ਬਿਓਰੋ। ਪੰਜਾਬ ਦੀਆਂ ਵਿਧਾਨ ਸਭਾ ਚੋਣਾਂ ਦੇ ਨਤੀਜਿਆਂ ਨੂੰ ਮਹਿਜ਼ ਕੁਝ ਦਿਨ ਬਾਕੀ ਹਨ ਅਤੇ ਨਤੀਜਿਆਂ ਤੋਂ ਪਹਿਲਾਂ ਲੀਡਰਾਂ ਦੀਆਂ ਧੜਕਨਾਂ ਤੇਜ਼ ਹੋਣ ਲੱਗੀਆਂ ਹਨ। ਤਮਾਮ ਪਾਰਟੀਆਂ ਆਪੋ-ਆਪਣੀ ਜਿੱਤ ਦਾ ਦਾਅਵਾ ਕਰ ਰਹੀਆਂ ਹਨ ਅਤੇ ਹੁਣ ਫੇਹਰਿਸਤ ਵਿੱਚ ਬੀਜੇਪੀ ਲੀਡਰਸ਼ਿਪ ਵੱਲੋਂ ਵੱਡਾ ਬਿਆਨ ਸਾਹਮਣੇ ਆਇਆ ਹੈ। 5 ਸੂਬਿਆਂ ਦੀਆਂ ਚੋਣਾਂ ਨੂੰ ਲੈ ਕੇ ਸ਼ਨੀਵਾਰ ਨੂੰ ਬੀਜੇਪੀ ਦੇ ਕੌਮੀ ਪ੍ਰਧਾਨ ਜੇਪੀ ਨੱਢਾ ਅਤੇ ਗ੍ਰਹਿ ਮੰਤਰੀ ਅਮਿਤ ਸ਼ਾਹ ਨੇ ਪ੍ਰੈੱਸ ਕਾਨਫਰੰਸ ਕੀਤੀ।
ਇਸ ਦੌਰਾਨ ਅਮਿਤ ਸ਼ਾਹ ਨੇ ਕਿਹਾ, “ਅਸੀਂ 4 ਸੂਬਿਆਂ (ਉੱਤਰ ਪ੍ਰਦੇਸ਼, ਗੋਆ, ਉੱਤਰਾਖੰਡ, ਮਣੀਪੁਰ) ਵਿੱਚ ਸਰਕਾਰ ਬਣਾਉਣ ਜਾ ਰਹੇ ਹਾਂ ਅਤੇ ਪੰਜਾਬ ਵਿੱਚ ਆਪਣੀ ਸਥਿਤੀ ਨੂੰ ਬਹੁਤ ਬਿਹਤਰ ਕਰਾਂਗੇ।“ ਉਹਨਾਂ ਕਿਹਾ ਕਿ ਅਸੀਂ ਪਹਿਲੀ ਵਾਰ ਪੰਜਾਬ ਵਿੱਚ ਗਠਜੋੜ ਦੀ ਸਭ ਤੋਂ ਵੱਡੀ ਪਾਰਟੀ ਦੇ ਤੌਰ ‘ਤੇ ਚੋਣ ਲੜੀ ਹੈ।
ਸ਼ਾਹ ਨੇ ਕਿਹਾ ਕਿ ਪੰਜਾਬ ਵਿੱਚ ਮੁਕਾਬਲਾ ਪੰਜ-ਤਰਫਾ ਸੀ। ਲਿਹਾਜਾ ਕੁਝ ਵੀ ਠੋਸ ਪੱਧਰ ‘ਤੇ ਨਹੀਂ ਕਿਹਾ ਜਾ ਸਕਦਾ। ਸ਼ਾਹ ਨੇ ਕਿਹਾ ਕਿ ਹਾਲੇ ਤਾਂ ਕੋਈ ਜੋਤਿਸ਼ੀ ਹੀ ਪੰਜਾਬ ਚੋਣਾਂ ਦਾ ਆਂਕਲਨ ਕਰ ਸਕਦਾ ਹੈ।
Joint press conference by BJP National President Shri @JPNadda and HM Shri @AmitShah at party headquarters in New Delhi. https://t.co/YPzy8HLo6m
— BJP (@BJP4India) March 5, 2022
ਨੱਢਾ ਨੇ ਅਕਾਲੀ ਦਲ ‘ਤੇ ਬੋਲਿਆ ਹਮਲਾ
ਜੇਪੀ ਨੱਢਾ ਨੇ ਕਿਹਾ ਕਿ ਪਹਿਲਾਂ ਪੰਜਾਬ ਵਿੱਚ ਬੀਜੇਪੀ ਅਕਾਲੀ ਦਲ ਦੇ ਨਾਲ ਮਿਲ ਕੇ ਚੋਣ ਲੜਦੀ ਰਹੀ, ਜਿਸ ਵਿੱਚ ਪਾਰਟੀ ਦਾ ਦਾਇਰਾ ਬੇਹੱਦ ਸੀਮਤ ਸੀ। ਉਹਨਾਂ ਕਿਹਾ ਕਿ ਪਾਰਟੀ ਵਿੱਚ ਕਈ ਵਾਰ ਇਕੱਲਿਆਂ ਚੋਣ ਲੜਨ ਦੀ ਮੰਗ ਉਠੀ, ਪਰ ਪ੍ਰਧਾਨ ਮੰਤਰੀ ਮੋਦੀ ਨੇ ਗਠਜੋੜ ਧਰਮ ਨਿਭਾਉਂਦੇ ਹੋਏ ਅਜਿਹਾ ਨਹੀਂ ਕੀਤਾ। ਹੁਣ ਅਕਾਲੀ ਦਲ ਨੇ ਹੀ ਗਠਜੋੜ ਤੋੜਨ ਦਾ ਕੰਮ ਕੀਤਾ।
ਕੈਪਟਨ ਤੇ ਢੀਂਡਸਾ ਦੇ ਨਾਲ ਲੜੀ ਚੋਣ
ਪੰਜਾਬ ਵਿੱਚ ਇਸ ਵਾਰ ਬੀਜੇਪੀ ਨੇ ਸਾਬਕਾ ਸੀਐੱਮ ਕੈਪਟਨ ਅਮਰਿੰਦਰ ਸਿੰਘ ਅਤੇ ਟਕਸਾਲੀ ਅਕਾਲੀ ਆਗੂ ਸੁਖਦੇਵ ਸਿੰਘ ਢੀਂਡਸਾ ਦੇ ਨਾਲ ਮਿਲ ਕੇ ਚੋਣ ਲੜੀ ਹੈ। ਬੀਜੇਪੀ ਨੇ ਪਹਿਲੀ ਵਾਰ ਪੰਜਾਬ ਵਿੱਚ 65 ਤੋਂ ਵੱਧ ਸੀਟਾਂ ‘ਤੇ ਚੋਣ ਲੜੀ। ਅਕਾਲੀ ਦਲ ਦੇ ਨਾਲ ਬੀਜੇਪੀ 20 ਤੋਂ 25 ਸੀਟਾਂ ਉੱਪਰ ਚੋਣ ਲੜਦੀ ਰਹੀ, ਜਿਸ ਵਿੱਚ ਬੀਜੇਪੀ ਦਾ ਸਭ ਤੋਂ ਵਧੀਆ ਪ੍ਰਦਰਸ਼ਨ 19 ਸੀਟਾਂ ਜਿੱਤਣ ਦਾ ਰਿਹਾ।
