ਬਿਓਰੋ। ਯੂਕ੍ਰੇਨ ਵਿੱਚ ਰੂਸ ਵੱਲੋਂ ਕੀਤੇ ਗਏ ਹਮਲੇ ਤੋਂ ਬਾਅਦ ਲਗਾਤਾਰ ਹਾਲਾਤ ਤਣਾਅਪੂਰਣ ਬਣੇ ਹੋਏ ਹਨ। ਅਜਿਹੇ ਵਿੱਚ ਕਈ ਅਜਿਹੇ ਲੋਕ ਵੀ ਹਨ, ਜੋ ਧਰਮ ਅਤੇ ਜਾਤ-ਪਾਤ ਤੋਂ ਉੱਪਰ ਉੱਠ ਕੇ ਯੂਕ੍ਰੇਨ ਵਿੱਚ ਫਸੇ ਲੋਕਾਂ ਦੀ ਮਦਦ ਕਰ ਰਹੇ ਹਨ। ਅਜਿਹਾ ਹੀ ਇੱਕ ਨੌਜਵਾਨ ਹੈ ਛੱਡੀਸਗੜ੍ਹ ਦਾ ਰਹਿਣ ਵਾਲਾ 29 ਸਾਲਾ ਰਾਜਦੀਪ ਸਿੰਘ ਹਰਗੋਤਰਾ, ਜੋ 6 ਸਾਲਾਂ ਤੋਂ ਜਰਮਨੀ ਵਿੱਚ ਰਹਿ ਰਿਹਾ ਹੈ ਅਤੇ ਯੂਕ੍ਰੇਨ ਦੇ ਸਰਹੱਦੀ ਇਲਾਕਿਆਂ ਵਿੱਚ ਫਸੇ ਭਾਰਤੀਆਂ ਸਣੇ ਤਮਾਮ ਲੋਕਾਂ ਦੀ ਮਦਦ ਲਈ ਰੋਜਾਨਾ ਸੈਂਕੜੇ ਕਿੱਲੋਮੀਟਰ ਦਾ ਸਫਰ ਤੈਅ ਕਰਕੇ ਉਹਨਾਂ ਨੂੰ ਰਾਹਤ ਪਹੁੰਚਾ ਰਿਹਾ ਹੈ।
ਇਸ ਤਰ੍ਹਾਂ ਮਦਦ ਕਰ ਰਹੇ ਰਾਜਦੀਪ
29 ਸਾਲਾ ਰਾਜਦੀਪ ਸਿੰਘ ਜੰਪ ਰੋਪ ਦੇ ਕੌਮਾਂਤਰੀ ਖਿਡਾਰੀ ਹਨ। ਉਹ ਆਪਣੇ ਕੁਝ ਸਾਥੀਆਂ ਨੂੰ ਲੈ ਕੇ ਜਰਮਨੀ ਤੋਂ 9-9 ਲੋਕਾਂ ਦੀ ਸਮਰੱਥਾ ਵਾਲੀਆਂ 2 ਗੱਡੀਆਂ ਲੈ ਕੇ ਨਿਕਲਦੇ ਹਨ। ਇਹਨਾਂ ਗੱਡੀਆਂ ਵਿੱਚ ਲੋਕਾਂ ਦੀ ਜ਼ਰੂਰਤ ਦਾ ਸਾਮਾਨ ਜਿਵੇਂ ਖਾਣਾ, ਜੂਸ, ਪਾਣੀ, ਦਵਾਈਆਂ, ਗੱਦੇ ਅਤੇ ਚੱਦਰਾਂ ਲੱਦੇ ਹੁੰਦੇ ਹਨ। ਸਭ ਤੋਂ ਪਹਿਲਾਂ ਉਹ ਇਹਨਾਂ ਗੱਡੀਆਂ ਵਿੱਚ ਬੁਡਾਪੋਸਟ ਪਹੁੰਚੇ, ਜਿਥੋਂ ਉਹ ਹੰਗਰੀ-ਯੂਕ੍ਰੇਨ ਬਾਰਡਰ ਲਈ ਨਿਕਲ ਪਏ। ਪਿਛਲੇ 2 ਦਿਨਾਂ ਵਿੱਚ ਉਹ 1200 ਕਿੱਲੋਮੀਟਰ ਤੋਂ ਵੱਧ ਦਾ ਸਫਰ ਤੈਅ ਕਰ ਚੁੱਕੇ ਹਨ।
ਬਾਰਡਰ ਏਰੀਆ ਤੋਂ ਲੋਕਾਂ ਨੂੰ ਲੈ ਕੇ ਰਾਜਦੀਪ ਆਸਟ੍ਰੀਆ ਪਹੁੰਚਣਗੇ ਅਤੇ ਮੁੜ ਵਾਪਸ ਆ ਕੇ ਇਸੇ ਤਰ੍ਹਾਂ ਹੋਰ ਲੋਕਾਂ ਦੀ ਮਦਦ ਕਰਨਗੇ। ਉਹਨਾਂ ਨੇ ਲੋਕਾਂ ਦੇ ਰਹਿਣ ਦਾ ਇੰਤਜਾਮ ਆਸਟ੍ਰੀਆ ਵਿੱਚ ਕੁਝ ਦੋਸਤਾਂ ਦੇ ਘਰਾਂ ਵਿੱਚ ਕੀਤਾ ਹੈ।
ਸੋਸ਼ਲ ਮੀਡੀਆ ਜਰੀਏ ਮਿਲ ਰਹੀ ਮਦਦ
ਉਹ ਸੋਸ਼ਲ ਮੀਡੀਆ ਜ਼ਰੀਏ ਲੋਕਾਂ ਨਾਲ ਜੁੜ ਰਹੇ ਹਨ। ਸੋਸ਼ਲ ਮੀਡੀਆ ਰਾਹੀਂ ਹੀ ਉਹਨਾਂ ਨੂੰ ਕਾਫੀ ਡੋਨੇਸ਼ਨ ਵੀ ਮਿਲ ਰਿਹਾ ਹੈ। ਆਰਟ ਆਫ ਲਿਵਿੰਗ, ਗੁਰਦੁਆਰੇ ਅਤੇ ਕਈ ਸਮਾਜਿਕ ਸੰਸਥਾਵਾਂ ਵੀ ਮਦਦ ਕਰ ਰਹੀਆਂ ਹਨ। ਕਈ ਸੰਸਥਾਵਾਂ ਉਹਨਾਂ ਨੂੰ Ready To Eat ਪੈਕੇਟ ਵੀ ਦੇ ਰਹੀਆਂ ਹਨ, ਜੋ ਉਹ ਲੋਕਾਂ ਤੱਕ ਪਹੁੰਚਾ ਰਹੇ ਹਨ। ਇਸ ਤੋਂ ਇਲਾਵਾ ਭਾਰਤੀ ਅੰਬੈਸੀ ਤੋਂ ਵੀ ਮਦਦ ਮਿਲ ਰਹੀ ਹੈ।
