ਬਿਓਰੋ। ਪੰਜਾਬ ਕਾਂਗਰਸ ਵਿੱਚ ਚੱਲ ਰਹੀ ਲੜਾਈ ਹੁਣ ਨਵੇਂ ਮੋੜ ‘ਤੇ ਹੈ। 4 ਮੰਤਰੀਆਂ ਸਣੇ ਕਰੀਬ 30 ਵਿਧਾਇਕਾਂ ਦੀ ਕੈਪਟਨ ਖਿਲਾਫ਼ ਖੁੱਲ੍ਹੀ ਬਗਾਵਤ ਦੇ ਚਲਦੇ ਕਾਂਗਰਸ ਵਿੱਚ ਜ਼ਬਰਦਸਤ ਹਲਚਲ ਹੈ। ਅੰਦਰਖਾਤੇ ਦੋਵੇਂ ਧੜੇ ਆਪੋ-ਆਪਣੀ ਰਣਨੀਤੀ ਬਣਾਉਣ ‘ਚ ਜੁਟੇ ਹਨ।
ਦਿਲਚਸਪ ਹੈ ਕਿ ਬਗਾਵਤ ਦਾ ਬਿਗੁਲ ਵਜਾਉਣ ਵਾਲੇ ਰੰਧਾਵਾ ਦਾ ਕੁਝ ਵੀ ਘੰਟਿਆਂ ਬਾਅਦ ਕੈਪਟਨ ਨਾਲ ਸਾਹਮਣਾ ਵੀ ਹੋ ਗਿਆ। ਦਰਅਸਲ, ਗੰਨਾ ਕਿਸਾਨਾਂ ਦੇ ਨਾਲ ਸੀਐੱਮ ਦੀ ਬੈਠਕ ਵਿੱਚ ਸਹਿਕਾਰਤਾ ਮੰਤਰੀ ਦੇ ਨਾਤੇ ਰੰਧਾਵਾ ਵੀ ਪਹੁੰਚੇ ਸਨ। ਸਿੱਧੂ ਧੜੇ ਤੋਂ ਰੰਧਾਵਾ ਇਕਲੌਤੇ ਸਨ, ਜੋ ਬੈਠਕ ਵਿੱਚ ਸ਼ਾਮਲ ਸਨ, ਜਦਕਿ ਬਾਕੀ ਸਾਰੇ ਕੈਪਟਨ ਦੇ ਕਰੀਬੀ ਬੈਠਕ ਵਿੱਚ ਮੌਜੂਦ ਸਨ।
ਕੈਪਟਨ ਤੋਂ ਦੂਰ ਬੈਠੇ ਰੰਧਾਵਾ
ਮੰਤਰੀ ਹੋਣ ਦੇ ਨਾਤੇ ਸੁਖਜਿੰਦਰ ਰੰਧਾਵਾ ਨੇ ਕੈਪਟਨ ਦੇ ਨਾਲ ਵਾਲੀ ਕੁਰਸੀ ‘ਤੇ ਬੈਠਣਾ ਸੀ, ਪਰ ਉਹ ਉਹਨਾਂ ਤੋਂ ਕਾਫੀ ਦੂਰ ਬੈਠੇ। ਸੀਐੱਮ ਦੇ ਨਾਲ ਇੱਕ ਪਾਸੇ ਪ੍ਰਤਾਪ ਬਾਜਵਾ ਅਤੇ ਦੂਜੇ ਪਾਸੇ ਫਤਿਹਜੰਗ ਬਾਜਵਾ ਬੈਠੇ ਸਨ। ਸੂਤਰਾਂ ਦੀ ਮੰਨੀਏ, ਤਾਂ ਬੈਠਕ ਵਿੱਚ ਕੈਪਟਨ ਅਤੇ ਰੰਧਾਵਾ ਵਿਚਾਲੇ ਕੋਈ ਗੱਲ ਨਹੀਂ ਹੋਈ ਅਤੇ ਦੋਵਾਂ ਵਿਚਾਲੇ ਤਲਖੀ ਸਾਫ ਨਜ਼ਰ ਆਈ। ਇਥੋਂ ਤੱਕ ਕਿ ਜਦੋਂ ਮੀਟਿੰਗ ਵਿੱਚ ਕਿਸਾਨ ਆਗੂਆਂ ਨੇ ਗੰਨੇ ਦਾ ਰੇਟ ਵਧਾਉਣ ‘ਤੇ ਸੀਐੱਮ ਦਾ ਮੂੰਹ ਮਿੱਠਾ ਕਰਵਾਇਆ, ਉਸ ਵੇਲੇ ਵੀ ਰੰਧਾਵਾ ਨਾਲ ਨਜ਼ਰ ਨਹੀਂ ਆਏ।
ਦਿੱਲੀ ਜਾਣ ਦੀ ਤਿਆਰੀ ‘ਚ ਬਾਗੀ ਆਗੂ
ਕੈਪਟਨ ਖਿਲਾਫ਼ ਮੋਰਚਾ ਖੋਲ੍ਹਣ ਵਾਲੇ ਮੰਤਰੀਆਂ ਵਿੱਚ ਸੁਖਜਿੰਦਰ ਰੰਧਾਵਾ, ਚਰਨਜੀਤ ਚੰਨੀ, ਤ੍ਰਿਪਤ ਰਜਿੰਦਰ ਸਿੰਘ ਬਾਜਵਾ ਅਤੇ ਸੁਖਬਿੰਦਰ ਸਿੰਘ ਸੁਖ ਸਰਕਾਰੀਆ ਸ਼ਾਮਲ ਹਨ। ਇਹ ਸਾਰੇ ਮੰਤਰੀ ਜਲਦ ਹੀ ਹਾਈਕਮਾਂਡ ਨਾਲ ਮੁਲਾਕਾਤ ਕਰਕੇ ਕੈਪਟਨ ਨੂੰ ਹਟਾਉਣ ਦੀ ਮੰਗ ਕਰਨਗੇ।
