ਬਿਓਰੋ। ਪੰਜਾਬ ਦੀਆਂ ਵਿਧਾਨ ਸਭਾ ਚੋਣਾਂ ਇਸ ਵਾਰ ਕਈ ਮਾਇਨਿਆਂ ਵਿੱਚ ਅਹਿਮ ਹਨ, ਜਿਹਨਾਂ ਵਿੱਚ ਇੱਕ ਦਿਲਚਸਪ ਪਹਿਲੂ ਇਹ ਵੀ ਹੈ ਕਿ ਇਸ ਵਾਰ ਵਧੇਰੇਤਰ ਸੀਟਾਂ ‘ਤੇ ਉਮੀਦਵਾਰਾਂ ਨੂੰ ਉਹਨਾਂ ਦੇ ‘ਆਪਣੇ’ ਹੀ ਟੱਕਰ ਦੇ ਰਹੇ ਹਨ। ਫਿਰ ਚਾਹੇ ਉਹ ਟਿਕਟ ਨਾ ਮਿਲਣ ਦੇ ਚਲਦੇ ਅਜਾਦ ਲੜ ਰਹੇ ਹੋਣ ਜਾਂ ਫਿਰ ਕਿਸੇ ਹੋਰ ਪਾਰਟੀ ਦੇ ਨਿਸ਼ਾਨ ‘ਤੇ ਆਪਣੀ ਕਿਸਮਤ ਅਜ਼ਮਾ ਰਹੇ ਹੋਣ। ਦਿਲਚਸਪ ਇਹ ਵੀ ਹੈ ਕਿ ਇਸ ਮਾਮਲੇ ਵਿੱਚ ਸਭ ਤੋਂ ਵੱਧ ਨੁਕਸਾਨ ਕਾਂਗਰਸ ਨੂੰ ਹੋ ਰਿਹਾ ਹੈ, ਕਿਉਂਕਿ 47 ਉਮੀਦਵਾਰ ਅਜਿਹੇ ਹਨ, ਜੋ ਕਾਂਗਰਸੀ ਸਨ ਪਰ ਹੁਣ ਕਾਂਗਰਸ ਨੂੰ ਹੀ ਚੁਣੌਤੀ ਦੇ ਰਹੇ ਹਨ।
ਡਾ. ਮਨੋਹਰ ਸਿੰਘ: ਅਜਿਹੇ ਉਮੀਦਵਾਰਾਂ ਵਿੱਚ ਸਭ ਤੋਂ ਅਹਿਮ ਨਾਂਅ ਉਸ ਸ਼ਖਸ ਦਾ ਹੈ, ਜੋ ਸੂਬੇ ਦੇ ਮੌਜੂਦਾ ਮੁੱਖ ਮੰਤਰੀ ਅਤੇ ਅਗਾਮੀ ਚੋਣਾਂ ਲਈ ਕਾਂਗਰਸ ਦੇ ਸੀਐੱਮ ਕੈਂਡੀਡੇਟ ਚਰਨਜੀਤ ਸਿੰਘ ਚੰਨੀ ਦੇ ਭਰਾ ਹਨ। ਚੰਨੀ ਦੇ ਭਰਾ ਡਾ. ਮਨੋਹਰ ਸਿੰਘ ਬੱਸੀ ਪਠਾਣਾ ਹਲਕੇ ਤੋਂ ਅਜਾਦ ਉਮੀਦਵਾਰ ਦੇ ਤੌਰ ‘ਤੇ ਕਿਸਮਤ ਅਜ਼ਮਾ ਰਹੇ ਹਨ। ਦਿਲਚਸਪ ਹੈ ਕਿ ਖੁਦ ਸੀਐੱਮ ਚੰਨੀ ਕਾਂਗਰਸ ਵੱਲੋਂ 2 ਹਲਕਿਆਂ ਚਮਕੌਰ ਸਾਹਿਬ ਅਤੇ ਭਦੌੜ ਤੋਂ ਚੋਣ ਮੈਦਾਨ ਵਿੱਚ ਉਤਾਰੇ ਗਏ ਹਨ। ਸਾਫ਼ ਹੈ ਕਿ ਡਾ. ਮਨੋਹਰ ਸਿੰਘ ਬੱਸੀ ਪਠਾਣਾ ਤੋਂ ਕਾਂਗਰਸ ਉਮੀਦਵਾਰ ਲਈ ਵੋਟ ਕੱਟਣ ਦਾ ਕੰਮ ਬਾਖੂਬੀ ਕਰਨਗੇ।
ਰਾਣਾ ਇੰਦਰ ਪ੍ਰਤਾਪ ਸਿੰਘ: ਲਿਸਟ ਵਿੱਚ ਦੂਜਾ ਨਾਂਅ ਸੂਬੇ ਦੇ ਕੈਬਨਿਟ ਮੰਤਰੀ ਰਾਣਾ ਗੁਰਜੀਤ ਸਿੰਘ ਦੇ ਪੁੱਤਰ ਰਾਣਾ ਇੰਦਰ ਪ੍ਰਤਾਪ ਸਿੰਘ ਦਾ ਹੈ। ਬੇਸ਼ੱਕ ਕਾਂਗਰਸ ਨੇ ਰਾਣਾ ਗੁਰਜੀਤ ਸਿੰਘ ਨੂੰ ਕਪੂਰਥਲਾ ਤੋਂ ਉਮੀਦਵਾਰ ਬਣਾਇਆ ਹੈ, ਪਰ ਰਾਣਾ ਗੁਰਜੀਤ ਆਪਣੇ ਨਾਲ-ਨਾਲ ਪੁੱਤਰ ਲਈ ਵੀ ਸੁਲਤਾਨਪੁਰ ਲੋਧੀ ਤੋਂ ਟਿਕਟ ਮੰਗ ਰਹੇ ਸਨ। ਕਾਂਗਰਸ ਨੇ ਰਾਣਾ ਗੁਰਜੀਤ ਦੀ ਮੰਗ ਨੂੰ ਦਰਕਿਨਾਰ ਕਰਦਿਆਂ ਸੁਲਤਾਨਪੁਰ ਲੋਧੀ ਤੋਂ ਮੌਜੂਦਾ ਵਿਧਾਇਕ ਨਵਤੇਜ ਚੀਮਾ ‘ਤੇ ਹੀ ਭਰੋਸਾ ਜਤਾਇਆ। ਇਸੇ ਤੋਂ ਨਰਾਜ਼ ਹੋ ਕੇ ਰਾਣਾ ਗੁਰਜੀਤ ਨੇ ਪੁੱਤਰ ਰਾਣਾ ਇੰਦਰ ਪ੍ਰਤਾਪ ਸਿੰਘ ਨੂੰ ਅਜਾਦ ਉਮੀਦਵਾਰ ਵਜੋਂ ਮੈਦਾਨ ਵਿੱਚ ਉਤਾਰ ਦਿੱਤਾ।
ਅੰਗਦ ਸੈਣੀ: ਉੱਤਰ ਪ੍ਰਦੇਸ਼ ਵਿੱਚ ਪਤਨੀ ਵੱਲੋਂ ਕਾਂਗਰਸ ਦਾ ਹੱਥ ਛੱਡ ਕੇ ਬੀਜੇਪੀ ਵਿੱਚ ਸ਼ਾਮਲ ਹੋਣਾ ਪੰਜਾਬ ਵਿੱਚ ਕਾਂਗਰਸ ਦੇ ਮੌਜੂਦਾ ਵਿਧਾਇਕ ਅੰਗਦ ਸੈਣੀ ਨੂੰ ਭਾਰੀ ਪਿਆ ਹੈ। ਅੰਗਦ ਸੈਣੀ ਨੂੰ ਪਾਰਟੀ ਨੇ ਇਸ ਵਾਰ ਨਵਾਂਸ਼ਹਿਰ ਤੋਂ ਟਿਕਟ ਨਹੀਂ ਦਿੱਤੀ। ਨਰਾਜ਼ ਸੈਣੀ ਹੁਣ ਅਜਾਦ ਉਮੀਦਵਾਰ ਵਜੋਂ ਮੈਦਾਨ ਵਿੱਚ ਹਨ ਅਤੇ ਕਾਂਗਰਸ ਦੇ ਖਿਲਾਫ਼ ਪ੍ਰਚਾਰ ਕਰ ਰਹੇ ਹਨ।
ਅਮਰੀਕ ਢਿੱਲੋਂ: ਸਮਰਾਲਾ ਤੋਂ ਮੌਜੂਦਾ ਵਿਧਾਇਕ ਅਮਰੀਕ ਸਿੰਘ ਢਿੱਲੋਂ ਵੀ ਟਿਕਟ ਨਾ ਮਿਲਣ ਦੇ ਚਲਦੇ ਕਾਂਗਰਸ ਤੋਂ ਬਾਗੀ ਹੋ ਗਏ ਅਤੇ ਅਜਾਦ ਉਮੀਦਵਾਰ ਵਜੋਂ ਕਿਸਮਤ ਅਜ਼ਮਾ ਰਹੇ ਹਨ। ਅਮਰੀਕ ਢਿੱਲੋਂ ਦੇ ਬਾਗੀ ਹੋਣ ਦੇ ਚਲਦੇ ਉਹਨਾਂ ਨਾਲ ਜੁੜਿਆ ਵੋਟਬੈਂਕ ਵੀ ਕਾਂਗਰਸ ਤੋਂ ਦੂਰ ਹੋਣ ਦੇ ਪੂਰੇ ਅਸਾਰ ਨੇ।
ਹਰਮਿੰਦਰ ਸਿੰਘ ਜੱਸੀ: ਕਾਂਗਰਸ ਦੀ ਟਿਕਟ ‘ਤੇ ਪਿਛਲੀ ਵਾਰ ਮੌੜ ਮੰਡੀ ਤੋਂ ਚੋਣ ਲੜਨ ਵਾਲੇ ਹਰਮਿੰਦਰ ਸਿੰਘ ਜੱਸੀ ਵੀ ਇਸ ਵਾਰ ਅਜਾਦ ਉਮੀਦਵਾਰ ਵਜੋਂ ਮੈਦਾਨ ਵਿੱਚ ਹਨ। ਜੱਸੀ ਡੇਰਾ ਸੱਚਾ ਸੌਦਾ ਮੁਖੀ ਰਾਮ ਰਹੀਮ ਦੇ ਰਿਸ਼ਤੇਦਾਰ ਹਨ। ਲਿਹਾਜਾ ਉਹਨਾਂ ਦਾ ਡੇਰੇ ਨਾਲ ਜੁੜਿਆ ਵੋਟਬੈਂਕ ਕਾਂਗਰਸ ਦੇ ਹਿੱਸੇ ਤਾਂ ਨਹੀਂ ਆਉਣ ਵਾਲਾ।
ਦਿਲਚਸਪ ਹੈ ਕਿ ਸੀਐੱਮ ਚਰਨਜੀਤ ਸਿੰਘ ਚੰਨੀ ਜਿਸ ਭਦੌੜ ਸੀਟ ਤੋਂ ਇਸ ਵਾਰ ਪਹਿਲੀ ਵਾਰ ਆਪਣੀ ਕਿਸਮਤ ਅਜ਼ਮਾ ਰਹੇ ਹਨ, ਉਸ ਹਲਕੇ ਵਿੱਚ ਸੂਬੇ ਦੇ ਡਿਪਟੀ ਸਪੀਕਰ ਅਜੈੈਬ ਸਿੰਘ ਭੱਟੀ ਨੇ ਆਪਣੀ ਪਤਨੀ ਮਨਜੀਤ ਕੌਰ ਨੂੰ ਵੀ ਮੈਦਾਨ ਵਿੱਚ ਉਤਾਰਿਆ ਹੋਇਆ ਹੈ। ਅਜੈਬ ਸਿੰਘ ਭੱਟੀ ਪਿਛਲੀ ਵਾਰ ਮਲੋਟ ਤੋਂ ਕਾਂਗਰਸ ਦੇ ਵਿਧਾਇਕ ਚੁਣੇ ਗਏ ਸਨ, ਪਰ ਇਸ ਵਾਰ ਕਾਂਗਰਸ ਨੇ ਉਹਨਾਂ ਦੀ ਟਿਕਟ ਕੱਟ ਕੇ ਰੁਪਿੰਦਰ ਕੌਰ ਰੂਬੀ ਨੂੰ ਮੈਦਾਨ ਵਿੱਚ ਉਤਾਰਿਆ ਹੈ।
BJP ਤੇ PLC ਦੀ ਟਿਕਟ ‘ਤੇ ਮੈਦਾਨ ‘ਚ ਇਹ ‘ਕਾਂਗਰਸੀ’ ਚਿਹਰੇ
ਕਾਂਗਰਸ ਛੱਡ ਕੇ ਬੀਜੇਪੀ ਅਤੇ ਪੰਜਾਬ ਲੋਕ ਕਾਂਗਰਸ ਵਿੱਚ ਸ਼ਾਮਲ ਹੋ ਕੇ ਟਿਕਟ ਹਾਸਲ ਕਰਨ ਵਾਲੇ ਉਮੀਦਵਾਰਾਂ ਦੀ ਵੀ ਕੋਈ ਕਮੀ ਨਹੀਂ ਹੈ। ਦੋਵੇਂ ਪਾਰਟੀਆਂ ਦੇ ਅਜਿਹੇ 15 ਉਮੀਦਵਾਰ ਹਨ, ਜੋ ਕਾਂਗਰਸ ਛੱਡ ਕੇ ਆਏ ਅਤੇ ਆਉਂਦੇ ਹੀ ਉਹਨਾਂ ਨੂੰ ਉਮੀਦਵਾਰ ਐਲਾਨ ਦਿੱਤਾ ਗਿਆ। ਇਹਨਾਂ ਵਿੱਚ ਸੂਬੇ ਦੇ ਸਾਬਕਾ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਦੇ ਨਾਲ-ਨਾਲ ਸਾਬਕਾ ਕੈਬਨਿਟ ਮੰਤਰੀ ਰਾਣਾ ਗੁਰਮੀਤ ਸਿੰਘ ਸੋਢੀ ਅਤੇ 2 ਵਿਧਾਇਕਾਂ ਦੇ ਨਾਂਅ ਸ਼ੁਮਾਰ ਹਨ। ਇਹ ਨਾਂਅ ਹਨ:-
ਪਟਿਆਲਾ- ਕੈਪਟਨ ਅਮਰਿੰਦਰ ਸਿੰਘ (ਪੰਜਾਬ ਲੋਕ ਕਾਂਗਰਸ)
ਫਿਰੋਜ਼ਪੁਰ ਸ਼ਹਿਰੀ- ਰਾਣਾ ਗੁਰਮੀਤ ਸੋਢੀ (ਬੀਜੇਪੀ)
ਬਟਾਲਾ- ਫਤਿਹਜੰਗ ਬਾਜਵਾ (ਬੀਜੇਪੀ)
ਮੋਗਾ- ਡਾ. ਹਰਜੋਤ ਕਮਲ (ਬੀਜੇਪੀ)
ਪਟਿਆਲਾ ਦਿਹਾਤੀ- ਸੰਜੀਵ ਬਿੱਟੂ (ਪੰਜਾਬ ਲੋਕ ਕਾਂਗਰਸ)
ਗੜ੍ਹਸ਼ੰਕਰ- ਨਿਮਿਸ਼ਾ ਮਹਿਤਾ (ਬੀਜੇਪੀ)
ਕਰਤਾਰਪੁਰ- ਸੁਰਿੰਦਰ ਮਹੇ (ਬੀਜੇਪੀ)
ਲੁਧਿਆਣਾ ਈਸਟ- ਜਗਮੋਹਨ ਸ਼ਰਮਾ (ਪੰਜਾਬ ਲੋਕ ਕਾਂਗਰਸ)
ਅੰਮ੍ਰਿਤਸਰ ਸਾਊਥ- ਹਰਜਿੰਦਰ ਠੇਕੇਦਾਰ (ਪੰਜਾਬ ਲੋਕ ਕਾਂਗਰਸ)
ਖਰੜ- ਕਮਲਦੀਪ ਸੈਣੀ (ਪੰਜਾਬ ਲੋਕ ਕਾਂਗਰਸ)
ਬੱਸੀ ਪਠਾਣਾ- ਦੀਪਕ ਜੋਤੀ (ਪੰਜਾਬ ਲੋਕ ਕਾਂਗਰਸ)
ਦਾਖਾ- ਦਮਨਜੀਤ ਸਿੰਘ ਮੋਹੀ (ਪੰਜਾਬ ਲੋਕ ਕਾਂਗਰਸ)
ਬਠਿੰਡਾ ਸ਼ਹਿਰੀ- ਰਾਜ ਲੰਬੜਦਾਰ (ਪੰਜਾਬ ਲੋਕ ਕਾਂਗਰਸ)
ਮਾਨਸਾ- ਜੀਵਨ ਦਾਸ ਬਾਵਾ (ਪੰਜਾਬ ਲੋਕ ਕਾਂਗਰਸ)
ਸਨੌਰ- ਬਿਕਰਮਜੀਤ ਇੰਦਰ ਸਿੰਘ ਚਾਹਲ (ਪੰਜਾਬ ਲੋਕ ਕਾਂਗਰਸ)
‘ਆਪ’ ਤੋਂ ਲੜ ਰਹੇ ਕਾਂਗਰਸ ਦੇ ਇਹ ਚਿਹਰੇ
ਚੋਣਾਂ ਤੋਂ ਪਹਿਲਾਂ ਕਾਂਗਰਸ ਤੋਂ ਵਿਦਾ ਹੋਏ ਟਿਕਟਾਂ ਦੇ ਦਾਅਵੇਦਾਰਾਂ ਦੀ ਵੱਡੀ ਫੌਜ ਆਮ ਆਦਮੀ ਪਾਰਟੀ ਵਿੱਚ ਸ਼ਾਮਲ ਹੋਈ ਹੈ। ਆਮ ਆਦਮੀ ਪਾਰਟੀ ਦੇ 21 ਉਮੀਦਵਾਰ ਅਜਿਹੇ ਹਨ, ਜੋ ਕਾਂਗਰਸ ਤੋਂ ਬਾਗੀ ਹੋ ਕੇ ਇਥੇ ਆਏ ਅਤੇ ਉਹਨਾਂ ਨੂੰ ਨਾਲੋ-ਨਾਲ ਟਿਕਟ ਵੀ ਦੇ ਦਿੱਤੀ ਗਈ। ਇਹਨਾਂ ਦੇ ਨਾਂਅ ਇਸ ਤਰ੍ਹਾਂ ਹਨ:-
ਸੁਜਾਨਪੁਰ- ਅਮਿਤ ਸਿੰਘ ਮੰਟੂ
ਪਠਾਨਕੋਟ- ਵਿਭੂਤੀ ਸ਼ਰਮਾ
ਗੁਰਦਾਸਪੁਰ- ਰਮਨ ਬਹਿਲ
ਖੇਮਕਰਨ- ਸਰਵਣ ਸਿੰਘ ਧੁਨ
ਭੁਲੱਥ- ਰਣਜੀਤ ਸਿੰਘ ਰਾਣਾ
ਮਜੀਠਾ- ਸੁਖਜਿੰਦਰ ਰਾਜ ਸਿੰਘ ਲਾਲੀ ਮਜੀਠੀਆ
ਫਗਵਾੜਾ- ਜੋਗਿੰਦਰ ਸਿੰਘ ਮਾਨ
ਜਲੰਧਰ ਨੌਰਥ- ਦਿਨੇਸ਼ ਢੱਲ
ਹੁਸ਼ਿਆਰਪੁਰ- ਪੰਡਿਤ ਬ੍ਰਹਮ ਸ਼ੰਕਰ
ਚਮਕੌਰ ਸਾਹਿਬ- ਡਾ. ਚਰਨਜੀਤ ਸਿੰਘ
ਫਤਿਹਗੜ੍ਹ ਸਾਹਿਬ- ਲਖਬੀਰ ਸਿੰਘ ਰਾਏ
ਲੁਧਿਆਣਾ ਈਸਟ- ਦਲਜੀਤ ਸਿੰਘ ਗਰੇਵਾਲ
ਨਵਾਂਸ਼ਹਿਰ- ਲਲਿਤ ਮੋਹਨ
ਆਤਮ ਨਗਰ- ਕੁਲਵੰਤ ਸਿੰਘ ਸਿੱਧੂ
ਲੁਧਿਆਣਾ ਕੇਂਦਰੀ- ਅਸ਼ੋਕ ਪੱਪੀ ਪਰਾਸ਼ਰ
ਲੁਧਿਆਣਾ ਈਸਟ- ਗੁਰਪ੍ਰੀਤ ਸਿੰਘ ਗੋਗੀ
ਰਾਏਕੋਟ- ਹਾਕਮ ਸਿੰਘ ਠੇਕੇਦਾਰ
ਜੀਰਾ- ਨਰੇਸ਼ ਕਟਾਰੀਆ
ਜਲਾਲਾਬਾਦ- ਜਗਦੀਪ ਸਿੰਘ ਗੋਲਡੀ
ਲੰਬੀ- ਗੁਰਮੀਤ ਸਿੰਘ ਖੁੱਡੀਆਂ
ਰਾਮਪੁਰਾ ਫੂਲ- ਬਲਕਾਰ ਸਿੰਘ ਸਿੱਧੂ
ਇਸ ਸਭ ਦੇ ਵਿਚਾਲੇ ਇੱਕ ਨਾਂਅ ਅਜਿਹਾ ਵੀ ਹੈ, ਜਿਸ ਨੂੰ ਆਮ ਆਦਮੀ ਪਾਰਟੀ ਵੱਲੋਂ ਟਿਕਟ ਵੀ ਦੇ ਦਿੱਤੀ ਗਈ, ਪਰ ਉਸਨੇ ਟਿਕਟ ਮਿਲਣ ਦੇ ਬਾਵਜੂਦ ‘ਆਪ’ ਛੱਡ ਕੇ ਕਾਂਗਰਸ ਵਿੱਚ ਜਾਣ ਦਾ ਮਨ ਬਣਾਇਆ। ਫਿਰੋਜ਼ਪੁਰ ਦਿਹਾਤੀ ਤੋਂ ਕਾਂਗਰਸ ਦੇ ਉਮੀਦਵਾਰ ਆਸ਼ੂ ਬਾਂਗੜ ਪਹਿਲਾਂ ‘ਆਪ’ ਵੱਲੋਂ ਉਮੀਦਵਾਰ ਐਲਾਨੇ ਗਏ ਸਨ, ਪਰ ‘ਆਪ’ ਛੱਡ ਕੇ ਕਾਂਗਰਸ ਵਿੱਚ ਜਾਣ ਮਗਰੋਂ ਇਹਨਾਂ ਨੂੰ ਕਾਂਗਰਸ ਨੇ ਆਪਣਾ ਉਮੀਦਵਾਰ ਐਲਾਨ ਦਿੱਤਾ।
ਇਸ ਤੋਂ ਇਲਾਵਾ ਪਿਛਲੀਆਂ ਚੋਣਾਂ ਦੌਰਾਨ ‘ਆਪ’ ਦੀ ਟਿਕਟ ‘ਤੇ ਚੋਣ ਲੜ ਕੇ ਵਿਧਾਨ ਸਭਾ ਪਹੁੰਚੇ ਅੱਧਾ ਦਰਜਨ ਤੋਂ ਵੱਧ ਵਿਧਾਇਕ ਕਾਂਗਰਸ ਵਿੱਚ ਸ਼ਾਮਲ ਹੋ ਗਏ ਸਨ। ਇਹਨਾਂ ‘ਚੋਂ ਰੁਪਿੰਦਰ ਕੌਰ ਰੂਬੀ ਇਸ ਵਾਰ ਮਲੋਟ ਤੋਂ ਕਾਂਗਰਸ ਦੇ ਉਮੀਦਵਾਰ ਹਨ। ਇਸ ਤੋਂ ਇਲਾਵਾ ਰਾਏਕੋਟ ਤੋਂ ‘ਆਪ’ ਦੇ ਮੌਜੂਦਾ ਵਿਧਾਇਕ ਜਗਤਾਰ ਸਿੰਘ ਜੱਗਾ ਹਾਸੋਵਾਲੀਆ ਇਸ ਵਾਰ ਜਗਰਾਓਂ ਤੋਂ ਕਾਂਗਰਸ ਦੀ ਟਿਕਟ ‘ਤੇ ਕਿਸਮਤ ਅਜ਼ਮਾ ਰਹੇ ਹਨ।
ਇਹ ‘ਕਾਂਗਰਸੀ’ ਅਕਾਲੀ ਦਲ ਦੀ ਟਿਕਟ ‘ਤੇ ਲੜ ਰਹੇ
ਕਾਂਗਰਸ ਦੇ ਕਈ ਅਜਿਹੇ ਚਿਹਰੇ ਵੀ ਹਨ, ਜੋ ਇਹਨਾਂ ਚੋਣਾਂ ਤੋਂ ਪਹਿਲਾਂ ਸ਼੍ਰੋਮਣੀ ਅਕਾਲੀ ਦਲ ਵਿੱਚ ਸ਼ਾਮਲ ਹੋਏ ਹਨ। ਅਕਾਲੀ ਦਲ ਨੇ ਅਜਿਹੇ 5 ਚਿਹਰਿਆਂ ਨੂੰ ਚੋਣ ਮੈਦਾਨ ਵਿੱਚ ਉਤਾਰਿਆ ਹੈ, ਜੋ ਇਸ ਪ੍ਰਕਾਰ ਹਨ:-
ਜੰਡਿਆਲਾ- ਸਤਿੰਦਰ ਛੱਜਲਵੰਡੀ
ਸੁਲਤਾਨਪੁਰ ਲੋਧੀ- ਕੈਪਟਨ ਹਰਮਿੰਦਰ ਸਿੰਘ
ਫਾਜਿਲਕਾ- ਹੰਸ ਰਾਜ ਜੋਸਨ
ਅਬੋਹਰ- ਮੋਹਿੰਦਰ ਰਿਣਵਾ
ਸੁਖਬੀਰ ਦੇ ਖਿਲਾਫ਼ ਕਾਂਗਰਸ ਨੇ ਉਤਾਰਿਆ BSP ਦਾ ‘ਚਿਹਰਾ’
ਸੂਬੇ ਦੀ ਹੌਟ ਸੀਟ ਜਲਾਲਾਬਾਦ ਦੀ ਗੱਲ ਕਰੀਏ, ਤਾਂ ਇਥੇ ਕਾਂਗਰਸ ਨੇ BSP ਛੱਡ ਕੇ ਆਏ ਮੋਹਨ ਸਿੰਘ ਫਲੀਆਂਵਾਲਾ ਨੂੰ ਚੋਣ ਮੈਦਾਨ ਵਿੱਚ ਉਤਾਰਿਆ ਹੈ। ਇਸ ਸੀਟ ਤੋਂ ਅਕਾਲੀ ਦਲ ਪ੍ਰਧਾਨ ਸੁਖਬੀਰ ਬਾਦਲ ਚੋਣ ਲੜਦੇ ਹਨ ਅਤੇ ਫਲੀਆਂਵਾਲਾ ਨੂੰ ਉਹਨਾਂ ਦੇ ਖਿਲਾਫ਼ ਇੱਕ ਮਜਬੂਤ ਉਮੀਦਵਾਰ ਮੰਨਿਆ ਜਾ ਰਿਹਾ ਹੈ।
