ਚੰਡੀਗੜ੍ਹ। ਪੰਜਾਬ ‘ਚ ਕੋਰੋਨਾ ਵੈਕਸੀਨੇਸ਼ਨ ‘ਚ ਤੇਜ਼ੀ ਲਿਆਉਣ ਲਈ ਸਰਕਾਰ ਨੇ ਪੰਜਾਬ ਦੇ ਪੁੱਤਰ ਅਤੇ ਅਦਾਕਾਰ ਸੋਨੂੰ ਸੂਦ ਨੂੰ ਬ੍ਰਾਂਡ ਅੰਬੈਸਡਰ ਬਣਾਇਆ ਹੈ। ਸੋਨੂੰ ਸੂਦ ਨਾਲ ਮੁਲਾਕਾਤ ਤੋਂ ਇੱਕ ਦਿਨ ਬਾਅਦ ਸੀਐੱਮ ਕੈਪਟਨ ਨੇ ਇਸਦਾ ਐਲਾਨ ਕੀਤਾ। ਸੋਨੂੰ ਨੇ ਸ਼ਨੀਵਾਰ ਨੂੰ ਚੰਡੀਗੜ੍ਹ ‘ਚ ਸੀਐੱਮ ਦੀ ਰਿਹਾਇਸ਼ ‘ਤੇ ਪਹੁੰਚ ਕੇ ਉਹਨਾਂ ਨਾਲ ਮੁਲਾਕਾਤ ਕੀਤੀ ਸੀ। ਇਸ ਦੌਰਾਨ ਸੋਨੂੰ ਨੇ ਸੀਐੱਮ ਨੂੰ ਆਪਣੀ ਕਿਤਾਬ ‘ਮੈਂ ਕੋਈ ਮਸੀਹਾ ਨਹੀਂ ਹਾਂ’ ਵੀ ਭੇਂਟ ਕੀਤੀ, ਜਿਸ ‘ਚ ਉਹਨਾਂ ਦੇ ਮੋਗਾ ਤੋਂ ਮੁੰਬਈ ਤੱਕ ਦੇ ਸਫ਼ਰ ਦਾ ਜ਼ਿਕਰ ਹੈ।
ਸੋਨੂੰ ‘ਤੇ ਲੋਕਾਂ ਨੂੰ ਵਿਸ਼ਵਾਸ- ਕੈਪਟਨ
ਸੀਐੱਮ ਨੇ ਕਿਹਾ ਕਿ ਪੰਜਾਬ ‘ਚ ਵੈਕਸੀਨ ਪ੍ਰਤੀ ਲੋਕਾਂ ਨੂੰ ਬੇਹੱਦ ਡਰ ਹੈ। ਅਜਿਹੇ ‘ਚ ਜੇਕਰ ਲੋਕ ਪੰਜਾਬ ਦੇ ਪੁੱਤਰ ਤੋਂ ਟੀਕੇ ਬਾਰੇ ਸੁਣਨਗੇ ਕਿ ਟੀਕਾ ਕਿੰਨਾ ਸੁਰੱਖਿਅਤ ਅਤੇ ਜ਼ਰੂਰੀ ਹੈ, ਤਾਂ ਲੋਕ ਉਸ ‘ਤੇ ਵਿਸ਼ਵਾਸ ਜ਼ਰੂਰ ਕਰਨਗੇ। ਪਿਛਲੇ ਸਾਲ ਲਾਕਡਾਊਨ ਦੌਰਾਨ ਪ੍ਰਵਾਸੀ ਮਜ਼ਦੂਰਾਂ ਨੂੰ ਘਰ ਪਹੁੰਚਾਉਣ ‘ਚ ਸੋਨੂੰ ਨੇ ਜਿਸ ਤਰ੍ਹਾਂ ਸ਼ਾਨਦਾਰ ਭੂਮਿਕਾ ਨਿਭਾਈ, ਉਹ ਵੀ ਇਸ ਮਿਸ਼ਨ ‘ਚ ਮਦਦਗਾਰ ਸਾਬਿਤ ਹੋਵੇਗੀ।
ਪੰਜਾਬ ਲਈ ਕੰਮ ਕਰਨਾ ਮੇਰੀ ਖੁਸ਼ਕਿਸਮਤੀ- ਸੋਨੂੰ
ਸੋਨੂੰ ਨੇ ਕਿਹਾ ਕਿ ਉਹ ਇਸ ਕੋਰੋਨਾ ਵੈਕਸੀਨ ਲਈ ਬ੍ਰਾਂਡ ਅੰਬੈਸਡਰ ਬਣਾਏ ਜਾਣ ਤੋਂ ਬੇਹੱਦ ਖੁਸ਼ ਅਤੇ ਸਨਮਾਨਿਤ ਮਹਿਸੂਸ ਕਰ ਰਹੇ ਹਨ। ਸੋਨੂੰ ਨੇ ਕਿਹਾ ਕਿ ਉਹਨਾਂ ਦੇ ਸੂਬੇ ਦੇ ਲੋਕਾਂ ਦੇ ਜੀਵਨ ਦੀ ਰੱਖਿਆ ਲਈ ਪੰਜਾਬ ਸਰਕਾਰ ਦੀ ਇਸ ਵੱਡੀ ਮੁਹਿੰਮ ‘ਚ ਜੋ ਵੀ ਭੂਮਿਕਾ ਨਿਭਾ ਸਕਾਂਗਾ, ਇਹ ਮੇਰੀ ਲਈ ਕਿਸੇ ਖੁਸ਼ਕਿਸਮਤੀ ਤੋਂ ਘੱਟ ਨਹੀਂ।
Vaccination against #Covid19 will provide all with required immunity to fight pandemic. We need to ensure that all eligible persons are vaccinated at earliest & that we continue to follow safety protocols. Urge my fellow Punjabis to ensure we triumph against #Covid19. @SonuSood pic.twitter.com/D6I07EHRXJ
— Capt.Amarinder Singh (@capt_amarinder) April 11, 2021
ਜਦੋਂ ਮਜ਼ਦੂਰਾਂ ਦੇ ਮਸੀਹਾ ਬਣੇ ਸੋਨੂੰ ਸੂਦ
ਪਿਛਲੇ ਸਾਲ ਲਾਕਡਾਊਨ ਦੌਰਾਨ ਜਦੋਂ ਪ੍ਰਵਾਸੀ ਮਜ਼ਦੂਰ ਆਪਣੇ ਘਰਾਂ ਨੂੰ ਪਰਤਣ ਲੱਗੇ, ਤਾਂ ਸੋਨੂੰ ਸੈਂਕੜੇ ਮਜ਼ਦੂਰਾਂ ਲਈ ਮਸੀਹਾ ਬਣੇ। ਉਹਨਾਂ ਨੇ ਸੈਂਕੜੇ ਮਜ਼ਦੂਰਾਂ ਦੀ ਆਰਥਿਕ ਮਦਦ ਕੀਤੀ, ਜਿਸ ਨਾਲ ਉਹ ਆਪਣੀ ਮੰਜ਼ਿਲ ਤੱਕ ਪਹੁੰਚ ਸਕੇ। ਸੋਨੂੰ ਦੇ ਇਸ ਮਿਸ਼ਨ ਨਾਲ ਦੇਸ਼ ਭਰ ‘ਚ ਉਹਨਾਂ ਨੂੰ ਇੱਕ ਵੱਖਰੀ ਪਛਾਣ ਮਿਲੀ।
ਮੋਗਾ ਨਾਲ ਖਾਸ ਰਿਸ਼ਤਾ
ਸੋਨੂੰ ਸੂਦ ਮੂਲ ਰੂਪ ਨਾਲ ਪੰਜਾਬ ਦੇ ਮੋਗਾ ਜ਼ਿਲ੍ਹੇ ਦੇ ਵਸਨੀਕ ਹਨ। ਬਾਲੀਵੁੱਡ ਦੀ ਦੁਨੀਆ ‘ਚ ਸ਼ੋਹਰਤ ਕਮਾਉਣ ਦੇ ਬਾਵਜੂਦ ਉਹ ਮੋਗਾ ਨੂੰ ਨਹੀਂ ਭੁੱਲੇ ਹਨ। ਉਹਨਾਂ ਨੂੰ ਜਦੋਂ ਵੀ ਮੌਕਾ ਮਿਲਦਾ ਹੈ, ਤਾਂ ਉਹ ਮੋਗਾ ਜ਼ਰੂਰ ਆਉਂਦੇ ਹਨ। ਸੋਨੂੰ ਦੀ ਭੈਣ ਅੱਜ ਵੀ ਮੋਗਾ ‘ਚ ਹੀ ਰਹਿੰਦੀ ਹੈ।
