ਚੰਡੀਗੜ੍ਹ। ਨਵਜੋਤ ਸਿੰਘ ਸਿੱਧੂ ਦੇ ਪੰਜਾਬ ਕਾਂਗਰਸ ਪ੍ਰਧਾਨ ਵਜੋਂ ਅਹੁਦਾ ਸੰਭਾਲਣ ਤੋਂ ਪਹਿਲਾਂ ਆਖਰ ਉਹ ਤਸਵੀਰ ਸਾਹਮਣੇ ਆ ਹੀ ਗਈ, ਜਿਸਦਾ ਹਰ ਪੰਜਾਬੀ ਨੂੰ ਇੰਤਜ਼ਾਰ ਸੀ। ਪੰਜਾਬ ਕਾਂਗਰਸ ਦੀ ਨਵੀਂ ਟੀਮ ਦੇ ਅਧਿਕਾਰਤ ਗਠਨ ਤੋਂ ਪਹਿਲਾਂ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਵੱਲੋਂ ਪਾਰਟੀ ਆਗੂਆਂ ਲਈ ਪੰਜਾਬ ਭਵਨ ਵਿਖੇ ਜੋ ਟੀ-ਪਾਰਟੀ ਰੱਖੀ ਗਈ ਸੀ, ਉਥੇ ਸਿੱਧੂ ਅਤੇ ਕੈਪਟਨ ਦੋਵੇਂ ਇਕੱਠੇ ਨਜ਼ਰ ਆਏ।
ਸੀਐੱਮ ਦੇ ਮੀਡੀਆ ਸਲਾਹਕਾਰ ਰਵੀਨ ਠੁਕਰਾਲ ਵੱਲੋਂ ਕੈਪਟਨ ਤੇ ਸਿੱਧੂ ਦੀਆਂ ਤਸਵੀਰਾਂ ਸੋਸ਼ਲ ਮੀਡੀਆ ‘ਤੇ ਪੋਸਟ ਕੀਤੀਆਂ ਗਈਆਂ ਹਨ। ਇਹਨਾਂ ਤਸਵੀਰਾਂ ‘ਚ ਕੈਪਟਨ ਤੇ ਸਿੱਧੂ ਇੱਕੋ ਟੇਬਲ ‘ਤੇ ਬਹਿ ਕੇ ਇੱਕ-ਦੂਜੇ ਨਾਲ ਗੱਲਬਾਤ ਕਰਦੇ ਨਜ਼ਰ ਆ ਰਹੇ ਹਨ।
ਕੈਪਟਨ-ਸਿੱਧੂ ਨਾਲ ਟੇਬਲ ‘ਤੇ ਪੰਜਾਬ ਕਾਂਗਰਸ ਇੰਚਾਰਜ ਹਰੀਸ਼ ਰਾਵਤ, ਪ੍ਰਤਾਪ ਬਾਜਵਾ ਅਤੇ ਮਨੀਸ਼ ਤਿਵਾੜੀ ਵੀ ਬੈਠੇ ਹੋਏ ਹਨ।
…ਤਾਂ ਕੀ ਬਿਨ੍ਹਾਂ ਮੁਆਫ਼ੀ ਬਣ ਗਈ ਗੱਲ?
ਇਹਨਾਂ ਤਸਵੀਰਾਂ ਤੋਂ ਬਾਅਦ ਇੱਕ ਸਵਾਲ ਸਿਆਸੀ ਗਲਿਆਰਿਆਂ ‘ਚ ਆਮ ਹੈ ਕਿ…ਕੈਪਟਨ ਅਮਰਿੰਦਰ ਸਿੰਘ ਨੇ ਸਿੱਧੂ ਨਾਲ ਮੁਲਾਕਾਤ ਲਈ ਜੋ ਮੁਆਫ਼ੀ ਦੀ ਸ਼ਰਤ ਰੱਖੀ ਸੀ, ਕੀ ਉਸ ਤੋਂ ਬਿਨ੍ਹਾਂ ਹੀ ਦੋਵੇਂ ਆਗੂਆਂ ਵਿਚਾਲੇ ਦੂਰੀਆਂ ਘੱਟ ਹੋ ਗਈਆਂ ਹਨ। ਜਾਂ ਫਿਰ ਮਹਿਜ਼ ਸ਼ਿਸ਼ਟਾਚਾਰ ਲਈ ਦੋਵੇਂ ਆਗੂ ਦੂਰੀਆਂ ਖਤਮ ਹੋਣ ਦਾ ਦਿਖਾਵਾ ਕਰ ਰਹੇ ਹਨ।
