ਬਿਓਰੋ। ਅਮਰੀਕਾ ਦੇ ਇੰਡੀਆਨਾਪੋਲਿਸ ਸਥਿਤ ਫੈਡੇਕਸ ਫੈਸੇਲਟੀ ‘ਚ ਗੋਲੀਬਾਰੀ ਦੌਰਾਨ ਜਾਨ ਗਵਾਉਣ ਵਾਲੇ 8 ਲੋਕਾਂ ਦੀ ਪਛਾਣ ਕਰ ਲਈ ਗਈ ਹੈ, ਜਿਹਨਾਂ ‘ਚੋਂ 4 ਭਾਰਤੀ ਮੂਲ ਦੇ ਸਿੱਖ ਸਨ। 66 ਸਾਲਾ ਅਮਰਜੀਤ ਜੋਹਲ, 64 ਸਾਲਾ ਜਸਵਿੰਦਰ ਕੌਰ, 68 ਸਾਲਾ ਜਸਵਿੰਦਰ ਸਿੰਘ ਅਤੇ 48 ਸਾਲਾ ਅਮਰਜੀਤ ਸੇਖੋਂ ਇਸ ਗੋਲੀਬਾਰੀ ਦਾ ਸ਼ਿਕਾਰ ਹੋਏ ਸਨ।
9/11 ਦੇ ਬਾਅਦ ਤੋਂ ਨਿਸ਼ਾਨੇ ‘ਤੇ ਸਨ !
ਦੱਸਿਆ ਜਾ ਰਿਹਾ ਹੈ ਕਿ ਇਹ ਚਾਰੇ ਸਿੱਖ ਅਮਰੀਕਾ ‘ਚ ਵਰਲਡ ਟਰੇਡ ਸੈਂਟਰ ‘ਤੇ ਹੋਏ ਹਮਲੇ ਦੇ ਬਾਅਦ ਤੋਂ ਹੀ HateCrime ਦਾ ਸ਼ਿਕਾਰ ਸਨ। ਇਸ ਲਈ ਪੁਲਿਸ ਤੋਂ ਮੰਗ ਕੀਤੀ ਜਾ ਰਹੀ ਹੈ ਕਿ ਇਸ ਘਟਨਾ ਦੀ HateCrime ਦੇ ਪਹਿਲੂ ਤੋਂ ਵੀ ਜਾਂਚ ਕੀਤੀ ਜਾਵੇ।
ਇੱਕ ਹਫ਼ਤੇ ਪਹਿਲਾਂ ਹੀ ਫੈਡੇਕਸ ‘ਚ ਕੰਮ ਕਰਨ ਆਇਆ ਸੀ ਜਸਵਿੰਦਰ
ਇਹ ਵੀ ਕਾਬਿਲੇਗੌਰ ਹੈ ਕਿ ਗੋਲੀਬਾਰੀ ‘ਚ ਜਾਨ ਗਵਾਉਣ ਵਾਲਾ 68 ਸਾਲਾ ਜਸਵਿੰਦਰ ਕੁਝ ਸਮਾਂ ਪਹਿਲਾਂ ਹੀ ਪੰਜਾਬ ਤੋਂ ਅਮਰੀਕਾ ਆਇਆ ਸੀ ਅਤੇ ਕਰੀਬ ਇੱਕ ਹਫ਼ਤੇ ਪਹਿਲਾਂ ਹੀ ਉਸਨੇ ਫੈਡੇਕਸ ‘ਚ ਕੰਮ ਕਰਨਾ ਸ਼ੁਰੂ ਕੀਤਾ ਸੀ।
ਵੇਅਰਹਾਊਸ ‘ਚ 90% ਕਰਮਚਾਰੀ ਭਾਰਤੀ
ਹਾਲਾਂਕਿ ਪੁਲਿਸ ਦਾ ਕਹਿਣਾ ਹੈ ਕਿ ਘਟਨਾ ਦੇ ਕਾਰਨਾਂ ਬਾਰੇ ਫਿਲਹਾਲ ਸਾਫ਼ ਨਹੀਂ ਹੈ, ਪਰ ਇਸ ਗੱਲ ਨੂੰ ਵੀ ਅਣਗੌਲਿਆਂ ਨਹੀਂ ਕੀਤਾ ਜਾ ਸਕਦਾ ਕਿ ਫੈਡੇਕਸ ਕੰਪਨੀ ‘ਚ ਕੰਮ ਕਰਨ ਵਾਲੇ 90 ਫ਼ੀਸਦ ਕਰਮਚਾਰੀ ਭਾਰਤੀ ਹਨ ਅਤੇ ਇਹਨਾਂ ‘ਚ ਵਧੇਰੇਤਰ ਸਿੱਖ ਭਾਈਚਾਰੇ ਦੇ ਲੋਕ ਆਉਂਦੇ ਹਨ।
ਕੀ ਹੈ ਮਾਮਲਾ ?
ਅਮਰੀਕਾ ਦੇ ਇੰਡੀਆਨਾਪੋਲਿਸ ‘ਚ ਏਅਰਪੋਰਟ ਨੇੜੇ ਫੈਡੇਕਸ ਕੰਪਨੀ ਦੇ ਵੇਅਰਹਾਊਸ ‘ਚ ਵੀਰਵਾਰ ਰਾਤ ਇੱਕ ਸ਼ਖਸ ਵੱਲੋਂ ਗੋਲੀਬਾਰੀ ਕੀਤੀ ਗਈ ਸੀ। ਪੁਲਿਸ ਮੁਤਾਬਕ ਇਸ ਦੌਰਾਨ ਬੰਦੂਕਧਾਰੀ ਨੇ ਖੁਦ ਵੀ ਗੋਲੀ ਮਾਰ ਕੇ ਖੁਦਕੁਸ਼ੀ ਕਰ ਲਈ ਹੈ, ਜਿਸਦੀ ਪਛਾਣ ਬ੍ਰਾਂਡੇਨ ਸਕੌਟ ਦੇ ਤੌਰ ‘ਤੇ ਹੋਈ ਹੈ।
