December 16, 2022
(Chandigarh)
ਤਰਨਤਾਰਨ ਦੇ ਸਰਹਾਲੀ ਥਾਣੇ ਵਿੱਚ ਹੋਏ RPG ਅਟੈਕ ਦੇ ਮਾਮਲੇ ਨੂੰ ਪੰਜਾਬ ਪੁਲਿਸ ਨੇ ਸੁਲਝਾ ਲਿਆ ਹੈ। DGP ਪੰਜਾਬ ਗੌਰਵ ਯਾਦਵ ਨੇ ਪ੍ਰੈੱਸ ਕਾਨਫ਼ਰੰਸ ਕਰਕੇ ਖੁਲਾਸਾ ਕੀਤਾ ਕਿ ਕੈਨੇਡਾ ‘ਚ ਬੈਠਿਆ ਗੈਂਗਸਟਰ ਲਖਬੀਰ ਸਿੰਘ ਲੰਡਾ ਉਰਫ ਲੰਡਾ ਹਰੀਕੇ ਇਸ ਹਮਲੇ ਦਾ ਮਾਸਟਰਮਾਈਂਡ ਹੈ। ਉਹਨਾਂ ਕਿਹਾ ਕਿ ਪਾਕਿਸਤਾਨ ਦੀ ਖੂਫੀਆ ਏਜੰਸੀ ISI ਦੇ ਇਸ਼ਾਰੇ ‘ਤੇ ਲੰਡਾ ਨੇ ਆਪਣੇ ਗੁਰਗਿਆਂ ਤੋਂ ਇਹ ਹਮਲਾ ਕਰਵਾਇਆ।
DGP ਨੇ ਦੱਸਿਆ ਕਿ ਇਸ ਮਾਮਲੇ ਵਿੱਚ 6 ਮੁਲਜ਼ਮਾਂ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਹੈ, ਜਦਕਿ 1 ਨੂੰ ਪ੍ਰੋ਼ਡਕਸ਼ਨ ਵਾਰੰਟ ‘ਤੇ ਲਿਆਂਦਾ ਗਿਆ ਹੈ। ਉਹਨਾਂ ਕਿਹਾ ਕਿ ਬੇਸ਼ੱਕ ਲਖਬੀਰ ਲੰਡਾ ਇਸ ਹਮਲੇ ਦਾ ਮਾਸਟਰਮਾਈਂਡ ਹੈ, ਪਰ ਇਸ ਨੂੰ ਅੰਜਾਮ ਤੱਕ ਪਹੁੰਚਾਉਣ ਵਿੱਚ ਅਹਿਮ ਭੂਮਿਕਾ ਉਸਦੇ ਯੂਰਪ ‘ਚ ਬੈਠੇ ਹੈਂਡਲਰ ਸਤਵੀਰ ਸੱਤਾ ਅਤੇ ਗੁਰਦੇਵ ਸਿੰਘ ਜੱਸਲ ਦੀ ਹੈ। ਇਸ ਤੋਂ ਇਲਾਵਾ ਗੋਇੰਦਵਾਲ ਸਾਹਿਬ ਦੀ ਜੇਲ੍ਹ ‘ਚ ਬੈਠੇ ਉਹਨਾਂ ਦੇ ਸਾਥੀ ਅਜਮੀਤ ਸਿੰਘ ਨਾਲ ਵੀ ਲਗਾਤਾਰ ਫੋਨ ਦੇ ਜ਼ਰੀਏ ਸੰਪਰਕ ਕੀਤਾ ਜਾ ਰਿਹਾ ਸੀ।
2 ਨਬਾਲਗ ਮੁਲਜ਼ਮਾਂ ਨੇ ਦਾਗਿਆ RPG
ਪੁਲਿਸ ਮੁਤਾਬਕ, RPG ਅਟੈਕ ਮਾਮਲੇ ਵਿੱਚ ਸ਼ਾਮਲ ਮੁਲਜ਼ਮਾਂ ਵਿਚੋਂ 2 ਨਬਾਲਗ ਹਨ। DGP ਨੇ ਦੱਸਿਆ ਕਿ ਇਹਨਾਂ ਨਬਾਲਗ ਮੁਲਜ਼ਮਾਂ ਨੇ ਹੀ ਥਾਣੇ ਵਿੱਚ RPG ਦਾਗਿਆ ਸੀ। ਉਹਨਾਂ ਇਹ ਵੀ ਦੱਸਿਆ ਕਿ ਦੋਵੇਂ ਨਬਾਲਗਾਂ ਨੇ ਇਸ ਅਟੈਕ ਲਈ 8.5 ਲੱਖ ਰੁਪਏ ਦੀ ਰਕਮ ਲਈ ਸੀ। ਇਸ ਤੋਂ ਇਲਾਵਾ ਚੋਹਲਾ ਸਾਹਿਬ ਦੇ ਰਹਿਣ ਵਾਲੇ 2 ਮੁਲਜ਼ਮ ਫਿਲਹਾਲ ਫ਼ਰਾਰ ਹਨ, ਜਿਹਨਾਂ ਦੀ ਭਾਲ ਕੀਤੀ ਜਾ ਰਹੀ ਹੈ।
1 ਦਸੰਬਰ ਨੂੰ ਪੰਜਾਬ ਆਇਆ ਸੀ RPG
DGP ਨੇ ਦੱਸਿਆ ਕਿ 1 ਦਸੰਬਰ ਨੂੰ ਤਰਨਤਾਰਨ ਦੇ ਪਿੰਡ ਬਰਹਾਲਾ ਵਿੱਚ RPG ਦੀ ਸਪਲਾਈ ਹੋਈ ਸੀ। ਜਿਹਨਾਂ ਮੁਲਜ਼ਮਾਂ ਨੇ ਇਸ RPG ਦੀ ਸਪਲਾਈ ਲਈ, ਉਹਨਾਂ ਨੇ ਕਰੀਬ 8 ਮਹੀਨਿਆਂ ਤੱਕ ਇਸ RPG ਨੂੰ ਆਪਣੇ ਕੋਲ ਰੱਖਿਆ। ਉਹਨਾਂ ਦੱਸਿਆ ਕਿ RPG 70 MM ਕੈਲੀਬਰ RPG 26 ਨਾਲ ਇਸ ਹਮਲੇ ਨੂੰ ਅੰਜਾਮ ਦਿੱਤਾ ਗਿਆ।
Dead letter box technique ਦਾ ਲਿਆ ਸਹਾਰਾ
DGP ਨੇ ਦੱਸਿਆ ਕਿ ਇਸ ਪੂਰੇ ਹਮਲੇ ਨੂੰ ਅੰਜਾਮ ਦੇਣ ਲਈ Dead letter box technique ਦਾ ਇਸਤੇਮਾਲ ਕੀਤਾ ਗਿਆ। ਇਸਦਾ ਮਤਲਬ ਹੁੰਦਾ ਹੈ ਕਿ ਕਿਸੇ ਨੂੰ ਕੰਮ ਦਿੱਤਾ ਜਾਂਦਾ ਹੈ ਕਿ ਤੁਸੀਂ ਸਾਮਾਨ ਇੱਕ ਥਾਂ ਤੋਂ ਦੂਜੀ ਥਾਂ ਲੈ ਕੇ ਜਾਣਾ ਹੈ, ਉਸ ਤੋਂ ਬਾਅਦ ਉਸਦਾ ਕੰਮ ਖਤਮ ਹੋ ਜਾਂਦਾ ਹੈ। ਇਸ ਤੋਂ ਬਾਅਦ ਦੂਜੇ ਲੋਕਾਂ ਨੂੰ ਅੱਗੇ ਦਾ ਕੰਮ ਦਿੱਤਾ ਜਾਂਦਾ ਹੈ। ਕਰਾਈਮ ਦੀ ਦੁਨੀਆ ਵਿੱਚ ਇਸਦਾ ਫਾਇਦਾ ਇਹ ਮੰਨਿਆ ਜਾਂਦਾ ਹੈ ਕਿ ਪਹਿਲਾਂ ਵਾਲੇ ਮੁਲਜ਼ਮ ਬਾਅਦ ਵਾਲੇ ਮੁਲਜ਼ਮ ਨੂੰ ਜਾਣਦੇ ਨਹੀਂ ਹੁੰਦੇ ਅਤੇ ਨਾ ਹੀ ਉਹਨਾਂ ਨੂੰ ਅਗਲੀ ਪਲਾਨਿੰਗ ਬਾਰੇ ਕੋਈ ਜਾਣਕਾਰੀ ਹੁੰਦੀ ਹੈ। ਲਿਹਾਜ਼ਾ ਪੁਲਿਸ ਨੂੰ ਮਾਮਲੇ ਦੀ ਤਹਿ ਤੱਕ ਪਹੁੰਚਣ ਵਿੱਚ ਮੁਸ਼ਕਿਲ ਆਉਂਦੀ ਹੈ। DGP ਨੇ ਕਿਹਾ ਕਿ ਅਜਿਹੀ ਸ਼ਾਤਰ ਪਲਾਨਿੰਗ ਦੇ ਬਾਵਜੂਦ ਉਹਨਾਂ ਦੀ ਟੀਮ ਨੇ ਬੇਹੱਦ ਘੱਟ ਸਮੇਂ ਦੇ ਅੰਦਰ ਇਸ ਮਾਮਲੇ ਨੂੰ ਸੁਲਝਾਉਣ ਵਿੱਚ ਕਾਮਯਾਬੀ ਹਾਸਲ ਕੀਤੀ ਹੈ।
