ਬਿਓਰੋ। ਪੰਜਾਬ ਦੀਆਂ ਵਿਧਾਨ ਸਭਾ ਚੋਣਾਂ ਤੋਂ ਪਹਿਲਾਂ ਸੂਬਾ ਕਾਂਗਰਸ ਦੇ ਸਾਬਕਾ ਪ੍ਰਧਾਨ ਸੁਨੀਲ ਜਾਖੜ ਨੇ ਇੱਕ ਵੱਡਾ ਦਾਅਵਾ ਕੀਤਾ ਹੈ। ਜਾਖੜ ਦਾ ਦਾਅਵਾ ਹੈ ਕਿ ਕੈਪਟਨ ਨੂੰ ਸੀਐੱਮ ਦੀ ਕੁਰਸੀ ਤੋਂ ਹਟਾਏ ਜਾਣ ਤੋਂ ਬਾਅਦ ਕਾਂਗਰਸ ਦੇ 42 ਵਿਧਾਇਕ ਉਹਨਾਂ ਨੂੰ ਸੀਐੱਮ ਬਣਾਉਣ ਦੇ ਹੱਕ ਵਿੱਚ ਸਨ, ਜਦਕਿ ਚਰਨਜੀਤ ਚੰਨੀ ਨੂੰ ਸਿਰਫ਼ 2 ਵਿਧਾਇਕਾਂ ਦਾ ਸਮਰਥਨ ਸੀ। ਅਬੋਹਰ ਵਿੱਚ ਕਾਂਗਰਸ ਉਮੀਦਵਾਰ ਲਈ ਪ੍ਰਚਾਰ ਦੇ ਦੌਰਾਨ ਜਾਖੜ ਨੇ ਇਹ ਦਾਅਵਾ ਕੀਤਾ।
ਸੁਨੀਲ ਜਾਖੜ ਦੇ ਦਾਅਵੇ ਮੁਤਾਬਕ, ਜਦੋਂ ਕਾਂਗਰਸ ਵੱਲੋਂ ਨਵੇਂ ਸੀਐੱਮ ਦੀ ਚੋਣ ਕੀਤੀ ਜਾਣੀ ਸੀ, ਤਾਂ 79 ਵਿਧਾਇਕਾਂ ਨੂੰ ਫੋਨ ਕਰਕੇ ਉਹਨਾਂ ਦੀ ਰਾਏ ਮੰਗੀ ਗਈ। ਇਹਨਾਂ ਫੋਨ ਕਾਲਾਂ ਦੌਰਾਨ, ਜਾਖੜ ਮੁਤਾਬਕ:-
- 42 ਵਿਧਾਇਕਾਂ ਨੇ ਸੁਨੀਲ ਜਾਖੜ ਨੇ ਹੱਕ ‘ਚ ਵੋਟ ਦਿੱਤੀ।
- 16 ਵਿਧਾਇਕਾਂ ਨੇ ਸੁਖਜਿੰਦਰ ਸਿੰਘ ਰੰਧਾਵਾ ਦਾ ਨਾਂਅ ਲਿਆ।
- 12 ਵਿਧਾਇਕਾਂ ਨੇ ਕੈਪਟਨ ਦੀ ਪਤਨੀ ਮਹਾਂਰਾਣੀ ਪ੍ਰਨੀਤ ਕੌਰ ਦੇ ਹੱਕ ‘ਚ ਵੋਟ ਕੀਤੀ।
- 6 ਵਿਧਾਇਕਾਂ ਨੇ ਨਵਜੋਤ ਸਿੰਘ ਸਿੱਧੂ ਨੂੰ CM ਬਣਾਏ ਜਾਣ ਦੀ ਵਕਾਲਤ ਕੀਤੀ।
- ਮਹਿਜ਼ 2 ਵਿਧਾਇਕਾਂ ਨੇ ਚਰਨਜੀਤ ਸਿੰਘ ਚੰਨੀ ਦੇ ਹੱਕ ‘ਚ ਵੋਟ ਕੀਤੀ।
ਇਸ ਤਰ੍ਹਾਂ CM ਬਣਦੇ-ਬਣਦੇ ਰਹਿ ਗਏ ਸਨ ਜਾਖੜ
ਜਾਖੜ ਦੇ ਦਾਅਵਾ ਸਹੀ ਹੈ ਜਾਂ ਗਲਤ, ਇਹ ਤਾਂ ਕਿਹਾ ਨਹੀਂ ਜਾ ਸਕਦਾ। ਪਰ ਇੰਨਾ ਜ਼ਰੂਰ ਹੈ ਕਿ ਸੁਨੀਲ ਜਾਖੜ ਨੂੰ ਸੀਐੱਮ ਬਣਾਏ ਜਾਣ ਲਈ ਹਾਈਕਮਾਂਡ ਹਰੀ ਝੰਡੀ ਦੇ ਚੁੱਕਿਆ ਸੀ। ਹੋ ਸਕਦਾ ਹੈ ਕਿ ਇਸ ਫੈਸਲਾ ਵਿਧਾਇਕਾਂ ਦੀਆਂ ਇਹਨਾਂ ਵੋਟਾਂ ਤੋਂ ਬਾਅਦ ਹੀ ਲਿਆ ਗਿਆ ਹੋਵੇ, ਜਿਸਦਾ ਜਾਖੜ ਦਾਅਵਾ ਕਰ ਰਹੇ ਹਨ।
ਖੈਰ, ਸੁਨੀਲ ਜਾਖੜ ਦਾ CM ਬਣਨਾ ਤੈਅ ਸੀ। ਇਸਦੇ ਲਈ ਉਹਨਾਂ ਨੂੰ ਖਾਸ ਤੌਰ ‘ਤੇ ਬੈਂਗਲੌਰ ਤੋਂ ਵਾਪਸ ਵੀ ਬੁਲਾਇਆ ਗਿਆ, ਪਰ ਇਸ ਵਿਚਾਲੇ ਪਾਰਟੀ ਦੇ ਕੁਝ ਸੀਨੀਅਰ ਆਗੂਆਂ ਖਾਸਕਰ ਅੰਬਿਕਾ ਸੋਨੀ ਵੱਲੋਂ ਸਿੱਖ ਸਟੇਟ-ਸਿੱਖ ਸੀਐੱਮ ਦੀ ਗੱਲ ਕਹੀ ਜਾਣ ਲੱਗੀ। ਇਸੇ ਦੇ ਚਲਦੇ ਸੁਨੀਲ ਜਾਖੜ ਦਾ ਨਾਂਅ ਸੀਐੱਮ ਦੀ ਰੇਸ ‘ਚੋਂ ਬਾਹਰ ਹੋ ਗਿਆ।
ਮੈਨੂੰ ਡਿਪਟੀ CM ਦੀ ਆਫਰ ਦਿੱਤੀ ਗਈ- ਜਾਖੜ
ਸੁਨੀਲ ਜਾਖੜ ਨੇ ਇਸਦੇ ਨਾਲ ਹੀ ਇਹ ਵੀ ਖੁਲਾਸਾ ਕਰ ਦਿੱਤਾ ਕਿ ਉਹਨਾਂ ਨੂੰ ਸੀਐੱਮ ਨਾ ਬਣਾਏ ਜਾਣ ਮਗਰੋਂ ਡਿਪਟੀ ਸੀਐੱਮ ਦਾ ਅਹੁਦਾ ਆਫਰ ਕੀਤਾ ਗਿਆ। ਹਾਲਾਂਕਿ ਉਸਦੇ ਲਈ ਖੁਦ ਜਾਖੜ ਨੇ ਮਨ੍ਹਾਂ ਕਰ ਦਿੱਤਾ। ਜਾਖੜ ਨੇ ਕਿਹਾ ਕਿ ਉਹਨਾਂ ਲਈ ਇਹੀ ਕਾਫੀ ਸੀ ਕਿ ਵਿਧਾਇਕ ਨਾ ਹੋਣ ਦੇ ਬਾਵਜੂਦ ਵੀ ਉਹਨਾਂ ਨੂੰ ਕਈ ਵਿਧਾਇਕਾਂ ਨੇ ਸੀਐੱਮ ਅਹੁਦੇ ਲਈ ਚੁਣਿਆ।
ਰੰਧਾਵਾ ਵੀ ਕਬੂਲ ਚੁੱਕੇ, “ਉਹ ਸਨ CM ਦਾਅਵੇਦਾਰ”
ਕਾਬਿਲੇਗੌਰ ਹੈ ਕਿ ਇਸ ਤੋਂ ਪਹਿਲਾਂ ਡਿਪਟੀ ਸੀਐੱਮ ਸੁਖਜਿੰਦਰ ਸਿੰਘ ਰੰਧਾਵਾ ਵੀ ਕਬੂਲ ਚੁੱਕੇ ਹਨ ਕਿ ਜਾਖੜ ਤੋਂ ਬਾਅਦ ਉਹਨਾਂ ਨੂੰ ਸੀਐੱਮ ਬਣਾਇਆ ਜਾਣਾ ਤੈਅ ਸੀ। ਕਾਂਗਰਸ ਹਾਈਕਮਾਂਡ ਨੇ ਇਸਦੇ ਲਈ ਹਾਂ ਵੀ ਕਰ ਦਿੱਤੀ ਸੀ। ਪਰ ਬਾਅਦ ਵਿੱਚ ਚੰਨੀ ਨੂੰ ਸੀਐੱਮ ਬਣਾ ਦਿੱਤਾ ਗਿਆ। ਸੂਤਰ ਦੱਸਦੇ ਹਨ ਕਿ ਰੰਧਾਵਾ ਦੇ ਨਾਂਅ ‘ਤੇ ਲਗਭਗ ਮੁਹਰ ਲੱਗ ਚੁੱਕੀ ਸੀ, ਜਿਸ ਤੋਂ ਬਾਅਦ ਸਿੱਧੂ ਨੇ ਵੀ ਦਾਅਵਾ ਠੋਕ ਦਿੱਤਾ। ਉਹਨਾਂ ਕਿਹਾ ਕਿ ਜੇਕਰ ਜੱਟ ਸਿੱਖ ਨੂੰ ਹੀ ਸੀਐੱਮ ਬਣਾਉਣਾ ਹੈ, ਤਾਂ ਉਹਨਾਂ ਨੂੰ ਬਣਾਉਣਾ ਚਾਹੀਦਾ ਹੈ, ਜਿਸ ਤੋਂ ਬਾਅਦ ਕਾਂਗਰਸ ਨੇ ਵਿਚਲਾ ਰਾਹ ਵੇਖ ਕੇ ਸੂਬੇ ਦੀ ਕਮਾਨ ਚੰਨੀ ਨੂੰ ਸੌਂਪ ਦਿੱਤੀ।
ਹੁਣ ਸਿਰਫ਼ ਸਿੱਧੂ ਤੇ ਚੰਨੀ ਵਿਚਕਾਰ ਟੱਕਰ
ਦਿਲਚਸਪ ਹੈ ਕਿ ਪੰਜਾਬ ਕਾਂਗਰਸ ਵੱਲੋਂ ਸੀਐੱਮ ਫੇਸ ਲਈ ਹੁਣ ਸਿਰਫ਼ ਨਵਜੋਤ ਸਿੰਘ ਸਿੱਧੂ ਅਤੇ ਚਰਨਜੀਤ ਸਿੰਘ ਚੰਨੀ ਵਿਚਕਾਰ ਤੈਅ ਕੀਤਾ ਜਾਣਾ ਹੈ। ਇਸਦੇ ਸੰਕੇਤ ਰਾਹੁਲ ਗਾਂਧੀ ਦੇ ਪੰਜਾਬ ਫੇਰੀ ਦੌਰਾਨ ਕੀਤੇ ਐਲਾਨ ਤੋਂ ਮਿਲਦੇ ਹਨ। ਬੇਸ਼ੱਕ ਹਿੰਦੂ ਚਿਹਰੇ ਦੇ ਤੌਰ ‘ਤੇ ਸੁਨੀਲ ਜਾਖੜ ਦੀ ਤਸਵੀਰ ਕਾਂਗਰਸ ਦੇ ਹੋਰਡਿੰਗਜ਼ ਵਿੱਚ ਆਮ ਵੇਖੀ ਜਾ ਸਕਦੀ ਹੈ, ਪਰ ਜਾਖੜ ਨਾ ਤਾਂ ਚੋਣ ਲੜ ਰਹੇ ਹਨ ਅਤੇ ਪਿਛਲੇ ਕੁਝ ਵਕਤ ਤੋਂ ਸਰਗਰਮ ਸਿਆਸਤ ਤੋਂ ਦੂਰ ਹੀ ਹਨ। ਹਾਲਾਂਕਿ ਇਸ ਸਭ ਦੇ ਵਿਚਾਲੇ ਪ੍ਰਤਾਪ ਸਿੰਘ ਬਾਜਵਾ ਵੀ ਸੀਐੱਮ ਕੈਂਡੀਡੇਟ ਦੇ ਤੌਰ ‘ਤੇ ਦਾਅਵਾ ਠੋਕ ਰਹੇ ਹਨ।
