ਬਿਓਰੋ। 2022 ਦੀਆਂ ਪੰਜਾਬ ਵਿਧਾਨ ਸਭਾ ਚੋਣਾਂ ਲਈ ਕਾਂਗਰਸ ਵੱਲੋਂ ਬਣਾਈ ਗਈ ਸਕ੍ਰੀਨਿੰਗ ਕਮੇਟੀ ‘ਤੇ ਵਿਵਾਦ ਖੜ੍ਹਾ ਹੋ ਗਿਆ ਹੈ। ਦਰਅਸਲ, ਸਕ੍ਰੀਨਿੰਗ ਕਮੇਟੀ ਦੀ ਕਮਾਨ ਪਾਰਟੀ ਦੇ ਕੌਮੀ ਜਨਰਲ ਸਕੱਤਰ ਅਜੇ ਮਾਕਨ ਨੂੰ ਸੌਂਪੀ ਗਈ ਹੈ। ਮਾਕਨ ਨੂੰ ਕਮੇਟੀ ਦਾ ਚੇਅਰਮੈਨ ਲਗਾਏ ਜਾਣ ‘ਤੇ ਸਾਬਕਾ ਸੀਐੱਮ ਕੈਪਟਨ ਅਮਰਿੰਦਰ ਸਿੰਘ ਨੇ ਸਵਾਲ ਖੜ੍ਹੇ ਕੀਤੇ ਹਨ।
ਦੰਗਿਆਂ ਦੇ ਮੁਲਜ਼ਮ ਦਾ ਭਤੀਜਾ ਹੈ ਮਾਕਨ- ਕੈਪਟਨ
ਕੈਪਟਨ ਨੇ ਕਿਹਾ, “ਅਜੇ ਮਾਕਨ 1984 ਵਿੱਚ ਦਿੱਲੀ ‘ਚ ਹੋਏ ਸਿੱਖ ਵਿਰੋਧੀ ਦੰਗਿਆਂ ਦੇ ਮੁੱਖ ਮੁਲਜ਼ਮ ਲਲਿਤ ਮਾਕਨ ਦਾ ਭਤੀਜਾ ਹੈ।” ਉਹਨਾਂ ਕਿਹਾ ਕਿ ਕਾਂਗਰਸ ਮਾਕਨ ਤੋਂ ਬੁਰਾ ਆਦਮੀ ਨਹੀਂ ਚੁਣ ਸਕਦੀ ਸੀ। ਉਹਨਾਂ ਕਿਹਾ ਕਿ ਕੇਂਦਰ ਸਰਕਾਰ ਦੰਗਿਆਂ ਦੇ ਮੁਲਜ਼ਮ ਸੱਜਣ ਕੁਮਾਰ ਨੂੰ ਸਜਾ ਦਵਾਉਣ ਲਈ ਅੱਗੇ ਵੱਧ ਰਹੀ ਹੈ, ਤਾਂ ਓਧਰ ਅਜੇ ਮਾਕਨ ਨੂੰ ਪੰਜਾਬ ਵਿੱਚ ਅਹਿਮ ਜਿੰਮੇਵਾਰੀ ਦੇ ਕੇ ਪੰਜਾਬੀਆਂ ਦੇ ਜ਼ਖਮਾਂ ‘ਤੇ ਲੂਣ ਛਿੜਕ ਰਹੀ ਹੈ।
ਸਾਬਕਾ ਸੀਐੱਮ ਨੇ ਕਿਹਾ, “ਮਾਕਨ ਇੰਨਾ ਕੁਆਲੀਫਾਈਡ ਨਹੀਂ ਕਿ ਅੰਬਿਕਾ ਸੋਨੀ ਅਤੇ ਸੁਨੀਲ ਜਾਖੜ ਵਰਗੇ ਸੀਨੀਅਰ ਆਗੂਆਂ ਦਾ ਪ੍ਰਮੁੱਖ ਬਣ ਸਕੇ।”
ਪੰਜਾਬ ‘ਚ ਕਾਂਗਰਸ ਦੀ ਹਾਰ ਤੈਅ- ਕੈਪਟਨ
ਕੈਪਟਨ ਨੇ ਕਿਹਾ ਕਿ ਦਿੱਲੀ ਚੋਣਾਂ ਵਿੱਚ ਮਾਕਨ ਦੀ ਅਗਵਾਈ ‘ਚ ਕਾਂਗਰਸ ਨੂੰ ਲਗਾਤਾਰ 2 ਵਾਰ ਕਰਾਰੀ ਹਾਰ ਮਿਲੀ ਹੈ। ਦਿੱਲੀ ਦੀਆਂ ਚੋਣਾਂ ਵਿੱਚ 2014 ਅਤੇ 2019 ਵਿੱਚ ਕਾਂਗਰਸ ਨੂੰ ਕੋਈ ਸੀਟ ਨਹੀਂ ਮਿਲੀ। ਉਹਨਾਂ ਕਿਹਾ, “ਜਿਸਨੇ ਦਿੱਲੀ ‘ਚ ਪਾਰਟੀ ਦਾ ਸਫਾਇਆ ਕੀਤਾ ਹੋਵੇ, ਉਸ ਨੂੰ ਪੰਜਾਬ ਵਿੱਚ ਜਿੰਮੇਵਾਰੀ ਦੇ ਕੇ ਕਾਂਗਰਸ ਆਪਣੇ ਅੰਜਾਮ ਨੂੰ ਤੈਅ ਕਰ ਚੁੱਕੀ ਹੈ, ਜਿਸ ਨੂੰ ਕੋਈ ਵੀ ਸਮਝ ਸਕਦਾ ਹੈ। ਲੱਗਦਾ ਹੈ ਪੰਜਾਬ ਵਿੱਚ ਕਾਂਗਰਸ ਨੇ ਪਹਿਲਾਂ ਹੀ ਹਾਰ ਮੰਨ ਲਈ ਹੈ।” ਉਹਨਾਂ ਕਿਹਾ ਕਿ ਕਾਂਗਰਸ ਨੇ ਫੇਲ੍ਹ ਲੀਡਰ ਨੂੰ ਪੰਜਾਬ ਵਿੱਚ ਲਗਾ ਦਿੱਤਾ ਹੈ, ਜੋ ਵਿਧਾਨ ਸਭਾ ਵਿੱਚ ਆਪਣੀ ਜ਼ਮਾਨਤ ਤੱਕ ਜ਼ਬਤ ਕਰਵਾ ਚੁੱਕਿਆ ਹੈ।
ਕੌਣ ਹਨ ਅਜੇ ਮਾਕਨ ?
ਕਾਬਿਲੇਗੌਰ ਹੈ ਕਿ ਅਜੇ ਮਾਕਨ ਗਾਂਧੀ ਪਰਿਵਾਰ ਦੇ ਬੇਹੱਦ ਕਰੀਬੀ ਹਨ। ਇਸ ਵੇਲੇ ਉਹ ਪਾਰਟੀ ਦੇ ਕੌਮੀ ਜਨਰਲ ਸਕੱਤਰ ਹਨ ਅਤੇ ਰਾਜਸਥਾਨ ਕਾਂਗਰਸ ਦੇ ਇੰਚਾਰਜ ਹਨ। ਕੈਪਟਨ ਨੂੰ ਪੰਜਾਬ ਦੇ ਸੀਐੱਮ ਅਹੁਦੇ ਤੋਂ ਹਟਾਉਣ ਲਈ ਭੇਜੇ ਆਬਜ਼ਰਵਰਾਂ ਵਿੱਚ ਮਾਕਨ ਵੀ ਸ਼ਾਮਲ ਸਨ। ਕਾਂਗਰਸ ਹਾਈਕਮਾਂਡ ਨੇ ਸੋਮਵਾਰ ਨੂੰ ਹੀ ਮਾਕਨ ਨੂੰ ਪੰਜਾਬ ਵਿਧਾਨ ਸਭਾ ਚੋਣਾਂ 2022 ਲਈ ਉਮੀਦਵਾਰਾਂ ਦੀ ਚੋਣ ਲਈ ਬਣਾਈ ਗਈ ਸਕ੍ਰੀਨਿੰਗ ਕਮੇਟੀ ਦਾ ਚੇਅਰਮੈਨ ਲਾਇਆ ਗਿਆ ਹੈ।
ਦੱਸ ਦਈਏ ਕਿ ਮਾਕਨ ਦੇ ਚਾਚਾ ਲਲਿਤ ਮਾਕਨ ਵੀ ਕਾਂਗਰਸ ਦੇ ਵੱਡੇ ਲੀਡਰ ਹਨ। ਲਲਿਤ ਮਾਕਨ ਦਾ ਨਾਂਅ 1984 ਦੇ ਸਿੱਖ ਵਿਰੋਧੀ ਦੰਗਿਆਂ ਦੇ ਮੁਲਜ਼ਮਾਂ ਵਿੱਚ ਵੀ ਲਿਆ ਜਾਂਦਾ ਹੈ। ਇਸੇ ਨੂੰ ਅਧਾਰ ਬਣਾ ਕੇ ਕੈਪਟਨ ਨੇ ਅਜੇ ਮਾਕਨ ਦੇ ਖਿਲਾਫ਼ ਮੋਰਚਾ ਖੋਲ੍ਹ ਦਿੱਤਾ ਹੈ।
