਸਦ ਹਨ। ਵਿਧਾਨ ਸਭਾ ਚੋਣਾਂ ਵਿੱਚ ਮੰਡੀ ਜ਼ਿਲ੍ਹੇ ਦੀਆਂ 10 ਸੀਟਾਂ ਵਿੱਚੋਂ ਕਾਂਗਰਸ 1 ਸੀਟ ਹੀ ਜਿੱਤ ਸਕੀ। ਅਜਿਹੇ ਵਿੱਚ ਕਾਂਗਰਸ ਇਥੇ ਜ਼ਿਮਨੀ ਚੋਣ ਦਾ ਰਿਸਕ ਨਹੀਂ ਲੈਣਾ ਚਾਹੁੰਦੀ। ਨਾਲ ਹੀ ਪ੍ਰਤਿਭਾ ਸਿੰਘ ਨੂੰ ਸੀਐੱਮ ਬਣਾਉਣ ਲਈ ਵਿਧਾਇਕ ਅਹੁਦੇ ਦੀ ਚੋਣ ਲੜਾਉਣੀ ਪਏਗੀ। ਅਜਿਹੇ ਵਿੱਚ ਕਾਂਗਰਸ 2 ਜ਼ਿਮਨੀ ਚੋਣ ਕਰਵਾਉਣ ਦੇ ਮੂਡ ਵਿੱਚ ਨਹੀਂ ਹੈ।
ਪ੍ਰਤਿਭਾ ਸਿੰਘ ਦਾ ਦਬਾਅ ਕੰਮ ਨਹੀਂ ਆਇਆ
ਸਾਂਸਦ ਹੋਣ ਦੇ ਚਲਦੇ ਪ੍ਰਤਿਭਾ ਸਿੰਘ ਦਾ ਨਾਂਅ ਸੀਐੱਮ ਦੀ ਰੇਸ ਤੋਂ ਬਾਹਰ ਹੋ ਗਿਆ। ਉਸ ਤੋਂ ਬਾਅਦ ਪ੍ਰਤਿਭਾ ਸਿੰਘ ਆਪਣੇ ਧੜੇ ਦੇ ਮੁਕੇਸ਼ ਅਗਨੀਹੋਤਰੀ ਨੂੰ ਮੁੱਖ ਮੰਤਰੀ ਬਣਾਉਣ ‘ਤੇ ਅੜ ਗਈ, ਪਰ ਇਸ ‘ਤੇ ਵੀ ਸਹਿਮਤੀ ਨਹੀਂ ਬਣੀ ਅਤੇ ਪ੍ਰਤਿਭਾ ਸਿੰਘ ਦੇ ਧੜੇ ਨੂੰ ਡਿਪਟੀ ਸੀਐੱਮ ਦੇ ਅਹੁਦੇ ਨਾਲ ਹੀ ਸਬਰ ਕਰਨਾ ਪਿਆ।
ਕੌਣ ਹੈ ਸੁਖਵਿੰਦਰ ਸਿੰਘ ਸੁੱਖੂ..?
ਸੁਖਵਿੰਦਰ ਸਿੰਘ ਸੁੱਖੂ ਹਿਮਾਚਲ ਪ੍ਰਦੇਸ਼ ਕਾਂਗਰਸ ਦੇ ਦਿੱਗਜ ਲੀਡਰ ਹੈ। ਉਹ ਚੌਥੀ ਵਾਰ ਵਿਧਾਇਕ ਚੁਣ ਕੇ ਪਹੁੰਚੇ ਹਨ। ਮੂਲ ਰੂਪ ਨਾਲ ਹਮੀਰਪੁਰ ਜ਼ਿਲ੍ਹੇ ਦੇ ਨਾਦੌਨ ਦੇ ਰਹਿਣ ਵਾਲੇ ਸੁੱਖੂ ਨੇ ਸਟੂਡੈਂਟ ਪਾਲੀਟਿਕਸ ਤੋਂ ਆਪਣੇ ਕਰੀਅਰ ਦੀ ਸ਼ੁਰੂਆਤ ਕੀਤੀ। ਉਹ ਕਾਲਜ ਦੇ ਦਿਨਾਂ ਵਿੱਚ ਕਾਂਗਰਸ ਦੀ ਵਿਿਦਆਰਥੀ ਜਥੇਬੰਦੀ ਨੈਸ਼ਨਲ ਸਟੂਡੈਂਟ ਯੂਨੀਅਨ ਆਫ ਇੰਡੀਆ(NSUI) ਨਾਲ ਜੁੜੇ ਸਨ। 1989 ਵਿੱਚ ਉਹ NSUI ਦੀ ਸੂਬਾ ਇਕਾਈ ਦੇ ਪ੍ਰਧਾਨ ਚੁਣੇ ਗਏ।
1998-2008 ਦੇ ਵਿਚਕਾਰ ਸੁਖਵਿੰਦਰ ਸੁੱਖੂ ਨੇ ਹਿਮਾਚਲ ਕਾਂਗਰਸ(ਯੂਥ) ਦੇ ਪ੍ਰਧਾਨ ਦੇ ਤੌਰ ‘ਤੇ ਵੀ ਕੰਮ ਕੀਤਾ। ਯੂਥ ਕਾਂਗਰਸ ਵਿੱਚ ਆਪਣੇ ਕਾਰਜਕਾਲ ਤੋਂ ਬਾਅਦ ਉਹ 2008 ਵਿੱਚ ਸੂਬਾ ਕਾਂਗਰਸ ਕਮੇਟੀ ਦੇ ਸਕੱਤਰ ਬਣੇ। ਸੁੱਖੂ ਨੂੰ ਬਾਅਦ ਵਿੱਚ ਆਪਣੇ ਪਾਰਟੀ ਪ੍ਰਬੰਧਨ ਅਤੇ ਪ੍ਰਸਿੱਧੀ ਕਾਰਨ ਪਾਰਟੀ ਦਾ ਸੂਬਾ ਪ੍ਰਧਾਨ ਬਣਾਇਆ ਗਿਆ।
