ਬਿਓਰੋ। ਲੁਧਿਆਣਾ ਵਿੱਚ ਫੋਕਲ ਪੁਆਇੰਟ ਇਲਾਕੇ ‘ਚ ਸ਼ੁੱਕਰਵਾਰ ਨੂੰ ਦਿਨ-ਦਿਹਾੜੇ ਲੁਟੇਰਿਆਂ ਨੇ ਵੱਡੀ ਵਾਰਦਾਤ ਨੂੰ ਅੰਜਾਮ ਦਿੱਤਾ। ਬਦਮਾਸ਼ ਕਾਰੋਬਾਰੀ ‘ਤੇ ਹਮਲਾ ਕਰਕੇ 9.50 ਲੱਖ ਦੀ ਨਗਦੀ ਦੇ ਨਾਲ ਮੋਬਾਈਲ ਫੋਨ ਲੁੱਟ ਕੇ ਫਰਾਰ ਹੋ ਗਏ। 2 ਮੋਟਰਸਾਈਕਲਾਂ ‘ਤੇ ਆਏ ਲੁਟੇਰਿਆਂ ਨੇ 12 ਸੈਕੰਡ ਅੰਦਰ ਇਸ ਵਾਰਦਾਤ ਨੂੰ ਅੰਜਾਮ ਦਿੱਤਾ। ਲੁੱਟ ਦੀ ਇਹ ਸਾਰੀ ਘਟਨਾ CCTV ‘ਚ ਕੈਦ ਹੋ ਗਈ।
ਲੁਟੇਰੇ ਨੇ ਸਿਰ ‘ਚ ਮਾਰੀ ਰੌਡ
ਲੁੱਟ ਦਾ ਸ਼ਿਕਾਰ ਹੋਏ ਸ਼ਿਵ ਹੌਜ਼ਰੀ ਫੈਕਟਰੀ ਦੇ ਮਾਲਕ ਰਾਧੇ ਸ਼ਿਆਮ ਥਾਪਰ ਨੇ ਦੱਸਿਆ ਕਿ ਉਹ ਸਵੇਰੇ ਆਪਣੀ ਸਿਟੀ ਹੌਂਡਾ ਕਾਰ ਵਿੱਚ ਸਵਾਰ ਹੋ ਕੇ ਫੈਕਟਰੀ ਵਿੱਚ ਆਏ ਸਨ। ਜਿਵੇਂ ਹੀ ਕਾਰ ਤੋਂ ਉਤਰ ਕੇ ਫੈਕਟਰੀ ਦੇ ਗੇਟ ਦੇ ਅੰਦਰ ਗਏ, ਤਾਂ ਪਿੱਛੇ ਤੋਂ ਆਏ ਲੁਟੇਰਿਆਂ ਨੇ ਸਿਰ ‘ਤੇ ਰੌਡ ਮਾਰ ਕੇ ਜ਼ਖਮੀ ਕਰ ਦਿੱਤਾ। ਰੌਡ ਲੱਗਣ ਤੋਂ ਬਾਅਦ ਉਹ ਹੇਠਾਂ ਡਿੱਗ ਪਿਆ। ਇਸੇ ਦੌਰਾਨ ਲੁਟੇਰੇ ਉਸ ਤੋਂ ਬੈਗ ਖੋਹ ਕੇ ਫਰਾਰ ਹੋ ਗਏ। ਬੈਗ ਵਿੱਚ 9.5 ਲੱਖ ਰੁਪਏ ਦੀ ਨਗਦੀ ਅਤੇ 2 ਲੱਖ ਦੀ ਕੀਮਤ ਦੇ ਮੋਬਾਈਲ ਫੋਨ ਸਨ।
CCTV ‘ਚ ਕੈਦ ਹੋਈ ਪੂਰੀ ਵਾਰਦਾਤ
ਲੁੱਟ ਦੀ ਪੂਰੀ ਵਾਰਦਾਤ ਫੈਕਟਰੀ ਅਤੇ ਆਸਪਾਸ ਲੱਗੇ CCTV ਕੈਮਰਿਆਂ ਵਿੱਚ ਕੈਦ ਹੋ ਗਈ ਹੈ। CCTV ਕੈਮਰਿਆਂ ਦੀ ਫੁਟੇਜ ਮੁਤਾਬਕ, 2 ਮੋਟਰਸਾਈਕਲਾਂ ‘ਤੇ ਆਏ 6 ਲੁਟੇਰਿਆਂ ਨੇ ਮੂੰਹ ਬੰਨ੍ਹੇ ਹੋਏ ਸਨ। ਸਾਰਿਆਂ ਨੇ ਹੱਥਾਂ ਵਿੱਚ ਤੇਜ਼ਧਾਰ ਹਥਿਆਰ ਫੜੇ ਹੋਏ ਸਨ। ਪੁਲਿਸ ਹੁਣ ਮੋਟਰਸਾਈਕਲਾਂ ਦੇ ਨੰਬਰਾਂ ਦਾ ਪਤਾ ਲਗਾਉਣ ਵਿੱਚ ਜੁਟੀ ਹੈ।
ਪੁਲਿਸ ਨੂੰ ਡਰਾਈਵਰ ‘ਤੇ ਸ਼ੱਕ
ਪੁਲਿਸ ਨੇ ਮਾਮਲੇ ਦੀ ਜਾਂਚ ਸ਼ੁਰੂ ਕਰ ਦਿੱਤੀ ਹੈ ਅਤੇ ਫਿਲਹਾਲ ਫੈਕਟਰੀ ਮਾਲਕ ਦੇ ਡਰਾਈਵਰ ਉੱਪਰ ਸ਼ੱਕ ਜਤਾਇਆ ਜਾ ਰਿਹਾ ਹੈ। ਕਿਉਂਕਿ ਉਸਨੇ ਪਹਿਲਾਂ ਤਾਂ ਗੱਡੀ ਨੂੰ ਫੈਕਟਰੀ ਤੋਂ ਦੂਰ ਖੜ੍ਹਾ ਕੀਤਾ, ਜਿਸ ਕਾਰਨ ਮਾਲਕ ਨੂੰ ਗੇਟ ਤੱਕ ਪੈਦਲ ਜਾਣਾ ਪਿਆ। ਇਸ ਤੋਂ ਬਾਅਦ ਜਿਵੇਂ ਹੀ ਲੁਟੇਰੇ ਆਏ ਅਤੇ ਲੁੱਟ ਕਰਨ ਲੱਗੇ, ਉਦੋਂ ਵੀ ਉਹ ਬਾਹਰ ਨਹੀਂ ਨਿਕਲਿਆ। ਜਦੋਂ ਲੁਟੇਰੇ ਉਥੋਂ ਚਲੇ ਗਏ, ਉਸ ਤੋਂ ਬਾਅਦ ਉਹ ਗੱਡੀ ਤੋਂ ਉਤਰਿਆ।
