October 3, 2022
(Chandigarh)
ਦਿੱਲੀ ਤੋਂ ਬਾਅਦ ਪੰਜਾਬ ਵਿੱਚ ਵੀ ਆਮ ਆਦਮੀ ਪਾਰਟੀ ਨੇ ਭਰੋਸੇ ਦੀ ਵੋਟ ਹਾਸਲ ਕਰ ਲਈ ਹੈ। ਪੰਜਾਬ ਵਿਧਾਨ ਸਭਾ ਵਿੱਚ ਸਰਕਾਰ ਨੂੰ ਭਰੋਸਗੀ ਮਤੇ ਦੇ ਹੱਕ ਵਿੱਚ 93 ਵੋਟਾਂ ਹਾਸਲ ਹੋਈਆਂ। ਇਹਨਾਂ ਵਿੱਚ ਆਮ ਆਦਮੀ ਪਾਰਟੀ ਦੇ 91 ਵਿਧਾਇਕਾਂ(ਸਪੀਕਰ ਨੂੰ ਛੱਡ ਕੇ) ਤੋਂ ਇਲਾਵਾ ਅਕਾਲੀ ਵਿਧਾਇਕ ਮਨਪ੍ਰੀਤ ਇਆਲੀ ਅਤੇ ਬਹੁਜਨ ਸਮਾਜ ਪਾਰਟੀ ਦੇ ਵਿਧਾਇਕ ਡਾ. ਨਛੱਤਰ ਪਾਲ ਦੀ ਵੋਟ ਸ਼ਾਮਲ ਹੈ।
ਦਰਅਸਲ, ਵਿਧਾਨ ਸਭਾ ਵਿੱਚ ਅਵਾਜ਼ ਮੱਤ ਨਾਲ ਵੋਟਿੰਗ ਹੋਈ, ਜਿਸ ਵਿੱਚ ਸਪੀਕਰ ਨੇ ਪਹਿਲਾਂ ਭਰੋਸਗੀ ਮਤੇ ‘ਤੇ ਪੱਖ ਵਾਲਿਆਂ ਨੂੰ ਹੱਥ ਖੜ੍ਹਾ ਕਰਨ ਲਈ ਕਿਹਾ। ਸੀਐੱਮ ਸਣੇ ਆਮ ਆਦਮੀ ਪਾਰਟੀ ਦੇ 91 ਵਿਧਾਇਕਾਂ ਨੇ ਮਤੇ ਦੇ ਪੱਖ ‘ਚ ਅਵਾਜ਼ ਬੁਲੰਦ ਕੀਤੀ, ਜਦਕਿ ਮਤੇ ਦੇ ਵਿਰੋਧ ‘ਚ ਹੱਥ ਖੜ੍ਹਾ ਕਰਨ ਵਾਲਿਆਂ ਦੀ ਵਾਰੀ ਕੋਈ ਅਵਾਜ਼ ਨਹੀਂ ਆਈ। ਸਦਨ ਵਿੱਚ ਮੌਜੂਦ ਅਕਾਲੀ ਦਲ ਤੇ BSP ਦੇ 2 ਵਿਧਾਇਕਾਂ ਨੇ ਮਤੇ ‘ਤੇ ਨਾ ਹਾਂ ਦੇ ਪੱਖ ਵਿੱਚ ਤੇ ਨਾ ਹੀ ਨਾਂਹ ਦੇ ਹੱਕ ਵਿੱਚ ਵੋਟ ਕੀਤੀ। ਇਸ ਲਈ ਉਹਨਾਂ ਦੀ ਵੋਟ ਵੀ ਮਤੇ ਦੇ ਹੱਕ ਵਿੱਚ ਮੰਨੀ ਗਈ।
ਕਾਂਗਰਸ-BJP ਸਦਨ ‘ਚੋਂ ਰਹੇ ਗੈਰ-ਹਾਜ਼ਰ
ਭਰੋਸਗੀ ਮਤੇ ‘ਤੇ ਚਰਚਾ ਸ਼ੁਰੂ ਹੁੰਦੇ ਹੀ ਕਾਂਗਰਸ ਨੇ ਸਦਨ ਤੋਂ ਵਾਕਆਊਟ ਕਰ ਲਿਆ ਸੀ, ਜਦਕਿ ਬੀਜੇਪੀ ਨੇ ਪਹਿਲਾਂ ਹੀ ਪੂਰੇ ਸੈਸ਼ਨ ਦਾ ਬਾਈਕਾਟ ਕੀਤਾ ਹੋਇਆ ਹੈ। ਅਕਾਲੀ ਦਲ ਦੇ 2 ਵਿਧਾਇਕ ਵੀ ਸਦਨ ‘ਚੋਂ ਗੈਰ-ਹਾਜ਼ਰ ਰਹੇ।
ਆਪਰੇਸ਼ਨ ਲੋਟਸ ਹੋਇਆ ਫੇਲ੍ਹ- CM
ਸਪੀਕਰ ਦੇ ਐਲਾਨ ਤੋਂ ਬਾਅਦ ਮੁੱਖ ਮੰਤਰੀ ਭਗਵੰਤ ਮਾਨ ਨੇ ਸਦਨ ‘ਚੋਂ ਬਾਹਰ ਆ ਕੇ ਕਿਹਾ, “ਅੱਜ ਆਪਰੇਸ਼ਨ ਲੋਟਸ ਦੀ ਜ਼ਬਰਦਸਤ ਹਾਰ ਹੋਈ ਹੈ ਅਤੇ ਆਪਰੇਸ਼ਨ ਲੋਟਸ ਫੇਲ੍ਹ ਹੋਇਆ ਹੈ। ਕਾਂਗਰਸ ਜਿਹੜੀ ਬੀਜੇਪੀ ਦਾ ਹਿੱਸਾ ਬਣੀ ਹੋਈ ਹੈ, ਉਹ ਇਸ ਭਰੋਸਗੀ ਮਤੇ ਤੋਂ ਬਾਹਰ ਰਹੀ। ਮੈਂ ਉਨ੍ਹਾਂ ਨਾਲ ਹਮਦਰਦੀ ਕਰਦਾ ਹਾਂ ਕਿ ਤੁਹਾਡੀ ਕੀਮਤ ਨਹੀਂ ਪੈ ਸਕੀ।” ਉਹਨਾਂ ਕਿਹਾ ਕਿ ਸਾਡੀ ਪਾਰਟੀ ਇਕੱਠਿਆਂ ਚਲਦੀ ਹੈ।
ਇਸ ਤੋਂ ਪਹਿਲਾਂ ਸਦਨ ਵਿੱਚ ਭਰੋਸਗੀ ਮਤੇ ‘ਤੇ ਬੋਲਦਿਆਂ ਮੁੱਖ ਮੰਤਰੀ ਨੇ ਕਿਹਾ, “ਲੋਕਤੰਤਰ ਨੂੰ ਕੋਈ ਖਰੀਦਣ ਦੀ ਕੋਸ਼ਿਸ਼ ਕਰੇਗਾ, ਪੈਸੇ ਨਾਲ ਜਿੱਤਣ ਦੀ ਕੋਸ਼ਿਸ਼ ਕਰੇਗਾ, ਮੈਨੂੰ ਨਹੀਂ ਲਗਦਾ ਸਾਡੇ ਦੇਸ਼ ਦਾ ਲੋਕਤੰਤਰ ਇੰਨਾ ਕਮਜ਼ੋਰ ਹੈ, ਜੋ ਇਨ੍ਹਾਂ ਦੇ ਪੈਸਿਆਂ ਨਾਲ ਵਿਕ ਜਾਵੇ।”
‘ਆਪ’ ਕਨਵੀਨਰ ਅਤੇ ਦਿੱਲੀ ਦੇ ਮੁੱਖ ਮੰਤਰੀ ਅਰਵਿੰਦ ਕੇਜਰੀਵਾਲ ਨੇ ਵੀ ਸੈਸ਼ਨ ਮੁਲਤਵੀ ਹੁੰਦੇ ਹੀ ਟਵੀਟ ਕੀਤਾ ਅਤੇ ਕਿਹਾ, “ਪੰਜਾਬ ‘ਚ ਵੀ ਆਪਰੇਸ਼ਨ ਲੋਟਸ ਫੇਲ੍ਹ ਹੋ ਗਿਆ।”
Operation Lotus fails in Punjab also. https://t.co/b5p899Wjaz
— Arvind Kejriwal (@ArvindKejriwal) October 3, 2022
ਕਿਉਂ ਲਿਆਂਦਾ ਗਿਆ ਭਰੋਸਗੀ ਮਤਾ..?
ਦੱਸ ਦਈਏ ਕਿ ਪਿਛਲੇ ਦਿਨੀਂ ਆਮ ਆਦਮੀ ਪਾਰਟੀ ਨੇ ਬੀਜੇਪੀ ‘ਤੇ ਉਹਨਾਂ ਦੇ ਵਿਧਾਇਕਾਂ ਨੂੰ ਖਰੀਦਣ ਦੀ ਕੋਸ਼ਿਸ਼ ਦਾ ਇਲਜ਼ਾਮ ਲਾਇਆ ਸੀ। ਖਜ਼ਾਨਾ ਮੰਤਰੀ ਹਰਪਾਲ ਚੀਮਾ ਨੇ ਪ੍ਰੈੱਸ ਕਾਨਫ਼ਰੰਸ ਕਰਕੇ ਦਾਅਵਾ ਕੀਤਾ ਸੀ ਕਿ ਉਹਨਾਂ ਦੇ ਕਰੀਬ 10 ਵਿਧਾਇਕਾਂ ਨੂੰ 25-25 ਕਰੋੜ ਦੇ ਆਫਰ ਸਬੰਧੀ ਫੋਨ ਕਾਲ ਆ ਰਹੇ ਹਨ। ਨਾਲ ਹੀ ਬੀਜੇਪੀ ‘ਚ ਸ਼ਾਮਲ ਨਾ ਹੋਣ ਦੀ ਸੂਰਤ ‘ਚ CBI ਤੇ ED ਵਰਗੀਆਂ ਏਜੰਸੀਆਂ ਦਾ ਡਰ ਵਿਖਾਇਆ ਜਾ ਰਿਹਾ ਹੈ।(ਪੂਰੀ ਖ਼ਬਰ ਇਥੇ ਪੜ੍ਹੋ)
ਇਹ ਵੀ ਪੜ੍ਹੋ:- AAP ਦਾ BJP ‘ਤੇ ਨਵਾੰ ਇਲਜ਼ਾਮ…ਕਿਹਾ- ਵਿਧਾਇਕਾੰ ਨੂੰ ਜਾਨੋੰ ਮਾਰਨ ਦੀ ਦਿੱਤੀ ਜਾ ਰਹੀ ਧਮਕੀ
