ਸਾਲ 2022 ਦੀਆਂ ਵਿਧਾਨ ਸਭਾ ਚੋਣਾਂ ਤੋਂ ਪਹਿਲਾਂ ਕਾਂਗਰਸ ਡੈਮੇਜ ਕੰਟਰੋਲ ਦੀ ਤਿਆਰੀ ‘ਚ ਜੁਟ ਗਈ ਹੈ। ਇਸ ਤਹਿਤ ਬੁੱਧਵਾਰ ਦਾ ਦਿਨ ਬੇਹੱਦ ਮਹੱਤਵਪੂਰਣ ਰਿਹਾ, ਕਿਉਂਕਿ ਸੂਬੇ ਦੀ ਸਿਆਸਤ ਦੇ ਉਹ ਵੱਡੇ ਚਿਹਰੇ, ਜੋ ਪਿਛਲੇ 2 ਸਾਲਾਂ ਤੋਂ ਇੱਕ-ਦੂਜੇ ‘ਤੇ ਬਿਆਨਾਂ ਦੇ ਤੀਰ ਚਲਾ ਰਹੇ ਸਨ, ਉਹ ਬੁੱਲਾਂ ‘ਤੇ ਮੁਸਕਾਨ ਲਏ ਜੱਫੀ ਪਾ ਤਸਵੀਰ ਖਿਚਾਉਂਦੇ ਨਜ਼ਰ ਆਏ।
ਪੰਜਾਬ ਦੇ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਅਤੇ ਸਾਬਕਾ ਕੈਬਨਿਟ ਮੰਤਰੀ ਨਵਜੋਤ ਸਿੱਧੂ ਦੀ ਇਹ ਤਸਵੀਰ ਆਪਣੇ ਆਪ ‘ਚ ਬਹੁਤ ਕੁਝ ਕਹਿੰਦੀ ਹੈ। ਕੁਝ ਅਜਿਹਾ ਹੀ ਸੀਐੱਮ ਦੇ ਮੀਡੀਆ ਸਲਾਹਕਾਰ ਨੇ ਆਪਣੇ ਟਵੀਟ ‘ਚ ਵੀ ਲਿਖਿਆ।
ਦਰਅਸਲ, ਸੀਐੱਮ ਵੱਲੋਂ ਸਿੱਧੂ ਨੂੰ ਚਾਹ ‘ਤੇ ਸੱਦਿਆ ਗਿਆ ਸੀ। ਇਸ ਦੌਰਾਨ ਦੋਵੇਂ ਆਗੂਆਂ ਦੀ ਆਪਸ ‘ਚ ਗੱਲਬਾਤ ਕੀ ਹੋਈ, ਇਸਦਾ ਖੁਲਾਸਾ ਤਾਂ ਨਹੀਂ ਹੋਇਆ। ਪਰ ਜੋ ਮੁਸਕਾਨ ਤਸਵੀਰ ‘ਚ ਵੇਖੀ ਜਾ ਰਹੀ ਹੈ ਅਤੇ ਜੋ ਮੁਸਕਾਨ ਸੀਐੱਮ ਦੇ ਫਾਰਮਹਾਊਸ ‘ਚੋਂ ਬਾਹਰ ਨਿਕਲਦੇ ਵਕਤ ਸਿੱਧੂ ਦੇ ਚਿਹਰੇ ‘ਤੇ ਸੀ, ਉਹ ਇਹ ਦੱਸਣ ਲਈ ਕਾਫ਼ੀ ਸੀ ਕਿ ਦੋਵਾਂ ਵਿਚਾਲੇ ਕੋਈ ਨਾ ਕੋਈ ਗੱਲ ਜ਼ਰੂਰ ਬਣ ਗਈ ਹੈ।
ਹਾਲਾਂਕਿ ਸਿੱਧੂ ਨੇ ਸ਼ਾਇਰੀ ਦੇ ਜ਼ਰੀਏ ਜ਼ਰੂਰ ਆਪਣੀ ਗੱਲ ਜਨਤਾ ਦੇ ਸਾਹਮਣੇ ਰੱਖੀ। ਉਹਨਾਂ ਟਵੀਟ ਕੀਤਾ, “ਅਜ਼ਾਦ ਰਹੋ ਵਿਚਾਰਾਂ ਨਾਲ, ਪਰ ਬੰਨ੍ਹੇ ਰਹੋ ਸੰਸਕਾਰਾਂ ਨਾਲ…ਤਾਂ ਜੋ ਆਸ ਅਤੇ ਵਿਸ਼ਵਾਸ ਰਹੇ ਕਿਰਦਾਰਾਂ ‘ਤੇ
4 ਮਹੀਨਿਆਂ ਅੰਦਰ ਇਹ ਦੂਜਾ ਅਜਿਹਾ ਮੌਕਾ ਹੈ, ਜਦੋਂ ਦੋਵੇਂ ਸਿੱਧੂ ਅਤੇ ਕੈਪਟਨ ਵਿਚਾਲੇ ਮੁਲਾਕਾਤ ਹੋਈ ਹੈ। ਇਸ ਤੋਂ ਪਹਿਲਾਂ ਨਵੰਬਰ ‘ਚ ਵੀ ਸਿੱਧੂ ਨੇ ਕੈਪਟਨ ਨਾਲ ਉਹਨਾਂ ਦੇ ਸਿਸਵਾਂ ਫਾਰਮਹਾਊਸ ‘ਚ ਮੁਲਾਕਾਤ ਕੀਤੀ ਸੀ। ਹਾਲਾਂਕਿ ਉਸ ਵੇਲੇ ਕੈਪਟਨ ਵੱਲੋਂ ਇਹ ਕਿਹਾ ਗਿਆ ਸੀ ਕਿ ਮੁਲਾਕਾਤ ਦੌਰਾਨ ਕ੍ਰਿਕਟ ‘ਤੇ ਚਰਚਾ ਕੀਤੀ ਗਈ ਹੈ।
ਦਰਅਸਲ, ਕਾਂਗਰਸ ਸਿੱਧੂ ਨੂੰ ਸਰਕਾਰ ਜਾਂ ਸੰਗਠਨ ‘ਚ ਕਿਸੇ ਵੱਡੇ ਅਹੁਦੇ ‘ਤੇ ਐਡਜਸਟ ਕਰਨਾ ਚਾਹੁੰਦੀ ਹੈ। ਇਸਦੇ ਲਈ ਪੰਜਾਬ ਕਾਂਗਰਸ ਦੇ ਇੰਚਾਰਜ ਹਰੀਸ਼ ਰਾਵਤ ਵੱਲੋਂ ਵੱਡੀ ਭੂਮਿਕਾ ਨਿਭਾਈ ਗਈ ਹੈ। ਚਰਚਾ ਹੈ ਕਿ ਹਾਈਕਮਾਨ ਨਵਜੋਤ ਸਿੱਧੂ ਨੂੰ ਸੂਬਾ ਕਾਂਗਰਸ ਪ੍ਰਧਾਨ ਬਣਾਉਣਾ ਚਾਹੁੰਦੀ ਹੈ, ਪਰ ਸੀਐੱਮ ਕੈਪਟਨ ਇਸਦੇ ਲਈ ਤਿਆਰ ਨਹੀਂ ਹਨ। ਅਜਿਹੇ ਵਿੱਚ ਸਿੱਧੂ ਨੂੰ ਕੈਬਨਿਟ ਮੰਤਰੀ ਦਾ ਅਹੁਦਾ ਹੀ ਵਾਪਸ ਦਿੱਤਾ ਜਾ ਸਕਦਾ ਹੈ। ਪਰ ਕਿਉਂਕਿ ਫੇਰਬਦਲ ਤੋਂ ਬਾਅਦ ਸਿੱਧੂ ਨੂੰ ਬਿਜਲੀ ਮੰਤਰੀ ਬਣਾਇਆ ਗਿਆ ਸੀ, ਤੇ ਇਸੇ ਕਾਰਨ ਸਿੱਧੂ ਨੇ ਮੰਤਰੀ ਦਾ ਅਹੁਦਾ ਛੱਡ ਦਿੱਤਾ ਸੀ। ਅਜਿਹੇ ਵਿੱਚ ਸਿੱਧੂ ਜੇਕਰ ਬਿਜਲੀ ਮੰਤਰੀ ਦਾ ਅਹੁਦਾ ਮਨਜ਼ੂਰ ਕਰਦੇ ਹਨ, ਤਾਂ ਇਹ ਉਹਨਾਂ ਲਈ ਬੈਕਫੁੱਟ ਵਾਲੀ ਸਥਿਤੀ ਹੋਵੇਗੀ। ਲਿਹਾਜ਼ਾ ਸਿੱਧੂ ਆਪਣੇ ਲਈ ਸਥਾਨਕ ਸਰਕਾਰਾਂ ਵਿਭਾਗ ਹੀ ਚਾਹੁਣਗੇ।