ਬਿਓਰੋ। ਪੰਜਾਬ ਕਾਂਗਰਸ ਵਿੱਚ ਮਚੇ ਘਮਸਾਣ ਵਿਚਾਲੇ ਹੁਣ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਦੀ ਸਾਂਸਦ ਪਤਨੀ ਪਰਨੀਤ ਕੌਰ ਵੀ ਮੈਦਾਨ ਵਿੱਚ ਕੁੱਦ ਗਏ ਹਨ। ਪਰਨੀਤ ਕੌਰ ਨੇ ਇਸ ਬਗਾਵਤ ਲਈ ਸਿੱਧੇ ਨਵਜੋਤ ਸਿੰਘ ਸਿੱਧੂ ਨੂੰ ਜ਼ਿੰਮੇਵਾਰ ਠਹਿਰਾਇਆ ਅਤੇ ਕਿਹਾ ਕਿ ਜਦੋਂ ਤੋਂ ਸਿੱਧੂ ਆਏ ਹਨ, ਉਦੋਂ ਤੋਂ ਹੀ ਕਾਂਗਰਸ ਵਿੱਚ ਕਲੇਸ਼ ਹੋਇਆ ਹੈ। ਉਹਨਾਂ ਨੇ ਬਾਗੀ ਆਗੂਆਂ ਨੂੰ ਸਵਾਲ ਕੀਤਾ ਕਿ ਉਹ ਸਾਢੇ ਚਾਰ ਸਾਲ ਤੱਕ ਚੁੱਪ ਕਿਉਂ ਰਹੇ।
ਕਿਸੇ ਦੇ ਕਹਿਣ ਨਾਲ ਸੀਐੱਮ ਨਹੀਂ ਬਦਲਿਆ ਜਾਂਦਾ- ਪਰਨੀਤ
ਪਰਨੀਤ ਕੌਰ ਨੇ ਦੋ-ਟੁੱਕ ਕਿਹਾ ਕਿ ਕਿਸੇ ਦੇ ਕਹਿਣ ਨਾਲ ਪੰਜਾਬ ਵਿੱਚ ਮੁੱਖ ਮੰਤਰੀ ਨਹੀਂ ਬਦਲਿਆ ਜਾਵੇਗਾ। ਪਰਨੀਤ ਕੌਰ ਦੇ ਜ਼ਰੀਏ ਕੈਪਟਨ ਧੜੇ ਨੇ ਇਹ ਸਪੱਸ਼ਟ ਸੰਦੇਸ਼ ਦੇ ਦਿੱਤਾ ਹੈ ਕਿ ਵਿਵਾਦ ਵਧਿਆ ਤਾਂ ਉਹ ਵੀ ਚੁੱਪ ਨਹੀਂ ਰਹਿਣਗੇ। ਪਰਨੀਤ ਨੇ ਕਾਂਗਰਸ ਹਾਈਕਮਾਂਡ ਨੂੰ ਅਪੀਲ ਕੀਤੀ ਕਿ ਪੂਰੇ ਮਾਮਲੇ ਦਾ ਨੋਟਿਸ ਲਿਆ ਜਾਵੇ।
ਪਾਰਟੀ ਨੂੰ ਨੁਕਸਾਨ ਹੋ ਰਿਹਾ ਹੈ- ਪਰਨੀਤ
ਪਰਨੀਤ ਕੌਰ ਨੇ ਕਿਹਾ ਕਿ ਇਸ ਤਰ੍ਹਾਂ ਦੇ ਝਗੜਿਆਂ ਕਾਰਨ ਪੰਜਾਬ ਵਿੱਚ ਪਾਰਟੀ ਡੈਮੇਜ ਹੋ ਰਹੀ ਹੈ। ਜਲਦੀ ਚੋਣਾਂ ਆਉਣ ਵਾਲੀਆਂ ਹਨ। ਅਜਿਹੇ ਵਿੱਚ ਇਹਨਾਂ ਸਾਰੀਆਂ ਗੱਲਾਂ ਲਈ ਸਮਾਂ ਠੀਕ ਨਹੀਂ ਹੈ। ਸਾਰਿਆਂ ਨੂੰ ਸਕਾਰਾਤਮਕ ਰੋਲ ਅਦਾ ਕਰਨਾ ਚਾਹੀਦਾ ਹੈ ਅਤੇ ਪਾਰਟੀ ਦੇ ਨਾਲ ਇਕਜੁੱਟ ਹੋ ਕੇ ਚੋਣ ਲੜਨੀ ਚਾਹੀਦੀ ਹੈ। ਉਨ੍ਹਾਂ ਇਹ ਵੀ ਕਿਹਾ ਕਿ ਸੀਐੱਮ ਨੇ ਵੱਡਾ ਦਿਲ ਅਤੇ ਮੈਚਿਓਰਿਟੀ ਵਿਖਾਈ ਹੈ, ਤਾਂ ਬਾਕੀ ਆਗੂਆਂ ਨੂੰ ਵੀ ਇਸ ਨੂੰ ਸਮਝਣਾ ਚਾਹੀਦਾ ਹੈ।
ਸਿੱਧੂ ਦੇ ਸਲਾਹਕਾਰਾਂ ‘ਤੇ ਵੀ ਵਿਖਾਇਆ ਸਖਤ ਰੁਖ
ਨਵਜੋਤ ਸਿੱਧੂ ਦੇ ਸਲਾਹਕਾਰ ਮਾਲਵਿੰਦਰ ਮਾਲੀ ਅਤੇ ਪਿਆਰੇ ਲਾਲ ਗਰਗ ਦੀ ਬਿਆਨਬਾਜ਼ੀ ‘ਤੇ ਵੀ ਪਰਨੀਤ ਕੌਰ ਨੇ ਸਖਤ ਰੁਖ ਵਿਖਾਇਆ। ਉਨ੍ਹਾਂ ਕਿਹਾ ਕਿ ਸਿੱਧੂ ਨੇ ਅਜਿਹੇ ਸਲਾਹਕਾਰ ਕਿਉਂ ਰੱਖੇ, ਜਿਸ ਨੂੰ ਕਾਂਗਰਸ ਪਾਰਟੀ ਦੇ ਬਾਰੇ ਪਤਾ ਹੀ ਨਹੀਂ। ਉਹਨਾਂ ਕਿਹਾ ਕਿ ਸਿੱਧੂ ਨੂੰ ਕਾਂਗਰਸ ਦੇ ਅੰਦਰੋਂ ਹੀ ਸਲਾਹਕਾਰ ਰੱਖਣੇ ਚਾਹੀਦੇ ਸਨ, ਜਿਨ੍ਹਾਂ ਨੂੰ ਪਾਰਟੀ ਦੀਆਂ ਨੀਤੀਆਂ ਬਾਰੇ ਪਤਾ ਹੋਵੇ।
