November 20, 2022
(Chandigarh)
ਡੇਰਾ ਪ੍ਰੇਮੀ ਪ੍ਰਦੀਪ ਦੇ ਕਤਲ ਕਾਂਡ ਵਿੱਚ ਪੰਜਾਬ ਪੁਲਿਸ ਨੂੰ ਇੱਕ ਹੋਰ ਸਫਲਤਾ ਹੱਥ ਲੱਗੀ ਹੈ। ਪੁਲਿਸ ਨੇ ਕਤਲ ਵਿੱਚ ਸ਼ਾਮਲ 6ਵੇਂ ਸ਼ੂਟਰ ਨੂੰ ਵੀ ਗ੍ਰਿਫ਼ਤਾਰ ਕਰ ਲਿਆ ਹੈ। ਕਤਲ ਕਾਂਡ ਵਿੱਚ ਵਾਂਟੇਡ 6ਵੇਂ AGTF ਨੇ ਜੈਪੁਰ ਦੇ ਰਾਮਗੜ੍ਹੀਆ ਇਲਾਕੇ ਵਿੱਚ ਐਨਕਾਊਂਟਰ ਤੋਂ ਬਾਅਦ ਸ਼ੂਟਰ ਰਮਜ਼ਾਨ ਖਾਨ ਉਰਫ ਰਾਜ ਹੁੱਡਾ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਹੈ। ਫਾਇਰਿੰਗ ਦੌਰਾਨ ਰਾਜ ਹੁੱਡਾ ਦੇ ਪੈਰ ‘ਤੇ ਗੋਲੀ ਵੱਜੀ ਹੈ, ਜਿਸ ਤੋਂ ਬਾਅਦ ਪੁਲਿਸ ਨੇ ਉਸ ਨੂੰ ਹਸਪਤਾਲ ਵਿੱਚ ਭਰਤੀ ਕਰਵਾਇਆ ਹੈ। ਰਾਜ ਹੁੱਡਾ ਹਰਿਆਣਾ ਦੇ ਰੋਹਤਕ ਦਾ ਰਹਿਣ ਵਾਲਾ ਦੱਸਿਆ ਜਾ ਰਿਹਾ ਹੈ।
In a major breakthrough #AGTF arrested Ramjan Khan@ Raj Hooda, involved in murder of Pardeep Kumar at #Kotkapura, #Faridkot has been apprehended after a brief encounter with AGTF at #Jaipur, Rajasthan. (1/2)
— DGP Punjab Police (@DGPPunjabPolice) November 20, 2022
ਦੱਸ ਦਈਏ ਕਿ ਕਤਲ ਕਾਂਡ ਵਿੱਚ ਸ਼ਾਮਲ 5 ਸ਼ੂਟਰਾਂ ਨੂੰ ਪਹਿਲਾਂ ਹੀ ਕਾਬੂ ਕਰ ਲਿਆ ਗਿਆ ਸੀ। ਹੁਣ ਸ਼ੂਟਰ ਰਾਜ ਹੁੱਡਾ ਦੇ ਫੜੇ ਜਾਣ ਤੋਂ ਬਾਅਦ ਇਸ ਮਾਮਲੇ ਵਿੱਚ ਸਾਰੇ ਸ਼ੂਟਰ ਗ੍ਰਿਫ਼ਤਾਰ ਹੋ ਚੁੱਕੇ ਹਨ। ਪੁਲਿਸ ਮੁਲਜ਼ਮਾਂ ਤੋਂ ਵਾਰਦਾਤ ਵਿੱਚ ਇਸਤੇਮਾਲ ਕੀਤੇ ਗਏ ਹਥਿਆਰ ਵੀ ਬਰਾਮਦ ਕਰ ਚੁੱਕੀ ਹੈ।
ਵਿਦੇਸ਼ ‘ਚ ਬੈਠਿਆ ਗੋਲਡੀ ਬਰਾੜ ਮਾਸਟਰਮਾਈਂਡ
ਇਸ ਮਾਮਲੇ ਵਿੱਚ ਵਿਦੇਸ਼ ‘ਚ ਬੈਠਾ ਅੱਤਵਾਦੀ ਗੋਲਡੀ ਬਰਾੜ ਮਾਸਟਰਮਾਈਂਡ ਹੈ। ਫ਼ਰੀਦਕੋਟ ਪੁਲਿਸ ਦੀ FIR ਵਿੱਚ ਗੋਲਡੀ ਦਾ ਵੀ ਨਾਂਅ ਹੈ। ਦੱਸ ਦਈਏ ਕਿ ਗੋਲਡੀ ਨੇ ਜੇਲ੍ਹ ਵਿੱਚ ਬੰਦ ਰਾਜੂ ਨਾਂਅ ਦੇ ਗੈਂਗਸਟਰ ਦੇ ਜ਼ਰੀਏ ਇਹਨਾਂ ਸ਼ੂਟਰਾਂ ਨੂੰ ਕਤਲ ਦਾ ਟਾਰਗੇਟ ਦਿੱਤਾ ਸੀ। ਰਾਜੂ ਨੂੰ ਵੀ ਫ਼ਰੀਦਕੋਟ ਪੁਲਿਸ ਜੇਲ੍ਹ ਤੋਂ ਪ੍ਰੋਡਕਸ਼ਨ ਵਾਰੰਟ ‘ਤੇ ਲੈ ਕੇ ਗ੍ਰਿਫ਼ਤਾਰ ਕਰ ਚੁੱਕੀ ਹੈ।
ਸ਼ਰੇਆਮ ਗੋਲੀਆਂ ਮਾਰ ਕੇ ਕੀਤਾ ਗਿਆ ਸੀ ਕਤਲ
2015 ਦੇ ਬਰਗਾੜੀ ਬੇਅਦਬੀ ਕਾਂਡ ਦੀਆਂ ਘਟਨਾਵਾਂ ‘ਚ ਜ਼ਮਾਨਤ ‘ਤੇ ਚੱਲ ਰਹੇ ਡੇਰਾ ਸੱਚਾ ਸੌਦਾ ਸਿਰਸਾ ਦੇ ਪ੍ਰੇਮੀ ਪ੍ਰਦੀਪ ਕੁਮਾਰ ਉਰਫ ਰਾਜੂ ਦਾ ਗੋਲੀਆਂ ਮਾਰ ਕੇ ਕਤਲ ਕਰ ਦਿੱਤਾ ਗਿਆ ਸੀ। ਘਟਨਾ ਦੇ ਸਮੇਂ ਪ੍ਰਦੀਪ ਕੁਮਾਰ ਆਪਣੀ ਦੁਕਾਨ ‘ਤੇ ਪਹੁੰਚੇ ਸਨ ਕਿ ਪਹਿਲਾਂ ਤੋਂ ਹੀ ਤਾਕ ਵਿੱਚ ਘੁੰਮ ਰਹੇ ਤਿੰਨ ਮੋਟਰਸਾਈਕਲਾਂ ‘ਚ ਸਵਾਰ 6 ਹਮਲਾਵਰਾਂ ਨੇ ਤਾਬੜਤੋੜ ਫਾਇਰਿੰਗ ਕਰਕੇ ਪ੍ਰਦੀਪ ਦਾ ਕਤਲ ਕਰ ਦਿੱਤਾ ਸੀ।
