ਚੰਡੀਗੜ੍ਹ। ਪ੍ਰਧਾਨ ਮੰਤਰੀ ਨਰੇਂਦਰ ਮੋਦੀ ਨੇ ਐਤਵਾਰ ਨੂੰ ਦੇਸ਼ਵਾਸੀਆਂ ਨਾਲ ‘ਮਨ ਕੀ ਬਾਤ’ ਕੀਤੀ। ਇਸ ਦੌਰਾਨ ਟੋਕਿਓ ਓਲੰਪਿਕਸ ਦੇ ਨਾਲ-ਨਾਲ ਕੋਰੋਨਾ ਵੈਕਸੀਨੇਸ਼ਨ ਪ੍ਰਧਾਨ ਮੰਤਰੀ ਦੀ ਜ਼ੁਬਾਨ ‘ਤੇ ਰਿਹਾ। ਵੈਕਸੀਨੇਸ਼ਨ ਦੀ ਗੱਲ ਕਰਦੇ ਹੋਏ ਪੀਐੱਮ ਨੇ ਚੰਡੀਗੜ੍ਹ ਦੇ ਉਸ ਛੋਲੇ-ਭਟੂਰੇ ਵਾਲੇ ਦਾ ਜ਼ਿਕਰ ਵੀ ਕੀਤਾ, ਜੋ ਵੈਕਸੀਨੇਸ਼ਨ ਕਰਾਉਣ ਵਾਲਿਆਂ ਨੂੰ ਮੁਫਤ ‘ਚ ਛੋਲੇ-ਭਟੂਰੇ ਖੁਆ ਕੇ ਚਰਚਾ ‘ਚ ਰਿਹਾ ਸੀ।
ਆਪਣੇ ਸੰਬੋਧਨ ‘ਚ ਪੀਐੱਮ ਨੇ ਕਿਹਾ, “ਚੰਡੀਗੜ੍ਹ ਦੇ ਸੈਕਟਰ-29 ‘ਚ ਸੰਜੇ ਰਾਣਾ ਜੀ ਫੂਡ ਸਟਾਲ ਚਲਾਉਂਦੇ ਹਨ ਅਤੇ ਸਾਈਕਲ ‘ਤੇ ਛੋਲੇ-ਭਟੂਰੇ ਵੇਚਦੇ ਹਨ। ਇੱਕ ਦਿਨ ਉਹਨਾਂ ਦੀ ਬੇਟੀ ਰਿਧਿਮਾ ਅਤੇ ਭਤੀਜੀ ਰਿਆ ਇੱਕ ਆਈਡਿਆ ਨਾਲ ਉਹਨਾਂ ਕੋਲ ਆਈ। ਦੋਵਾਂ ਨੇ ਉਹਨਾਂ ਨੂੰ ਕੋਰੋਨਾ ਵੈਕਸੀਨ ਲਗਵਾਉਣ ਵਾਲਿਆਂ ਨੂੰ ਮੁਫਤ ‘ਚ ਛੋਲੇ-ਭਟੂਰੇ ਖਵਾਉਣ ਲਈ ਕਿਹਾ। ਉਹ ਇਸਦੇ ਲਈ ਖੁਸ਼ੀ-ਖੁਸ਼ੀ ਤਿਆਰ ਹੋ ਗਏ। ਉਹਨਾਂ ਨੇ ਤੁਰੰਤ ਇਹ ਚੰਗਾ ਯਤਨ ਸ਼ੁਰੂ ਵੀ ਕਰ ਦਿੱਤਾ।”
ਪ੍ਰਧਾਨ ਮੰਤਰੀ ਨੇ ਅੱਗੇ ਕਿਹਾ, “ਸੰਜੇ ਰਾਣਾ ਜੀ ਦੇ ਛੋਲੇ-ਭਟੂਰੇ ਮੁਫਤ ‘ਚ ਖਾਣ ਲਈ ਤੁਹਾਨੂੰ ਵਿਖਾਉਣਾ ਪਵੇਗਾ ਕਿ ਤੁਸੀਂ ਉਸੇ ਦਿਨ ਵੈਕਸੀਨ ਲਗਵਾਈ ਹੈ। ਵੈਕਸੀਨ ਦਾ ਮੈਸੇਜ ਵਿਖਾਉਦੇ ਹੀ ਉਹ ਤੁਹਾਨੂੰ ਟੇੇਸਟੀ ਛੋਲੇ-ਭਟੂਰੇ ਦੇ ਦੇਣਗੇ।” Hawker ਦੀ ਤਾਰੀਫ਼ ਕਰਦਿਆਂ ਪੀਐੱਮ ਨੇ ਕਿਹਾ, “ਸਮਾਜ ਦੀ ਭਲਾਈ ਦੇ ਕੰਮ ਲਈ ਪੈਸਿਆਂ ਤੋਂ ਵੱਧ ਸੇਵਾ-ਭਾਵ, ਕਰਤੱਵ ਭਾਵ ਦੀ ਵੱਧ ਜ਼ਰੂਰਤ ਹੁੰਦੀ ਹੈ। ਸਾਡੇ ਸੰਜੇ ਭਰਾ, ਇਸੇ ਨੂੰ ਸਹੀ ਸਾਬਿਤ ਕਰ ਰਹੇ ਹਨ ।
ਕਾਬਿਲੇਗੌਰ ਹੈ ਕਿ ਚੰਡੀਗੜ੍ਹ ਦੇ ਵੈਂਡਰ ਸੰਜੇ ਰਾਣਾ ਵੱਲੋਂ ਬਕਾਇਦਾ ਬੋਰਡ ਲਗਾ ਕੇ ਮੁਫਤ ਛੋਲੇ-ਭਟੂਰੇ ਦਾ ਜ਼ਿਕਰ ਕਰਦਿਆਂ ਲੋਕਾਂ ਨੂੰ ਵੈਕਸੀਨੇਸ਼ਨ ਲਈ ਪ੍ਰੇਰਿਤ ਕੀਤਾ ਗਿਆ ਸੀ। ਵੈਂਡਰ ਦੇ ਇਸ ਕਾਰੇ ਦੀ ਨਾ ਸਿਰਫ ਸਥਾਨਕ ਲੋਕਾਂ, ਬਲਕਿ ਪੰਜਾਬ ਦੇ ਰਾਜਪਾਲ ਵੀਪੀ ਸਿੰਘ ਬਦਨੌਰ ਨੇ ਵੀ ਤਾਰੀਫ਼ ਕੀਤੀ ਸੀ।
