ਬਿਓਰੋ। ਦੁਨੀਆ ਭਰ ਵਿੱਚ ਆਪਣੀ ਸੁੰਦਰਤਾ ਦਾ ਜਲਵਾ ਬਿਖੇਰਨ ਵਾਲੀ ਪੰਜਾਬ ਦੀ ਧੀ ਮਿਸ ਯੂਨੀਵਰਸ 2021 ਹਰਨਾਜ਼ ਕੌਰ ਸੰਧੂ ਵਤਨ ਪਰਤ ਚੁੱਕੀ ਹੈ, ਪਰ ਕੋਰੋਨਾ ਮਹਾਂਮਾਰੀ ਅਤੇ ਓਮੀਕ੍ਰੌਨ ਵੈਰੀਏਂਟ ਦੇ ਖ਼ਤਰੇ ਦੇ ਚਲਦੇ ਉਹਨਾਂ ਨੂੰ 7 ਦਿਨਾਂ ਲਈ ਕੁਆਰੰਟੀਨ ਕੀਤਾ ਗਿਆ ਹੈ। ਸਿਹਤ ਵਿਭਾਗ ਨੇ ਉਹਨਾਂ ਦੇ ਸੈਂਪਲ ਵੀ ਲਏ ਹਨ। 8ਵੇਂ ਦਿਨ ਰਿਪੋਰਟ ਆਉਣ ਤੋਂ ਬਾਅਦ ਉਹਨਾਂ ਨੂੰ 7 ਦਿਨਾਂ ਤੱਕ ਸੈਲਫ ਮੌਨੀਟਰ ਵੀ ਕਰਨਾ ਪਏਗਾ। ਹਰਨਾਜ਼ ਸੰਧੂ ਵੀਰਵਾਰ ਨੂੰ ਮੁੰਬਈ ਪਹੁੰਚੀ ਹੈ। ਉਹਨਾਂ ਨੂੰ ਏਅਰਪੋਰਟ ਤੋਂ ਹੀ 7-ਸਟਾਰ ਹੋਟਲ ਵਿੱਚ ਕੁਆਰੰਟੀਨ ਕੀਤਾ ਗਿਆ।
ਹਰਨਾਜ਼ ਦੇ ਭਰਾ ਹਰਨੂਰ ਨੇ ਦੱਸਿਆ ਕਿ ਕੋਰੋਨਾ ਨਿਯਮਾਂ ਦੇ ਮੁਤਾਬਕ ਉਹਨਾਂ ਦੀ ਭੈਣ ਨੂੰ 7 ਦਿਨਾਂ ਲਈ ਕੁਆਰੰਟੀਨ ਕੀਤਾ ਗਿਆ ਹੈ। ਫਿਲਹਾਲ ਹਰਨਾਜ਼ ਦੇ ਚੰਡੀਗੜ੍ਹ ਆਉਣ ਦਾ ਕੋਈ ਪ੍ਰੋਗਰਾਮ ਨਹੀਂ ਹੈ। 7 ਦਿਨ ਕੁਆਰੰਟੀਨ ਰਹਿਣ ਤੋਂ ਬਾਅਦ ਹੀ ਅਗਲਾ ਪ੍ਰੋਗਰਾਮ ਤੈਅ ਹੋਵੇਗਾ।
ਵਿਦੇਸ਼ ਮੰਤਰਾਲੇ ਨੇ ਜਾਰੀ ਕੀਤੀ ਸੀ ਨਵੀਂ ਗਾਈਡਲਾਈਨ
ਮਿਸ ਯੂਨੀਵਰਸ ਹਰਨਾਜ਼ ਨੂੰ ਕੇਂਦਰ ਸਰਕਾਰ ਦੇ ਗਾਈਡਲਾਈਨਜ਼ ਮੁਤਾਬਕ ਹੀ ਕੁਆਰੰਟੀਨ ਕੀਤਾ ਗਿਆ ਹੈ। ਸਰਕਾਰ ਨੇ ਸੂਬਿਆਂ ਦੇ ਨਾਲ-ਨਾਲ ਏਅਰਲਾਈਨਜ਼ ਨੂੰ ਵੀ ਐਡਵਾਇਜ਼ਰੀ ਜਾਰੀ ਕੀਤੀ ਸੀ। ਸਾਰੇ ਯਾਤਰੀਆਂ ਲਈ ਦੇਸ਼ ਵਿੱਚ ਆਉਣ ਤੋਂ ਬਾਅਦ 7 ਦਿਨਾਂ ਤੱਕ ਹੋਮ ਆਈਸੋਲੇਸ਼ਨ ਲਾਜ਼ਮੀ ਹੁੰਦਾ ਹੈ ਅਤੇ 8ਵੇਂ ਦਿਨ ਮੁੜ ਟੈਸਟ ਕਰਵਾ ਕੇ 7 ਦਿਨਾਂ ਤੱਕ ਸੈਲਫ ਮੌਨੀਟਰ ਕਰਨ ਲਈ ਕਿਹਾ ਜਾਂਦਾ ਹੈ।
ਮਿਸ ਯੂਨੀਵਰਸ ਦੇ ਮਾਮਲੇ ਵਿੱਚ ਹੀ ਏਅਰਲਾਈਨਸ ਨੇ ਇਹਨਾਂ ਨਿਯਮਾਂ ਦੀ ਹੀ ਪਾਲਣਾ ਕੀਤੀ ਹੈ ਅਤੇ ਹਰਨਾਜ਼ ਸੰਧੂ ਨੇ ਵੀ ਪੂਰਾ ਸਹਿਯੋਗ ਕੀਤਾ। ਹੁਣ ਮਿਸ ਯੂਨੀਵਰਸ ਕੁਆਰੰਟੀਨ ਰਹੇਗੀ, ਉਸ ਤੋਂ ਬਾਅਦ ਹੀ ਉਹਨਾਂ ਦਾ ਅੱਗੇ ਦਾ ਪ੍ਰੋਗਰਾਮ ਤੈਅ ਹੋਵੇਗਾ।
