ਟੋਕਿਓ। ਟੋਕਿਓ ਓਲੰਪਿਕਸ ‘ਚ ਬਿਹਤਰ ਪ੍ਰਦਰਸ਼ਨ ਕਰਦਿਆਂ ਸਟਾਰ ਸ਼ਟਲਰ ਪੀਵੀ ਸਿੰਧੂ ਨੇ ਭਾਰਤ ਦੀ ਝੋਲੀ ਹੁਣ ਤੀਜਾ ਮੈਡਲ ਪਾ ਦਿੱਤਾ ਹੈ। ਸਿੰਧੂ ਨੇ ਬ੍ਰਾਨਜ਼ ਮੈਡਲ ਮੈਚ ਵਿੱਚ ਚੀਨ ਦੀ ਜਿਆਓ ਬਿੰਗ ਹੇ ਨੂੰ ਸਿਰਫ਼ 52 ਮਿੰਟਾਂ ‘ਚ 21-13, 21-15 ਨਾਲ ਮਾਤ ਦੇ ਕੇ ਮੈਡਲ ਆਪਣੇ ਨਾੰਅ ਕੀਤਾ ਹੈ।
ਸਿਰਫ਼ 52 ਮਿੰਟਾਂ ‘ਚ ਜਿੱਤਿਆ ਮੈਚ
ਪੀਵੀ ਸਿੰਧੂ ਨੇ ਬਿਹਤਰੀਨ ਸ਼ੁਰੂਆਤ ਕਰਦੇ ਹੋਏ ਪਹਿਲੀ ਗੇਮ ‘ਚ 4-0 ਦੀ ਬੜ੍ਹਤ ਬਣਾ ਲਈ ਸੀ। ਇਸ ਤੋਂ ਬਾਅਦ ਜਿਆਓ ਨੇ ਵਾਪਸੀ ਕਰਦੇ ਹੋਏ 5-5 ਦੀ ਬਰਾਬਰੀ ਕਰ ਲਈ। ਫਿਰ ਸ਼ਾਨਦਾਰ ਸ਼ਾਟਸ ਲਗਾਉਂਦੇ ਹੋਏ ਸਿੰਧੂ ਨੇ ਪਹਿਲੀ ਗੇਮ ਦੇ ਹਾਫ ਨੂੰ 11-8 ਦੇ ਫ਼ਰਕ ਨਾਲ ਖਤਮ ਕੀਤਾ। ਇਸ ਤੋਂ ਬਾਅਦ ਸਿੰਧੂ ਨੇ ਪਿੱਛੇ ਮੁੜ ਕੇ ਨਹੀਂ ਵੇਖਿਆ ਅਤੇ ਸਿਰਫ਼ 23 ਮਿੰਟਾਂ ‘ਚ ਪਹਿਲੀ ਗੇਮ ਆਪਣੇ ਨਾੰਅ ਕੀਤੀ।
ਦੂਜੀ ਗੇਮ ‘ਚ ਵੀ ਸਿੰਧੂ ਨੇ ਬਿਹਤਰੀਨ ਸ਼ੁਰੂਆਤ ਕੀਤੀ ਅਤੇ ਗੇਮ ਵਿੱਚ 11-8 ਨਾਲ ਅੱਗੇ ਰਹੀ। ਹਾਲਾਂਕਿ ਲਗਾਤਾਰ 3 ਪੁਆਇੰਟਸ ਹਾਸਲ ਕਰਕੇ ਜਿਆਓ ਇੱਕ ਵਾਰ ਫਿਰ ਬਰਾਬਰੀ ‘ਤੇ ਪਹੁੰਚ ਗਈ। ਇਸ ਤੋਂ ਬਾਅਦ ਸਿੰਧੂ ਨੇ ਸਮੈਸ਼ ਅਤੇ ਲੌਂਗ ਸ਼ੌਟ ਲਗਾਉਂਦੇ ਹੋਏ ਲਗਾਤਾਰ 4 ਪੁਆਇੰਟ ਬਣਾਏ ਅਤੇ ਮੈਚ 15-11 ਦੇ ਸਕੋਰ ‘ਤੇ ਲਿਆ ਖੜ੍ਹਾ ਕੀਤਾ। ਇਸ ਤੋਂ ਬਾਅਦ ਚੀਨੀ ਖਿਡਾਰਨ ਸਿਰਫ਼ 4 ਪੁਆਇੰਟ ਹੀ ਬਣਾ ਸਕੀ, ਪਰ ਸਿੰਧੂ ਨੇ 6 ਪੁਆਇੰਟਸ ਬਣਾ ਕੇ ਦੂਜੀ ਗੇਮ ਦੇ ਨਾਲ-ਨਾਲ ਮੈਚ ਵੀ ਆਪਣੇ ਨਾੰਅ ਕਰ ਲਿਆ।
ਲਗਾਤਾਰ 2 ਓਲੰਪਿਕ ਮੈਡਲ ਜਿੱਤਣ ਵਾਲੀ ਪਹਿਲੀ ਮਹਿਲਾ ਖਿਡਾਰੀ
ਟੋਕਿਓ ਓਲੰਪਿਕਸ ‘ਚ ਬ੍ਰਾਨਜ਼ ਮੈਡਲ ਜਿੱਤਣ ਦੇ ਨਾਲ ਹੀ ਪੀਵੀ ਸਿੰਧੂ ਨੇ ਇਤਿਹਾਸ ਰਚ ਦਿੱਤਾ ਹੈ। ਸਿੰਧੂ ਓਲੰਪਿਕ ‘ਚ ਲਗਾਤਾਰ 2 ਮੈਡਲ ਜਿੱਤਣ ਵਾਲੀ ਭਾਰਤ ਦੀ ਪਹਿਲੀ ਮਹਿਲਾ ਖਿਡਾਰੀ ਬਣ ਗਈ ਹੈ। ਓਵਰਔਲ, ਅਜਿਹਾ ਕਰਨ ਵਾਲੀ ਉਹ ਸੁਸ਼ੀਲ ਕੁਮਾਰ ਤੋਂ ਬਾਅਦ ਭਾਰਤ ਦੀ ਦੂਜੀ ਮਹਿਲਾ ਅਥਲੀਟ ਹਨ।
ਪੀਵੀ ਸਿੰਧੂ ਨੇ ਇਸ ਤੋਂ ਪਹਿਲਾਂ 2016 ਰਿਓ ਓਲੰਪਿਕਸ ‘ਚ ਸਿਲਵਰ ਮੈਡਲ ਜਿੱਤ ਕੇ ਭਾਰਤ ਦੀ ਝੋਲੀ ਪਾਇਆ ਸੀ। ਓਧਰ ਸੁਸ਼ੀਲ ਕੁਮਾਰ ਨੇ 2008 ਬੀਜਿੰਗ ਓਲੰਪਿਕਸ ‘ਚ ਬ੍ਰਾਨਜ਼ ਅਤੇ 2012 ਲੰਡਨ ਓਲੰਪਿਕਸ ‘ਚ ਸਿਲਵਰ ਮੈਡਲ ਆਪਣੇ ਨਾੰਅ ਕੀਤਾ ਸੀ।
ਟੋਕਿਓ ਓਲੰਪਿਕਸ ‘ਚ ਭਾਰਤ ਨੂੰ ਹੁਣ ਤੱਕ 3 ਮੈਡਲ ਮਿਲੇ
ਦੱਸਣਯੋਗ ਹੈ ਕਿ ਟੋਕਿਓ ਓਲੰਪਿਕਸ ‘ਚ ਭਾਰਤ ਦਾ ਇਹ ਤੀਜਾ ਮੈਡਲ ਹੈ। ਸਭ ਤੋਂ ਪਹਿਲਾਂ ਮੀਰਾਬਾਈ ਚਾਨੂ ਨੇ ਵੇਟਲਿਫਟਿੰਗ ਦੇ 49 ਕਿੱਲੋਗ੍ਰਾਮ ਭਾਰ ਵਰਗ ‘ਚ ਸਿਲਵਰ ਮੈਡਲ ਹਾਸਲ ਕੀਤਾ ਸੀ। ਓਧਰ ਬਾਕਸਰ ਲਵਲਿਨਾ ਬੋਰਗੋਹੇਨ ਨੇ 69 ਕਿੱਲੋਗ੍ਰਾਮ ਵੇਲਟਰਵੇਟ ਕੈਟੇਗਰੀ ਦੇ ਸੈਮੀਫਾਈਨਲ ‘ਚ ਪਹੁੰਚ ਕੇ ਭਾਰਤ ਲਈ ਇੱਕ ਮੈਡਲ ਪੱਕਾ ਕਰ ਲਿਆ ਹੈ।
