ਬਿਓਰੋ। ਪੰਜਾਬ ਦੀਆਂ ਵਿਧਾਨ ਸਭਾ ਚੋਣਾਂ ਵਿੱਚ ਇਸ ਵਾਰ ਬੰਪਰ ਵੋਟਿੰਗ ਹੋਈ ਹੈ। ਕਰੀਬ 70 ਫੀਸਦ ਲੋਕਾਂ ਨੇ ਇਸ ਵਾਰ ਆਪਣੇ ਜਮਹੂਰੀ ਹੱਕ ਦਾ ਇਸਤੇਮਾਲ ਕਰਦਿਆਂ ਪੰਜਾਬ ਦੀ ਨਵੀਂ ਸਰਕਾਰ ਚੁਣਨ ਲਈ ਵੋਟ ਕੀਤੀ। ਸਵੇਰੇ 8 ਵਜੇ ਤੋਂ ਸ਼ੁਰੂ ਹੋਈ ਇਹ ਵੋਟਿੰਗ ਸ਼ਾਮ 6 ਵਜੇ ਤੱਕ ਚੱਲੀ, ਜਿਸ ਦੌਰਾਨ ਕਈ ਅਜਿਹੀਆਂ ਤਸਵੀਰਾਂ ਸਾਹਮਣੇ ਆਈਆਂ, ਜੋ ਆਪਣੇ ਆਪ ਵਿੱਚ ਕਾਫੀ ਕੁਝ ਬਿਆਨ ਕਰਦੀਆਂ ਹਨ। ਵੈਸੇ ਤਾਂ ਇਸ ਤਰ੍ਹਾਂ ਦੀਆਂ ਤਸਵੀਰਾਂ ਹਰ ਵਾਰ ਹੀ ਵੇਖਣ ਨੂੰ ਮਿਲਦੀਆਂ ਹਨ, ਪਰ ਫਿਰ ਵੀ ਹਰ ਵਾਰ ਇਹ ਦਿਲ ਖਿੱਚਵੀਆਂ ਹੁੰਦੀਆਂ ਹਨ।
ਅੰਮ੍ਰਿਤਸਰ ਵਿੱਚ ‘ਸੋਹਣਾ ਤੇ ਮੋਹਣਾ’ ਨਾਮੀ 2 ਜੁੜਵਾ ਭਰਾਵਾਂ ਨੂੰ ਸੋਸ਼ਲ ਮੀਡੀਆ ਜ਼ਰੀਏ ਪੰਜਾਬ ਦੇ ਵਧੇਰੇਤਰ ਲੋਕ ਜਾਣਦੇ ਹੋਣਗੇ। ਸਰੀਰ ਤੋਂ ਜੁੜੇ ਇਹ ਦੋਵੇਂ ਭਰਾ ਐਤਵਾਰ ਨੂੰ ਪਹਿਲੀ ਵਾਰ ਆਪਣੀ ਵੋਟ ਭੁਗਤਾਉਣ ਪਹੁੰਚੇ। ਇਸ ਦੌਰਾਨ ਉਹਨਾਂ ਦੇ ਚਿਹਰੇ ‘ਤੇ ਵੱਖਰੀ ਹੀ ਚਮਕ ਸੀ। ਚੋਣ ਕਮਿਸ਼ਨ ਨੇ ਵੀ ਇਹਨਾਂ ਭਰਾਵਾਂ ਦੀ ਸ਼ਲਾਘਾ ਕੀਤੀ ਅਤੇ ਕਿਹਾ ਕਿ ਸਰੀਰ ਤੋਂ ਭਾਵੇਂ ਦੋਵੇਂ ਭਰਾ ਇੱਕ ਹਨ, ਪਰ ਇਹਨਾਂ ਦੀਆਂ ਵੋਟਾਂ 2 ਗਿਣੀਆਂ ਜਾਣਗੀਆਂ।
ਸੂਬੇ ਦੀਆਂ ਕਈ ਥਾਵਾਂ ਤੋਂ ਲਾੜੇ ਅਤੇ ਲਾੜੀਆਂ ਵੱਲੋਂ ਵੀ ਵਿਆਹ ਤੋਂ ਪਹਿਲਾਂ ਜਾਂ ਬਾਅਦ ਵਿੱਚ ਵੋਟ ਕੀਤੇ ਜਾਣ ਦੀਆਂ ਤਸਵੀਰਾਂ ਸਾਹਮਣੇ ਆਈਆਂ। ਜ਼ੀਰਕਪੁਰ ਦੇ ਪਿੰਡ ਨਾਭਾ ਦੀ ਵੀ ਇੱਕ ਕੁੜੀ ਅਰਸ਼ਪ੍ਰੀਤ ਕੌਰ ਆਪਣੇ ਵਿਆਹ ਤੋਂ ਪਹਿਲਾਂ ਪੋਲਿੰਗ ਬੂਥ ‘ਤੇ ਵੋਟ ਭੁਗਤਾਉਣ ਪਹੁੰਚੀ।
ਇਹ ਤਸਵੀਰਾਂ ਸਮਾਜ ਨੂੰ ਇਹ ਸੁਨੇਹਾ ਦਿੰਦੀਆਂ ਹਨ ਕਿ ਲੋਕਤੰਤਰ ਦੇ ਇਸ ਮਹਾਂਕੁੰਭ ਵਿੱਚ ਸਾਰਿਆਂ ਨੂੰ ਵੱਧ-ਚੜ੍ਹ ਕੇ ਹਿੱਸਾ ਲੈਣਾ ਚਾਹੀਦਾ ਹੈ।
ਅਜਿਹੀ ਹੀ ਇੱਕ ਤਸਵੀਰ ਡੇਰਾ ਬੱਸੀ ਤੋਂ ਵੀ ਸਾਹਮਣੇ ਆਈ, ਜਿਥੇ ਬੂਥ ਨੰਬਰ- 147 ਵਿੱਚ ਲਾੜੀ ਬਣੀ ਕੁੜੀ ਆਪਣੇ ਜਮਹੂਰੀ ਹੱਕ ਦਾ ਇਸਤੇਮਾਲ ਕਰਨ ਲਈ ਪਹੁੰਚੀ।
ਪਟਿਆਲਾ ਦੇ ਸਰਕਾਰੀ ਕਾਲਜ ਆਫ ਐਜੂਕੇਸ਼ਨ ਵਿੱਚ ਵੀ ਇੱਕ ਲਾੜੀ ਵੋਟ ਭੁਗਤਾਉਣ ਲਈ ਪਹੁੰਚੀ ਅਤੇ ਸਮਾਜ ਨੂੰ ਆਪਣੀ ਜ਼ਿੰਮੇਵਾਰੀ ਨਿਭਾਉਣ ਦਾ ਸੁਨੇਹਾ ਦਿੱਤਾ।
ਮੋਹਾਲੀ ਦੇ ਐਮਿਟੀ ਇੰਟਰਨੈਸ਼ਨਲ ਸਕੂਲ ਤੋਂ ਆਈਆਂ ਤਸਵੀਰਾਂ ਵੀ ਬੇਹੱਦ ਦਿਲਚਸਪ ਸਨ। ਇਥੇ ਵੋਟ ਭੁਗਤਾਉਣ ਪਹੁੰਚੇ ਲੋਕਾਂ ਦਾ ਸਵਾਗਤ ਢੋਲ-ਨਗਾੜਿਆਂ ਨਾਲ ਕੀਤਾ ਗਿਆ।
When the festive spirit of Punjab beautifully amalgamate with spirit of democracy!
Voters are welcomed with resonating beats of 'Dhol'
Go cast your vote.#govote #AssemblyElections2022 #COVIDsafeElections #TheCEOPunjab #PunjabVotes2022 #EveryVoteCounts @ECISVEEP @SpokespersonECI pic.twitter.com/pjwFFuQhmY— Chief Electoral Officer, Punjab (@TheCEOPunjab) February 20, 2022
ਵੋਟਿੰਗ ਦੌਰਾਨ ਬਜ਼ੁਰਗਾਂ ਵਿੱਚ ਵੀ ਖਾਸਾ ਉਤਸ਼ਾਹ ਵੇਖਣ ਨੂੰ ਮਿਲਿਆ। ਉਮਰ ਦੀ ਪਰਵਾਹ ਕੀਤੇ ਬਿਨ੍ਹਾਂ ਬਜ਼ੁਰਗ ਵੱਧ-ਚੜ੍ਹ ਕੇ ਵੋਟਿੰਗ ਕਰਨ ਪਹੁੰਚੇ।
ਬਜ਼ੁਰਗਾਂ ਨੂੰ ਵੋਟਿੰਗ ਦੌਰਾਨ ਕਿਸੇ ਤਰ੍ਹਾਂ ਦੀ ਮੁਸ਼ਕਿਲ ਨਾ ਆਵੇ, ਇਸਦੇ ਲਈ ਵੀ ਖਾਸ ਇੰਤਜ਼ਾਮ ਕੀਤੇ ਗਏ ਸਨ। ਜਲੰਧਰ ਦੇ ਪੋਲਿੰਗ ਬੂਥਾਂ ਅੰਦਰ ਬਜ਼ੁਰਗਾਂ ਅਤੇ ਦਿਵਿਆਂਗਾਂ ਨੂੰ ਗੋਲਫ ਕਾਰਟ ਵਿੱਚ ਲਿਜਾਉਂਦੇ ਹੋਏ ਵੇਖਿਆ ਗਿਆ।
ਇਸਦੇ ਨਾਲ ਹੀ ਵਧੇਰੇਤਰ ਪੋਲਿੰਗ ਬੂਥਾਂ ਤੇ ਵਹੀਲ ਚੇਅਰਸ ਦਾ ਵੀ ਖਾਸ ਇੰਤਜ਼ਾਮ ਕੀਤਾ ਗਿਆ ਸੀ। NCC ਦੇ ਕੈਡਿਟ ਵੀ ਬਜ਼ੁਰਗਾਂ ਅਤੇ ਦਿਵਿਆਂਗਾਂ ਦੀ ਮਦਦ ਕਰਦੇ ਵੇਖੇ ਗਏ।
ਜਲੰਧਰ: ਬਜ਼ੁਰਗ ਵੋਟਰ ਨੂੰ ਵੋਟ ਪਾਉਣ ਲਈ ਮਤਦਾਨ ਕੇਂਦਰ ਦੇ ਅੰਦਰ ਲਿਜਾਂਦੇ ਹੋਏ ਐਨ.ਸੀ.ਸੀ. ਦੇ ਕੈਡਿਟ।@TheCEOPunjab @PIBChandigarh pic.twitter.com/78ay2bLUpX
— DPRO Jalandhar (@DproJalandhar) February 20, 2022
ਪਟਿਆਲਾ ਅਤੇ ਸੰਗਰੂਰ ਜ਼ਿਲ੍ਹੇ ਵਿੱਚ ਟ੍ਰਾਂਸਜੈਂਡਰਜ਼ ਵੱਲੋਂ ਵੀ ਵੋਟ ਕੀਤੇ ਜਾਣ ਦੀਆਂ ਤਸਵੀਰਾਂ ਸਾਹਮਣੇ ਆਈਆਂ।
