October 12, 2022
(Bureau Report)
ਤਰਨਤਾਰਨ ਵਿੱਚ ਬੀਤੇ ਦਿਨ ਹੋਏ ਕੱਪੜਾ ਵਪਾਰੀ ਦੇ ਕਤਲ ਦੀ ਜ਼ਿੰਮੇਵਾਰੀ ਗੈਂਗਸਟਰ ਲਖਬੀਰ ਸਿੰਘ ਲੰਡਾ ਉਰਫ ਲੰਡਾ ਹਰੀਕੇ ਨੇ ਲੈ ਲਈ ਹੈ। ਗੈਂਗਸਟਰ ਨੇ ਫੇਸਬੁੱਕ ‘ਤੇ ਪੋਸਟ ਪਾ ਕੇ ਇਹ ਕਤਲ ਕਬੂਲਿਆ ਹੈ। ਇਸ ਪੋਸਟ ਵਿੱਚ ਲੰਡਾ ਨੇ ਮ੍ਰਿਤਕ ਗੁਰਜੰਟ ਨੂੰ ਪੰਜਾਬ ਪੁਲਿਸ ਦਾ ਦਲਾਲ ਦੱਸਿਆ ਹੈ।
ਜੋ ਤਰਨਤਾਰਨ ਵਿੱਚ ਗੁਰਜੰਟ ਦਲਾਲ ਦਾ ਕਤਲ ਹੋਇਆ, ਅਸੀਂ ਕੀਤਾ। ਕਿਉਂਕਿ ਇਹਨੇ ਸਾਡੇ ਭਰਾ ਅਰਸ਼ਦੀਪ ਭੱਟੀ ਦੀ ਜ਼ਿੰਦਗੀ ਖ਼ਰਾਬ ਕੀਤੀ। ਸਿਰਫ਼ ਇੱਕ ਪੰਜਾਬ ਪੁਲਿਸ ਦੇ ਕਹਿਣ ‘ਤੇ ਕਿ ਉਹ Satta Nashera ਦਾ ਯਾਰ ਦੋਸਤ ਸੀ। ਇਹਦੀ ਪੰਜਾਬ ਪੁਲਿਸ ਵਿੱਚ ਜੁਆਇਨਿੰਗ ਸੀ। ਫਿਰੌਤੀ ਵੀ ਮੰਗੀ ਸੀ, ਪਰ ਕਿਸੇ ਯਾਰ ਦੇ ਕਹਿਣ ‘ਤੇ ਬਿਨ੍ਹਾਂ ਪੈਸਿਆਂ ਤੋਂ ਛੱਡਿਆ ਸੀ। ਹੁਣ ਇਹ ਪੁਲਿਸ ਦਾ ਦਲਾਲ ਬਣ ਗਿਆ। ਪੁਲਿਸ ਦਾ ਦਲਾਲ ਇੱਕ ਵੀ ਨਹੀਂ ਛੱਡਣਾ।
ਪੋਸਟ ਵਿੱਚ ਅੱਗੇ ਲੰਡਾ ਹਰੀਕੇ ਨੇ ਪੰਜਾਬ ਪੁਲਿਸ ਨੂੰ ਖੁੱਲ੍ਹੀ ਧਮਕੀ ਦਿੱਤੀ ਹੈ ਕਿ ਜੇਕਰ ਹੁਣ ਪੁਲਿਸ ਮੁਲਜ਼ਮਾਂ ਦੇ ਘਰਾਂ ਵਿੱਚ ਜਾ ਕੇ ਪਰਿਵਾਰਾਂ ਨੂੰ ਤੰਗ ਕਰੇਗੀ, ਤਾਂ ਉਹਨਾਂ ਨੂੰ ਆਪਣਿਆਂ ਦੀ ਜਾਨ ਗੁਆਉਣੀ ਪਾ ਸਕਦੀ ਹੈ।
ਜਿਹੜੇ ਸਾਡੇ ਭਰਾਵਾਂ ਨੇ ਕੰਮ ਕੀਤਾ, ਉਹਨਾਂ ਸ਼ਰੇਆਮ ਕੀਤਾ। ਪੁਲਿਸ ਆਵਦੀ ਬਣਦੀ ਕਾਰਵਾਈ ਕਰੇ। ਪਰ ਜੇ ਤੁਸੀਂ ਪਹਿਲਾਂ ਵਾਂਗ ਸਾਡੇ ਘਰਾਂ ਵਿੱਚ ਜਾ ਕੇ ਸਾਡੇ ਘਰਦੇ ਜਾਂ ਰਿਸ਼ਤੇਦਾਰਾਂ ਨੂੰ ਤੰਗ ਕੀਤਾ, ਤਾਂ ਅਸੀਂ ਅਗਲੀ ਵਾਰ ਤੁਹਾਡੇ ਘਰਾਂ ਵਿੱਚ ਜਾਵਾਂਗੇ।
ਇੰਨਾ ਹੀ ਨਹੀਂ, ਇਸ ਪੋਸਟ ਵਿੱਚ ਲੰਡਾ ਹਰੀਕੇ ਨੇ ਪੁਲਿਸ ਨੂੰ ਇਹ ਵੀ ਧਮਕੀ ਦਿੱਤੀ ਹੈ ਕਿ ਜਿਹੜੇ ਬੰਦੇ ਜੇਲ੍ਹ ਵਿੱਚ ਬੰਦ ਕੀਤੇ ਗਏ ਹਨ, ਉਹ ਕੋਈ ਵਾਰਦਾਤ ਕਰਕੇ ਹੀ ਜਾਣਗੇ।
ਤੁਸੀਂ 35-40 ਮੁੰਡੇ ਆਪਣੇ ਦਲਾਲ ਦੇ ਕਹਿਣ ‘ਤੇ ਜੇਲ੍ਹਾਂ ਵਿੱਚ ਬੰਦ ਕਰ ਦਿੱਤੇ, ਜੋ ਕਿ ਨਿਰਦੇਸ਼ ਸੀ। ਅਗਲੇ 35-40 ਕੁਝ ਕਰਕੇ ਹੀ ਜਾਣਗੇ, ਨਜਾਇਜ਼ ਨਹੀਂ ਜਾਂਦੇ। ਤਿਆਰੀ ਰੱਖਿਓ।
ਪੋਸਟ ਦੇ ਅੰਤ ਵਿੱਚ ਲੰਡਾ ਹਰੀਕੇ ਬੇਖੌਫ ਹੋ ਕੇ ਕਹਿ ਰਿਹਾ ਹੈ ਕਿ ਉਸ ਨਾਲ ਗੱਦਾਰੀ ਕਰਨ ਵਾਲੇ ਹਰ ਸ਼ਖਸ ਨੂੰ ਮੌਤ ਮਿਲੇਗੀ।
ਜਿਹੜਾ ਵੀ ਸਾਡੇ ਨਾਲ ਗੱਦਾਰੀ ਕਰੇਗਾ, ਉਹਦੇ ਲਈ ਮਾਫੀ ਨਹੀਂ ਮੌਤ ਹੈ। ਸਿਆਣਿਆਂ ਨੇ ਸੱਚ ਕਿਹਾ, ਜੰਗਲ ‘ਤੇ ਰਾਜ ਕਰਨਾ ਹੈ ਤਾਂ ਜਾਨਵਰ ਨਾਲ ਜਾਨਵਰ ਬਣਨਾ ਪੈਣਾ। ਹੁਣ ਉਹ ਸਾਰੇ ਹੱਕ ਲੈ ਕੇ ਛੱਡਾਂਗੇ, ਜਿਹੜੇ ਹੱਕਾਂ ਕਰਕੇ ਸਾਨੂੰ ਘਰ ਛੱਡਣੇ ਪਏ।
ਲੰਡਾ ਹਰੀਕੇ ਦੀ ਫੇਸਬੁੱਕ ਪੋਸਟ…
ਦੱਸ ਦਈਏ ਕਿ ਬੀਤੇ ਦਿਨ ਤਰਨਤਾਰਨ ਵਿੱਚ ਇੱਕ ਕੱਪੜਾ ਵਪਾਰੀ ਦਾ ਦੁਕਾਨ ਦੇ ਅੰਦਰ ਵੜ ਕੇ ਗੋਲੀਆਂ ਮਾਰ ਕੇ ਕਤਲ ਕਰ ਦਿੱਤਾ ਗਿਆ ਸੀ। ਪਰਿਵਾਰ ਨੇ ਇਲਜ਼ਾਮ ਲਾਇਆ ਸੀ ਕਿ ਗੈਂਗਸਟਰ ਲੰਡਾ ਹਰੀਕੇ ਵੱਲੋਂ ਉਸ ਤੋਂ ਰੰਗਦਾਰੀ ਮੰਗੀ ਜਾ ਰਹੀ ਸੀ, ਜਿਸਦੇ ਚਲਦੇ ਇਹ ਕਤਲ ਹੋਇਆ।(ਪੂਰੀ ਖ਼ਬਰ ਇਥੇ ਪੜ੍ਹੋ)
