ਬਿਓਰੋ। ਪਠਾਨਕੋਟ ਵਿੱਚ ਆਰਮੀ ਕੈਂਪ ‘ਤੇ ਹੋਏ ਗ੍ਰਨੇਡ ਹਮਲੇ ਤੋਂ ਬਾਅਦ ਪੰਜਾਬ ਸਰਕਾਰ ਹਰਕਤ ਵਿੱਚ ਹੈ। ਮੰਗਲਵਾਰ ਨੂੰ ਗ੍ਰਹਿ ਮੰਤਰੀ ਸੁਖਜਿੰਦਰ ਸਿੰਘ ਰੰਧਾਵਾ ਨੇ ਅੰਮ੍ਰਿਤਸਰ ਵਿੱਚ ਬਾਰਡਰ ਰੇਂਜ ਦੇ ਅਫਸਰਾਂ ਨਾਲ ਉੱਚ ਪੱਧਰੀ ਬੈਠਕ ਕੀਤੀ। ਬੈਠਕ ਵਿੱਚ ਫੈਸਲਾ ਲਿਆ ਗਿਆ ਕਿ ਪੰਜਾਬ ਨਾਲ ਲਗਦੇ ਪਾਕਿਸਤਾਨ ਬਾਰਡਰ ‘ਤੇ ਕੈਮਰੇ ਲਗਾਏ ਜਾਣਗੇ, ਤਾਂ ਜੋ ਉਥੇ ਹੋਣ ਵਾਲੀ ਹਰ ਹਰਕਤ ‘ਤੇ ਸੁਰੱਖਿਆ ਏਜੰਸੀਆਂ ਅਤੇ ਪੁਲਿਸ ਨਜ਼ਰ ਰੱਖ ਸਕੇ।
ਉਹਨਾਂ ਕਿਹਾ ਕਿ ਕੈਮਰਿਆਂ ਜ਼ਰੀਏ ਸਰਹੱਦੀ ਇਲਾਕਿਆਂ ਵਿੱਚ ਸੁਰੱਖਿਆ ਅਤੇ ਚੌਕਸੀ ਵਧਾਈ ਜਾਵੇਗੀ। ਇਸ ਤੋਂ ਇਲਾਵਾ ਪੁਲਿਸ ਨੂੰ ਵੀ ਬਾਰਡਰ ਇਲਾਕਿਆਂ ਵਿੱਚ ਗਸ਼ਤ ਵਧਾਉਣ ਲਈ ਕਿਹਾ ਗਿਆ ਹੈ। ਸੁਰੱਖਿਆ ਦੀ ਨਿਗਰਾਨੀ ਦਾ ਜਿੰਮਾ ਪੁਲਿਸ ਦੇ ਆਲਾ ਅਫਸਰ ਰੱਖਣਗੇ, ਤਾਂ ਜੋ ਕਿਸੇ ਤਰ੍ਹਾਂ ਦੀ ਅਣਸੁਖਾਵੀਂ ਘਟਨਾ ਨਾ ਵਾਪਰੇ। ਖਾਸਕਰ ਸਾਢੇ 3 ਮਹੀਨੇ ਬਾਅਦ ਹੋਣ ਵਾਲੀਆਂ ਚੋਣਾਂ ਨੂੰ ਵੇਖਦੇ ਹੋਏ ਪੁਲਿਸ ਵੱਧ ਤੋਂ ਵੱਧ ਸਤਰਕ ਰਹੇਗੀ।
ਗ੍ਰਨੇਡ ਅਟੈਕ ਤੋਂ ਬਾਅਦ ਸਾਹਮਣੇ ਆਈਆਂ ਖਾਮੀਆਂ
ਪਠਾਨਕੋਟ ਵਿੱਚ ਆਰਮੀ ਕੈਂਪ ਦੇ ਗੇਟ ‘ਤੇ ਗ੍ਰਨੇਡ ਅਟੈਕ ਤੋਂ ਬਾਅਦ ਪੰਜਾਬ ਵਿੱਚ ਸੁਰੱਖਿਆ ਦੇ ਲਿਹਾਜ਼ ਨਾਲ ਕੁਝ ਖਾਮੀਆਂ ਸਾਹਮਣੇ ਆਈਆਂ ਹਨ। ਸੂਤਰਾਂ ਦੀ ਮੰਨੀਏ, ਤਾਂ ਆਰਮੀ ਕੈਂਪ ‘ਤੇ ਗ੍ਰਨੇਡ ਫਟਣ ਦੀ ਜਾਣਕਾਰੀ ਘਟਨਾ ਦੇ ਇੱਕ ਘੰਟੇ ਬਾਅਦ ਪੁਲਿਸ ਤੱਕ ਪਹੁੰਚੀ। ਇਸ ਤੋਂ ਇਹ ਪਤਾ ਲੱਗਿਆ ਕਿ ਰਾਤ ਨੂੰ ਪੁਲਿਸ ਅਫਸਰ ਡਿਊਟੀ ‘ਤੇ ਨਹੀਂ ਹੁੰਦੇ, ਜਿਸਦੇ ਤੁਰੰਤ ਬਾਅਦ ਡਿਪਟੀ ਸੀਐੱਮ ਨੇ ਆਦੇਸ਼ ਦਿੱਤੇ ਕਿ ਰਾਤ ਨੂੰ ਇੱਕ ਤਿਹਾਈ ਅਫਸਰ ਫੀਲਡ ਵਿੱਚ ਰਹਿਣ। ਉਹ ਖੁਦ ਵੀਡੀਓ ਕਾਲ ‘ਤੇ ਰੋਸਟਰ ਦੇ ਹਿਸਾਬ ਨਾਲ ਅਫਸਰਾਂ ਦੀ ਲੋਕੇਸ਼ਨ ਦੀ ਜਾਂਚ ਕਰਨਗੇ।
