ਅੰਮ੍ਰਿਤਸਰ। ਪੰਜਾਬ ਕਾਂਗਰਸ ‘ਚ ਚੱਲ ਰਹੇ ਘਮਸਾਣ ਵਿਚਾਲੇ ਹੁਣ ਕਾਂਗਰਸ ਪ੍ਰਧਾਨ ਨਵਜੋਤ ਸਿੰਘ ਸਿੱਧੂ ਨੇ ਸਿੱਧੀ ਧਮਕੀ ਦਿੱਤੀ ਹੈ। ਸਿੱਧੂ ਨੇ ਕਿਹਾ ਕਿ ਜੇਕਰ ਉਹਨਾਂ ਨੂੰ ਫ਼ੈਸਲੇ ਲੈਣ ਦੀ ਖੁੱਲ੍ਹ ਨਾ ਮਿਲੀ, ਤਾਂ ਉਹ ਇੱਟ ਨਾਲ ਇੱਟ ਖੜਕਾ ਦੇਣਗੇ। ਹਾਲਾਂਕਿ ਇਹ ਧਮਕੀ ਕਾਂਗਰਸ ਹਾਈਕਮਾਂਡ ਨੂੰ ਹੈ ਜਾਂ ਫਿਰ ਕੈਪਟਨ ਅਮਰਿੰਦਰ ਸਿੰਘ, ਇਸ ਨੂੰ ਲੈ ਕੇ ਸਿਆਸੀ ਚਰਚਾਵਾਂ ਦਾ ਬਜ਼ਾਰ ਗਰਮ ਹੈ। ਸਿੱਧੂ ਨੇ ਅੰਮ੍ਰਿਤਸਰ ‘ਚ ਵਪਾਰੀਆਂ ਨਾਲ ਬੈਠਕ ਦੌਰਾਨ ਇਹ ਬਿਆਨ ਦਿੱਤਾ।
ਦਰਸ਼ਨੀ ਘੋੜਾ ਬਣਨ ਦਾ ਫਾਇਦਾ ਨਹੀਂ- ਸਿੱਧੂ
ਸਿੱਧੂ ਨੇ ਕਿਹਾ, “ਮੈਂ ਹਾਈਕਮਾਂਡ ਨੂੰ ਇੱਕ ਹੀ ਗੱਲ ਕਹਿ ਕੇ ਆਇਆ ਹਾਂ ਕਿ ਜੇਕਰ ਮੈਂ ਪੰਜਾਬ ਮਾਡਲ ਜ਼ਰੀਏ ਲੋਕਾਂ ਦੀਆਂ ਉਮੀਦਾਂ ‘ਤੇ ਖਰਾ ਉਤਰਾਂਗਾ, ਤਾਂ ਅਗਲੇ 20 ਸਾਲ ਪੰਜਾਬ ਵਿੱਚੋਂ ਕਾਂਗਰਸ ਨਹੀਂ ਜਾਵੇਗੀ। ਜੇਕਰ ਤੁਸੀਂ ਮੈਨੂੰ ਫ਼ੈਸਲੇ ਲੈਣ ਦੀ ਛੋਟ ਨਹੀਂ ਦੇਵੋਗੇ, ਤਾਂ ਫਿਰ ਮੈਂ ਇੱਟ ਨਾਲ ਇੱਟ ਖੜਕਾਵਾਂਗਾ। ਦਰਸ਼ਨੀ(ਦਿਖਾਵਟੀ) ਘੋੜਾ ਬਣਨ ਦਾ ਕੋਈ ਫਾਇਦਾ ਨਹੀਂ। ਪੰਜਾਬ ਮਾਡਲ ਅੱਗੇ ਦਿੱਲੀ ਮਾਡਲ ਵੀ ਫੇਲ੍ਹ ਹੋ ਜਾਵੇਗਾ।”
Punjab Model means People make Policies for Trade, Industry & Power … Giving Power of People back to the People !! Part -2 pic.twitter.com/GjZXpdlwQH
— Navjot Singh Sidhu (@sherryontopp) August 27, 2021
ਸਹੁੰ ਅਤੇ ਵਾਅਦੇ ਦੇ ਬਹਾਨੇ ਕੈਪਟਨ ‘ ਤੇ ਨਿਸ਼ਾਨਾ
ਸਿੱਧੂ ਨੇ ਇਸ ਦੌਰਾਨ ਕੈਪਟਨ ਅਮਰਿੰਦਰ ਸਿੰਘ ‘ਤੇ ਵੀ ਹਮਲਾ ਬੋਲਿਆ। ਸਿੱਧੂ ਨੇ ਕਿਹਾ, ” ਮੈਂ ਨਾ ਤਾਂ ਸਹੁੰ ਖਾਵਾਂਗਾ ਤੇ ਨਾ ਹੀ ਵਾਅਦਾ ਕਰਾਂਗਾ, ਪਰ ਪੰਜਾਬ ਮਾਡਲ ਦੇ 6 ਮਹੀਨਿਆਂ ਬਾਅਦ ਲੋਕ ਖੁਦ ਆਪਣੇ ਵਿਕਾਸ ਲਈ ਕੰਮ ਤੈਅ ਕਰਨਗੇ,ਇਹ ਵਚਨ ਦਿੰਦਾ ਹਾਂ।
ਦੱਸ ਦਈਏ ਕਿ ਕੈਪਟਨ ਨੇ ਪਿਛਲੀਆਂ ਵਿਧਾਨ ਸਭਾ ਚੋਣਾਂ ਦੌਰਾਨ ਪੰਜਾਬ ‘ਚ ਨਸ਼ੇ ਦੇ ਖਾਤਮੇ ਲਈ ਗੁਟਕਾ ਸਾਹਿਬ ਦੀ ਸਹੁੰ ਖਾਧੀ ਸੀ। ਇਸ ਤੋਂ ਇਲਾਵਾ ਉਹਨਾਂ ਨੇ ਘਰ-ਘਰ ਰੁਜ਼ਗਾਰ ਅਤੇ ਸਸਤੀ ਬਿਜਲੀ ਸਣੇ ਕੋਈ ਲੋਕ-ਲੁਭਾਵਨੇ ਵਾਅਦੇ ਪੰਜਾਬ ਦੀ ਜਨਤਾ ਨਾਲ ਕੀਤੇ ਸਨ।
…ਤਾਂ ਕੀ ਹਾਈਕਮਾਂਡ ਤੋਂ ਵੀ ਨਰਾਜ਼ ਹੋ ਗਏ ‘ਗੁਰੂ’?
ਸਿੱਧੂ ਦਾ ਇਹ ਬਿਆਨ ਇਸ ਲਈ ਬੇਹੱਦ ਅਹਿਮ ਹੈ, ਕਿਉਂਕਿ ਕੈਪਟਨ ਦੇ ਖਿਲਾਫ਼ ਬਗਾਵਤ ਤੋਂ ਬਾਅਦ ਕਾਂਗਰਸ ਹਾਈਕਮਾਂਡ ਵੱਲੋਂ ਹਰੀਸ਼ ਰਾਵਤ ਨੇ ਕਿਹਾ ਸੀ ਕਿ ਸਿੱਧੂ ਨੂੰ ਪੰਜਾਬ ਕਾਂਗਰਸ ਦਾ ਪ੍ਰਧਾਨ ਬਣਾਇਆ ਗਿਆ ਹੈ, ਪੂਰੀ ਕਾਂਗਰਸ ਨਹੀਂ ਸੌਂਪੀ। ਇਸਦੇ ਨਾਲ ਹੀ ਕਸ਼ਮੀਰ ਅਤੇ ਪਾਕਿਸਤਾਨ ਨੂੰ ਲੈ ਕੇ ਵਿਵਾਦਤ ਟਿੱਪਣੀਆਂ ਕਰਨ ਵਾਲੇ ਸਲਾਹਕਾਰਾਂ ਨੂੰ ਹਟਾਉਣ ਦੀ ਚੇਤਾਵਨੀ ਵੀ ਦਿੱਤੀ ਸੀ। ਰਾਵਤ ਨੇ ਕਿਹਾ ਸੀ ਕਿ ਸਿੱਧੂ ਨੇ ਖੁਦ ਉਹਨਾਂ ਨੂੰ ਨਾ ਹਟਾਇਆ, ਤਾਂ ਪਾਰਟੀ ਹਟਾਏਗੀ।
ਇਸਦੇ ਜ਼ਰੀਏ ਸਿੱਧੂ ਨੂੰ ਸਪੱਸ਼ਟ ਸੰਦੇਸ਼ ਦਿੱਤਾ ਗਿਆ ਸੀ ਕਿ ਉਹ ਪੰਜਾਬ ਵਿੱਚ ਮਨਮਾਨੀ ਨਾ ਕਰਨ। ਹੁਣ ਸਿੱਧੂ ਦੇ ਤਾਜਾ ਬਿਆਨ ਵਿੱਚ ਉਹਨਾਂ ਦੀ ਨਰਾਜ਼ਗੀ ਸਾਫ ਝਲਕ ਰਹੀ ਹੈ। ਸਵਾਲ ਹੈ..ਕੀ ਕੈਪਟਨ ਤੋਂ ਬਾਅਦ ਹੁਣ ਸਿੱਧੂ, ਹਾਈਕਮਾਂਡ ਨਾਲ ਵੀ ਟਕਰਾਉਣ ਦੀ ਤਿਆਰੀ ਵਿੱਚ ਹਨ।
