ਦਿੱਲੀ। ਕਾਂਗਰਸ ਨੇ ਪੰਜਾਬ ਵਿਧਾਨ ਸਭਾ ਚੋਣਾਂ ਲਈ ਤਿਆਰੀ ਖਿੱਚ ਲਈ। ਪਾਰਟੀ ਨੇ ਸੀਨੀਅਰ ਲੀਡਰਾਂ ਦੀਆਂ ਵੱਡੀਆਂ ਜਿੰਮੇਵਾਰੀਆਂ ਤੈਅ ਕਰ ਦਿੱਤੀਆਂ ਹਨ। ਖਾਸ ਗੱਲ ਹੈ ਕਿ ਇਹਨਾਂ ਵਿੱਚ ਪੰਜਾਬ ਕਾਂਗਰਸ ਦੇ ਸਾਬਕਾ ਪ੍ਰਧਾਨ ਸੁਨੀਲ ਜਾਖੜ ਦਾ ਨਾਂਅ ਵੀ ਸ਼ੁਮਾਰ ਹੈ, ਜੋ ਪਾਰਟੀ ਤੋਂ ਨਰਾਜ਼ ਚੱਲ ਰਹੇ ਸਨ। ਜਾਖੜ ਨੂੰ ਕਾਂਗਰਸ ਨੇ ਕੈਂਪੇਨ ਕਮੇਟੀ ਦਾ ਚੇਅਰਮੈਨ ਨਿਯੁਕਤ ਕੀਤਾ ਹੈ।
ਇਸ ਤੋਂ ਇਲਾਵਾ ਅੰਬਿਕਾ ਸੋਨੀ ਨੂੰ ਇਲੈਕਸ਼ਨ ਕੋ-ਆਰਡੀਨੇਸ਼ਨ ਕਮੇਟੀ ਅਤੇ ਸਾਂਸਦ ਪ੍ਰਤਾਪ ਬਾਜਵਾ ਨੂੰ ਮੈਨੀਫੈਸਟੋ ਕਮੇਟੀ ਦਾ ਚੇਅਰਮੈਨ ਲਾਇਆ ਗਿਆ ਹੈ। ਨਾਲ ਹੀ ਪਾਰਟੀ ਦੇ ਜਨਰਲ ਸਕੱਤਰ ਅਜੇ ਮਾਕਨ ਨੂੰ ਸਕ੍ਰੀਨਿੰਗ ਕਮੇਟੀ ਦਾ ਚੇਅਰਮੈਨ ਨਿਯੁਕਤ ਕੀਤਾ ਗਿਆ ਹੈ।
ਜਾਖੜ ਨੂੰ ਮਨਾਉਣ ਦੀ ਕਵਾਇਦ
ਪਹਿਲਾਂ ਸੁਨੀਲ ਜਾਖੜ ਤੋਂ ਪ੍ਰਧਾਨਗੀ ਲੈ ਕੇ ਸਿੱਧੂ ਨੂੰ ਦੇਣਾ, ਫਿਰ ਸੀਐੱਮ ਬਣਦੇ-ਬਣਦੇ ਰਹਿ ਜਾਣ ਦੇ ਚਲਦੇ ਲਗਾਤਾਰ ਨਰਾਜ਼ ਚੱਲ ਰਹੇ ਸੁਨੀਲ ਜਾਖੜ ਨੂੰ ਕੈਂਪੇਨ ਕਮੇਟੀ ਦਾ ਚੇਅਰਮੈਨ ਬਣਾਏ ਜਾਣ ਤੋਂ ਸਾਫ਼ ਹੈ ਕਿ ਇਸਦੇ ਜ਼ਰੀਏ ਕਾਂਗਰਸ ਪਾਰਟੀ ਉਹਨਾਂ ਨੂੰ ਮਨਾਉਣ ਦੀ ਕਵਾਇਦ ਵਿੱਚ ਲੱਗੀ ਹੈ। ਦਿਲਚਸਪ ਹੈ ਕਿ ਪੰਜਾਬ ਕਾਂਗਰਸ ਦੇ ਆਗੂਆਂ ਖਿਲਾਫ਼ ਬਿਆਨਬਾਜੀ ਕਰਨ ਵਾਲੇ ਜਾਖੜ ਹਾਈਕਮਾਂਡ ਨਾਲ ਲਗਾਤਾਰ ਸੰਪਰਕ ਵਿੱਚ ਰਹੇ। ਕੁਝ ਹੀ ਦਿਨ ਪਹਿਲਾਂ ਉਹਨਾਂ ਨੇ ਦਿੱਲੀ ਵਿੱਚ ਰਾਹੁਲ ਗਾਂਧੀ ਨਾਲ ਮੁਲਾਕਾਤ ਕੀਤੀ ਸੀ, ਜਿਸ ਤੋਂ ਬਾਅਦ ਇਹ ਫੈਸਲਾ ਸਾਹਮਣੇ ਆਇਆ ਹੈ। ਹਾਲਾਂਕਿ ਵੇਖਣਾ ਹੋਵੇਗਾ ਕਿ ਲਗਾਤਾਰ ਚੰਨੀ-ਸਿੱਧੂ ਖਿਲਾਫ਼ ਬਿਆਨਬਾਜੀ ਕਰਨ ਵਾਲੇ ਸੁਨੀਲ ਜਾਖੜ ਇਹਨਾਂ ਦੋਵਾਂ ਦੀ ਹੀ ਲੀਡਰਸ਼ਿਪ ਵਾਲੀ ਕਾਂਗਰਸ ਪਾਰਟੀ ਲਈ ਪ੍ਰਚਾਰ ਦੀ ਕਮਾਨ ਕਿਵੇਂ ਸੰਭਾਲਦੇ ਹਨ।
ਜਾਖੜ ਦੇ ਰਾਹ ‘ਚ ਰੋੜਾ ਬਣੀ ਸੋਨੀ ਨੂੰ ਵੀ ਜਿੰਮਾ
ਕਾਂਗਰਸ ਦੇ ਸੂਤਰਾਂ ਦੀ ਮੰਨੀਏ, ਤਾਂ ਅੰਬਿਕਾ ਸੋਨੀ ਹੀ ਉਹ ਲੀਡਰ ਸਨ, ਜਿਹਨਾਂ ਦੇ ਕਾਰਨ ਸੁਨੀਲ ਜਾਖੜ ਸੀਐੱਮ ਬਣਦੇ-ਬਣਦੇ ਰਹਿ ਗਏ ਸਨ। ਸੋਨੀ ਨੇ ਹੀ ਸਿੱਖ ਸਟੇਟ ਸਿੱਖ ਸੀਐੱਮ ਦਾ ਮੁੱਦਾ ਚੁੱਕਦਿਆਂ ਜਾਖੜ ਨੂੰ ਮੁੱਖ ਮੰਤਰੀ ਨਾ ਬਣਾਏ ਜਾਣ ਦੀ ਵਕਾਲਤ ਕੀਤੀ ਸੀ। ਇਸੇ ਦੇ ਚਲਦੇ ਜਾਖੜ ਲਗਾਤਾਰ ਇਸ਼ਾਰਿਆਂ-ਇਸ਼ਾਰਿਆਂ ਵਿੱਚ ਉਹਨਾਂ ‘ਤੇ ਹਮਲੇ ਵੀ ਬੋਲਦੇ ਰਹੇ। ਹੁਣ ਉਹਨਾਂ ਨੂੰ ਇਲੈਕਸ਼ਨ ਕੋ-ਆਰਡੀਨੇਸ਼ਨ ਕਮੇਟੀ ਦਾ ਜਿੰਮਾ ਦਿੱਤੇ ਜਾਣ ਤੋਂ ਸਾਫ ਹੈ ਕਿ ਉਹਨਾਂ ਨੂੰ ਜਾਖੜ ਨਾਲ ਮਿਲ ਕੇ ਕੰਮ ਕਰਨਾ ਪਏਗਾ।
ਵਾਅਦਿਆਂ ਦੀ ਜਿੰਮੇਵਾਰੀ ਬਾਜਵਾ ਦੇ ਹੱਥ
ਦਿਲਚਸਪ ਹੈ ਕਿ ਪ੍ਰਤਾਪ ਬਾਜਵਾ ਹਮੇਸ਼ਾ ਚੋਣਾਂ ਵੇਲੇ ਕੀਤੇ ਵਾਅਦਿਆਂ ਨੂੰ ਪੂਰਾ ਨਾ ਕੀਤੇ ਜਾਣ ਦੇ ਚਲਦੇ ਅਕਸਰ ਆਪਣੀ ਹੀ ਪਾਰਟੀ ਖਿਲਾਫ਼ ਅਵਾਜ ਬੁਲੰਦ ਕਰਦੇ ਰਹੇ ਹਨ। ਕੈਪਟਨ ਦੇ ਰਾਜ ਵਿੱਚ ਉਹ ਅਕਸਰ ਸੀਐੱਮ ਨੂੰ ਪੱਤਰ ਲਿਖ ਕੇ ਚੋਣ ਵਾਅਦਿਆਂ ਨੂੰ ਜਲਦ ਤੋਂ ਜਲਦ ਪੂਰਾ ਕੀਤੇ ਜਾਣ ਦੀ ਵਕਾਲਤ ਕਰਦੇ ਰਹੇ। ਲਿਹਾਜਾ ਇਸ ਵਾਰ ਪਾਰਟੀ ਨੇ ਵਾਅਦਿਆਂ ਦੀ ਜਿੰਮੇਵਾਰੀ ਉਹਨਾਂ ਨੂੰ ਹੀ ਸੌਂਪ ਦਿੱਤੀ ਹੈ। ਵੇਖਣਾ ਹੋਵੇਗਾ ਕਿ ਉਹਨਾਂ ਦੇ ਪਿਟਾਰੇ ‘ਚੋਂ ਕਿਹੜੇ-ਕਿਹੜੇ ਚੋਣ ਵਾਅਦੇ ਪੰਜਾਬ ਦੀ ਜਨਤਾ ਨਾਲ ਕੀਤੇ ਜਾਣਗੇ।
I am thankful to Congress President Sonia Gandhi ji,@RahulGandhi ji & @priyankagandhi ji for this opportunity. I will do my best in this role as Chairman of Manifesto Committee. pic.twitter.com/mdaQE6Tl41
— Partap Singh Bajwa (@Partap_Sbajwa) December 6, 2021
ਉਮੀਦਵਾਰਾਂ ਦੀ ਚੋਣ ‘ਚ ਭੂਮਿਕਾ ਨਿਭਾਉਣਗੇ ਮਾਕਨ
ਸੀਨੀਅਰ ਕਾਂਗਰਸੀ ਆਗੂ ਅਜੇ ਮਾਕਨ ਨੂੰ ਪਾਰਟੀ ਨੇ ਸਕ੍ਰੀਨਿੰਗ ਕਮੇਟੀ ਦਾ ਜਿੰਮਾ ਦਿੱਤਾ ਹੈ। ਸਕ੍ਰੀਨਿੰਗ ਕਮੇਟੀ ਟਿਕਟਾਂ ਦੇ ਦਾਅਵੇਦਾਰਾਂ ਨੂੰ ਸ਼ਾਰਟਲਿਸਟ ਕਰਕੇ ਦਿੱਲੀ ਭੇਜੇਗੀ, ਜਿਹਨਾਂ ‘ਤੇ ਮੰਥਨ ਕਰਕੇ ਸੈਂਟਰਲ ਇਲੈਕਸ਼ਨ ਕਮੇਟੀ ਇਹਨਾਂ ‘ ਤੇ ਆਖਰੀ ਫੈਸਲਾ ਲਵੇਗੀ। ਸੈਂਟਰਲ ਕਮੇਟੀ ਵਿੱਚ ਸੋਨੀਆ ਗਾਂਧੀ, ਰਾਹੁਲ ਗਾਂਧੀ ਸਣੇ ਕਾਂਗਰਸ ਦੇ ਕਈ ਵੱਡੇ ਆਗੂ ਸ਼ਾਮਲ ਹਨ।
