ਅੰਮ੍ਰਿਤਸਰ। ਪੰਜਾਬ ਵਿੱਚ ਬੇਸ਼ੱਕ ਕੈਪਟਨ ਦਾ ਤਖਤਾ ਪਲਟ ਹੋ ਚੁੱਕਿਆ ਹੈ, ਪਰ ਉਹਨਾਂ ਦਾ ਲੋਕਾਂ ਵਿੱਚ ਨਾ ਵਿਚਰਣ ਦੀ ਇਮੇਜ ਨਵੇਂ ਸੀਐੱਮ ਚਰਨਜੀਤ ਚੰਨੀ ਲਈ ਨਾ ਬਣੇ, ਇਸਦਾ ਧਿਆਨ ਸੂਬਾ ਕਾਂਗਰਸ ਪ੍ਰਧਾਨ ਨਵਜੋਤ ਸਿੱਧੂ ਬਾਖਬੀ ਰੱਖ ਰਹੇ ਹਨ। ਇਸੇ ਮਕਸਦ ਨਾਲ ਸਿੱਧੂ, ਸੀਐੱਮ ਚੰਨੀ ਨੂੰ ਅੰਮ੍ਰਿਤਸਰ ਦੇ ਮਸ਼ਹੂਰ ਟੀ-ਸਟਾਲ ‘ਤੇ ਲੈ ਕੇ ਗਏ, ਜਿਥੇ ਸੀਐੱਮ ਨੇ ਲੋਕਾਂ ਦੇ ਵਿਚਕਾਰ ਬਹਿ ਕੇ ਸ਼ਾਇਰਾਨਾ ਮਹਿਫਿਲ ਸਜਾਈ।
ਦਰਬਾਰ ਸਾਹਿਬ ਸਮੇਤ ਹੋਰ ਧਾਰਮਿਕ ਅਸਥਾਨਾਂ ਦੇ ਦਰਸ਼ਨ-ਦੀਦਾਰੇ ਕਰਨ ਉਪਰੰਤ ਸੀਐੱਮ ਚੰਨੀ ਆਪਣੇ ਪੂਰੇ ਲਾਮ-ਲਸ਼ਕਰ ਨਾਲ ਸ਼ਹਿਰ ਦੇ ਮਸ਼ਹੂਰ ਗਿਆਨੀ ਟੀ-ਸਟਾਲ ਪਹੁੰਚੇ। ਇਥੇ ਉਹਨਾਂ ਨੇ ਆਮ ਲੋਕਾਂ ਨਾਲ ਮੁਲਾਕਾਤ ਕੀਤੀ। ਕਿਸੇ ਨੂੰ ਪਰੇਸ਼ਾਨੀ ਨਾ ਹੋਵੇ, ਇਸਦੇ ਲਈ ਸੁਰੱਖਿਆ ਦਸਤੇ ਨੂੰ ਵੀ ਦੂਰ ਰੱਖਿਆ ਗਿਆ। ਇਥੇ ਚਾਹ ਦੀਆਂ ਚੁਸਕੀਆਂ ਦੇ ਨਾਲ-ਨਾਲ ਸੀਐੱਮ ਦਾ ਸ਼ਾਇਰਾਨਾ ਅੰਦਾਜ਼ ਵੇਖਣ ਨੂੰ ਮਿਲਿਆ, ਜਿਸ ਨੂੰ ਸੁਣ ਕੇ ਸਿੱਧੂ ਵਾਹਵਾਹੀ ਕਰਦੇ ਨਜ਼ਰ ਆਏ।
ਇਹ ਸ਼ੇਰ ਸੁਣਾ ਕੇ ਚੰਨੀ ਨੇ ਬਟੋਰੀ ਵਾਹਵਾਹੀ
ਸ਼ਾਇਰਾਨਾ ਅੰਦਾਜ਼ ‘ਚ ਚੰਨੀ ਬੋਲੇ:-
“ਚਲਤੇ-ਫਿਰਤੇ ਹੁਏ ਮਹਿਤਾਬ ਦਿਖਾਏਂਗੇ ਤੁਮਹੇ, ਹਮਸੇ ਮਿਲਣਾ ਕਭੀ ਯੇ ਪੰਜਾਬ ਦਿਖਾਏਂਗੇ ਤੁਮਹੇ!
ਚਾਂਦ ਹਰ ਛਤ ਪਰ ਹੈ, ਸੂਰਜ ਹੈ ਹਰ ਆਂਗਨ ਮੇਂ..ਨੀਂਦ ਸੇ ਜਾਗੋ, ਨਏ ਖੁਆਬ ਦਿਖਾਏਂਗੇ ਤੁਮਹੇ!!”
ਜਲੰਧਰ ‘ਚ ਵੀ ਸਕਿਓਰਿਟੀ ਹਟਾ ਕੇ ਵਿਦਿਆਰਥੀਆਂ ਨੂੰ ਮਿਲੇ
ਅੰਮ੍ਰਿਤਸਰ ਤੋਂ ਬਾਅਦ ਮੁੱਖ ਮੰਤਰੀ ਚਰਨਜੀਤ ਚੰਨੀ ਦਾ ਜਲੰਧਰ ਦੇ DAV ਕਾਲਜ ਵਿੱਚ ਵੀ ਅਜਿਹਾ ਹੀ ਰੂਪ ਵੇਖਣ ਨੂੰ ਮਿਲਿਆ। ਚੰਨੀ ਨੇ ਕਾਲਜ ਵਿੱਚ ਸਕਿਓਰਿਟੀ ਹਟਾ ਕੇ ਵਿਦਿਆਰਥੀਆਂ ਨਾਲ ਮੁਲਾਕਾਤ ਕੀਤੀ।
ਮੁੱਖ ਮੰਤਰੀ ਦੀ ਇਸ ਪਹਿਲ ਨੂੰ ਵੇਖ ਕੇ ਵਿਦਿਆਰਥੀ ਵੀ ਬੇਹੱਦ ਉਤਸ਼ਾਹਿਤ ਨਜ਼ਰ ਆਏ।
ਹਾਲਾਂਕਿ ਇਸ ਦੌਰਾਨ ਹਾਲਾਤ ਕਾਬੂ ਰੱਖਣ ਲਈ ਪੁਲਿਸ ਨੂੰ ਖਾਸੀ ਮੁਸ਼ੱਕਤ ਕਰਨੀ ਪਈ।
