ਚੰਡੀਗੜ੍ਹ। ਪੰਜਾਬ ਦਆਂ ਵਿਧਾਨ ਸਭਾ ਚੋਣਾਂ ਸਿਰ ‘ਤੇ ਹਨ। ਲਿਹਾਜਾ ਸਿੱਖਾਂ ਦੀ ਬਹੁਤਾਤ ਵਾਲੇ ਇਸ ਸੂਬੇ ਵਿੱਚ ਸਿੱਖ ਸਮਾਜ ਦੀ ਨਰਾਜ਼ਗੀ ਕਿਸੇ ਵੀ ਪਾਰਟੀ ਲਈ ਮੁਸੀਬਤ ਖੜ੍ਹੀ ਕਰ ਸਕਦੀ ਹੈ। ਅਜਿਹੇ ਵਿੱਚ ਬੀਜੇਪੀ ਵੀ ਸਿੱਖ ਵੋਟ ਬੈਂਕ ਨੂੰ ਭੁਨਾਉਣ ਦੀ ਕੋਸ਼ਿਸ਼ ਵਿੱਚ ਲੱਗ ਗਈ ਹੈ। ਬੇਸ਼ੱਕ ਬੀਜੇਪੀ ਦੀ ਅਗਵਾਈ ਵਾਲੀ ਕੇਂਦਰ ਸਰਕਾਰ ਨੇ ਖੇਤੀ ਕਾਨੂੰਨ ਵਾਪਸ ਲੈ ਲਏ ਹੋਣ, ਪਰ ਪਿਛਲੇ ਇੱਕ ਸਾਲ ਦੌਰਾਨ ਇਸ ਅੰਦੋਲਨ ਦੇ ਚਲਦੇ ਜੋ ਕੁਝ ਕਿਸਾਨਾਂ ਨੇ ਝੱਲਿਆ, ਉਸਨੂੰ ਭੁੱਲਣਾ ਇੰਨਾ ਵੀ ਅਸਾਨ ਨਹੀਂ ਹੈ। ਬਾਵਜੂਦ ਇਸਦੇ ਬੀਜੇਪੀ ਨੇ ਸਿੱਖਾਂ ਦੀ ਨਰਾਜ਼ਗੀ ਦੂਰ ਕਰਨ ਦੀ ਕਵਾਇਦ ਸ਼ੁਰੂ ਕਰ ਦਿੱਤੀ ਹੈ।
ਬੀਜੇਪੀ ਨੇ ਪ੍ਰਧਾਨ ਮੰਤਰੀ ਨਰੇਂਦਰ ਮੋਦੀ ਦੀ ਅਗਵਾਈ ਵਾਲੀ ਕੇਂਦਰ ਸਰਕਾਰ ਵੱਲੋਂ ਸਿੱਖ ਸਮਾਜ ਲਈ ਕੀਤੇ 13 ਕੰਮ ਗਿਣਾਏ ਹਨ, ਜਿਹਨਾਂ ਵਿੱਚ ਕਰਤਾਰਪੁਰ ਲਾਂਘੇ ਦੇ ਨਿਰਮਾਣ ਤੋਂ ਲੈ ਕੇ ’84 ਦੰਗਿਆਂ ਦੇ ਮੁਲਜ਼ਮਾਂ ਨੂੰ ਸਜਾ ਸਮੇਤ ਅਫਗਾਨਿਸਤਾਨ ਤੋਂ ਸਿੱਖਾਂ ਨੂੰ ਭਾਰਤ ਲਿਆਉਣ ਵਰਗੀਆਂ ਉਪਲਬਧੀਆਂ ਸ਼ਾਮਲ ਹਨ। ਇਹ ਸਾਰੀਆਂ ਉਪਲਬਧੀਆਂ ਗਿਣਾ ਕੇ ਬੀਜੇਪੀ ਨੇ ਸਿੱਖਾਂ ਨੂੰ ਪ੍ਰਭਾਵਿਤ ਕਰਨ ਦੀ ਕੋਸ਼ਿਸ਼ ਕੀਤੀ ਹੈ।
‘ਤੇਰ੍ਹਾਂ’ ਕੰਮ ਗਿਣਾਉਣ ਪਿੱਛੇ ਬਾਬੇ ਨਾਨਕ ਦਾ ਸਿਧਾਂਤ !
ਪਿਛਲੇ ਕੁਝ ਸਮੇਂ ਦੌਰਾਨ ਬੀਜੇਪੀ ਨੇ ਸਿੱਖ ਸਮਾਜ ਨਾਲ ਜੁੜੇ ਕਈ ਅਹਿਮ ਫੈਸਲੇ ਲਏ ਹਨ, ਜਿਹਨਾਂ ‘ਚੋਂ ਬੀਜੇਪੀ ਨੇ ਸਿਰਫ਼ 13 ਕੰਮ ਹੀ ਗਿਣਾਏ। ਬੀਜੇਪੀ ਦੇ ਇਸ ਸਿਆਸੀ ਪੇਚ ਨੂੰ ਬਾਬੇ ਨਾਨਕ ਦੇ ‘ਤੇਰਾ-ਤੇਰਾ’ ਸਿਧਾਂਤ ਨਾਲ ਜੋੜ ਕੇ ਵੇਖਿਆ ਜਾ ਰਿਹਾ ਹੈ।
ਦਰਅਸਲ, ਪਹਿਲੀ ਪਾਤਸ਼ਾਹੀ ਸ੍ਰੀ ਗੁਰੂ ਨਾਨਕ ਦੇਵ ਜੀ ਕਪੂਰਥਲਾ ਦੇ ਸੁਲਤਾਨਪੁਰ ਲੋਧੀ ਵਿੱਚ ਰਹਿੰਦਿਆਂ ਨਵਾਬ ਦੌਲਤ ਖਾਂ ਦੇ ਭੰਡਾਰ ਘਰ ਵਿੱਚ ਕੰਮ ਕਰਦੇ ਹਨ। ਇਥੇ ਗੁਰੂ ਨਾਨਕ ਦੇਵ ਜੀ ਜ਼ਰੂਰਤਮੰਦਾਂ ਦੀ ਮਦਦ ਕਰਦੇ ਸਨ। ਦੱਸਿਆ ਜਾਂਦਾ ਹੈ ਕਿ ਇਥੇ ਸਾਮਾਨ ਤੋਲਦਿਆਂ ਜਦੋਂ ਗੁਰੂ ਨਾਨਕ ਧਿਆਨ ਵਿੱਚ ਲੀਨ ਹੋ ਜਾਂਦੇ ਹਨ, ਤਾਂ ਉਹ ਸਭ ਨੂੰ ‘ਤੇਰਾ-ਤੇਰਾ’ ਕਹਿ ਕੇ ਸਾਮਾਨ ਦੇ ਦਿੰਦੇ ਸਨ। ਕੁਝ ਲੋਕਾਂ ਨੇ ਸੁਲਤਾਨ ਨੂੰ ਚੁਗਲੀ ਕਰ ਦਿੱਤੀ ਹੈ ਕਿ ਬਾਬੇ ਨਾਨਕ ਦੇ ਕਾਰਨ ਮੋਦੀਖਾਨਾ ਲੁੱਟ ਰਿਹਾ ਹੈ। ਹਾਲਾਂਕਿ ਜਦੋਂ ਜਾਂਚ ਹੋਈ, ਤਾਂ ਮੋਦੀਖਾਨੇ ਵਿੱਚ ਸਾਮਾਨ ਵੱਧ ਹੀ ਨਿਕਲਿਆ। ਇਸ ਨਾਲ ਜੁੜਿਆ ਗੁਰਦੁਆਰਾ ਹੱਟ ਸਾਹਿਬ ਅੱਜ ਵੀ ਸੁਲਤਾਨਪੁਰ ਲੋਧੀ ਵਿਖੇ ਸੁਸ਼ੋਭਿਤ ਹੈ। ਗੁਰੂ ਨਾਨਕ ਦੇਵ ਜੀ ਵੱਲੋਂ ਭੰਡਾਰ ਘਰ ਵਿੱਚ ਸਾਮਾਨ ਤੋਲਣ ਲਈ ਵਰਤੇ ਜਾਣ ਵਾਲੇ ਪੱਥਰ ਵੀ ਉਥੇ ਮੌਜੂਦ ਹਨ।
ਕਾਨੂੰਨ ਵਾਪਸੀ ਲਈ ਵੀ ਚੁਣਿਆ ਗੁਰਪੁਰਬ ਦਾ ਦਿਨ
ਦਿਲਚਸਪ ਹੈ ਕਿ ਸਿੱਖ ਸਮਾਜ ਦੀ ਨਰਾਜ਼ਗੀ ਦੂਰ ਕਰਨ ਲਈ ਪ੍ਰਧਾਨ ਮੰਤਰੀ ਨਰੇਂਦਰ ਮੋਦੀ ਨੇ ਦਿਨ ਵੀ ਓਹੀ ਚੁਣਿਆ, ਜਿਸ ਨਾਲ ਸਿੱਖ ਸਮਾਜ ਦੀਆਂ ਭਾਵਨਾਵਾਂ ਜੁੜੀਆਂ ਸਨ। ਮੋਦੀ ਨੇ ਪਹਿਲੀ ਪਾਤਸ਼ਾਹੀ ਦੇ ਪ੍ਰਕਾਸ਼ ਪੁਰਬ ਮੌਕੇ ਖੇਤੀ ਕਾਨੂੰਨਾਂ ਨੂੰ ਵਾਪਸ ਲਏ ਜਾਣ ਦਾ ਐਲਾਨ ਕੀਤਾ ਸੀ, ਜਿਸਦਾ ਸੰਵਿਧਾਨਕ ਪ੍ਰਕਿਰਿਆ ਵੀ ਸੈਸ਼ਨ ਸ਼ੁਰੂ ਹੁੰਦੇ ਹੀ ਮੁਕੰਮਲ ਕਰ ਲਈ ਗਈ। ਅਜਿਹਾ ਕਰਕੇ ਪੀਐੱਮ ਨੇ ਖੁਦ ਨੂੰ ਸਿੱਖਾਂ ਦਾ ਕਰੀਬੀ ਵਿਖਾਉਣ ਦੀ ਕੋਸ਼ਿਸ਼ ਕੀਤੀ ਸੀ।
ਪਹਿਲਾਂ ਬੁਕਲੇਟ ਵੀ ਜਾਰੀ ਕਰ ਚੁੱਕੀ ਹੈ ਸਰਕਾਰ
ਕਾਬਿਲੇਗੌਰ ਹੈ ਕਿ ਇਸੇ ਸਾਲ ਦੀ ਸ਼ੁਰੂਆਤ ਵਿੱਚ ਬੀਜੇਪੀ ਨੇ 71 ਪੇਜਾਂ ਦੀ ਇੱਕ ਬੁਕਲੇਟ ਵੀ ਜਾਰੀ ਕੀਤੀ ਸੀ। ‘ਪ੍ਰਧਾਨ ਮੰਤਰੀ ਮੋਦੀ ਅਤੇ ਉਹਨਾਂ ਦੀ ਸਰਕਾਰ ਦਾ ਸਿੱਖਾਂ ਦੇ ਨਾਲ ਵਿਸ਼ੇਸ਼ ਸਬੰਧ’ ਦੇ ਟਾਈਟਲ ਵਾਲੀ ਇਸ ਬੁਕਲੇਟ ਵਿੱਚ ਕਰਤਾਰਪੁਰ ਲਾਂਘੇ ਦਾ ਨਿਰਮਾਣ, ਲੰਗਰ ਨੂੰ GST ਮੁਕਤ ਕਰਨ, ਸਿੱਖ ਦੰਗਾ ਮਾਮਲੇ ‘ਚ ਕਾਰਵਾਈ ਅਤੇ ਦਹਿਸ਼ਤਵਾਦ ਦੇ ਦੌਰ ‘ਤ ਬਣੀ ਬਲੈਕ ਲਿਸਟ ਤੋਂ ਸਿੱਖਾਂ ਦੇ ਨਾਂਅ ਹਟਾਉਣ ਵਰਗੇ ਕੰਮ ਗਿਣਾਏ ਗਏ ਸਨ।
ਪੰਜਾਬ ਦੇ ਨਾਲ-ਨਾਲ UP ਤੇ ਉੱਤਰਾਖੰਡ ‘ਤੇ ਵੀ ਨਜ਼ਰ
ਜਾਹਿਰ ਹੈ ਇਹ ਸਾਰੇ ਕੰਮ ਗਿਣਾ ਕੇ ਬੀਜੇਪੀ ਦੀ ਨਜ਼ਰ ਪੰਜਾਬ ਦੇ ਸਿੱਖ ਵੋਟ ਬੈਂਕ ‘ਤੇ ਹੈ, ਪਰ ਇਸਦੇ ਨਾਲ ਹੀ 4 ਹੋਰ ਸੂਬਿਆਂ ਵਿੱਚ ਵੀ ਵਿਧਾਨ ਸਭਾ ਚੋਣਾਂ ਹੋਣ ਜਾ ਰਹੀਆਂ ਹਨ। ਇਹਨਾਂ ‘ਚੋਂ ਉੱਤਰ ਪ੍ਰਦੇਸ਼ ਅਤੇ ਉੱਤਰਾਖੰਡ ਦੇ ਵੀ ਕਈ ਜਿਲ੍ਹਿਆਂ ਵਿੱਚ ਸਿੱਖਾਂ ਦਾ ਚੰਗਾ ਅਧਾਰ ਹੈ। ਉੱਤਰ ਪ੍ਰਦੇਸ਼ ਦੇ ਮੁਰਾਦਾਬਾਦ, ਰਾਮਪੁਰ ਅਤੇ ਬਰੇਲੀ ਵਰਗੇ ਜਿਲ੍ਹਿਆਂ ਵਿੱਚ ਸਿੱਖਾਂ ਦੀ ਵੱਡੀ ਤਦਾਤ ਹੈ। ਇਸਦੇ ਨਾਲ ਹੀ ਲਖੀਮਪੁਰ ਖੀਰੀ ਵਿੱਚ ਕਿਸਾਨਾਂ ਨੂੰ ਕਥਿਤ ਤੌਰ ‘ਤੇ ਕੁਚਲੇ ਜਾਣ ਦੇ ਮਾਮਲੇ ‘ਚ ਵੀ ਬੀਜੇਪੀ ਦੀ ਸਾਖ ਖਰਾਬ ਹੋਈ ਹੈ, ਜਿਸ ਨੂੰ ਸੁਧਾਰਨ ਦੀ ਕੋਸ਼ਿਸ਼ ਹੋਵੇਗੀ। ਓਧਰ ਉੱਤਰਾਖੰਡ ਦੇ ਊਧਮਪੁਰ ਸਣੇ ਕਈ ਇਲਾਕਿਆਂ ਵਿੱਚ ਵੱਡੀ ਗਿਣਤੀ ਸਿੱਖ ਰਹਿੰਦੇ ਹਨ। ਲਿਹਾਜਾ ਇਹਨਾਂ ‘ਤੇ ਵੀ ਬੀਜੇਪੀ ਦੀ ਨਜ਼ਰ ਹੈ।
