ਚੰਡੀਗੜ੍ਹ। ਕੋਰੋਨਾ ਦੇ ਨਵੇਂ ਵੈਰੀਏਂਟ ਓਮੀਕ੍ਰੌਨ ਦੇ ਦੇਸ਼ ਭਰ ਵਿੱਚ ਵੱਧ ਰਹੇ ਮਾਮਲਿਆਂ ਵਿਚਾਲੇ ਹੁਣ ਪੰਜਾਬ ‘ਤੇ ਇਸਦਾ ਖਤਰਾ ਮੰਡਰਾਉਣ ਲੱਗਿਆ ਹੈ। ਦਰਅਸਲ, ਰਾਜਧਾਨੀ ਚੰਡੀਗੜ੍ਹ ਵਿੱਚ ਇਟਲੀ ਤੋਂ ਆਇਆ ਇੱਕ 20 ਸਾਲਾ ਨੌਜਵਾਨ ਓਮੀਕ੍ਰੌਨ ਪਾਜੀਟਿਵ ਪਾਇਆ ਗਿਆ ਹੈ। ਚੰਡੀਗੜ੍ਹ ਵਿੱਚ ਆਏ ਇਸ ਕੇਸ ਨੇ ਪੰਜਾਬ ਦੇ ਨਾਲ-ਨਾਲ ਇਸਦੇ ਨਾਲ ਲੱਗਦੇ ਹਰਿਆਣਾ ਤੇ ਹਿਮਾਚਲ ਵਿੱਚ ਹੜਕੰਪ ਮਚਾ ਦਿੱਤਾ ਹੈ।
ਇਹ ਤਿੰਨੇ ਸੂਬੇ ਚੰਡੀਗੜ੍ਹ ਦੇ ਨਾਲ ਲੱਗਦੇ ਹਨ। ਬੇਸ਼ੱਕ ਇਹਨਾਂ ਸੂਬਿਆਂ ਵੱਲੋਂ ਚੰਡੀਗੜ੍ਹ ਏਅਰਪੋਰਟ ‘ਤੇ ਪਹੁੰਚਣ ਵਾਲੇ ਯਾਤਰੀਆਂ ਦੀ ਜਾਂਚ ਕਰਵਾਈ ਜਾ ਰਹੀ ਹੈ, ਪਰ ਚੰਡੀਗੜ੍ਹ ਤੋਂ ਇਹਨਾਂ ਸੂਬਿਆਂ ਨੂੰ ਜਾਣ ਵਾਲੇ ਯਾਤਰੀਆਂ ‘ਤੇ ਫਿਲਹਾਲ ਕਿਸੇ ਤਰ੍ਹਾਂ ਦੀ ਕੋਈ ਪਾਬੰਦੀ ਨਹੀਂ ਹੈ। ਅਜਿਹੇ ਵਿੱਚ ਜੇਕਰ ਓਮੀਕ੍ਰੌਨ ਫੈਲਿਆ, ਤਾਂ ਇਹਨਾਂ ਸੂਬਿਆਂ ਵਿੱਚ ਖ਼ਤਰਾ ਵੱਧ ਸਕਦਾ ਹੈ। ਫਿਲਹਾਲ ਇਹਨਾਂ ਤਿੰਨੇ ਸੂਬਿਆਂ ਵਿੱਚ ਓਮੀਕ੍ਰੌਨ ਦਾ ਇੱਕ ਵੀ ਕੇਸ ਨਹੀਂ ਹੈ।
ਸਭ ਤੋਂ ਅਹਿਮ ਗੱਲ ਇਹ ਹੈ ਕਿ ਚੰਡੀਗੜ੍ਹ ਵਿੱਚ ਓਮੀਕ੍ਰੌਨ ਪਾਜੀਟਿਵ ਪਾਏ ਗਏ ਨੌਜਵਾਨ ਵਿੱਚ ਕੋਰੋਨਾ ਦਾ ਇੱਕ ਵੀ ਲੱਛਣ ਨਹੀਂ ਸੀ, ਜਿਸ ਨਾਲ ਚਿੰਤਾ ਵਧਣਾ ਲਾਜ਼ਮੀ ਹੈ। ਵਿਦੇਸ਼ ਤੋਂ ਆਉਣ ‘ਤੇ ਪ੍ਰੋਟੋਕੋਲ ਤਹਿਤ ਨੌਜਵਾਨ ਦਾ ਟੈਸਟ ਕੀਤਾ ਗਿਆ ਸੀ, ਜਿਸ ਤੋਂ ਬਾਅਦ ਇਸਦਾ ਪਤਾ ਲੱਗਿਆ। ਇਸ ਨੌਜਵਾਨ ਨੂੰ ਫਾਈਜ਼ਰ ਵੈਕਸੀਨ ਦੀ ਦੋਵੇਂ ਡੋਜ਼ ਵੀ ਲੱਗੀਆਂ ਹੋਈਆਂ ਹਨ।
22 ਨਵੰਬਰ ਨੂੰ ਚੰਡੀਗੜ੍ਹ ਆਇਆ ਸੀ ਨੌਜਵਾਨ
ਇਹ ਨੌਜਵਾਨ ਬੀਤੀ 22 ਨਵੰਬਰ ਨੂੰ ਚੰਡੀਗੜ੍ਹ ਆਇਆ ਸੀ। ਜਾਣਕਾਰੀ ਮੁਤਾਬਕ, ਉਹ ਆਪਣੇ ਰਿਸ਼ਤੇਦਾਰਾਂ ਨੂੰ ਮਿਲਣ ਲਈ ਚੰਡੀਗੜ੍ਹ ਆਇਆ ਸੀ ਅਤੇ ਪ੍ਰੋਟੋਕੋਲ ਦੇ ਤਹਿਤ ਉਸ ਨੂੰ ਹੋਮ ਕੁਆਰੰਟੀਨ ਕੀਤਾ ਗਿਆ ਸੀ। ਇਸ ਉਪਰੰਤ 1 ਦਸੰਬਰ ਨੂੰ ਮੁੜ ਟੈਸਟ ਕਰਨ ‘ਤੇ ਉਹ ਕੋਰੋਨਾ ਪਾਜੀਟਿਵ ਪਾਇਆ ਗਿਆ ਸੀ, ਜਿਸ ਤੋਂ ਬਾਅਦ ਉਸਨੂੰ ਇੰਸਟੀਟਿਊਸ਼ਨਲ ਕੁਆਰੰਟੀਨ ਕਰ ਦਿੱਤਾ ਗਿਆ। ਇਸ ਵਿਚਾਲੇ ਓਮੀਕ੍ਰੌਨ ਵੈਰੀਏਂਟ ਦਾ ਪਤਾ ਲਗਾਉਣ ਲਈ ਉਸਦੇ ਸੈਂਪਲ ਜੀਨੋਮ ਸੀਕਵੈਂਸਿੰਗ ਜਾਂਚ ਲਈ ਦਿੱਲੀ ਭੇਜੇ ਗਏ ਸਨ। ਦਿੱਲੀ ਦੀ ਜੀਨੋਮ ਸੀਕਵੈਂਸਿੰਗ ਜਾਂਚ ਦੇ ਨਤੀਜੇ ਸ਼ਨੀਵਾਰ ਨੂੰ ਮਿਲੇ, ਜਿਸ ਵਿੱਚ ਓਮੀਕ੍ਰੌਨ ਵੈਰੀਏਂਟ ਦੀ ਪੁਸ਼ਟੀ ਹੋਈ ਹੈ।
ਹੁਣ ਉਸਦੀ ਦੋਬਾਰਾ ਜਾਂਚ ਕੀਤੀ ਜਾ ਰਹੀ ਹੈ। ਜੇਕਰ ਉਸਦੀ ਰਿਪੋਰਟ ਨੈਗੇਟਿਵ ਆਈ, ਤਾਂ 7 ਦਿਨਾਂ ਲਈ ਹੋਮ ਕੁਆਰੰਟੀਨ ਕੀਤਾ ਜਾਵੇਗਾ। ਪਾਜੀਟਿਵ ਆਉਣ ‘ਤੇ 7 ਦਿਨਾਂ ਲਈ ਇੰਸਟੀਟਿਊਸ਼ਨਲ ਕੁਆਰੰਟੀਨ ਰਹਿਣਾ ਪਏਗਾ, ਜਦੋਂ ਤੱਕ ਰਿਪੋਰਟ ਨੈਗੇਟਿਵ ਨਹੀਂ ਆਉਂਦੀ।
ਪੰਜਾਬ-ਹਰਿਆਣਾ ਦੀ ਰਾਜਧਾਨੀ ਚੰਡੀਗੜ੍ਹ
ਜਿਕਰਯੋਗ ਹੈ ਕਿ ਚੰਡੀਗੜ੍ਹ, ਪੰਜਾਬ ਅਤੇ ਹਰਿਆਣਾ ਦੀ ਰਾਜਧਾਨੀ ਹੈ। ਲਿਹਾਜਾ ਦੋਵੇਂ ਸੂਬਿਆਂ ਦੀਆਂ ਸਰਕਾਰਾਂ ਦੇ ਸਾਰੇ ਵੱਡੇ ਦਫ਼ਤਰ ਚੰਡੀਗੜ੍ਹ ਵਿੱਚ ਹੀ ਹਨ। ਅਫ਼ਸਰਾਂ ਤੋਂ ਲੈ ਕੇ ਲੀਡਰਾਂ ਤੱਕ ਦੀ ਇਥੇ ਬਿਨ੍ਹਾਂ ਰੋਕ-ਟੋਕ ਆਵਾਜਾਈ ਲੱਗੀ ਰਹਿੰਦੀ ਹੈ। ਅਜਿਹੇ ਵਿੱਚ ਜੇਕਰ ਚੰਡੀਗੜ੍ਹ ਵਿੱਚ ਓਮੀਕ੍ਰੌਨ ਵਧਿਆ, ਤਾਂ ਟੈਂਸ਼ਨ ਵਧਣਾ ਲਾਜ਼ਮੀ ਹੈ।
ਟੂਰਿਜ਼ਮ ਦੇ ਲਿਹਾਜ਼ ਨਾਲ ਹਿਮਾਚਲ ਨੂੰ ਵੀ ਖ਼ਤਰਾ
ਚੰਡੀਗੜ੍ਹ ਵਿੱਚ ਰਹਿਣ ਵਾਲੇ ਵਧੇਰੇਤਰ ਲੋਕਾਂ ਲਈ ਟੂਰਿਜ਼ਮ ਦੇ ਲਿਹਾਜ਼ ਨਾਲ ਹਿਮਾਚਲ ਪ੍ਰਦੇਸ਼ ਉਹਨਾਂ ਦੀ ਫੇਵਰੇਟ ਜਗ੍ਹਾ ਹੈ। ਖਾਸਕਰ ਨਜ਼ਦੀਕ ਹੋਣ ਦੇ ਚਲਦੇ ਸਿਟੀ ਬਿਊਟੀਫੁੱਲ ਦੇ ਲੋਕ ਆਮ ਤੌਰ ‘ਤੇ ਉਥੇ ਆਉਂਦੇ-ਜਾਂਦੇ ਹਨ। ਖਾਸਕਰ, ਸ਼ਨੀਵਾਰ ਤੇ ਐਤਾਵਰ ਨੂੰ ਛੁੱਟੀ ਹੋਣ ਦੇ ਚਲਦੇ ਵੱਡੀ ਗਿਣਤੀ ਵਿੱਚ ਲੋਕ ਘੁੰਮਣ ਲਈ ਹਿਮਾਚਲ ਨੂੰ ਜਾਂਦੇ ਹਨ। ਪੰਜਾਬ ਅਤੇ ਹਰਿਆਣਾ ਤੋਂ ਵੀ ਵੱਡੀ ਗਿਣਤੀ ਟੂਰਿਸਟ ਇਥੇ ਪਹੁੰਚਦੇ ਹਨ।
ਪੰਜਾਬ ‘ਚ 3 ਸ਼ੱਕੀ ਮਰੀਜ਼
ਪੰਜਾਬ ਵਿੱਚ ਓਮੀਕ੍ਰੌਨ ਦਾ ਖ਼ਤਰਾ ਇਸ ਲਈ ਵੀ ਵੱਧ ਜਾਂਦਾ ਹੈ, ਕਿਉਂਕਿ ਇਥੇ ਪਹਿਲਾਂ ਹੀ ਇਥੇ 3 ਸ਼ੱਕੀ ਮਰੀਜ਼ ਹਨ। ਇਹ ਲੋਕ ਵੀ ਇਟਲੀ ਤੋਂ ਆਏ ਸਨ ਅਤੇ ਅੰਮ੍ਰਿਤਸਰ ਏਅਰਪੋਰਟ ‘ਤੇ ਉਤਰੇ ਸਨ। ਕੋਵਿਡ ਜਾਂਚ ਵਿੱਚ ਇਹ ਤਿੰਨੇ ਪਾਜੀਟਿਵ ਪਾਏ ਗਏ ਹਨ ਅਤੇ ਇਹਨਾਂ ਦੇ ਸੈਂਪਲ ਓਮੀਕ੍ਰੌਨ ਵੈਰੀਏਂਟ ਦੀ ਜਾਂਚ ਲਈ ਦਿੱਲੀ ਭੇਜੇ ਗਏ ਹਨ। ਫਿਲਹਾਲ ਇਹਨਾਂ ਨੂੰ ਮੈਡੀਕਲ ਕਾਲਜ ਵਿੱਚ ਇੱਕ ਵੱਖਰੇ ਵਾਰਡ ‘ਚ ਰੱਖਿਆ ਗਿਆ ਹੈ।
