ਬਿਓਰੋ। ਪੰਜਾਬ ਵਿਧਾਨ ਸਭਾ ਚੋਣਾਂ ਲਈ ਕਾਂਗਰਸ ਨੇ ਮੰਗਲਵਾਰ ਦੇਰ ਰਾਤ 23 ਉਮੀਦਵਾਰਾਂ ਦੀ ਦੂਜੀ ਸੂਚੀ ਜਾਰੀ ਕਰ ਦਿੱਤੀ। ਇਸ ਸੂਚੀ ਵਿੱਚ 4 ਸਿਟਿੰਗ ਵਿਧਾਇਕਾਂ ਨੂੰ ਮੁੜ ਚੋਣ ਮੈਦਾਨ ਵਿੱਚ ਉਤਾਰਿਆ ਗਿਆ ਹੈ, ਜਦਕਿ 4 ਸਿਟਿੰਗ ਵਿਧਾਇਕਾਂ ਦੀ ਟਿਕਟ ਕੱਟ ਦਿੱਤੀ ਗਈ ਹੈ। ਇਸ ਸੂਚੀ ਦੇ ਨਾਲ ਹੀ ਕਾਂਗਰਸ ਨੇ ਹੁਣ ਤੱਕ ਪੰਜਾਬ ਦੇ ਦੰਗਲ ਵਿੱਚ 109 ਸੀਟਾਂ ‘ਤੇ ਉਮੀਦਵਾਰ ਉਤਾਰ ਦਿੱਤੇ ਹਨ, ਜਦਕਿ ਬਾਕੀ ਬਚੀਆਂ 8 ਸੀਟਾਂ ‘ਤੇ ਅਜੇ ਤੱਕ ਸਹਿਮਤੀ ਨਹੀਂ ਬਣ ਸਕੀ ਹੈ। ਇਹਨਾਂ ਵਿੱਚ 4 ਸਿਟਿੰਗ ਵਿਧਾਇਕਾਂ ਦੀਆਂ ਸੀਟਾਂ ਵੀ ਸ਼ਾਮਲ ਹਨ।
ਟਿਕਟ ਬਚਾਉਣ ‘ਚ ਕਾਮਯਾਬ ਰਹੇ ਇਹ 4 ਵਿਧਾਇਕ
ਪਠਾਨਕੋਟ ਜਿਲ੍ਹੇ ਦੀ ਭੋਆ ਸੀਟ ਤੋਂ ਵਿਧਾਇਕ ਜੋਗਿੰਦਰਪਾਲ ਨੂੰ ਕਾਂਗਰਸ ਨੇ ਮੁਣ ਚੋਣ ਮੈਦਾਨ ਵਿੱਚ ਉਤਾਰਿਆ ਹੈ। ਖ਼ਬਰ ਹੈ ਕਿ ਸੁਨੀਲ ਜਾਖੜ ਉਹਨਾਂ ਨੂੰ ਟਿਕਟ ਦੇਣ ਦਾ ਵਿਰੋਧ ਕਰ ਰਹੇ ਸਨ, ਜਦਕਿ ਚੰਨੀ ਉਹਨਾਂ ਨੂੰ ਟਿਕਟ ਦਵਾਉਣਾ ਚਾਹੁੰਦੇ ਸਨ। ਯਾਨੀ ਹਾਈਕਮਾਂਡ ਨੇ ਇਥੇ ਚੰਨੀ ਦੀ ਪਸੰਦ ਨੂੰ ਤਰਜੀਹ ਦਿੱਤੀ।
ਲੁਧਿਆਣਾ ਜਿਲ੍ਹੇ ਦੇ ਗਿੱਲ ਵਿਧਾਨ ਸਭਾ ਹਲਕੇ ਤੋਂ ਵਿਧਾਇਕ ਕੁਲਦੀਪ ਵੈਦ ਵੀ ਆਪਣੀ ਟਿਕਟ ਬਚਾਉਣ ਵਿੱਚ ਕਾਮਯਾਬ ਰਹੇ ਹਨ। ਵੈਦ ਨੂੰ ਪਹਿਲਾਂ ਜਗਰਾਓਂ ਸੀਟ ‘ਤੇ ਭੇਜਣ ਦੀ ਚਰਚਾ ਸੀ, ਪਰ ਉਹ ਖੁਦ ਗਿੱਲ ਤੋਂ ਚੋਣ ਲੜਨਾ ਚਾਹੁੰਦੇ ਸਨ।
ਫਾਜਿਲਕਾ ਤੋਂ ਸਿਟਿੰਗ ਵਿਧਾਇਕ ਦਵਿੰਦਰ ਘੁਬਾਇਆ ਨੂੰ ਚੋਣ ਮੈਦਾਨ ਵਿੱਚ ਉਤਰਿਆ ਗਿਆ ਹੈ। ਘੁਬਾਇਆ ਨੂੰ ਵੀ ਫਾਜਿਲਕਾ ਤੋਂ ਟਿਕਟ ਦਿੱਤੇ ਜਾਣ ਦਾ ਕਾਫੀ ਵਿਰੋਧ ਸੀ। ਉਹਨਾਂ ਨੂੰ ਫਿਰੋਜ਼ਪੁਰ ਦਿਹਾਤੀ ਸੀਟ ‘ਤੇ ਸ਼ਿਫਟ ਕਰਨ ਦੀ ਵੀ ਚਰਚਾ ਸੀ, ਪਰ ਅਜਿਹਾ ਨਹੀਂ ਹੋਇਆ।
ਖਡੂਰ ਸਾਹਿਬ ਤੋਂ ਵੀ ਮੌਜੂਦਾ ਵਿਧਾਇਕ ਰਮਨਜੀਤ ਸਿੰਘ ਸਿੱਕੀ ਨੂੰ ਮੁੜ ਟਿਕਟ ਦਿੱਤੀ ਗਈ ਹੈ। ਚਰਚਾ ਸੀ ਕਿ ਖਡੂਰ ਸਾਹਿਬ ਤੋਂ ਲੋਕ ਸਭਾ ਸਾਂਸਦ ਜਸਬੀਰ ਡਿੰਪਾ ਖੁਦ ਲਈ ਟਿਕਟ ਚਾਹੁੰਦੇ ਸਨ, ਪਰ ਪਾਰਟੀ ਨੇ ਮੌਜੂਦਾ ਵਿਧਾਇਕ ‘ਤੇ ਹੀ ਦਾਅ ਖੇਡਣਾ ਬਿਹਤਰ ਸਮਝਿਆ।
ਇਹਨਾਂ 4 ਵਿਧਾਇਕਾਂ ਦੀ ਕੱਟੀ ਟਿਕਟ
ਦੂਜੀ ਲਿਸਟ ਵਿੱਚ ਜਿਹਨਾਂ 4 ਵਿਧਾਇਕਾਂ ਦੀ ਟਿਕਟ ਕੱਟੀ ਗਈ ਹੈ, ਉਹਨਾਂ ਵਿੱਚ ਫਿਰੋਜ਼ਪੁਰ ਦਿਹਾਤੀ ਦੇ ਵਿਧਾਇਕ ਸਤਿਕਾਰ ਕੌਰ, ਸਮਰਾਲਾ ਤੋਂ ਵਿਧਾਇਕ ਅਮਰੀਕ ਸਿੰਘ ਢਿੱਲੋਂ, ਅਮਰਗੜ੍ਹ ਤੋਂ ਵਿਧਾਇਕ ਸੁਰਜੀਤ ਸਿੰਘ ਧੀਮਾਨ ਅਤੇ ਪਟਿਆਲਾ ਦੀ ਸ਼ੁਤਰਾਣਾ ਸੀਟ ਤੋਂ ਵਿਧਾਇਕ ਨਿਰਮਲ ਸਿੰਘ ਦਾ ਨਾਂਅ ਸ਼ਾਮਲ ਹੈ।
ਦਿਲਚਸਪ ਹੈ ਕਿ ਕਾਂਗਰਸ ਪਾਰਟੀ ਇਸ ਤੋਂ ਪਹਿਲਾਂ ਵੀ 4 ਵਿਧਾਇਕਾਂ ਦੀ ਟਿਕਟ ਕੱਟ ਚੁੱਕੀ ਹੈ ਅਤੇ ਅਗਾਮੀ ਲਿਸਟ ਵਿੱਚ ਵੀ 4 ਸੈਟਿੰਗਜ਼ ਵਿਧਾਇਕਾਂ ‘ਤੇ ਖ਼ਤਰੇ ਦੇ ਬੱਦਲ ਮੰਡਰਾ ਰਹੇ ਹਨ।
ਇਹਨਾਂ 4 ਵਿਧਾਇਕਾਂ ‘ਤੇ ਲਟਕ ਰਹੀ ਤਲਵਾਰ
ਕਾਂਗਰਸ ਪਾਰਟੀ ਵੱਲੋਂ ਹੁਣ 8 ਉਮੀਦਵਾਰਾਂ ਦਾ ਐਲਾਨ ਕਰਨਾ ਬਾਕੀ ਹੈ, ਪਰ ਇਨ੍ਹਾਂ 8 ਸੀਟਾਂ ਵਿਚ 4 ਸੀਟਾਂ ਅਜਿਹੀਆਂ ਹਨ, ਜੋ ਫਿਲਹਾਲ ਕਾਂਗਰਸ ਦੇ ਖਾਤੇ ਵਿੱਚ ਹਨ। ਪਰ ਇਹਨਾਂ ਵਿਧਾਇਕਾਂ ਦੀ ਟਿਕਟ ਕੱਟੀ ਜਾ ਸਕਦੀ ਹੈ। ਖੇਮਕਰਨ ਸੀਟ ਤੋਂ ਵਿਧਾਇਕ ਸੁਖਪਾਲ ਭੁੱਲਰ, ਫ਼ਰੀਦਕੋਟ ਤੋਂ ਵਿਧਾਇਕ ਕੁਸ਼ਲਦੀਪ ਸਿੰਘ ਕਿੱਕੀ ਢਿੱਲੋਂ, ਅਟਾਰੀ ਤੋਂ ਵਿਧਾਇਕ ਤਰਸੇਮ ਸਿੰਘ ਡੀਸੀ ਅਤੇ ਨਵਾਂ ਸ਼ਹਿਰ ਦੇ ਵਿਧਾਇਕ ਅੰਗਦ ਸਿੰਘ ਦੀ ਟਿਕਟ ਕੱਟੀ ਜਾ ਸਕਦੀ ਹੈ। ਕਾਬਿਲੇਗੌਰ ਹੈ ਕਿ ਅੰਗਦ ਸਿੰਘ ਦੀ ਪਤਨੀ ਅਦਿਤੀ ਸਿੰਘ ਯੂਪੀ ਦੇ ਰਾਏਬਰੇਲੀ ਵਿੱਚ ਬੀਜੇਪੀ ਦੀ ਟਿਕਟ ‘ਤੇ ਚੋਣ ਲੜ ਰਹੇ ਹਨ।
