ਬਿਓਰੋ। ਸੀਐੱਮ ਕੈਪਟਨ ਅਮਰਿੰਦਰ ਸਿੰਘ ਦੇ ਖਿਲਾਫ ਬਗਾਵਤ ਦਾ ਬਿਗਲ ਵਜਾਉਣ ਵਾਲੇ ਸਿੱਧੂ ਧੜੇ ਨੂੰ ਇੱਕ ਤੋਂ ਬਾਅਦ ਇੱਕ ਝਟਕੇ ਲੱਗ ਰਹੇ ਹਨ। ਹੁਣ ਤੱਕ ਕਰੀਬ 8 ਵਿਧਾਇਕ ਖੁਦ ਨੂੰ ਇਸ ਬਗ਼ਾਵਤ ਤੋਂ ਵੱਖ ਕਰ ਚੁੱਕੇ ਹਨ। ਦਰਅਸਲ, ਮੰਗਲਵਾਰ ਨੂੰ ਸਿੱਧੂ ਧੜੇ ਨਾਲ ਜੁੜੇ ਚਾਰ ਮੰਤਰੀਆਂ ਨੇ ਕੈਪਟਨ ਅਮਰਿੰਦਰ ਸਿੰਘ ‘ਤੇ ਭਰੋਸਾ ਨਾ ਹੋਣ ਦੀ ਗੱਲ ਕਰਦੇ ਹੋਏ ਉਨ੍ਹਾਂ ਨੂੰ ਅਹੁਦੇ ਤੋਂ ਹਟਾਉਣ ਦੀ ਮੰਗ ਕੀਤੀ ਸੀ। ਦਾਅਵਾ ਇਹ ਵੀ ਕੀਤਾ ਗਿਆ ਸੀ ਕਿ ਕਰੀਬ 30 ਤੋਂ ਵੱਧ ਵਿਧਾਇਕ ਇਸੇ ਹੱਕ ਵਿੱਚ ਹਨ, ਪਰ ਸ਼ਾਮ ਹੁੰਦੇ ਹੀ ਤਸਵੀਰ ਬਦਲਣ ਲੱਗੀ।
6 ਵਿਧਾਇਕਾਂ ਨੇ ਬਗਾਵਤ ਨੂੰ ਸਾਜ਼ਿਸ਼ ਦੱਸਿਆ
ਕਾਂਗਰਸ ਦੇ 6 ਵਿਧਾਇਕਾਂ ਨੇ ਇਕ ਲਿਖਤੀ ਬਿਆਨ ਜਾਰੀ ਕਰਕੇ ਇਸ ਬਗ਼ਾਵਤ ਤੋਂ ਖੁਦ ਨੂੰ ਵੱਖ ਕਰ ਲਿਆ ਅਤੇ ਇਸ ਪੂਰੀ ਕਾਰਵਾਈ ਨੂੰ ਪਾਰਟੀ ਦੇ ਖਿਲਾਫ ਸਾਜ਼ਿਸ਼ ਕਰਾਰ ਦਿੱਤਾ। ਬਿਆਨ ਜਾਰੀ ਕਰਨ ਵਾਲਿਆਂ ਵਿੱਚ ਅਮਰਿੰਦਰ ਸਿੰਘ ਰਾਜਾ ਵੜਿੰਗ, ਕੁਲਦੀਪ ਵੈਦ, ਗੁਰਕੀਰਤ ਕੋਟਲੀ, ਸੰਤੋਖ ਸਿੰਘ ਭਲਾਈਪੁੁਰ, ਦਲਬੀਰ ਸਿੰਘ ਗੋਲਡੀ ਅਤੇ ਅੰਗਦ ਸਿੰਘ ਸ਼ਾਮਲ ਹਨ। ਇਨ੍ਹਾਂ ਵਿਧਾਇਕਾਂ ਵੱਲੋਂ ਕਿਹਾ ਗਿਆ ਕਿ ਉਨ੍ਹਾਂ ਨੂੰ ਸੀਐੱਮ ਦੀ ਲੀਡਰਸ਼ਿਪ ‘ਤੇ ਪੂਰਾ ਭਰੋਸਾ ਹੈ ਅਤੇ ਕੈਪਟਨ ਨੂੰ ਹਟਾਉਣ ਦੀ ਮੰਗ ਕਰਨ ਦਾ ਸਵਾਲ ਹੀ ਨਹੀਂ ਉਠਦਾ।
2 ਹੋਰ ਵਿਧਾਇਕ ਸਮਰਥਨ ‘ਚ ਉਤਰੇ
ਓਧਰ ਵਿਧਾਇਕ ਕਾਕਾ ਲੋਹਗੜ੍ਹ ਅਤੇ ਸਤਿਕਾਰ ਕੌਰ ਨੇ ਵੀ ਸੀਐੱਮ ਦੇ ਖਿਲਾਫ ਬਾਗੀ ਧੜੇ ਵਿੱਚ ਸ਼ਾਮਲ ਹੋਣ ਤੋਂ ਇਨਕਾਰ ਕੀਤਾ ਹੈ ਅਤੇ ਕੈਪਟਨ ਨੂੰ ਪਾਰਟੀ ਦਾ ਸਭ ਤੋਂ ਵੱਡਾ ਆਗੂ ਦੱਸਦੇ ਹੋਏ ਉਨ੍ਹਾਂ ਦੀ ਅਗਵਾਈ ‘ਤੇ ਭਰੋਸਾ ਜਤਾਇਆ ਹੈ। ਇਨ੍ਹਾਂ ਦਾ ਕਹਿਣਾ ਹੈ ਕਿ ਕੈਪਟਨ ਨੇ ਪੰਜਾਬ ਦੇ ਮਸਲੇ ਹੱਲ ਕਰ ਸਕਦੇ ਹਨ।
ਬਾਗੀ ਮੰਤਰੀਆਂ ਦੇ ਤੇਵਰ ਬਰਕਰਾਰ
ਹਾਲਾਂਕਿ ਇਸ ਸਭ ਦੇ ਵਿਚਾਲੇ ਬਾਗੀ ਮੰਤਰੀਆਂ ਦੇ ਤੇਵਰ ਬਰਕਰਾਰ ਹਨ ਅਤੇ ਉਹ ਸੀਐੱਮ ਨੂੰ ਹਟਾਉਣ ਲਈ ਸੋਨੀਆ ਗਾਂਧੀ ਨਾਲ ਮੁਲਾਕਾਤ ਦੀ ਤਿਆਰੀ ਵਿੱਚ ਹਨ। ਕੈਪਟਨ ਦੇ ਖਿਲਾਫ ਬਾਗੀ ਧੜੇ ਦੀ ਅਗਵਾਈ ਕਰ ਰਹੇ ਤ੍ਰਿਪਤ ਰਜਿੰਦਰ ਸਿੰਘ ਬਾਜਵਾ, ਸੁਖਜਿੰਦਰ ਸਿੰਘ ਰੰਧਾਵਾ ਅਤੇ ਚਰਨਜੀਤ ਸਿੰਘ ਚੰਨੀ ਦਾ ਸਾਫ ਕਹਿਣਾ ਹੈ ਕਿ ਕੈਪਟਨ ਅਮਰਿੰਦਰ ਸਿੰਘ ਪੰਜਾਬ ਦੇ ਮਸਲੇ ਹੱਲ ਕਰਨ ਵਿੱਚ ਨਾਕਾਮ ਹਨ।
ਬਾਗੀ ਮੰਤਰੀਆਂ ਦਾ ਕਹਿਣਾ ਹੈ ਕਿ ਅਗਾਮੀ ਚੋਣਾਂ ਜਿੱਤਣ ਲਈ ਹਾਈਕਮਾਂਡ ਨੂੰ ਸੀਐੱਮ ਫੇਸ ਬਦਲਣਾ ਹੀ ਪਵੇਗਾ। ਕਦੇ ਸੀਐੱਮ ਦੇ ਕਰੀਬੀਆਂ ਵਿੱਚ ਸ਼ੁਮਾਰ ਰਹੇ ਤ੍ਰਿਪਤ ਬਾਜਵਾ ਤਾਂ ਕੈਪਟਨ ‘ਤੇ ਅਕਾਲੀਆਂ ਨਾਲ ਮਿਲੀਭੁਗਤ ਤੱਕ ਦਾ ਇਲਜ਼ਾਮ ਲਗਾ ਰਹੇ ਹਨ। ਅਜਿਹੇ ਵਿੱਚ ਕਾਂਗਰਸ ‘ਚ ਉਠਿਆ ਤੂਫ਼ਾਨ ਕਿੱਥੇ ਜਾ ਕੇ ਥੰਮਾਂ, ਕੁਝ ਕਿਹਾ ਨਹੀਂ ਜਾ ਸਕਦਾ।
