ਚੰਡੀਗੜ੍ਹ। ਨਵਜੋਤ ਸਿੰਘ ਸਿੱਧੂ ਦੇ ਤਾਜਪੋਸ਼ੀ ਸਮਾਗਮ ‘ਚ ਬੇਸ਼ੱਕ ਕਾਂਗਰਸ ਪਾਰਟੀ ਵੱਲੋਂ ਸਭ ਕੁਝ ਠੀਕ ਹੋਣ ਦਾ ਦਮ ਭਰਨ ਦੀ ਕੋਸ਼ਿਸ਼ ਕੀਤੀ ਗਈ, ਪਰ ਸਮਾਗਮ ਤੋਂ ਸਾਹਮਣੇ ਆਈਆਂ ਤਸਵੀਰਾਂ ਕੁਝ ਹੋਰ ਹੀ ਕਹਾਣੀ ਬਿਆਨ ਕਰ ਰਹੀਆਂ ਸਨ। ਇਸ ਸਮਾਗਮ ‘ਚ ਸੀਐੱਮ ਕੈਪਟਨ ਅਮਰਿੰਦਰ ਸਿੰਘ ਅਤੇ ਪੰਜਾਬ ਕਾਂਗਰਸ ਦੇ ਨਵੇਂ ਪ੍ਰਧਾਨ ਨਵਜੋਤ ਸਿੰਘ ਸਿੱਧੂ ਬੇਸ਼ੱਕ ਇੱਕ-ਦੂਜੇ ਦੇ ਆਲੇ-ਦੁਆਲੇ ਬੈਠੇ ਨਜ਼ਰ ਆਏ, ਪਰ ਉਹਨਾਂ ਦੀ Body language ਕੁਝ ਹੋਰ ਹੀ ਬਿਆਂ ਕਰ ਰਹੀ ਸੀ।
ਸਿੱਧੂ ਨੇ ਨਹੀਂ ਛੂਏ ਕੈਪਟਨ ਦੇ ਪੈਰ
ਦੱਸਣਯੋਗ ਹੈ ਕਿ ਜਦੋਂ ਸਿੱਧੂ ਮੰਚ ‘ਤੇ ਭਾਸ਼ਣ ਦੇਣ ਲਈ ਜਾਣ ਲੱਗੇ, ਤਾਂ ਉਹਨਾਂ ਨੇ ਆਪਣੇ ਨਾਲ ਬੈਠੇ ਸੀਐੱਮ ਕੈਪਟਨ ਅਮਰਿੰਦਰ ਸਿੰਘ ਅਤੇ ਪੰਜਾਬ ਕਾਂਗਰਸ ਇੰਚਾਰਜ ਹਰੀਸ਼ ਰਾਵਤ ਨੂੰ ਨਜ਼ਰਅੰਦਾਜ਼ ਕਰ ਦਿੱਤਾ, ਪਰ ਉਹਨਾਂ ਦੇ ਨਾਲ ਬੈਠੇ ਸਾਬਕਾ ਮੁੱਖ ਮੰਤਰੀ ਰਜਿੰਦਰ ਕੌਰ ਭੱਠਲ ਅਤੇ ਸੀਨੀਅਰ ਆਗੂ ਲਾਲ ਸਿੰਘ ਦੇ ਪੈਰੀਂ ਹੱਥ ਲਾ ਕੇ ਉਹਨਾਂ ਤੋਂ ਅਸ਼ੀਰਵਾਦ ਲਿਆ। ਇਸ ਤੋਂ ਬਾਅਦ ਹੀ ਭਾਸ਼ਣ ਦੇਣ ਲਈ ਅੱਗੇ ਵਧੇ।
ਇੰਨਾ ਹੀ ਨਹੀਂ, ਆਪਣਾ ਭਾਸ਼ਣ ਖਤਮ ਕਰਨ ਤੋਂ ਬਾਅਦ ਵੀ ਸਿੱਧੂ ਨੇ ਕੈਪਟਨ ਨੂੰ ਨਜ਼ਰਅੰਦਾਜ਼ ਹੀ ਕੀਤਾ ਅਤੇ ਚੁਪਚਾਪ ਕੈਪਟਨ ਦੇ ਨਾਲ ਵਾਲੀ ਕੁਰਸੀ ‘ਤੇ ਆ ਕੇ ਬਹਿ ਗਏ। ਮੰਚ ‘ਤੇ ਇਕੱਠੇ ਬਹਿ ਕੇ ਵੀ ਦੋਵੇਂ ਆਗੂਆਂ ਨੇ ਇੱਕ-ਦੂਜੇ ਨਾਲ ਗੱਲ ਤੱਕ ਨਹੀਂ ਕੀਤੀ।
ਭਾਸ਼ਣ ‘ਚ ਵੀ ਨਹੀਂ ਲਿਆ CM ਦਾ ਨਾੰਅ
ਜਦੋਂ ਕੈਪਟਨ ਤੇ ਸਿੱਧੂ ਇੱਕ ਮੰਚ ‘ਤੇ ਨਜ਼ਰ ਆਏ, ਤਾਂ ਉਮੀਦ ਕੀਤੀ ਜਾ ਰਹੀ ਸੀ ਕਿ ਦੋਵੇਂ ਆਗੂ ਆਪੋ-ਆਪਣੇ ਭਾਸ਼ਣਾਂ ‘ਚ ਉਹ ਗੱਲਾਂ ਕਰਨਗੇ, ਜਿਹਨਾਂ ਦੇ ਜ਼ਰੀਏ ਦੂਰੀਆਂ ਮਿਟਾਉਣ ਦੀ ਕੋਸ਼ਿਸ਼ ਹੋਵੇਗੀ। ਬੇਸ਼ੱਕ ਸੀਐੱਮ ਕੈਪਟਨ ਨੇ ਉਦਾਰਤਾ ਵਿਖਾਉਂਦਿਆਂ ਆਪਣੇ ਭਾਸ਼ਣ ‘ਚ ਸਿੱਧੂ ਨੂੰ ਵਧਾਈ ਦਿੱਤੀ, ਉਹਨਾਂ ਦੇ ਪਰਿਵਾਰ ਨਾਲ ਆਪਣੇ ਰਿਸ਼ਤੇ ਵੀ ਯਾਦ ਕੀਤੇ। ਪਰ ਜਦੋਂ ਵਾਰੀ ਸਿੱਧੂ ਦੀ ਆਈ, ਤਾਂ ਉਹਨਾਂ ਨੇ ਆਪਣੇ ਪੂਰੇ ਭਾਸ਼ਣ ‘ਚ ਕੈਪਟਨ ਦਾ ਜ਼ਿਕਰ ਤੱਕ ਨਹੀਂ ਕੀਤਾ।
ਕੈਮਰੇ ਲਈ ਪੋਜ਼ ਦੇਣ ਵਕਤ ਵੀ ਵਿਖੀ ਦੂਰੀ
ਇਸ ਤੋਂ ਇਲਾਵਾ ਜਦੋਂ ਕੈਪਟਨ ਅਤੇ ਸਿੱਧੂ ਫੁੱਲਾਂ ਦੇ ਹਾਰ ਦੇ ਨਾਲ ਕੈਮਰੇ ‘ਤੇ ਪੋਜ਼ ਦੇਣ ਲੱਗੇ, ਤਾਂ ਇਸ ਦੌਰਾਨ ਸਿੱਧੂ ਆਪਣੇ ਖੱਬੇ ਪਾਸੇ ਖੜ੍ਹੇ ਸੁਨੀਲ ਜਾਖੜ ਨਾਲ ਜੱਫੀ ਪਾਏ ਨਜ਼ਰ ਆਏ, ਪਰ ਸੱਜੇ ਪਾਸੇ ਖੜ੍ਹੇ ਕੈਪਟਨ ਤੋਂ ਉਹਨਾਂ ਦੀ ਦੂਰੀ ਸਾਫ ਵੇਖੀ ਜਾ ਸਕਦੀ ਸੀ।
ਇਸ ਤੋਂ ਬਾਅਦ ਜਦੋਂ ਹਰੀਸ਼ ਰਾਵਤ ਫੁੱਲਾਂ ਦੇ ਹਾਰ ਨਾਲ ਫੋਟੋ ਖਿਚਾਉਣ ਲਈ ਪਹੁੰਚੇ, ਤਾਂ ਕੈਪਟਨ ਮੌਕਾ ਵੇਖਦੇ ਹੀ ਪਾਸੇ ਹੋ ਗਏ। ਖਾਸ ਗੱਲ ਇਹ ਵੀ ਹੈ ਕਿ ਜਦੋਂ ਰਾਵਤ, ਸਿੱਧੂ ਦੇ ਸੱਜੇ ਪਾਸੇ ਆ ਕੇ ਖੜ੍ਹੇ ਹੋਏ, ਤਾਂ ਸਿੱਧੂ ਨੇ ਤੁਰੰਤ ਰਾਵਤ ਦੇ ਮੋਢੇ ‘ਤੇ ਹੱਥ ਰੱਖ ਲਿਆ, ਜਦਕਿ ਇਸ ਤੋਂ ਪਹਿਲਾਂ ਕੈਪਟਨ ਨੂੰ ਨਜ਼ਰਅੰਦਾਜ਼ ਹੀ ਕਰਦੇ ਰਹੇ।
ਪੰਜਾਬ ਭਵਨ ‘ਚ ਵੀ ਫੇਰੀਆਂ ਨਜ਼ਰਾਂ
ਕਾਬਿਲੇਗੌਰ ਹੈ ਕਿ ਇਸ ਤੋਂ ਪਹਿਲਾਂ ਵੀ ਜਦੋਂ ਸੀਐੱਮ ਕੈਪਟਨ ਅਮਰਿੰਦਰ ਸਿੰਘ ਵੱਲੋਂ ਪੰਜਾਬ ਭਵਨ ਵਿਖੇ ਟੀ-ਪਾਰਟੀ ਰੱਖੀ ਗਈ ਸੀ, ਤਾਂ ਨਵਜੋਤ ਸਿੰਘ ਸਿੱਧੂ ਪਹਿਲਾਂ ਸੀਐੱਮ ਨਾਲ ਬਿਨ੍ਹਾਂ ਮੁਲਾਕਾਤ ਕੀਤੇ ਨਜ਼ਰਾਂ ਫੇਰ ਕੇ ਅੱਗੇ ਲੰਘ ਗਏ ਸਨ। ਪਰ ਫਿਰ ਕੁਝ ਆਗੂਆਂ ਦੇ ਬੁਲਾਉਣ ‘ਤੇ ਉਹ ਵਾਪਸ ਆਏ ਅਤੇ ਸੀਐੱਮ ਕੈਪਟਨ ਨਾਲ ਮੁਲਾਕਾਤ ਕੀਤੀ। ਫੇਰ ਦੋਵੇਂ ਆਗੂਆਂ ਨੇ ਇੱਕ-ਦੂਜੇ ਨਾਲ ਗੱਲਬਾਤ ਵੀ ਕੀਤੀ।
